LUKA 9

Jisuan Kôilôm Sômleiinikahei a tir suak

(Mat.10:5-15; Mk.6:7-13)

1Jisuan Kôilôm Sômleiinikahei khah a koibûm a, ramrili ûmisua theina ritha neh thuneina a pêk a, natnahei indam theina ritha khom a pêk a. 2Khanchu, Pathian ram thu sîr rang neh damino indam rangin a tir suak tâk a.

3Khante, an ziangah, “Inzinna rangin îte chôi no rei, irol hei, cholite hei, ifarua hei, sum hei, sunglût bop hei chôi no rei.#Lk.10:4-11. 4Nin fena kipah nangni an lei ihamna in, nin tlungna takah khan nin rithok suak nôk mâkah chu nin om mai rang a nit. 5Nangni an lei iham nona khua chu nin mâk nungin an thônchâizia rilna rangin nin kephaa vâivut khah ithing itla rei,” a ti a.#TS.13:51.

6Khanchu, an fe a, kho tin an rifang a, mun tinah Thurchi Ṭha an isîr a, dam inohei an indam thiai a.

Heroda â lung a zîng

(Mat.14:1-12; Mk.6:14-29)

7Khante, Galili lal Heroda khan kha thilhei murdi khah a lei riat a. Ṭhenkan, “Baptistu Johana kha mithi lâi ata ai thoi nôk tâk a nit,” an ti pêk a.#Mat.16:14; Mk.8:28; Lk.9:19. 8Ṭhenkan, “Elija a zuang înlâr tâk a nit,” an ti a; ṭhenkan, “Tianlâia zânthla tukhôk manih kha a hong iring nôk tâk a nit,” an ti a. Khasikah khan Heroda kha â lung ai zîng a nit. 9Heroda khan, “Johana lu lak kha ki tan tâk a, hingkah taka a thurchi kî riat hih tûm ai nit?” a ti a. Khanchu, Jisua mu rang a tum tâk a.#Lk.23:8.

Jisuan mi sângringakah a vâi

(Mat.14:13-21; Mk.6:30-44; Joh.6:1-14)

10Khante, tirtônhei khah an hong kîr nôkin chu an sin va tho kha Jisua an iril a. Khante, anni khah a ziangah a ṭhui a, Bethsaida khuaah an khâtin a fepui tâk a. 11Nikhomsela, mipuihei khan an riatin chu an zui sa tâk a. Anni khah a lei lôm a, Pathian Ram thu a lei isîr pêk a, indam inang murdi ân dam a.

12Khante, kholoi inî tlâk rangto a hong nitin chu Kôilôm Sômleiinikahei kha an hong a, a ziangah, “Mipuihei hih ei kôlvêl khuaheiah neh loiheiah hin bu neh riakmun an mu theina rangin in fe ta roh, ei omna lak hi mun infiar kêng a nit a,” an ti a.

13Khanniseh, Jisuan an ziangah, “Nangmani ngêiin ifâk peh rei,” a ti pêk a.

Anni khan “Ibai thliam ringakah neh inga inikah bang kêng kin inei,” an ti a. 14Patling ringot khom sângringakah vêl an nit.

Khante, Jisuan a kôilômhei ziangah, “Mipuihei hih a buk bukin sômringa ngakah chitin inṭhung rei,” a ti a.

15Khanchu, kôilômhei khan a he be lam angkan an inṭhung tâk a. 16Khante, Jisuan ibai thliam ringakah neh inga inikah khah a lâk a, rivân tiang ienin Pathian ziangah lômthu â sîr a, a khoi a, mipuihei zianga sem rangin kôilômhei khah a pêk a. #Lk.24:30,31; TS.2:42; 20:11; 27:35. 17Khanchu, an rêngkan an fâk a, an khop seng tâk a; an sem bân kha kôilômhein an bûm a, khamlu sômleiinikah a lai sip a nit.

Peteran Jisua nitna ân puang

(Mat.16:13-19; Mk.8:27-29)

18Sûnkah chu Jisua kha fianrialah a ṭongṭai lâiin a kôilômhei a ziangah an hong a, ani khan an ziangah, “Mipuihein tûm a nit an ne ti ngai?” itin ardon a.

19Anni khan, “Ṭhenkan, ‘Baptistu Johana’ nang iti an om a, ṭhenkan, ‘Elija’ nang an ti a, ṭhenkan chu ‘Tianlâia zânthla tukhôk manih â thoi nôk tâk nîng a ti,’ nang an ti ngai,” itin an sâm a.#Mat.14:1,2; Mk.6:14,15; Lk.9:7,8. 20Ani khan, “Khateh, nangmanin teh tûm a nit nin ne iti?” itin ardon a.

