RIPHUTNA 28

1Khanchu, Isaka khan Jakoba kha a koi a, chibai â tûk#28:1 Isaka hin ‘Salom’ a lei ti a, ‘Ni ziangah thlangamna om riseh’ tina a nit. a, hingka hin he a be a, “Kanan nungâkhei hih nupuiin ni nei rang ni mak. 2Thoi inla, Mesopotamia rama ni pu Bethuela inah fen la, ni nu ṭapa Labana nainuhei lâia mi nupuiin va nei roh. 3Pathian Tinrêngthothei khan ṭhat nang lei vur a ta, nam dang dang itam takkahei pa ni hong nit theina rangin richi itam takka neiin, nang inpung riseh. 4Abrahama ṭhat ai vur angkan nangmah neh ner chihei chu ṭhat nangni vur sela, Pathianin Abrahama zianga ai pêk, ni mikhualna ram hi nei roh,” a ti a.#Riph.17:4-8. 5Khanchu, Isaka khan Jakoba chu a tir tâk a; Mesopotamia rama Jakoba neh Esauva nu Rebeki ṭâpa Suria mi Bethuela naipa, Labana ziangah khan a fe tâk a.

Esauvan nupui dang a nei

6Esauva khan Isakan Jakoba khah ṭhat a vur a, nupui inei rangin Mesopotamia ramah ân fe iti neh, ṭhat a vur lâia, “Kanan ram nungâkhei hih nupuiin ni nei rang ni mak,” itin â ril a, 7Jakoban a nu neh a pa thu ôiin Mesopotamia ramah a fe tâk iti a riat a. 8Khasika khan Esauva khan Kanan nupanghei khan a pa Isaka lung in ôi mak iti a riat tâk a. 9Khanungchu, Esauva khah Ismaela ziangah a va fe a, a nupui nei sa banah Abrahama naipa Ismaela nainu Mahalathi, Nebaiota farnu khah nupuiin a va nei nôk a.

Bethel muna Jakoba rimangphan

10Jakoba chu Beersebaa rithokin a suak a, Haran khua tiang a pan tâk a. 11Mun khatkah a hang tlungin chu inî a tlâk tâk sikin amakhan a riak tâk a; lung khatkah a lâk a, a lukhamin a mang a, a zâl tâk a. 12Rimang a phan a, rinênga rithoka rivân isun dapa rikal a hong rido a mu a, Pathian Vântirtônhei kha an zuang ṭumin an hang lui a.#Joh.1:51. 13Pumapa kha a kôlah â ding ṭian a, “Keima hih Pumapa, ni pu Abrahama Pathian, Isaka Pathian chu ki nit; ni zâlna rinêng hih nangmah neh ner chihei kî pêk rang a nit. 14Ner chihei khah rinênga ṭiai zâkah nîng an ta, sak neh thlang, sim neh mârah hong indar an ti; nangmah neh ner chiheiah khan rammuala nam tin ham la ṭhâng a ti.#Riph.12:3; 22:18. 15Ringai roh, nang ompui mai ki ta, ni fena kipah nang donsui mai ki ta, hi ramah hin nang hong ṭhui ikhîr nôk ki ti. Ki ṭonginkung hih thluan ken tlung mâkah chu nang ithla tlak no ning e,” a ti a.

16Jakoba khah a hang ṭhangin chu, “Hi munah hin Pumapa chu ai om ngêt a nit hi; ki lei iriat ino a nit,” a ti a. 17Khanchu, iṭin ân thing a, “Hi mun hih mun inrît a nit hi te, Pathian in kêng a lei init, rivân fena kotbâi chu a nit hi,” a ti a.

18Khanchu, Jakoba khah zîng takah a thoi a, a lunglukham khah a lâk a, lungphunin a phun a, a sîpah khan siriak a buak a. 19Kha mun rimingah khan “Bethel”#28:19 Bethel iti hih ‘Pathian in’ tina a nit. a be a; a tîrah khan chu kha muna khua om riming khah Luz a nit. 20-21Khanungchu, Jakoba khan ṭong arkhâm a, “Pathianin a ne ompui a, hi ki khual inzinna a hin a ne donsui a, fâknêk neh silbom a ne pêk mai a, ki pa inah thlangam takka ki kîr nôkin chu Pumapa chu ki Pathian nîng a ta. 22Hi ki lungphun khom hih Pathian in nîng a ti; khante, ni thil ne pêk murdiah khan sômka khatkah nang pe ngêt ngêt ki ti,” a ti a.

Currently Selected:

RIPHUTNA 28: BIATBSI

Highlight

Copy