LUKA 11

Jisuan ṭongṭai dân ân risei

(Mat.6:9-13; 7:7-11)

1Sûnkah chu Jisuan mun khatkatah a ṭongṭai a, a mong tenan chu a kôilômhei lâia khatkan a ziangah, “Puma, Johanan a kôilômhei ṭongṭai dân a înrisei angkan nen risei roh,” a ti a.#Mk.1:35; Lk.3:21; 5:16,38; 6:12; 7:18; 9:18,28.

2Khante, Jisuan an ziangah, “Nin ṭongṭaiin chu hingkan ti ngai rei:

“‘Kin Pa,#11:2 Mss ṭhenkatah ‘Rivâna mi’ iti a kop.

Ner ming marit om riseh,

Ni ram#11:2 Mss ṭhenkatah Ni ram chu zuang tlung riseh iti zoiah ‘Rivâna ni lungdo an isin angkan rinêngah isin ni riseh,’ iti a kop. zuang tlung riseh.

3Nîn tin kin fâk khop bu ne peh roh.

4Kin sualhei ne zâ roh,

Keini khomin kin chunga thonsualhei kin izâ ngai.

Thlêmnaah ne ṭhui inlût no roh,’ itin,” a ti a. #Lk.18:35; Mk.11:29.

5Khante, Jisuan a kôilômhei ziangah, “Nin lâia mi khatkah hin mal nei sela, zânlâiah a malpa inah fe sela, ‘Mala, ibai thliam ithumkah ithungin ne lei sem roh. 6Ki mal inzin a hong tlunga îte ken fâk rang lak nei mang a,’ va ti sela. 7A malpa khan insung ata, ‘Ne hong inbuai khâi no roh, atûn chu inkhâr khom ikal riai tâk kêng a nit a, ki naihei neh kin izâl tâk kêng, ithoiin îte nang hong peh thei khâi no ning,’ lei ti pêk sela. 8Nangni ke ril, a mal ni nit sikin ithoiin hong peh no khom sela, izak loia a ni ngit ngit sikin ithoiin a nuam zâkah hong pêng a ti.

9“Khasikah khan nangni ke ril, ngên rei ipe nîng nin ti; zong rei, mûng nin ti; ikik rei, inkhâr nangni ong a ti.#Mat.7:7-11. #Mat.18:19; 21:22; Mk.11:24; Joh.15:7; 16:23,24; Jak.1:5-8; 1 Joh.5:14,15. 10Tutu â ngên murdîn mûng an ta, â zong murdi khomin mûng an ta, â kik murdi chu inkhâr iong pêk nîng an ti. 11Nangni lâia pahei hin, nin naipahein inga nangni nih sela, irûl peh ung im a?#TS.19:13. 12Anitnole, ârtui nangni nih sela, âinuvêt peh ung im a? 13Nangni mi sual manin nin naihei thil iṭha pêk nachâng nin riatin teh, nin Pa rivâna mi vangin teh â ngêntuhei kha Rithla Rithiang ai pêk rang vang na!” a ti a.

Jisua neh Belzebula

(Mat.12:22-30; Mk.3:20-27)

14Khante, Jisuan ramrili ṭongtheiino khatkah hi a ûmisua a, ramrili khah a suak kaneh chu ṭongtheiino khah a ṭong thei tâk a. Mipuihei khan arkhêl an ti a. 15Khanniseh, mi ṭhenkan chu, “Ramrili lal Belzebula a nit sika ramrilihei ai ûmisua thei a nit,” an ti a.#Mat.9:34; 10:25.

