JOAN 20

Ago Gorange

(Mt 28:1-8; Mk 16:1-8; Lk 24:1-12)

1Hoptalokke kerayalum longe delo rokomope, kaamo dungadape Mari Magdalini agodelo gíla kaaname goyab delokke elíngem loopaktuupe kaato. 2Dekepe iname bí Simon Pitor kílang Jisuke ayanam luyilsuna akondelo dungaala pokai, “Bulu Ruutumme agolokke leenyok bomkai, delokke bulu bím ingkolo metudí dem ngolu kénmang!”

3Dekepe iname Pitorlang delokke akon luyilsunade agodanpe lento. 4Annyide dukkai, idakkom luyilsuna akonde Pitorme dukpoola agodelo kerape píípooto. 5Bí gubadola delo maayét ege títnam kídíem kaato idokom aralo aamang. 6Delokrongem Simon Pitor bí bíkke méélampe duknade, pííla ago aradelo aato. Bí delo maayét ege títnam demlang 7Jisuke dumponglo yétlík tuanam egedem doodope kaato. Dumponglo yétlík tuanam egede maayét ege títnam delo lekope doomape, kella dongusudo. 8Méélam yalumdem luyilsuna akon, agodelo kerape píípong nadete, aralo aato. Bí kaala arope mííto. 9(Bulu deloope Jisu bí sikolokke gerepyéku emnam Dooying kitab agomdem kénmato.)

Jisuke Mari Magdalinime Lengkan Suname

(Mt 28:9-10; Mk 16:9-11)

10Delokrongem Luyilsuna kídíde agí ekumlo gílat sutoku, 11idola Mari bí luyulo kapla duuto. Bí kapla, agodem kaape emla gubato 12delo yalune ina teyong kotoki annyiko, akone dumpong danlo delokke akone aledanlo ila, Jisuke simang dongko delo duuto. 13Bulu mimedem pokai, “Mime, kapeila no kapdune?”

Mimede poto, “Bulu ngokke Ruutumme laanyokto, delokke bulu bím ingkolo yutodí ngo kénmang.”

14Delo bí ngéngkut sukuname Jisume delo dakdope kaato, idola bí de Jisu bí emla kénmato. 15Bí pokai, “Mime, no kapeila kapdune? Sékome no matadune?” Amide bagan inako emla mííla, bí pokai, “Saare, no bím bomnyok tokumílo, ingkolo no bím leetone ngom pobika, delo ngo bím langkupe.”

16Jisu bí mimedem “E, Mari” emto.

Mimede bíkkídan pela dolangkula Aramaik agomlok kapdola pokai, “Rabbuni” (depe emnamde luyilne), emto.

17Jisu bí poto, “Ngom gakkí mapeka, kapeila ngo Abukelo enku mangada. Dempenem ngokke bíro kídílo gíkala bulum pobitoka, ‘Ngo ngokkelang noluke Abu, ngokkelang noluke Shédí kelo endakku.’ ”

18Mari Magdalini bí sim gelangala luyilsuna kídílo gítoku: “Ngo Ruutumme kaato!” Delo bí Jisuke ponam kídarem bulum pokan bitoku.

Jisuke Bíkkelo Luyilsuna Kídílo Lengkan Sukuname:

19Hoptalokke kerayalum longe delokke adeng delo, luyilsuna kídíe Judai kídíem pesola eyabem yapkar supala duudum sudungem, Jisu bí aala delo buluke gooralo dakdola pokai, “Yéponame nolukíng duulangka!” 20Depe porongem bí bulum bíkke alagemlang ínmuem lengkansuto. Ruutumme kaala luyilsuna kídíde ashérunge ito. 21Jisu bí bulum poto kukéng, “Yéponame nolukíng duulangka. Abue ngom kape melík todí, ngo nolum depe melíkdung.” 22Delokke delo bí bulum ngayab dakla poto, “Deena Aidem laarík sulangka. 23Nolu akonke paabem maabmílo, dem maab bidung; nolu dekedem maab mamílo, dem maab bimang.”

Jisulang Thoma

(Mt 28:16-20; Mk 16:14-18; Lk 24:36-49)

24Supak Thoma (Diduma), midum íying kolang annyi lokke akonde, Jisuke aadodelo luyilsuna kídí delo duumangai. 25Edílo luyilsuna abídde, Ruutumme ngolu kaato emla pobitodí delo bí poyik sukai, “Ngo gojal pítko alagem kaasu madem delokke gojal pítko delo ngokke lakkénge sutkí madem, delokke ngo bíkke ínmo danlo níkké kuem ukkí sumadem, ngo dem aro míímang.”

26Hoptako doorongem bíkkelo luyilsuna kídíde ekumdelo duutoku, delo Thomakom bulukíng duubosuto. Eyab kídíem yapkarla melateng, Jisu bí aala buluke gooralo dakdola poto, “Dengome nolukíng duulangka!” 27Delokrongem bí Thoma me luto, “Nokke lakkénge so sutkítola; ngokke alagem kaatola. Nokke alage ngokke ínmoso ukkítola. Mííne míngo yimape míngke sulangka.”

28Thoma bí Jisume pokai, “Ngokke Ruutum delokke ngokke Shédí!”

29Delo Jisu bí bím poto, “No ngom kaasu kolokmin no míngke sukane; ngom kaasu mapete míngke suna kídí demin gérne.”

Sim Kakot Sim Atgange

30Jisu bí bíkkelo luyilsuna kídí keralo bojéko abíd abíd irisinyo iyodem ibito, dekedem so kitabso atmang. 31Idola sikesim atgade Jisu bímin Kristo, Shédíke Ue, emla nolu míngke suyépe emla, delokke dekepe míngke sukolok nolu bíkke amínlok turnamem paadope emlamino attune.

Currently Selected:

JOAN 20: adiBSI

Highlight

Copy