LUKA 7

Jisuan sipai rizâka ruitu som ân dam

(Mat.8:5-13)

1Khante, Jisuan mihei ziangah kha thuhei murdi khah â sîr zoiin chu Kapernaumah a fe tâk a.#Joh.4:46-53. 2Rom.sipai rizaka ruitu som lungthlung tak dam mak a, a thi lôk lôk a. 3Khante, Jisua thurchi a lei riatin chu izuanga â som indam ranga ngên rangin Juda upahei a tir a. 4Jisua ziangah an hong a, ṭhatnemringai takkan an ngên a, “Hi mi hih ni ṭangpui rang inrup a nit. 5Kin mihei lung ân kham a, kin inkhôm in khom a ne isin pêk a nit,” an ti a.#TS.10:2.

6Khanchu, Jisuan annihei khah a zui tâk a. In a tlung rangton chu sipai rizaka ruitu khan a malhei a tir a, “Epu intak rakkan hong no roh, ki in sung ni lûtna rangin ritluk mak e. 7Khabanah keima ngêi khom ni zianga hong rang khomin ritluk mang e. Thu bang inchôi inla, ke som chu dam zel a ti. 8Kei khom mi thunuaia om ki nit a, ki nuaiah sipaihei an om a, khatka ziangah, ‘Fe roh’ ki tin chu a fe ngai a, ‘Hong roh’ ki tin a hong ngai a, ke som ziangah khom ‘Hih sin roh’ ki tin a sin ngai a,” a ti a.

9Khante, Jisuan amakhah a riatin chu arkhêl a ti a, arhêl a, mipui â zuihei ziangah, “Nangni ke ril, hingka taka iamna hih Israelhei lâiah la mu ngai mang e,” a ti a.

10A mi tirhei kha inah an hong kîr nôkin chu isom kha idamin an hong mu tâk a.

Numeinu naipa a kâiithoi

11Itôika nungah chu Jisua kha khua khatkah Nain khua an iti-ah khan a fe a, a kôilômhei neh mipui itam takkan an zui a. #1 Rêng.17:17-24; 2 Rêng.4:32-37. 12Khante, kho kul dâikot an tlung rangin chu, mi thi an hong rizôn suak a; a nu khah numei a nit a, a naipa neisun a nit. A khuaa mi itam takka khom an hong sa a. 13Khante, Pumapa khan a mun chu khâmnu khah lung ân kham tak tak a, a ziangah, “Ṭap no roh,” a ti pêk a. 14Khanungchu, a va nâi a, rilâng khah a tôn a, arzôntuhei khah an ngîr tâk a, Jisuan, “Tlangvâl, thoi roh, nang ki ti,” a ti a. 15Khante, mi thi khah â ṭhung zel a, a hong ṭong tâk a; khanchu, Jisuan a nu ziangah khan a pêk a.

16Mi murdîn an ṭi tâk a, Pathian an inpâk a, “Ei lâiah zânthla roinpui tak a zuang îlang tâk a nit; a mihei inzôk rangin Pathian a zuang tâk,” an ti a.#Lk.7:39; 24:19; Mat.21:11; Joh.6:14.

17Jisua thurchi khah Judai ram pumpuiah neh a kôlvêl ram tinah ân thang tâk a.

Baptistu Johana mi tirhei

(Mat.11:2-19)

18Johana kôilômhei khan Jisua thurchi khah Johana an iril a. 19Khanchu, Johana khan mi inikah a koi a, Pumapa ziangah, “Â zuang rangah khah ni nit im, mi dang kin lai tûng rang im?” itia ridon rangin a tir a.

20Kha mihei khah Jisua ziangah an hong a, “Baptistu Johanan, ‘A zuang rangah khah ni nit im, mi dang kin lai tûng rang im?’ itia nang ridon rangin ni ziangah a ne hong itir a nit,” an ti a.

21Kha lâi takah khan Jisuan mi itam takkah, daminohei, natna tuanghei, ramrili imanhei ân dam a, mitdel itam takkah khom an mit ân vâr pêk a.#Mat.4:23; Mk.3:10. 22Khanchu, Johana kôilômhei khah a sâm a, “Fe nôk ta unla, nin thil mu neh nin iriathei hi Johana va ril rei, mitdelhei khah a mit a vâr a, kebâihei ken an lôn a, iphârhei an rithiang a, kuarisêthei khom a ikuar a vâr a, mithihei kâiithoi an nit tâk a, inrianghei ziangah Thurchi Ṭha isîr a nit tâk.#Isa.29:18,19; 35:5,6; Lk.4:18,19. 23Tukhom ne ringla nohei chu mi hamṭha an nit,” a ti a.