16Ṭhenkan chu amah rinakna rangin rivân ata sinrikhêl inmuh rangin an ngên a.#Mat.12:28; 16:1; Joh.2:18; 6:30. 17Khanniseh, Jisuan an lunginṭong a riat a, an ziangah, “Tak ram khom inṭhen a, mahni neh mahni ridoi chu an ram ngai; insungkua khom mahni neh mahni ridoi chu a khâtin â lîr ngai. 18Soitana ram khom lôm risiamin mahni neh mahni an ridoiin teh, ingkan im â ding thei rang? Belzebula thuneina ne pêka ramrilihei ûmisua nin ne ti a. 19Khangkana, Belzebula sika kî ûmisua ngai a nitin teh, nin mihei #11:19 ‘Naihei’ iti a nit, Israel mi, ramrili ûmisua thiamhei an nit. khan tu sikin im ramrili an iûmisua ngai? Khasikin, anni khan thiamno nangni an închang a nit. 20Khante, Pathian rithaa ramrilihei kî ûmisua ngai a nitin chu nin ziangah Pathian Ram khah a zuang tlung tâk tina a nit.

21“Mi rât khan tluk rifûka a in a ngâk kârkah chu neinun murdi rikip charkan a om ngai. 22Khannisela, a nêka rât ualin a hong doi a, a hong inên chu, arngatna râlthluk khah sut a ta, a neinun khom lah pêk a ta, a nuam nuamin sem indar a ti. 23Tutu ki tianga ṭang ino chu ne kal a nit, tutu ne bûmpui ino chu â thek indar a nit.#Mk.9:40; Lk.9:50.

Ramrili hong kîr nôk thu

(Mat.12:43-45)

24“Ramrili khah mi sung ata a suakin chu ngammun izongin tui omnona munheiah a chai diai a; a mu no tenan chu, ‘Ki in, kî mâk tâk ngirah khan kîr nôk tâng ki ti,’ a ti a. 25Khante, a hong kîr nôkin chu phît infâi liaia rêl infel diamin a mu a. 26Khanungchu, a fe nôk a, ama nêka sual ual ramrili dang sarikah a hong ṭhui a, an lût a, amakhan an om tâk a. Khasikin, kha miriam omdân nungitah ual kha a masa nêkan a hong isiat ual ngai a nit,” a ti a.

Ham ṭhatna dik

27Jisuan kha thu khah â sîr zoiin chu mipui lâi ata nupangnu khatkah a hong ikhêk suak a, “Nupang nang ivonga, nang idonnu chu a ham a ṭhat e,” a ti a.

28Jisuan a sâm a, “A nit, khannisela, Pathian thu riaa zômhei hi an ham a ṭhat ual,” a ti a.

Risinsiana an zong

(Mat.12:38-42)

29Khante, mipuiin an hong uap a, Jisuan, “Ingkana atûnlâi mihei hih an îsual rai tâk im na! Risinsiana an zong a; khannisela, Jona risinsiana banah chu risinsiana dang rêng rêng ipe ni no nih. #Mat.16:4; Mk.8:12. 30Zânthla Jona kha Ninevi mihei ta ranga risinsiana ai nit angkah khan, Miriam Naipa hi atûnlâi mihei ta rang risinsiana nîng a ti. #Jon.3:4.

31“Roirêl nikhuan chu sim tianga Rêngnu Seba la ding a ta, atûnlâi mihei thiamno inchang a ti; ani chu Rêng Solomona vârna ringai rang pialin ram ilah tak ata ai hong a nit. Nangni ke ril, Solomona nêka roinpui ual hin ai om a nit.#1 Rêng.10:1-10; 2 Rich.9:1-12. 32Roirêl nikhuan chu Ninevi mihei khom hong iding an ta, thiamno nangni inchang an ti; anni chu Jona thu sîr sikin an sual an irlet a nit. Nangni ke ril, Jona nêka roinpui ual hin ai om a nit.

Takpum vâr

(Mat.5:15—6:22-23)

33“Tutên an meiser ichok kha mun rithupah seh ngai mak a, bêl nuaiah khom seh ngai mak; mi a hong ilûthein a vâr an mu theina rangin a siamunah kêng an isia ngai.#Mat.5:15; Mk.4:21; Lk.8:16. 34Nin mithei hi nin takpum meiser angkah a nit. Nin mit a vârin chu nin takpum khom a vâr pam a, nin mit a siatin chu nin takpum khom â zîng a nit. 35Khasikin, ridîn rei, nangmania ivâr iom khah izîng hong chang duai a ti. 36Khanchu, meiserin nangni a învâr pam ngai angkan nin takpum iṭang khah a zîngna boi riaikan, nin pumkan vâr pam a ti,” a ti a.

