LUK 5

Jisuke Tomlenpoonam Luyilsuna Kídíe

(Mt 4:18-22; Mk 1:16-20)

1Longe konem Jisu bí Gennesaret#5:1: Depe emnamde Galil Siyénge. Sine paatang robelo Shédíke agomem pobo namem talla bím gargong bomna miti milingem dakbosula dakdungem, 2asi sibe delo esab kuuna kídíeke etkungem annyiko metula buluke esabem puubíndope bí kaato. 3Etkung annyi delokke Simonke etkudelo bí reesala, asi arang danpe anyongko yudadope bulum poto. Delo bí etkudelo duudola ami kídíem ngiitomem poyilto.

4Bíkke ngiitomem poyinrongem, Simonme bí “Etku sim asi eeríkolo yudala esabem kuulíktola” emto.

5Simon bí poyansuto, “Saare, ngolu yoh rubungem kuulate atíkote kuupamang. Idokom nok agompe kungkíyé.” 6Bulu dekepe itoname, deddína enguem kuula buluke esabe bédgepe ikai. 7Dekepe iname bulu etkung konlo duuna angong kídíem iguldope ruuto, delo bulu aala etkudelo bíísétko yarname etkude giilum gepe ito. 8Simon Pitor bí dem kaayédem Jisuke keralo lebíng koníla poto, “Ruutume, no ngokke kerasokke gíto langku; ngo paabna amiko!”

9Kapeila bílang bíkke angong kídí takame buluke deddípe kuunam enguem kaala irisinyo kísape mííto, 10delokke dekepe Jebedike oo Jems lang Joan bínyi, delokke Simonke yéjon kídí dete irisinyo kísape kaato.

Delokrongem Jisu bí Simonme, “Pesomapeka, supak kelokke no amiem kuuyé,” emla pokai. 11Dekepe iname bulu etkung annyidem sibelo yudang langkula atí takamem mesu geyéla bíkkíng gímín geto.

Amikonem Jisuke Ipíkuname

(Mt 8:1-4; Mk 1:40-45)

12Longe konem Jisuke taonkolo yégo dungem, tííd gena amikone bíkkíng aato. Bí Jisume kaayéname, lebíng koníla, “Ruutume, nokke míísang emílo, no ngom deemo laayéku,” emto.

13Jisu bí alage meetardola amidem ukkíto. “Ngo míísadung, deelangkuka!” bí emto. Delo menang asak tíídde bíkke lokke nyokkaku. 14Delo Jisu bí bím “Sékomete pomapeka, idakkom no gíla miriem lengkan sulang kuka delokke nokke aikunamem ami keralo lengkan sudope, Mosike pokampe Shédíkíng amanem bisu tolangku.”

15Depe ilate bíkke agérde pakyape byargoola, deddína amie, agomem tatpe emla, delokke kinamem ipí kosupe emla aato. 16Idola Jisu bí leko leko rongngamko amolo gíla kumsuto.

Pittempe Kina Amikonem Jisuke Ipíkuname

(Mt 9:1-8; Mk 2:1-12)

17Longeko bí ngiitom luyilla dungai, delo Galil lokke, Judialokke, delokke Jirusalem lokke doolung miyolok aana Pharisi kídí ekelang ukil kídíekete duumín geto. Ruutumke pauare kina kídíem ipí dokupe bíkkíng duuto. 18Pittempe kina amikonem amieke ayoko ketpu pakpe jootaksula Jisuke keralo ekum aralo jongadope emla ralkíto. 19Milung aralok jonga bompeko kamang iyédem, bulu ekabem atyala, ami takam gooradelo Jisuke keralo ketpu pakpe joila meto. 20Jisu bí buluke míngkengem kaayédem, bí poto, “Angonge, nokke paab kídíem maab tobong.”

21Pharisi kídíelang ukil kídíe sikepe agí agísue míísu lento, “Sékoi si Shédíme lupéésuna ami si? Sékote paab kídíem maab bilana kamang, Shédí petommin dem iladune?”

22Buluke mííbo lubo sunamem taddola Jisu bí bulum luto, “Kapeila nolu noluke aanglo dekepe míídune? 23Ingkuei pobaa yaname, ‘Nokke paabem maab bito’ emnamdía, ma, ‘Gerepla gítolangku emnamdía?’ 24Depe ina me Tanike Ue tani amoso paabem maab bilanana ralnam kadung emnam dem nolu kéndope emla idung.” Bí pittempe kina amidem poto, “Ngo nom podung, gerepla nokke ketkeng dem joosula gíka langku.”

25Menang asak amikídí keralo tíkrepla bíkke ketpuem laala Shédíme yidge langaala ekumpe gíkaku. 26Takame irisinyope mííla Shédíme yidgeto. Bulu pesue idola pokai, “Silo ngolu kaarí kaanyo atíko kaato.”

Lebime Jisuke Tomname

(Mt 9:9-13; Mk 2:13-17)

27Sok méélampe, Jisuke luyupe lendo kuem, kajanang ulgoona Lebi emnam amikonem bíkke agér iko opislo duupe kaato. “Ngokkíng gímín getola” emla Jisu bí bím tomto, 28delo Lebi bí takamem mesutola bíkkíng gímín geto.

29Delokrongem Lebi bí Jisume agí ekumlo doman dobosupe emla aabotoku. Delokke delo kajanang ulna kídí elang amie bojé kokai bím dobosuto. 30Idakkom Pharisi kídí elang buluke opéé ukil kídíe bíkkelo luyilsuna kídíem, “Kajanang ulna kídí lolang ‘Paab gena’ kídílo nolu kapeila dobo tííbo sudune?” emla ííto.

31Jisu bí bulum poyansuto, “Ekerna kídíde daktor míímang idola kina ami kídí emin daktor míídune. 32Ngo deena kídíem tomkape aamang, idakkom paabna kídíe míílat suyékupe emlamin aadune.”

Domape Nyonam Legangem Pobosuname

(Mt 9:14-17; Mk 2:18-22)

33Bulu bím poto, “Joankelo luyilsuna kídíe leko leko domape nyola, kumsudung delokke dekepe Pharisi kídíke luyilsuna kídíete idung, idola nokke kídísi doyar tííyarla yédung.”

34Jisu bí poyansuto, “Angong kídílokke magbue duumín gedungem bulum dobomape duurom boyénía? 35Idakkom longeko buluke magbuem laapakdíe pííyé; delo bulu domape nyoyé.”

36Bí bulum luyiisunam ngiitom kote pobito, “Sékoteng ege anílok alopko pétla, ege akulo omtem líkna kamang. Dekepe bí imílo ege anídem bétmoyé, delokke ege aníde ege akudelo gyapmang. 37Delokke sékote ayo kaksur akulo onggur alang aníem pílíkna kamang. Bí depe imílo onggur alang aníde ayuem bukkéla, alangde toolenyé delokke kaksurde bukkéyé. 38Ma, aní alangdem aní kaksurlo písiipe aido. 39Delokke aku alangem tíípala sékote aní alangem tíílína kamang, kapeila bí ‘Akusi aiyadung’ empoyé.”

Currently Selected:

LUK 5: adiBSI

Highlight

Copy