Petera khan, “Pathian Mesia ni nit,” itin a sâm a.#Joh.6:68,69.

Jisuan a tuang rang neh a thi rang thu â sîr

(Mat.16:20-28; Mk.8:30—9:1)

21Khanungchu, Jisuan kha thu khah tute ziangah isîr loi rangin thu a pêk a. 22An ziangah, “Miriam Naipa hin thil itam takkah ai tuang ngêt rang a nit; upahei, thiampu lalhei, Dân inriseituhein nôl an ta, an ithat rang a nit. Khannisela, sûn thumka nungah chu kâiithoiin om ngêt a ti,” a ti a.#Lk.9:44; 17:25; 18:31-34.

23Khante, mi murdi ziangah, “Tukhom ne zui a nuamin chu mahni phialin nîn tin a kros riputin ne zui riseh.#Mat.10:38; Lk.14:27. 24Tukhom mahni ringna inzôk inuam kan ichân a ta; khanniseh, tukhom keima sika a ringna chân kan inzôk a ti.#Mat.10:39; Lk.17:33; Joh.12:25. 25Min rammual hih a pumin nei sela, amah ngêi khan chu siatna tongpuin, rimangpui ta sela, a ta rangin im rifena a om rang? 26Keimah neh ki thusîr ne zakpui kangân chu, Miriam Naipa khomin a roinpuina neh Pa neh vântirtôn rithianghei roinpuina neh a zuang tikin anni khah la zakpui a ti. 27A dik takkan nangni ke ril, hintaka ding ṭhenkahei hi, Pathian ram an mu mâkah chu thina ritem loi rang an om,” a ti a.

Jisua mêl danglamna

(Mat.17:1-8; Mk.9:2-8)

28Hi thu â sîra rithoka sûn iriatka nungah khan Jisuan Petera, Johana, Jakoba hei a ṭhui a, ṭongṭai rangin itlângah a hang fe a.#2 Pet.1:17,18. 29Khante, a ṭongṭai lâiin a mêl ilang dân khah a hong danglam tâk a, a puansilhei khah a hong vâr ri-el tâk a. 30Voikazelin mi inikan an zuang risônpui a, kha mihei khah Mosia neh Elija an nit.#TS.1:10. 31Roinpui takkan an zuang inlâr a, Jerusalemah thina ritema Pathian thiltum a len rang thu khah Jisua an zuang îsîrpui a nit.

32Petera neh a champuihei kha chu an in thlar a, an ṭhangin chu Jisua roinpuina neh a zianga mi inika ding khah an mu a. 33Mihei khan Jisua an mâk rangtoah khan Peteran a ziangah, “Minriseitu, hintaka om hih ei rangin a ṭhat, dângdite ithumkah sin kin ta, ni ta rang khatkah, Mosia rang khatka, Elija rang khatkah,” a ti a. Im ai ti khom khah iṭhan ai riat infel ino a nit.

34Petera khah a la ṭong mai lâiin sûm a zuang zîng a, annihei khah sûmin a zuang rikhû a; sûmin a zuang rikhûn chu kôilômhei khan an ṭi tak tak a. 35Sûma rithokah khan rôl a zuang iring a, “Ani hih ki mi rithlang, ki Naipa chu a nit; ama thu ringai rei,” a ti a. #Mat.3:17; 12:18; Mk.1:11; Lk.3:22.

36Rôl a mong tenan chu Jisua bang khah a om tâk a. Kôilômhei khan an thil mu an ip khap a, tute îte an îril ino a nit.

Jisuan ramrili iman naipang ân dam

(Mat.17:14-18; Mk.9:14-27)

37Atûkah Jisua neh kôilôm ithumkahei khah itlâng ata an zuang ṭumin chu mipui itam takkan Jisua an lei don a. 38Khante, mipui lâia mi khatkah â khêk a, “Minriseitu, ki naipa, ki nai neisun chu, ien rangin nang kî ngên a nit. 39Ramrilin a man a, â khêk rak rak ngai a, ân lîr a, a bâiah â suai ithlor rakkan deng ân thei a, ithi lôkkan ai mâk ngai a nit. 40Ni kôilômhei hi ûmisua pêk rangin ker phat lakin thei mak a,” a ti a.

41Jisuan a sâm a, “Atûnlâi mi, iamna risam neh pualoihei o, itena sôt im nin ziangah kî omin nangni kî ngaitua rang hi? Ni naipa khah hin hong ṭhui roh,” a ti a.