Farisaihei neh Dân inriseituhei a dem

(Mat.23:1-36; Mk.12:38-40)

37Khante, Jisuan kha thu khah â sîr zoiin chu Farisai khatkan bu ne rangin a fial a; khanchu, a fe a, khalai khah an rikhîl tâk a.#Lk.7:36; 14:1. 38Farisai khan Jisuan kut risuh loia khalai a ot khah a mun chu arngai ân rikhêl ok a. #Mk.7:1-5. 39Khante, Pumapa khan a ziangah, “Nangni Farisaihei hin kilât neh khêng a putiang nin infâi a; khanniseh, nin sungtiang chu kuatinkamna neh sualna sip a nit. 40Nin intlôk vang na! Putiang isiamtu Pathian khan a sungtiang khom ai siam ni mak im a? 41Kilât neh khênga thil iom khah inrianghei peh unla chu nin ta rangin thil tinrêng rithiang khai a ti.

42“A nit, nangni Farisaihei o, nin chung ân khôk vang na! Nin chimu invâng loinamsia hei, lêngisêr hei neh thlâi chi tinrêng sômka khatkah Pathian nin pêk ngai a; khannisela, dikna neh Pathian lungthlungna khah nin selet a; kha tak khah kêng nin sintum, a danghei khom selet ual loiin.#Lev.27:30; Mik.6:8.

43“Nangni Farisaihei o, nin chung ân khôk vang na! Inkhôm inah ṭhungmun iṭha nin ringen a, bazâr muna mi marit chibai bûk nin ringai innat a. 44Nin chung ân khôk vang na! Ithlân a nit iti reh loia min a chunga an lôn ngaina angkah hi nin nit,” a ti a.

45Khante, Dân inriseituhei lâia khatkan a ziangah, “Minriseitu, ni thu sîr hih keini khom ni ne êrona kêng a nit hite,” a ti a.

46Jisuan a sâm a, “Nangni Dân inriseituhei o, nangni khom nin chung ân khôk vang na! Puak irik pêl intak tak mihei chungah nin bâng a, nangmani lakin chu nin kutṭim ilua khomin tôn nuam mak chei a. 47Nin chung ân khôk vang na! Nin chibulhei ithat zânthlahei thlân khah nin siaminṭhat a.#TS.7:51-53. 48Kha sik takah khan nin chibulhein zânthlahei an lei ithat khah nin ihampui iti a înlang a nit; anmanin zânthlahei khah an that a, nangnin an ithlânhei khah nin ivuak inṭhat a nit. 49Khasikin kêng Pathian Vârna Bu-ah khom, ‘An ziangah zânthlahei neh tirtônhei tir ki ta, ṭhenkah lei that an ta, ṭhenkah deng lei inthei an ti,’ iti riziak ai nit. 50Khasikah khan Abela an that ata mâichâm neh Mun Rithiang kâra Zakaria an that idênah khan, rammual insiang ata zânthla an lei ithat murdi thisen phuba khah atûnlâi mihei chungah hin ila ai nit rang a nit. 51A nit, nangni ke ril, khahei sik pialah khan atûnlâi mihei chungah hin phuba chu ila nîng a ti.#Riph.4:8; 2 Rich.24:20-21; Zak.1:1. 52Dân inriseituhei o, nin chung ân khôk vang na! Vârna chabi khah nin vong khap a, nangni lak lût mak chei a, â lût itumhei lak nin lei idan a,” a ti a.

53Khante, Jisuan kha mun khah a mâkin chu Dân inriseituhei neh Farisaihein an sêl zel tâk a; thil itam takkah an ridon a. 54Sâm insual a nei duaia iman itumin an irdîp ṭian a nit.#Mk.12:13.

Currently Selected:

LUKA 11: BIATBSI

Highlight

Copy