LUK 4

Jisume Aro-menam Darkaaname

(Mt 4:1-11; Mk 1:12-13)

1Jisu bí Deena Aidlok bíísétla Jordan korong delok gílentoku delokke mootum moorang amolo Aide gíboto, 2delo bím looying appikope uyue aapí aang langkato. Bí delo longe kídídelo atí doma tíímape yéto, delo méélam yalumdelo bí kenoto.

3Darkaana uyude bím pokai, “No Shédíke Uemílo sim elísim ettípe ikímoto.”

4Jisu bí poyansuto, “Ngiitome podung, ‘Tanie ettíng petomlok turgemang.’ ”

5Delo Piyyang Uyude bím kedonko amolo gíbola delokke tani among tabu sim letellok lengkanboto. 6Delo bí bím pokai, “Nom ngo sim kaanam takam sokke mirem emlang ralnamem biyé, sim ngom bitung, delokke sékomedí ngo bipe mííyéne bím ngo biladung. 7Iname no ngokke keralo lebíng koníla kumsu yémílo si takam si nokkepe iyé.”

8Jisu bí poyansuto, “Ngiitome podung, ‘Nokke Shédí ruutum petomme kumsu langka, bím petom míngke sulangka.’ ”

9Piyyang Uyude bím Jirusalemlo gíbola kumkeng ekum delokke míílong tupnyulo saabo dola poto, “No Shédíke Uemílo sokke no agíe yopyi kítoku 10kapeila Ngiitome podung;

‘Nom aipakpe gakbompena kotokiem Shédí bí políkyé.

11Bulu nom buluke alaglok gakrepyéku,

demamílo nokke alem no elínglo tunyam supelo.’ ”

12Jisu bí poyansuto, “Ngiitome podung, ‘Nokke agíke Shédíme darkang mapeka.’ ”#Pobeng 6:16

13Edílo uyude sim atí takam aapí aang ikaa penamem iyintodí delo moodíkon legape mepala gíkaku.

Galillo Jisuke Agér Ilenname

(Mt 4:12-17; Mk 1:14-15)

14Dekepe irodem Deena Aid pauarlok Jisu bí Galillo entoku, delo bíkke kobore rego miyolo byargongkai. 15Bí buluke kumkeng ekumlo gígoola ngiitomem sikbila takam kelok yidnamem paato.

Najarethlo Jisume Míípakname

(Mt 13:53-58; Mk 6:1-6)

16Bí bíkke siisangko Najarethlo gíla Sabbath longelo kumkeng ekumlo bíkke iyasupe gíto. Delo bí poripe emla gerepto. 17Shédíke Kaaluna miri Isaiahke kitabem bím bito. Dem sorkaala sikepe atnamsim paato.

18“Ruutumke Aide ngokkelo dung.

Kapeila bí ngom ngiitomem opan kídílo pogoo bidope tosaktung.

Bí ngom pateklo duuna kídíem delokke mingmanem kaapa dokupe,

iréénam kídíem mopít dokupe emla pogoodope lulíkto.

19Delokke Shédíke ipít díku longem pokan bidope lulíkto.”#Isa 61:1-2

20Delokrongem bí kitabdem leklumla amidem bilat supa langkula dungatoku. Kumkeng ekumlo duuna miyode bím kanggapto, 21delo bí sikepe bulum polen boto, “Silo si dooying agomsi noluke tatkolo arokai.”

22Delokrongem takamde bím yitto delokke bíkke aiana agomem tatla bulu tarí tannyo kísarupe tatto. “Si Josephke oo mangía?” emla bulu ííbosuto.

23Jisu bí bulum pokai, “Berokrupe nolu ngom so agom so pokesuyé! ‘Daktor no agísue ipí sulangka! Nokke Kapernaumlo inamem ngoluke tatnam kídí emkom agí doolunglo ilangka.’ ”

24“Nolum ngo aruem podung” emla bí pongundola poto, “Kaaluna miriem sékomete agí doolulo aipe torík sumang, 25Tatgaptola, Elijahke longelo dítag angum kolang poolo akkéko pedong oimape dírí kenue botterupe iduem, Israello bojéko meyéngpe ine kato. 26Idakkom Elijahme buluke aralo séko kíngkom melíkmato, idola Sidon amolo duuna Sarepta doolung lokke meyéng atel kolomin melíktone. 27Delokke Kaaluna miri Elijahke longedelo Israello tííd gene bojéko kato, idakkom sékometeng ipímato, idola Siria lokke Naaman petom memin ipítone.”

28Dem tadrongem kumkeng ekumdelo duuna ami takame marto. 29Bulu gerepla, taon luyulo gílen bolangkula taon delokke dungko yorbe delok nííbongkupe emla míídola teyodelo saaboto. 30Idokom bí buluke pénsamlok pénnyok langaala gínyoktoku.

Urompe Tumna Amiko

(Mk 1:21-28)

31Delokrongem bí Kapernaumlo enla Galil lokke taonkolo gíto. Sabbath longelo amikídíem bí ngiitom luyil polen bokai. 32Bulu bíkke ngiitom pobonamem tatla tarí tannyo kísarupe tatto, kapeila bíkke agom dem miramrupe bí poto. 33Kumkeng ekumdelo uyupe tumna amiko deemana aid duubom namko kato. Bí goktoola pokai, 34“Ei, Najareth lokke Jisu no ngolum ingkoko ipe emla aadune? No ngolum nyokmope emlangía aadune? No sékodí ngo kéndung. No Shédíke Deena Amiko!”

35Delo Jisu bí “Asoope duulangka, amisok lento langku” emla ralnampe luto. Delo uyude amidem ami takam keradelo amolo gelet geyéla tarí iketmape gíkaku.

36Dem kaana ami takame irisinyo kísarupe kaala mipil miyonge pobosukai, “Sikena agomsi ingkuei? Ralnam loklang pauarlok bí uyuem hukum bila len géédokupe idune!” 37Delokrongem bíkke legange ayir agong takamlo byargongkai.

Amiem Bojéko Jisuke Ipíkuname

(Mt 8:14-17; Mk 1:29-34)

38Jisu bí kumkeng ekum delokke gílen langkula Simonke ekumlo gítoku. Depe iduem Simonke ayode ramnam kila duudo, delo bulu kinamdem monpakla iguldope Jisume roguto. 39Depe iname bí gubadola ramnam dem lutoname, delo de nyokkaku. Bí menang asak darep langkula bulum ibo saabotoku.

40Doonyie uadodem, séko buludí atí atí kina ramna kídíem aabotone, bulukíng Jisu bí agí alage leetanla kinamem ipítoku. 41Uyue ayokon kinamlok “Nomino Shédíke Ue” emla gokdola lenkaku. Idakkom bí bulum lutumto delokke bulum agom pomomang, kapeila bí Kristo emla bulu kénto.

Kumko Musuplo Jisuke Dooying Pogooname

(Mk 1:35-39)

42Píange iyédem Jisu bí rongngamko among kolo gílento. Ami kídíe bím matala bíkke dungkuem kaayédem bí bulum gínyo kumadope emla bulu ralkíto. 43Idakkom bí poto, “Ngo angukon taon kídí lokom Shédíke yéta legangem tatpona ngiitomem pogoo biperung aiyé, kapeila delok legapemin ngom melíktune.” 44Delokrongem bí Judia#4:44: Demangkom Judai kídí lokke among; ayokone “Galil”. lokke kumkeng ekumlo ngiitom poyar boto.

Currently Selected:

LUK 4: adiBSI

Highlight

Copy