MATHIU 15
15
Pu le Pangai Man chu
(Mrk. 7:1-13)
1Hava pha han Jerusalem ma pharisingai le danthei ojangain, Jisu jiang an honga anti. 2“Iruia mo na thiamruoingain ulianngai lui che na nun chan ha an jui lui? Ajarko anmanin an chak an nek tiang an kut rasuk ma u.”
3Tak-ha a man a shanga anmani jiang a ti, “Iruia mo nang ni om nan che na nun chan jarra Pathian chong pek ha nan jui lui? 4Ajarko Pathian chong pek in a ti nan pa le nan nu ha chitlejak neiru, hale a pa, a nu kho khong mi ha thi nati. 5Tak-ha nang nin nanti nemnakhat nan nei karra tu aninom a pa animakle a nu jiang, hivahi ko Pathian ta ke a ti aninko, 6an mani ning an pa an nu ha chitlejak nei lai noning, hava han nang nin lui che na nun chan jarra nang nin Pathian chong pek ha i om mannimacheu. 7A sat kan rol ngai, Isaia ning nang ni ruia asat alui ri a a ti. 8Mingai ning an bai sua jak kei an nahongdep hale an mur jak a chitlejak an na nei. Tak-ha anmani an lung ko kei jiang tenna a lak an om. 9Hale anmanin mingai chong pek ha ngir na chong ke tia an man chu a kei hi nem na buia chubei an na buk.”
Phur ha ning Mi ha A manchok
(Mrk. 7:14-23)
10Hava suale mitamngai ha a man akuia a ti, “Ngairu hale jetru.” 11Bai sunga a lut ha ning mi ha manmangmak, tak-ha bai tenna i hong suak ha ning mi ha a manmang.
12Hava suale a thiamruoingain ama jiang an honga anti, “Chong ha an jet pharisingai huipelaima tihi nang in na jet mo?”
13Tak-ha a man a hong shanga a ti, “Vanram ma ka Pan a luiling thing kung rakipngai ha kel nati. 14Anmani om rase u, anmani mitdelngai lamkei ke anni; hale a mitdel in mitdel ha an kan keiruoi inko, an ninia khurra an chul rang ke.”
15Hava suale Pitar ning ama jiang a hong shanga a ti, “Hiva tetan na din hi a thianga keini jiang na ri pero.”
16Han Jisun a ti, “Nang ni om a tun tenhin nan la jet lui mo? 17Bai a an thun rakip hi phunga a lut a manmang tihi nan jet lui mo? 18Tak-ha bai tenna a hong suak rakip ha lung sung tenna a hong ani hale anmanin mi ha an manmang. 19Ajarko lung sung tenna a hong suak ha, a satlui lungdo, mi that, milomnu jong, mui ruoi mak ma luiomchun, a ruk, adik lui shakhi pek, esella nuisongai ha ani. 20Mi ha a manmang ko hiva rakipngai hi ani, tak-ha kut rasuk lui a an chak an nek ha ning mi ha manmangma.”
Numei Khat Takngai
(Mrk. 7:24-30)
21Hava suale Jisun hava muntena a suak Tair le Sidon ram tiang a che jui. 22Hale enru hava ram ma Kanan nu pui an khat in ama jiang a hong khek a ti, “Lungsiat na muro, o Puma. David a pasalnai, ka numeinai ha seitan in khodeng a mantheijui.”
23Tak-ha a man chong khat om lui shangma, hale a thiamruoingain ama jiang an honga an lui ti, numeinu hi man che taro, ajarko a man kan nuk tiang a khek.
24Tak-ha a man a hong shanga a ti, “Israelngai inn sunga a mangsha belramngai rang ni lui a; kei hi na hong tir ma u.”
25Hava suale a man a honga ama ha chubei a buk a ti, “Puma na shanro.”
26Tak-ha a man a hong shanga a ti, naipangai tal ha luibak uitengai jiang deng juan pe hi sat mak.
27Hale a man a ti, “Adik, puma; aninom uitengain om an neipungai mai cham thuoia a hong chul a her ahak ha an chak.”
28Hava han Jisun ama jiang a hong shanga a ti, “Numei, na takngai na hi alianne; nang in na deina nuk jui han nang jiang hong ni rase, hale a numeinai ha hava phatak han a dam jui.”
Mitam Jisun A mandam
29Hale Jisun hava mun ha a mak, Galili tuionglian sirra a honga; hale tangbung han a chea hava mun han a hong ong. 30Hava suale mitamin ama jiang an honga, anmani le kan ruaia ke kiak, mitdel, chongsuaklui, kut kiak, hale a dang a tam tak Jisu ke kung a an hong choi, hale a man anmani ha a man dam jui. 31Chongsuakluingai chong an ri jui, a kut kiak ngain an dam a ke kiak ngain an lon jui, hale a mitdelngain an mu jui, hiva mitamngain an mu han an lui ngakchianna, hale Israel Pathian ha an lui manpak jui.
Pasal Lishing Manli Jisun A vai
(Mrk. 8:1-10)
32Hava suale Jisun a thiamruoingai a kol la akuia a ti, “Mitamngai hi kein lungsiat ka mu jui; ajarko anmanin kei le ni thum an hong om jui, hale chak rang nei lai ma u; hale anmani ha lamlaia anvantha rang mo tia, kein anmani hi von cham chunga masuojot making.”
33Hava han a thiamruoingain ama jiang anti, “Mitam hiva jet hi hunna rang tal hi ramtonglian hin hon mo kein in kan mu rang?”
34Jisun anmani jiang a ti, “Nang nin tal ijatmo nan la nei?” Hale anmanin anti, “Tallom sari le nga manli.”
35Hale a man mitam ha, simlei jolla ong na ranga chong alui pek. 36Hale a man tallom sari le nga a luia hale manpak na anei a, a ek khuia a thiamruoingai jiang alui pek; hale a thiamruoingain mitam jiang an pe jui. 37Hava han anmanin an chak, an khopjui; hale anmanin a liam a her ahak ha an man chun na luk sari aluisip, 38hava han a chak a nek mingai ha numei le nai pang teldeluia, pasal lishing manli alui ni.
39Hale a man mitamngai ha amanche suale, rokuang sunga a lut; hale Magdala ramtiang a che jui.
Currently Selected:
MATHIU 15: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
