ZAKARIA 11
11
Mi nunsiahei rimang rang thu
1O Lebanon, ni kotpuihei iong roh,
Ni sidar thinghei khah meiin ai kâng rimang rang a nit.
2O, nangmah fâr thingilian, ṭap inla, irung vong vong roh,
Sidar thinghei khah â lîr tâk a;
Thing ilianpa pahei khom an ilîr zoi tâk.
Basan sasothinghei o, ṭap unla, irung vong vong rei,
Rampuihei khah ai ṭiam zoi tâk a nit.
3Berapuhei chu ngaisiatin an irung e;
An roinpuinahei a siat zoi tâka na!
Sakeibaknei irung rihu ringai ta u;
An omna ngai Jordan rampui khom inram chit a nit tâk na!
Berapu inikah
4 Pumapa ki Pathian khan hingka hin a ti, “Bera lôm ithat ranga an ivâihei enkoltu ni roh. 5Â neituhei khan anni chu an that a, thiamno riti ual mak. A sahei khah an zuar a, ‘Pumapa chu inpâkin om riseh; ei hong richong tâk,’ an ti a. Enkoltuhei lak khomin anni khah lunginkham ngai mak a,” a ti a.
6 Pumapa khan, “Hi ram iluatuhei tute lunginkham khâi no ning e. Mi tinrêng an chunga rênghei kutah pêng ki ta, anni khan ram khah phûlpônin siam an ta, an kuta rithokah khan anni chu sanisua no ning e,” a ti a.
7Bera zuartuhei khan an ne mang a, khanchu, Bera lôm ithat ranga an ivâihei enkoltu ki hong nit tâk a. Khante, irol inikah ki lâk a, khatkah kha, “Ditsakna” ki be a, a dang kha, “Inpumna” ki be a; kha angkan bera lôm chu ki enkol tâk a. 8Thla khatka sungin berapu ithumkahei, keima ne neltuhei chungah ke lung diar khâi manga, anni chu ken rimang a. 9Khanungchu, bera lômhei ziangah khan, “Nangni enkoltu ni khâi no ning e, â thi rang chu thi sela, armang rang chu rimang riseh, a la dam isunhei khom an khâtin rithat risak riseh,” ki ti a. 10Khanchu, nam tin tin ranga Pumapan Thuthlung ai siam khah isût a nit tâk iti entîrnan ke rol “Ditsakna” khah ki lâk a, bong inikan ki khiak tâk a. 11Khangkan, kha nî-ah khan Thuthlung chu isût a nit tâk a. Khante, bera zuartuhei khan an ne en ṭian a, ki thil tho mangin Pumapa ai ṭong a nit iti an riat tâk a. 12An ziangah khan, “Ṭha nin tin chu, ki lo chu ne peh unla, nin ti non chu ne peh no rei,” ki ti a. Khangkan, ki lo khah tangka sômithumkah an ne pêk tâk a.#Mat.26:15.
13 Pumapa khan ki ziangah, “Biak in sumbôma khan seh roh,” a ti a. Khante ki man ranga inrupa an isût, tangka sômithumkah kha ki lâk a, biak in sumbômah khan ki sia tâk a.#Mat.27:9,10. 14Khanungchu, ke rol dang khatkah “Inpumna” khah ki lâk a, bong inikan ki khiak nôk a; khante, Juda neh Israelhei inpumna khah a chat tâk a.
15 Pumapa khan ki ziangah, “Berapu mangmunboi riamrei khah lah nôk roh. 16Ki bera lômhei enkoltu rang ken ding a; nikhomsela, ani khan inrimanga om ranghei khah san mak a, chekindara omhei khah zong ual mak a, sâbe tuanghei khah indam mak a, a la damhei khom ifâ ual mak. Kha nêkan chu â thâi thâihei sa khah a fâk a, an ketinhei idênin a khêng nôi chit ngai. 17Berapu mangmunboi, bera lôm imaraktu chung chu ân khôk vang na! Khandai chu â bânah neh a mit changtiangah khan ṭum a ti. Â bân khah rizal a ta, a mit changtiang chu zîng khap a ti,” a ti a.
Currently Selected:
ZAKARIA 11: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
