TIRTÔNHEI SINTHO 18

Paula Korinth khuaah

1Kha rizoiah khan Paula khah Atheni a mâk a, Korinth khuaah a fe tâk a. 2Amakhan Juda mi khatkah arming Akuila a mu a, ani khah Ponto rama suak a nit. Rom.rêng Klaudian Juda murdi Rom.khua ata a ûmisua vang sikin Akuila khah a nupui Priskili neh Itali rama rithoka hong rithon phing an nit. Paula khan an ziangah a lêng a, 3khahei khom khah ama angkana puan in isiam ngai an nit sikin an ziangah a om a, munkan sin an tho a tâk a.#TS.20:24; 1 Kor.4:12; 2 Kor.11:7-9; 1 Thes.2:7. 4Sabatnî tin inkhôm inah thu ân ritukpui ngai a, Judahei neh Grikhei khah inrethiam itumin zâl a song ngai a.

5Sila neh Timothea kha Makedonia rama rithokin an zuang tlung tenan chu Paula khah thusîr ringotin a zoro a mang tâk a; Jisua chu Mesia a nit iti Judahei ziangah a rilfia ngai a. 6Khannisela, Judahein an doi a, an isîrinsiat a; khanungchu, Paulan a puana vâivut â thing a, an ziangah, “Nin thi khomin nangmanin a mo pêl rei, kei chu kî hûl a nit. Atûna rithokin chu Jentailhei tiang ngat tâng ki ti,” a ti a.#TS.13:46; 20:26. 7Khanchu, khantak ata a suak a, Jentail mi khatkah arming Tita Justa inah a lût a, kha mi khah Pathian ngaisak mi tak a nit a; a in khom inkhôm in neh artôn ṭian a nit. 8Inkhôm in ruaitu Krispa neh a insung mihei murdi khan Pumapa an iam a. Korinth khuaa mi tam takka khomin thu an riat a, an iam a, baptisma an chang tâk a.#1 Kor.1:14.

9Zânkah chu Paulan inlârna a mu a, Pumapa khan a ziangah, “Ṭi no roh, ringam loiin thu isîr mai roh. 10Keimah ni ziangah ki om mai sikin nang innah rangin tutên ni chungah kut tlâk no nih; hi khuaah hin mi itam takkah kî nei a nit,” a ti a.#Jos.1:5,9; Isa.41:10; 43:5; Jer.1:8. 11Khanchu, Paula khah kha khuaah khan Pathian thu inriseiin kumkah neh kum rilangkah a om tâk a.

12Khante, Galioa khah Akaia rama Ram-optu a chang lâiin Judahei an inruala Paula an man a, roirêlnaah an ṭhui a. 13“Hi mi hin kin dân ni noa Pathian chubai iûn rangin mi a îthlêm ngai a nit,” an ti a.

14Paula khan isâm a tum a; nikhomseh, Galioa khan Judahei ziangah, “Judahei, ama thil hih pualoina thu manih, thonsual itho thu manih ni sela chu nin thu nangni kî ngaitua pêk rang a nit. 15Khannisela, thuhei, riminghei neh nin dân chungchânga rikhalna thu kêng a nit a, nangmanin rêl rei. Keiman chu khangkana thilhei kha chu rêl no ning e,” a ti a. 16Roirêlna muna rithokin â sua riai tâk a. 17Khanchu, an rêngkan an inkhôm in ruaitu Sosthena khah an man a, roirêlna mun kottualah khan an itôk a. Kha khom khah Galioa khan iten ringai viat mak a.

Paula Antiokeiah a kîr

18Kha nungah khan Paula khah sûn itam takkah a la châm a; kha rizoiin chu iamtuhei â thla a, Suria ram tiang rikuangin a fe tâk a, a ziangah Priskili neh Akuila khom an fe sa a. Paulan ṭonginkung a lei nei sikin Kenkriai khuaah chu an rithok nôk man a sam a la ep a.#TS.21:24; Rit.6:9,18. 19Khanchu, Efesi khua an tlung a, amakhan Priskili neh Akuila kha a mâk a; ani chu inkhôm inah a lût a, Judahei khah Pathian thu ân ritukpui a. 20Anni khan la châm ual rangin an ngên a; khanniseh, iham mak a. 21“Fe khom inlang Pathian lungdo a nitin chu nin ziangah la hong nôk ki ti,”#18:21 Mss ṭhenkatah, ‘Jerusalemah Kalkan Kût kî mang rang a nit,’ iti a kop. itin ṭong ihoiin â thla a. Khanchu, Efesi ata khah rikuangin a fe tâk a. 22Kaisari a tlung a, Jerusalemah a fe tâk a, koindang chibai a bûk a; kha rizoiin chu Antiokeiah a fe tâk a.

23Amakhan sûn itam takkah a châm nungin a fe nôk a, Galatia ram neh Frugia ram arfang suak a, iamtuhei murdi kha ân det thiai a.

Apolovan Efesi neh Korinth khuaah thu â sîr

24Kha lâiah khan Juda khatkah, arming Apolova, Alekzandria khuaa suak kha Efesi khuaah a zuang a. Ani khah thusîr ithiam tak a nit a, Pathian thu ria tak a nit. 25Ani khah Pumapa lampui thu lei inrisei tâk a nit a, ṭhatnemringai takkan Jisua thurchi ifel takka sîrin mi ân risei ngai a. Nikhomsela, Johana baptisma bang a lai riat a nit.#TS.19:3. 26Inkhôm inah ihâi takkan thusîr a phut a, Priskili neh Akuila khan a thusîr an riatin chu an inah an ṭhui a, a ziangah Pathian Lampui thu ṭhatnemringai takkan an rilfia pêk a. 27Khante, Apolova khan Akaia rama fe a tum iti an riatin chu Efesia iamtuhein an ithor a, amah an lei lôm theina rangin Akaia rama iamtuhei ziangah lekha an riziak pêk a. A zuk tlungin chu Pathian lungkhamna sika iamtu hong ichanghei ta rangin ṭangpuitu ṭha tak a chang a. 28Vântlâng riatah Judahei khah a sêlindong ngai a, Pathian Thubu mangin Jisua chu Mesia a nitzia a înlang pêk ngai a nit.

Currently Selected:

TIRTÔNHEI SINTHO 18: BIATBSI

Highlight

Copy