TIRTÔNHEI SINTHO 17

Thesalonika khuaa buaina

1Khante, Amfipolis neh Apolonia an khêl a, Thesalonika khua an tlung a, amakhan Judahei inkhôm in a om a. 2Paula kha a tho ngai lam angkan inkhôm inah a lût a; Sabatnî thumkah Pathian Lekha Thua rithoka iṭha takka sûtpuiin, 3Mesia chu thina tuang rang a nitzia neh thina rithoka thoinôk rang pial a nitzia irilfian ân lang ngai a. “Hi Jisua, a thurchi nin lâia kin înpuang hih Mesia a nit,” a ti ngai a.#Lk.24:26. 4Khanchu, an lâia mi ṭhenkan an iam a, Paula neh Sila kha an zom tâk a. Pathian ngaisak Grik mi itam takkah neh nupang inlâr itam takkah khomin an zui sa tâk a.

5Khanniseh, Judahei khan an narsa a, tolâia mi chanlamboi rivâk vêlhei khah an koibûm a, lômin an siam a. Kho pumpui an inbuai a, Paula neh Sila khah vântlâng makunga ṭhui itumin Jasona in an hong hum a. 6Nikhomsela, anni khah mu mak a, Jasona neh iamtu ṭhenkahei khah kho ulianhei makungah zâlrâtin an hong ṭhui a, an ikhêk a, “Hi mihei hin mun tinah buaina an siam ngai a. Atûnah hin ei khuah an hong a,#TS.16:20. 7Jasona hin a inah a lei ithlun a. Hihei hin an rêngkan, ‘Rêng dang a om, arming chu Jisua a nit,’ itin Kaisara dânhei murdi an îkal ngai a nit,” an ti a. 8Kha thu khan kho ulianhei neh mipuihei khah ân buai tak tak a. 9Kho ulianhei khan Jasona neh a champuihei khah an richo a, an isua tâk a.

Beroia khuaah Paula neh Sila

10Iamtuhei khan kha nî zân zelin Paula neh Sila khah Beroia khuaah an infe zel tâk a. Khante, an va tlungin chu Judahei inkhôm inah an lût a. 11Khan taka mihei kha chu Thesalonika mihei nêkan chu an lungril ar-ong ual a. Thu khah itui takkan an ringai a, Paula thusîr khah â dik neh dikno fiana rangin nîn tin Pathian Thubuhei an risei ngai a. 12Khahei lâia mi tam takkan an iam tâk a, Grik nupang milian itam takkah neh ipa itam takkah khomin an iam tâk a. 13Khanniseh, Thesalonika khuaa Judahei khan Paulan Beroia khuaah khom Pathian thu â sîr iti an riatin chu an va fe a, mipuihei an ithor a, an inbuai nôk tâk a. 14Khanchu, Paula khah tuipui idênin rikuanga fe rangin iamtuhei khan an zu thak zel tâk a. Sila neh Timothea chu an la châm mai a. 15Paula zu thaktuhei khan Atheni dênin an fepui; Sila neh Timothea khah â rang thei dôrka a zianga hong rangin ṭongricha ân chôi a, an kîr nôk tâk a.

Atheni khuah Paulan thu â sîr

16Khante, Paulan Atheniah anni khah a lei ngâk a, kha khua khah mirmila sip a nit iti a mun chu a lungril ân nat tak tak a. 17Khanchu, inkhôm inah Judahei neh Pathian ngaisaktu Jentailhei khah Pathian thu ân ritukpui ngai a; vântlâng ribûmnaa honghei khom ai mu kangân chu nîn tin thu â sîrpui ngai a. 18Khante, Epikuria mi ṭhenkah neh Stoik mi vâr ṭhenkahei khomin an hong risêlpui a. Ṭhenkan chu, “Hi mûrthiampa hin im a îsîr hi?” an ti a.

Jisua thu neh thoinôkna thu â sîr sikin ṭhenkan chu, “Nam dang pathianhei thu a îsîr nîng a ti hite,” an ti a. 19Khanchu, Paula khah an ṭhui a, khopui roirêlna Areopagiah khan an fepui a; a ziangah, “Hi inriseina thar ni îsîr hih â ria kin nuam. 20Ni îsîr kin iriathei hih thil danglam tak a nit a; khasikin, kha thil omzia khah â ria kin inuam a nit,” an ti a. 21Atheni kho mi murdi neh kho dang mi a zuang iomhei khomin an zoro nei murdi thil ithar isîrna neh ringainaa mang an nuam ngai a.

22Khante, Paula kha khopui roirêlna Areopagi maah khan a ngîr a, â sîr a, “Nangni Atheni kho mihei, lam tinrêngah sakho mi tak nin nit iti ki riat. 23Nin khosungah ki lêng malamin chubai nin iûn ngaihei ki en a; mâichâm khatkah, a chunga, ‘Riat loi Pathian ta rang,’ itia riziak ki mu a. Nin iriat ino chubai nin iûn mai ngai khah atûna keiman nangni ki hong îsîr pêk hih a nit. 24Pathian, rammual neh a sunga thil tinrêng isiamtu chu, rinêng neh rivân Pumapa a nit sikin kuta sin Tempilheiah om ngai mak. 25Miriamin ei sem rang thil îte khom risam mak e. Amah ngêi khah tinrêng zianga ringnahei, rithuakhei neh thil tinrêng ipetu a nit. 26Rammual pumpuia om rangin chibul khatka #17:26 Mss ṭhenkatah, ‘thisen ri-ang,’ iti a nit. rithokin nam tin a siam a. An ta rangin hun bihei a khit pêk a, an omna rang ramrîhei a khang pêk a. 27Hi a thona bi chu amah an zong an zong a, an mu thei ṭôkna ranga a nit. Khannisela, Pathian khan tute ne lat ual mak a.#Isa.55:6.

28“‘Ama sikin ei ring a, ei châng a,

ei iom a nit,’ itia an îsîr angkah khan.

Nin lâ phuatu ṭhenkah khomin

‘Eini khom a naihei ei nit’ itia an îsîr angkah kha a nit.

29Pathian naihei ei nitin chu Pathian khah rângkachakin manih, tangkarua manih, lungin manih, miriam kutthiam neh roisaka mirmil an isiamhei manih angkana om rangin ei ringai rang ni mak e.#Riph.1:27; 1 Kor.12:2. 30Khangkana Pathian ei riat no lâihei kha ani khan riano pelêm a tho a; nikhomsela, atûn chu ram tina mi murdi rilet rangin ai ti tâk a nit. 31Rammual pumpui hi idik taka roi a rêlpêk zoro rang nikhua a khit diam tâk a; â rêltu rang khom ân kung tâk: mi tin riat rangin kha mi khah thina rithokin ai kâiithoi tâk a nit,” a ti a.#Lap.96:13; Rom.10:4.

32Khante, thina rithoka thoinôkna thu an riatin chu, ṭhenkan an nuiso a; ṭhenkan chu, “Hi thu hih ni ziang ata ringai nôk kin inuam a nit,” an ti a. 33Khanchu, Paula khah an lâi ata a suak tâk a. 34Ṭhenkan chu Paula khah an zui a, an iam tâk a. Khahei lâiah khan Areopagia roirêltu lôma mi Dionusia neh nupang khatkah arming Damari neh mi dang itam takkah an iṭang a nit.

Currently Selected:

TIRTÔNHEI SINTHO 17: BIATBSI

Highlight

Copy