LUKA 8

Jisua zui nupanghei

1Itôika nungah khan Jisua kha khua lian neh khua chîn rifangin Pathian Ram Thurchi Ṭha sîrin a lôn a. Kôilôm Sômleiinikahei khan an zui a. 2Nupang ṭhenkah, ramrili iman ata damhei neh an natna ata damhei khomin an zui sa a; khahei khah Mari Magdalini, a sunga ramrili sarikah ai ûmisua pêk hei,#Mat.27:55,56; Mk.15:40,41; Lk.23:49. 3Heroda sum enkoltu Chuza nupui Joani hei, Sosani hei neh nupang dang itam takkahei an nit. Hi mihei hin anmani sumpuan ngêiin Jisua neh a kôilômhei khah an iṭangpui ngai a nit.

Fachi rithetu ṭongrikhek

(Mat.13:1-9; Mk.4:1-9)

4Kho tina rithokin mipuihei Jisua ziangah an hong ribûm a. Jisuan hi ṭongrikhek thu hih imangin thu a lei iril a. 5“Mi khatkan bu rît rangin a loiah a fe a, fachi arthe a, a hang rithen chu a ṭhen chu lampuiah a tlâk a, ivahein an fâk rip tâk a. 6A ṭhen chu lungpharpha chunga ipilah a tlâk a, imông chu a hong mông a; nikhomseh, ipilin izil a nei no sikin a rôp nôk rip zel tâk a. 7A ṭhen chu riling kârah a tlâk a, riling kârah a hong ṭoi a, riling khan a dîp that tâk a. 8A ṭhen chu rinêng iṭhaah a tlâk a, a hong thuar a, a bâk rizaka chitin a hong irâ tâk a,” a ti a.

Khante, Jisuan a tong ikhârnan, “Riatna ranga ikuar inei kan chu ringai riseh,” itin â khêk a.#Mat.11:15.

Ṭongrikhek thiltum

(Mat.13:10-17; Mk.4:10-12)

9A kôilômhei khan kha ṭongrikhek omzia khah Jisua an ridon a. 10Jisuan, “Pathian Ram rithup riat theina kha nin ziangah chu ipe a nit. Khanniseh, mi danghei rangin chu; en ṭian khom seh an mu infel nona rang neh an ringai ṭian khoma an riat infel nona rangin ṭongrikhek banga sîr pêk a nit.#Isa.6:9 (LXX); Jer.5:21; Ezek.12:2.

Fachi rithetu ṭongrikhek omzia

(Mat.13:18-23; Mk.4:13-20)

11“Ṭongrikhek omzia chu hingkan a nit; Fachi chu Pathian thu hi a nit.#1 Thes.2:13; 1 Pet.1:23. 12Fachi lampuia thla chu thu ringaia retuhei an nit; nikhomsela, an iam nona rang neh inringa an om nona rangin Soitana kha a hong a, an lungrila thu khah a lâk pêk vang ngai. 13Lung chung ipila thla chu an thu riat khah ilôm takka pom tâkhei hi an nit; nikhomsela, anmaniah rizung inthûk thla mak a, zoro sôt inote chu an zôm a, an chungah fiana a hong tlung viatin chu an ilîr nôk zel ngai. 14Riling kâra thla chu thu khah an riat a; nikhomsela, hi ringnuna lungkângna hei, richongna hei neh nunkhohoi rizuknahein a dîp a, an irâ zel min phâk ngai mak. 15Rinêng iṭhaa thla chu hihei hih an nit, thu an iriat khah lungrilah iṭha takkan an rê a, an zôm a, tuangdiar ngêi ngêia irâ sua tâkhei hi an nit.

Bêl nuaia meiser

(Mk.4:21-25)

16“Tutên meiser ichokin, bêl inrikhum ngai mak a, zâlmun thuaiah khom seh ngai mak. Â lût kan a vâr an mu theina rangin a siamunah kêng an isia ngai.#Mat.5:15; Mk.4:21; Lk.11:33.

17“Tlâng suak ino ranga rithup îte omak a, ria no rang neh inlang ino ranga thup khom îte omak e.#Mat.10:26; Mk.4:22,23; Lk.12:2; Efes.5:13.

