JOHANA 8
8
Inrênu an man thu
[ 1Jisua chu Oliv tlângah a fe a. 2Atûk zîng takah khan Tempilah a lût a. Mihei rêng rêng a ziangah an hong a; khanchu, â ṭhung a, anmani ân risei tâk a. 3Dân inriseituhei neh Farisaihei khan nupangnu, ân rê lâi taka an iman an hong ṭhui a, mipui maah an inngîr a. 4Jisua ziangah, “Minriseitu, hi nupangnu hih ân rê lâi taka kin iman a nit. 5Kin Dân, Mosia thupêkin chu lunga dêng that rang a nit a, nangman teh im ni ti?” an ti a.#Lev.20:10; Dn nik.22:22-24. 6Amakhah amah an dem theina ranga ama fiana an iti a nit. Khanniseh, Jisua khah â khûn a, a kutṭimin rinêng arziak a. 7Khante, iding puma ṭong an irdon angkan a hang tang a, an ziangah, “Nin lâia sual nei ino takin lungin dêng masa rei,” a ti a. 8Khanchu, â khûn nôk a, rinêngah #8:8 Mss ṭhenkatah, ‘an sualna arziak,’ iti a nit. arziak nôk ngir a. 9Khante, kha ṭong khah an riatin chu khat khatkan a ulian indônin #8:9 Mss ṭhenkatah, ‘a naipang tak idênin,’ iti a nit. an rot riai tâk a. Khanchu, Jisua kha a khâtin an mâk rak tâk a, nupangnu â dingna ngira ding ṭian neh khan bang an om tâk a.
10Khanchu, Jisua kha a hang tang a,#8:10 Mss ṭhenkatah ‘Nupangnu ban chu tute mu khâi mak a,’ iti a kop. nupangnu ziangah khan, “Taktiang im an iom tâk? Tutên thiamno nang inchang mak na?” a ti a.
11Nupangnu khan a sâm a, “Epu, tutên thiamno nen chang mak e,” a ti a.
Jisuan a ziangah, “A ṭhat, kei khomin thiamno nang inchang mang e. Fen la, atûn ata chu isual nôk khâi no roh,” a ti a.]#7:53—8:11 Mss itam takkah neh ilet masaah khan hi thu hih omak. Ṭhenkatah chu hi thu hih Joh.21:24 zoiah an sia a, ṭhenkatah chu Lk.21:38 zoiah an sia; Mss khatkatah chu Joh.7:36 zoiah a sia.
Jisua, rammual vâr
12Jisuan Farisaihei ziangah thu â sîr nôk a, “Keimah rammual vâr ki nit. Tukhom ne zui chu ringna vâr nei an ta, izîngah lêng tlak no nih,” a ti a.#Mat.5:14; Joh.9:5; 12:35.
13Farisaihei khan a ziangah, “Mahni thurchi kêng ni îsîr, ni thurchi sîr hi idik mak e,” an ti a.#Joh.5:31.
14Jisuan an ziangah, “Mahni thurchi ki îsîr ni khom sela ki îsîr hih â dik a nit. Keiman chu ki zuang rithokna neh ki fena rang khom ki riat a; nangmanin chu ki zuang rithokna neh ki fena rang reh mak chei. 15Nangmanin taksa dânin nin rêl ngai a, keiman chu tute thu rêl ngai mang e. #Joh.7:24. 16Ki lei irêl khom ni sela, ki thu rêl chu idik a ti, keima khât banga rêl ki nit no sikin; Pa ne tirtu khah ki ziangah ai om a nit. 17Nin Dân lekhabuah khom riatpuitu inika ṭong chu â dik a nit iti riziak a nit kha.#Dn nik.19:15; Mat.18:16. 18Keiman mahni thurchi ke sîr a, Pa ne tirtu khomin ki thu a ne iriatpui sa a nit,” a ti a.
19Anni khan a ziangah, “Takâm ni Pa chu?” an ti a.
Jisuan a sâm a, “Nangmanin ne reh mak chei, ki Pa khom reh mak chei. Nin ne iriat ni sela chu ki Pa khom reh tâng nin ti,” a ti a.