42Khante, a hong ṭhui lâiin ramrili khan naipang khah rinêngah â phek rak a, ân lîr a. Nikhomsela, Jisuan ramrili khah a ngo a, naipang khah ân dam a, a pa ziangah a pêk tâk a. 43Khante, mi murdi khan Pathian sinthotheina roinpui khah arkhêl an ti tak tak a.

Jisuan a thi rang thu â sîr nôk

(Mat.17:22-23; Mk.9:30-32)

Mi murdîn Jisua sinthohei arkhêl an la ti mai lâiah khan a kôilômhei ziangah, 44“Nangni ke ril rang hih ringil tlak no rei, Miriam Naipa hih miriamhei kutah inman ai nit rang a nit,” a ti a. 45Khanniseh, kôilômhei lak khan a thu sîr omzia khah reh thei mak a. An riatthiam nona rangin an ziangah chu thu rithup a nit; kha thu khah amah lak ridon infel ngam mak a.

Tûm â roinpui tak?

(Mat.18:1-5; Mk.9:33-37)

46Khante, kôilômhei khan ei lâiah tûm â roinpui rang tak itin an risêl a.#Lk.22:24. 47Jisuan an lunginṭong khah a riat a, naipangte hi a kâi a, a kôlah ân ding a. 48An ziangah, “Tutu hi naipangte hi ker ming sika lôm chu keimah ne lôm a nit; keimah ne lôm chu ne tirtu lôm a nit. Nin lâia â chîntak hi â roinpui tak chu a nit,” a ti a.#Lk.10:16; Mat.10:40; Joh.13:20.

Nangni kal ino chu nin tianga ṭang a nit

(Mk.9:38-40)

49Johana khan ani khah â sôn a, “Minriseitu, mi khatkan ner mingin ramrili a ûmisua a, ei lôma mi a nit no sikin kin khap,” a ti a.

50Jisuan a ziangah neh kôilôm danghei ziangah, “Khap no rei, tukhom nangni kal ino chu nin tianga ṭang a nit,” a ti a.

Samari mihei khua khatkan Jisua a nôl

51Jisuan, rivân a lui rang zoro a hong nâiin chu Jerusalema fe rang a tum a. 52A matonah mi a lei tir a, a ta ranga tinrêng lei inrifûk riai rangin Samari mihei khua khatkatah an lût a.#Lk.17:11; Joh.4:40-42. 53Khannisela, Jerusalema fe thal a tum ngit iti an riat sikin lei ngaisak mak a. 54Khanchu, a kôilôm Jakoba neh Johana khan amakhah an mun chu a ziangah, “Puma, annihei kâng inrivâm riai rangin rivân ata #9:54 Mss ṭhenkatah ‘Elija angkah khan’ iti a kop. mei koi iṭhul rangin ni ne nuam im?” an ti a.#2 Rêng.1:9-16. 55Khante, Jisua khah an tiang a ngat a, a ngo a.#9:55 Mss ṭhenkatah ‘Nin thu sîr khah nin iriat ino a nit, Miriam Naipa hi miriam ringna inrimang rang ni loiin, saninzôk ranga zuang kêng ai nit,’ iti a kop. 56Khanungchu, Jisua neh a kôilômhei kha kho dangah an fe tâk a.

Jisua zui itumhei

(Mat.8:19-22)

57Khante, lampuiah an lôn lâiin mi khatkan Jisua ziangah, “Ni fena kipah nang zui ki ti,” a ti a.

58Jisuan a ziangah, “Sihalhein khur an nei a, chungavuang ivahein ribu an nei; khanniseh, Miriam Naipa hi chu a lu ringatna rang ilua mun nei mak e,” a ti pêk a.

59Khannisela, mi dang ziangah chu, “Ne zui roh” a ti pêk a.

Khanniseh, kha mi khan, “Puma, fêng ki ta, ki pa la va phûm bak ki ti,” a ti a.

60Jisuan a sâm a, “Mithihein an mithi champuihei chu phûm riseh; nang chu fen la, Pathian Ram thu hi va sîr indar roh,” a ti a.

61Mi dangin a ziangah, “Puma, nang zui ki ti; nikhomsela, ki inmihei he ṭhan la va thla bak ki ti,” a ti a.#1 Rêng.19:20; Fil.3:13. 62Kha mi ziangah khan Jisuan, “Tutu âlkâinaa kut ibâng a, nungtianga ngat chu Pathian Ram mi inih tlâk ni mak e,” a ti pêk a.

Currently Selected:

LUKA 9: BIATBSI

Highlight

Copy