18“Nin thu dong dânah ridîn rei, â nei murdi chu peh sâng an ta, â nei ino chu ai nei viat ai sôn khom lah pêk rip an ti,” a ti a.#Mat.13:12; 25:29; Mk.4:24,25; Lk.19:26.

Jisua nu neh ân zirpuihei

(Mat.12:46-50; Mk.3:31-35)

19Khante, a nu neh ân zirpuihei khom Jisua ziangah an hong a, mipui sikin a ziang tlung thei mak a. 20Mi ṭhenkan Jisua ziangah, “Ni nu neh nen zirpuihein nang imu nuamin putiangah son nang an ngâk mai,” an ti pêk a.

21Khanchu, Jisuan a sâm a, “Pathian thu riaa zômhei hih ki nu neh ki suapuihei chu an nit,” a ti a.

Jisuan thlipui a ngo inmong

(Mat.8:23-27; Mk.4:35-41)

22Sûnkah chu a kôilômhei neh rikuangah an chuang a, “Dîl râl tiangah son lei kâi rei u,” a ti pêk a. Khanchu, an rithok tâk a. 23An hei fe lâiah khan Jisua khah a in thlar a. Voikarengin dîlah khan thlipui a hong râng a, an rikuang khah tuiin a sip lôk lôk tâk a, rilônthingin an om tâk a. 24Khanchu, kôilômhei khah Jisua ziangah an fe a, an ithoi a, “Minriseitu, Minriseitu, kin irmang zoi rang tâk kêng,” an ti a.

Khanchu, Jisua khah a hong thoi a, thlipui neh tuirisok khah thu a pêk a, a dâi dup tâk a. 25Khante, a kôilômhei ziangah, “Taktiang im nin iamna ai om tâk?” a ti a.

Khanniseh, an ringai rikhêlin an ṭi a, “Hi mi hih tûm ai nit hi? Thlipui neh tuirisok khom thu a pêk a, an izôm hi,” an ti a.

Jisuan ramrili iman ân dam

(Mat.8:28-34; Mk.5:1-20)

26Khante, Jisua neh a kôilômhei khah Galili dîl râl, Gerasin #8:26 Mss ṭhenkatah ‘Gergasin, Gadarin’ itihei a nit. ram an tlung a. 27Jisua kha imuang a suak kaneh chu khosunga mi, ramrili iman khatkan a hong tong a, kha mi khah zoro sôt takkah puansil iboia, inah khom om loia, thlân ipûkheia om ngai a nit a. 28Jisua a mun chu â khêk a, a ke bulah a bok a, iring takkan, “Jisua, Pathian Chungnungtaka Naipa im ne lo rang nî ti? Deng nen thei tlak loi rangin nang kî ngên a nit,” itin â khêk a.#Mk.1:24; Joh.2:4. 29Jisuan ramrili khah a sung ata suak rangin thu a pêk sikah hingkana ai ti a nit. Voi itam takkah an man a, lung inah an khum ngai a, a kuthei a kehei zingzirin an khuap a; nikhomsela, an khuapnahei khah â sat riai a, ramrili khan ramchâr tiang ai ṭhui ngai a nit. 30Khante, Jisuan, “Im ner ming?” a ti a.

Ani khan, “Ker ming chu Tamah” #8:30 ‘Legion’ Tamah itia let hi Rom.sipai pôl khatkah mi 6000 an nit ngai; khasikin, ‘Sângirukkah’ itia let thei a nit. a ti a, a sunga ramrili lût khah an tam sika a nit. 31Khante, ramrilihei khan khur mongboia tir loi rangin Jisua an riphat a.

32Khante, kha tlâng pangah khan vok lôm fâk izongin an om a, ramrilihei khan vokhei sunga lût rangin Jisua an ngên a; ani khan a phal pêk tâk a. 33Ramrilihei khan kha miriam khah an mâk a, vokhei sungah an lût tâk a. Vok lômhei khah rôlbôkah an itlân a, dîlah an ṭul a, an rinîk riai tâk a.