20Jisuan hi thu hih Tempila tholôm bôm an siana munah ân risei lâia ai ti a nit. Ama zoro a la tlung no sikin tutên ani khah an iman ino a nit.#Mk.12:41; Joh.7:30.
Ki fena rangah fe thei no tin u
21Khante, Jisuan an ziangah, “Kî fe rang tâk a nit, nangmanin ne zong nin ta; khanniseh, nin sualnaah khan thîng nin ti. Ki fena rangah fe thei no tin u,” a ti nôk a.#Joh.7:33.
22Juda ulianhei khan, “‘Ki fena rangah fe thei no tin u,’ ai ti hih ama khâtin rithat ai tum mani?” an ti a.
23Jisuan a sâm a, “Nangni chu hi rammuala mi nin nit. Kei chu chungtianga rithoka zuang ki nit. Nangni chu hi rammuala rithoka hong isuak nin nit a, kei chu hi rammuala rithoka hong isuak ni mang e. 24Khasikah khan a nit, ‘Nin sualnaah khan thîng nin ti,’ nangni kî ti a nit. ‘Ki nit’ kî ti hih nin iam non chu nin sualnaah nin ithi ngêt rang a nit,” a ti a.
25Anni khan, “Tûm nî nit,” an ti a.
Jisuan, “A tîra rithokin nangni ki îril tâk ni mak im a? 26Nin chungchângah hin isîr rang neh demna rang itam takkah ki nei. Îkhom ni seh, ne tirtu chu mi dik tak a nit a, a zianga rithoka kî riat bang khah rammual ki îril ngai a nit,” a ti a.
27Jisuan an ziangah Pa thurchi a îsîr a nit iti reh mak a. 28Khasikin, an ziangah, “Miriam Naipa hih nin ikhâi tikah keimah ki nit iti neh keima richamin îte tho mang a; nikhomseh, Pan a ne îril kah ki îsîr a nit iti reh tâng nin ti.#Joh.3:14; 12:32. 29Ne tirtu chu ki ziangah a om a, keima khât banga om rangin ne marak ngai mak; a lungdo ki sin mai ngai sikin,” a ti a.
30Kha thu Jisuan a îsîr khah mi itam takkan an riat a, amah an iam tâk a.
Thutakin nangni inzalen a ti
31Khanchu, Jisuan ama iamtu Judahei ziangah khan, “Ki thu nin zômin chu ki kôilôm diktak nîng nin ti;#Joh.15:7; 2 Joh.9. 32thutak riang nin ta, thutak khan nangni inzalen a ti,” a ti a.#Rom.6:18,22; Gal.5:1.
33Anni khan a ziangah, “Abrahama richi kin nit a, tute suakah la om ngai mang ung e. ‘Nangni inzalen a ti,’ ingkana ni tîm ai nit?” an ti a.#Mat.3:9; Lk.3:8.
34Jisuan an ziangah, “Thudik nangni ke ril, tukhom sual isin kangân chu sual bôi an nit. 35Suak chu insungkuaah kop kumkhua ngai mak; naipa chu kumkhuan a om mai ngai.#Riph.21:10; Gal.4:30. 36Khasikin, Naipan nangni ân zalenin chu zalen tak tak tâng nin ti. 37Abrahama richihei nin nit iti ki riat; nikhomsela, ki thu nin iham no sikin nangmanin ne that nin itum a nit. 38Keiman Pa zianga kî mu khah ke sîr a, nangmanin chu nin pa nangni ril lamin nin isin ngai a nit,” a ti a.
39Anni khan, “Kin Pa chu Abrahama a nit,” itin an sâm a.
Jisuan an ziangah, “Abrahama nai diktak nin init ni sela chu Abrahama lei sin lam angkah takin nin isin rang a nit. 40Ki sintho tâkhei rêng rêng chu Pathian zianga thutak kî riat nangni ril hi a nit; khanniseh, atûnah hin ne that nin itum a nit. Abrahaman chu hingka hin tho ngai mak e. 41Nangmanin chu nin pa lei itho ngai khah nin itho a nit,” a ti a.