24Johana mi tirhei an fe zoiin chu mipuihei ziangah Johana chungchâng Jisuan â sîr tâk a, “Johana ziangah ramchârah nin fe lâiah khan î muh rang im nin itûng? Ithli isêm innîng lâiluang mani? 25Tu en rangin im nin ife? Puan rivuai isila rivo mi mani? Khangkana puan rivuai isil mi neh hoisakfama lênghei chu rêng inah kêng an iom ngai. 26Ne ril ta u, îtak ien ranga nin ife suak mani? Zânthla en rangin na? O a nit; nangni ke ril, ani khah zânthla nêk khoma lian a nit. 27Johana hi a nit, Thubu-a, ‘Pathianin ki tirtôn ni matonah tir ki ta, ani khan ni matonah ni lampui lei siam a ti,’ ai ti kha a nit. 28Nangni ke ril, nupang ata inzir lâiah Johana nêka roinpui ual omak; khannisela, Pathian rama mi chîntak khom Johana nêka khan a roinpui ual,” a ti a.

29Johana thu sîr khah mipuihei khan an riat a; anmani neh a bîkin siadôltuhei khan Pathian lampui dik khah ipomin, Johana baptisma kha an lei ichang tâk a nit.#Mat.21:32; Lk.3:12. 30Khanniseh, Farisaihei neh Dân inriseituhei khan chu an ta ranga Pathian thil tum khah an nôl a, Johana baptisma kha an ichang nuam ino a nit.

31Jisuan, “Atûn lâi rualitharhei hih im an i-ang? Inêm ken rikhek rang tâk? 32Naipanghei bazâr muna ṭhung a, lôm khatkan lôm dang ziangah, ‘Rineina belem nangni kin tum pêk a, lâm mak chei a, lusûn la kin sak khomin ṭap ual mak chei a,’ itia risam risak angkah an nit. 33Baptistu Johana a zuang a, bu ngeiin uain khom in mak a, nangmanin, ‘Ramrili nei a nit hih,’ nin ti a.#Lk.1:15. 34Miriam Naipa a zuang a, a fâkin a in a, nangmanin, ‘En ta u, rôlruakpa, uain idu mi, siadôltuhei neh mi sualhei malpa soh,’ nin ti a.#Lk.5:29; 7:36; 11:37; 14:1,2. 35Nikhomsela, Pathian vârna dikzia chu â hamtuheiah a ilang suak a nit,” a ti a.

Jisua Farisai Simona inah

36Farisai lâia khatkan bu ne rangin Jisua a fial a, a inah khan a fe a, bu ne rangin â ṭhung a.#Mat.26:6-13; Mk.14:3-9; Joh.12:1-8. 37Kha khuaah khan nupang isual khatkah a om a. Jisua kha Farisai inah bu a nêk iti a riatin chu alabastar bûrin siriak namhoi a hong chôi a. 38Jisua nungah, a ke bulah khan iṭap pumin a ngîr a; a mitrithli khan Jisua kehei khah a zung indui a. A samin a kehei a zuk rûk a, a ke khah a fôp a, siriak namhoi khah a buak a. 39Â fialtu Farisai khan a mun chu a lungrilin, “Hi mi hih zânthla dik tak a nitin chu â tôntu nupang isual zia hih riang a ti,” a ti a.

40Jisuan a ziangah, “Simon, ṭongbâikah nang iril rang ki nei,” a ti a.

Simona khan, “O Minriseitu, ne ril roh,” a ti a.

41Jisuan a ziangah, “Mi inikan lâkai ipeh ngaitu ziangah sum an ritâng a. Khatkah khan duli rizarngakah, khatkah khan duli sômringakah. 42An tuak thei no sikin â zâ seng seng tâk a. A tukhôk khan im ani khah lungthlung ual a ti?” a ti a.#Mat.18:27.

43Simona khan a sâm a, “A izâ tam ual khan nîng a ti,” a ti a.

Jisuan, “Ni tîn dik,” a ti a.#Lk.10:28. 44Khanungchu, nupangnu tiang mâi a ngat a, Simona ziangah, “Hi nupangnu hih ni mu na? Ni inah ki hong a, ki ke risûkna rang tui ne peh mak che a, ani hin chu a mitrithlin ki kehei arsûk a, a samin a rûk inhûl a. 45Nangman ne fôpin ne lei lôm mak che a, ani hin chu a hong lût ata ki kehei ifôp bâng mak a. 46Nangman ki luah riak nen rithu mak che a, ani hin chu ki kehei siriak namhoi ai buak a nit. 47Khasikin, nang ke ril, a sual murdi kha izâ a nit tâk a, ani khomin hingka takah hin a lungthlungna a înlang a nit. Khasikin, tukhom izâna chînin chu lungthlungna chîn ân lang ngai,” a ti a.

48Khanchu, Jisuan nupangnu ziangah, “Ni sualhei izâ a nit tâk,” a ti a.#Mat.9:2; Mk.2:5; Lk.5:20. 49A khalai rikhîlpuihei khan, “Hingkana sualhei tena khom izâ thei hih tûm ai nit?” an riti a. 50Khante, Jisuan nupangnu ziangah, “Ni iamna hin nang a înzôk a nit, rithlaringam takkan fe ta roh,” a ti a. #Mat.9:22; Mk.5:34; Lk.8:48.

Currently Selected:

LUKA 7: BIATBSI

Highlight

Copy