34Khante, vok ienkoltuhei khan thil omzia an riatin chu an fe a, khosunga mihei neh a kôlvêla mihei kha an va ril a. 35Khanchu, thil omzia en rangin mihei khah an rithok suak a, Jisua ziang an hong tlungin chu, ramrili imanpu khah puan isila, lungril ngaingir riputin Jisua ke bula ṭhung kha an mu a, an ṭi tak tak a. 36Khante, kha thil imutuhei khan ramrili iman hong dam tâk dân khah an lei iril a. 37Gerasin rama mihei murdi khan an ṭi tak tak sikah khan Jisua kha an ziang ata suak rangin an ngên a; khanchu, Jisua kha rikuangah a chuang a, a mâk tâk a.

38Ramrili a sung ata suak, â dam tâk khan Jisua ziangah, “Nang zui ki ti,” a ti a.

39Khannisela, Jisuan, “Ni inah fen la, ni chunga Pathian sintho hih va ril roh,” a ti pêk a.

Khanchu, a fe a, khopui sung pumpuiah a chunga Jisuan sin ai tho pêk khah ân puang tâk a.

Jaira nainu neh nupang thi suak ân dam

(Mat.9:18-26; Mk.5:21-43)

40Khante, Jisua kha dîl râl ata a hong tlung nôk khah mipuihei khan an lei ngâk mai a, an lei lôm a. 41Khanungchu, kha khuaa inkhôm in ruaitu khatkah, arming Jaira a hong a, Jisua ke bulah â bok a. 42A nainu neisun, kum sômlei kum inika mi, a thi lôk lôk sikin a ina zuang rangin a ngên a. Khante, Jisua chu a fe tâk a, mipuihein an uap tul tul a.

43Khante, nupang khatkah kum sômlei kum inikah sar thi suak inrik a om a, a sumpuan nei murdi dâktorah â hek zoi riai tâk a, tute lakin indam thei mak a. 44Mipuihei kârah Jisua nungtiang a hong a, Jisua puan môr a hong tôn a, voikazelin a thi suak khah arngam tâk a. 45Jisuan, “Tûm ne tôn?” a ti a.

Kei chu ni mang an ti chit a. Khanchu, Peteran a ziangah, “Minriseitu, hi dôra mipuiin nang an iuap hite,” a ti a.

46Khanniseh, Jisuan, “Tukhôk manin a ne itôn a nit, keima ata sinthotheina a suak iti ki riat,” a ti a.#Lk.5:17; 6:19. 47Nupangnu khan rithup thei ni khâi mak iti a riatin chu inthing pumin a hong a, Jisua ke bulah â bok a, a tônna bi neh voikazela a dam tâk thu mi murdi makungah â sîr tâk a. 48Khanchu, Jisuan a ziangah, “Ki nainu ni iamna hi nî dampui a nit, thlangam takkan fe ta roh,” a ti pêk a.#Lk.7:50; 17:19; 18:42.

49Jisua khah a la ṭong mai lâiin, Jaira in ata thangkoi a hong tlung a, Jaira ziangah, “Ni nainu a thi tâk, Minriseitu hi inbuai khâi no roh,” a hong ti a.

50Jisuan a lei riat a, Jaira ziangah, “Ṭi no roh, iam ngit inla, dam a ti,” a ti a.

51In a va tlungin chu Petera, Johana, Jakoba, naipangnu nu neh pa banah chu tute a zianga lût phal mak a. 52Khataka om murdi khan naipangnu sûnin an ṭap a. Khannisela, Jisuan, “Ṭap no rei, â thi ni mak e, â in kêng ai nit,” a ti a.

53Khante, naipangnu khah a thi ngêt iti an riat sikin an nuiso a. 54Khannisela, Jisuan a kut â tûk a, “Ki naite, hong thoi roh,” a ti a. 55Khanchu, a hong ring nôk a, voikan a hong thoi zel tâk a; Jisuan, “Ifah rang peh rei,” a ti a. 56A nu neh a pa khan arkhêl an ti tak tak a; nikhomsela, Jisuan a sintho khah tute iril loi rangin thu a pêk a.

Currently Selected:

LUKA 8: BIATBSI

Highlight

Copy