Anni khan, “Pathian bang hi kin Pa neisun a nit, keini hih a nai diktakhei kin nit” itin an sâm a.#Dn nik.32:6; Isa.63:16; 64:8.
42Jisuan an ziangah, “Pathian nin Pa a nit titakin chu lung nin ne thlung rang a nit; Pathian zianga rithoka zuang ki nit sikin atûnah hin nin lâiah kî om a nit. Keima richama zuang ni mang a, ne tirtu richama zuang kêng kî nit. 43Ithôm ki thu sîr hih nin riatthiam thei tlak no? Ki thu sîr nin ringaitua thei no sika a nit. 44Nangni chu nin pa Diabola naihei nin nit a, nin pa lungdo sin nin inuam a nit. Ani khah a tîr ata mi that ngai a nit a, amaah khan thutak a omno sikin thudikah iding ngai mak. Milak a rilin amah-a suak khah a îsîr a nit, milakpa a nit sikin milakhei tinrêng pa khom a nit. 45Khanniseh, keiman thutak ke sîr sikin nin ne iiam ino a nit. 46Nin lâiah tûm sualna tianga thiamno nen chang thei nin om? Thutak ke sîr khomin ithôm nin iam thei no? 47Pathian zianga rithoka zuangin chu Pathian thu â ham ngai a. Nikhomseh, nangni chu Pathian zianga rithoka nin nit no sikin ki thu khom nin îham ino a nit,” a ti a.
Jisua neh Abrahama
48Khante, Judahei khan a ziangah, “Samari mi, ramrili iman ni nit kin iti khah kin itîn dik ni mak im a?” an ti a.#Joh.13:1; 16:28.
49Jisuan an ziangah, “Ramrili iman ni mang e. Ki Pa ki chôiinrisâng a, nangmanin nin ne îsîrinsiat a nit hih. 50Keima roinpuina rang izong ni mang; khannisela, â zongtu khatkah a om a, ani khah â rêltu chu a nit. 51Thutak nangni ke ril, tukhom ki thu zôm chu thina ritem tlak no nih,” a ti a.
52Judahein a ziangah, “Atûn chu ramrili iman ni nit iti kin riat infel tâk. Abrahama a thi tâk a, zânthlahei khom an thi zoi tâk a, nangmah lakin chu, ‘Ki thu zôm chu thina ritem tlak no nih,’ ni ti a. 53Kin chibul Abrahama nêkan nî roinpui ual mani? Ani khom a thi tâk, zânthlahei khom an thi zoi tâk; a tukhôkin im ni irbe hi?” an ti a.
54Jisuan a sâm a, “Mahni chôiinrisâng ni ngân inlang chu kha chôiinrisângna khah îte ni no nih. Kin#8:54 Mss ṭhenkatah ‘kin’ iti kop mak, a ṭhenah ‘nin’ iti a nit. Pathian nin iti, ki Pa khah ne chôiinrisângtu a nit.#Riph.3:4; 1 Joh.3:8. 55Nangmanin chu ani khah reh mak chei, keiman chu kî riat a nit. ‘Ani khah reh mang e,’ ki tin chu nangmani angkan milak kî nit rang a nit. Nikhomsela, ani khah ki riat a, a thu khom kî zôm ngai a nit. 56Nin chibul Abrahama khah ki zuang nikhua mu rang a nit sikah khan a râi a fân tak tak a; khaangkan, imu khom a mu ngêi a, ai lôm tak tak a nit,” a ti a.
57Anni khan a ziangah, “Kum sôm ringa lua la kâi loi chen Abrahama nî mu na?”#8:57 Mss ṭhenkatah ‘Abrahaman nang ai mu na?’ iti a nit. an ti a.
58Jisuan an ziangah, “Thudik nangni ki îril a nit, Abrahama inzir ma khomin ki om tâk,” a ti a.
59Khanungchu, ama dêngna rang lung an rût a; nikhomsela, Jisua arbîk a, Tempil ata khah a suak tâk a.
Currently Selected:
JOHANA 8: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
