ZAKARIA 10
10
Pumapan a mihei ritlan suak ân kung
1Ṭoirua zoroah hin Pumapa ziangah rua ngên rei,
Pumapa ngêi chu a nit, rua pom ngit sûm itir a, loia chimu tinrênghei ranga ruasângsari insûr ngai chu a nit. 2Mihei khan mirmilhei neh thlasân ithiamhei an pan a; nikhomsela, sâmna an idong chu chanlamboi neh milak ringot a nit. Rimang phantuhei khom khan milak rimang an phan a, an thlangam ṭong khom â tlong a nit. Khasikin, mihei chu bera rimang angkan an ivâi rimang a, enkoltu a om no sikin dengthei an ituang a nit.
3 Pumapa khan, “Ram dang mihei, a bîkin ki mihei chunga inlalhei chungah khan ki ning a thik tak tak a, anni chu deng ki înthei rang a nit. Juda mihei chu keima ta an nit a; keimah, Tinrêngthothei Pumapa ngêiin anni chu enkol tâng ki ta, ridoinaa sakor iṭha tak angkan kî siam rang a nit. 4Anmani lâi ngêia rithokin roirêltuhei, ruaituhei neh râlpahei chu ki mihei iruai rangin an la hong isuak rang a nit. 5Juda mihei chu mirât tak hong ni tâng an ta, kotsuaa nimnok kârah an irâlhei chîlpoltu sipaihei angkah hong ni tâng an ti. Pumapa chu an ziangah a om sikin natinsat takkan doi an ta, sakor chungchuang mihei khom inê vang an ti.
6Juda mihei chu irât takkan siam ki ta, Israel mihei chu inzôk ki ti.
An chungah lungkhamna inlang ki ta, ṭhui kîr nôk ki ti.
Anni chu kî heng tlak ngai ino angkan hong ni tâng an ta,
Keimah Pumapa chu an Pathian ki nit a; an ṭongṭaina chu sâm ki ti.
7Efraim mihei chu mihâi lôm angkan hong rât tâng an ta,
Uain iin ngai mihei angkan an lungril lôm a ti.
A nit, an naihei khan an rât tlia reh mai an ta,
A sintho sikah khan Pumapa a khan an lungril lôm an ti.
8Silrisîtin ki mihei chu koi ki ta; bûm khôm ki ti;
Anni chu ritlan suak ki ta;
Matona angkah takin hong inpung puang nôk ki ti.
9Ram dang dangah ke chekindar tâk khom a,
Ram ilah taka rithok khomin ne reh mai an ti.
Anni neh an naihei chu ringdamin om an ta,
An munah la hong kîr nôk an ti.
10Aigupta ram neh Asuria rama rithokin hong ṭhui kîr nôk ki ta;
Anmani ram ngêiah khan in-om ki ti.
Gilead ram neh Lebanon khomah khan ṭhui inlût ki ta;
Ram pumpui chu hong sip an ti.
11An dengtheina tuipui an rikan tikin,
Keimah, Pumapa hin tuirifônhei chu itông ki ta,
Nail lipui inthûkhei khom khah kang a ti.
Nam ripâk Asuria chu intlôm nîng a ta,
Aigupta ram rêng thuneina khom boi a ti.
12Ki mihei chu irât takkan siam ki ta,
Anni khan chubai nê ûnin, ki thu zôm an ti,” Pumapa khan a ti.
Currently Selected:
ZAKARIA 10: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
