JOAN 19

1Delokrongem Pilat bí Jisume gakla demmoto. 2Sipaying kídíe taanglok ponam dumlupko bíkke dumpo delo luplíkto. Bulu bím yalína egeko píllík pala 3bíkkíng lennyi lengum gínínla, “Judai kídíke Roje duuyar langka” emla manto. Delokrongem bulu bím mingmolok kítto.

4Lekoda Pilat bí gílen langkula Judai amikídí dem pokai, “Kaatola, ngo bím ajéng gakket penam kaapamang emnam dem nolu kényépe emla nolukíng bím bomlen bidungku.” 5Edílo Jisu bí taang dumlub emlang delokke yalína egem gela lentodí, delo Pilat bí bulum poto, “Sina amide!”

6Ríne kídí elang delokke buluke kotoki kídíe bím kaayédem, bulu, “Bím pansaatoka! Bím pansaatoka!” emla bottepe manbomto.

Idakkom Pilat bí poyansukai, “Nolu bím bomla pansaatoka. Ngokke pedan ngo bím edo luket penam atíyang kamang.”

7Judai ami kídíe lutí bomkai, “Ngoluke ayonko kadung, delokke delok ayon delok lumílo, bí siperung aiyé, kapeila bí agíem Shédíke Ue emsudung!”

8Pilat bí dem tayyédelo, bí mangkam yape pesokai, 9delo bí agí dungko aradelo aatoku. “Ingkolok no aatone?” emla bí Jisume íngkíto, idola Jisu bí agom poyan subimang. 10“No ngom pobi pemang idunía?” emla Pilat bí poto. “Nom melen kupenam demangkom pansaanam pauarde ngokke alaglo dung dem no kénmanía?” 11Jisu bí poyansuto, “Nom teyong telok binako kamangamílo, no ngokke teyolo pauar kamayai. Delok legape ingko amiedí ngom nokkíng melíktune bí nompenem paab ajéng kayadung.”

12Delokke ila, Pilat bí Jisume melenkupe emla ralkítuai, idola Judai kídíde tayyémpe, “No sim ami sim melen kumílo, no Kaisarke angomang. Séko agíem Roje emsududí de Kaisarme akne,” emtí bomkai.

13Pilat bí dem tayyédem, bí Jisume bomlen bido langkula elínglok pínam bisarko dungkolo dungangkai. Dungkeng elíng dem Aramaik agompe “Gabbata” emdung. 14De Gíbong gíídí hoptalok iruudí longelok longe raadang kuai. “Sina noluke rojade” emla Pilat bí Judai ami kídíem pokanto.

15Idakkom bulu, “Bím gígééboto! Bím gígééboto! Bím pansaatoka!” emla goktí bomto.

“Ngo noluke rojem pansaapía?” emla Pilat bí tatkíto.

“Ngolu Kaisarke kékonlo rojayang kamang,” emla ríne kídíe manto.

16Méélam yalumdem Pilat bí Jisume pansaayépe emla ami kídí delo melíkto.

Jisume Pansaaname

(Mt 27:32-44; Mk 15:21-32; Lk 23:26-43)

Dekepe iname sipaying kídíe Jisume gíboto. 17Bí kross em joobomsula Tuklong (Aramaik agompe Golgotha) emnam amodelo gílento. 18So bím pansaato delokke bíkkelo lekope midum annyiko itaksuto. Annyidem kereng eelenlo delokke Jisume raadalo ila pansaato. 19Pilat bí kakotko atla kross delo pítket líkmoto. De sikepe dakkai, NAJARETH LOKKE JISU, BÍ JUDAI KÍDÍKE ROJE. 20Judai ami kídíe bojéko dem porito, kapeila Jisume pansangko amode, taonlokke mongnyo dungai, delokke dem akordem Aramaik loklang, Latin loklang delokke Grik agomlok atla metung. 21Judai ami kídílokke ríne kídíe Pilatme, “‘Judai kídí lokke Roje’” emla atmapeka, emla luyatuai, idakkom, “ ‘Si ami si agíe Judai kídíke Roje emsuto.’ ”

22Pilat bí “Ngo ingkuem attodí attobong” emla poto.

23Edílo sipaying kídíde Jisume pansaatodí, delo bulu bíkke ege galugem laala, tarong appikope pétpan sula, aranglo genamem megeyéla mipile abor atelpe orsuto. De galukde ommape, teyolokke ila tabungem atelkope sumnamkuai. 24“Sim bétmangkom” emla bulu manbosuto. “Sim séko paayédí dem luturi solape,” embosuto. Si sikepe atnam Dooying kitab agomem aromope emla idung.

“Bulu ngokke egem buluke aralo orsuto delokke ngokke galuk

legape luturi soto.”#Miri 22:18 Dekepemin sipaying kídíe itone.

25Kross aníndelo bíkke anedela, bíkke anelokke bírme, Klopake méng Mari bí delokke Mari Magdalini bulu dakdo. 26Jisu bí agí ane dem bíkke ayanam luyilsuna delo dakmín dope kaayédem, bí agí anedem poto, “Ayanam ane simoko nokke ue.”

27Delokke luyilsuna delo “Sina nokke ane” emto. Delokke ila si luyilsuna si anedem bíkke ekumlo gíbotoku.

Jisuke Bínname

(Mt 27:45-56; Mk 15:33-41; Lk 23:44-49)

28Méélamdem, Dooying kitabem aro modope takamem iyinkai emnamdem kénsula Jisu bí “Ngo asi tíílínge” emto.

29Delo onggur alanglok píbíínam edungko dungai, depe iname bulu aséklok siipyak konem onggur alanglo ningnyom líkpala hissop esing aag kolo siipyakdem iklíkpala Jisuke nappalo leesato. 30Dem tíípala Jisu bí “Si apíngkai” emla manpala delo bí dumponge belgípla aapíe bínkai.

Jisuke Ínmuem Níkkéname

31Depe idudelo de iruu saarudí longe, delokrongem longe konde Sabbath longe kootíre. Kapeila Judai ami kídíe Sabbath longelo, simadem krosslo melíkmang; iname bulu aledem dírpala simadem laayipe emla Pilatkíng roguto. 32Depe iname sipaying kídíe aala Jisukíng pansang itak sunam kerangke amidem alem dírto delokrongem akon demteng depe ito. 33Idokom Jisukíng aala bulu bím sidope kaayédelo, bulu bíkke alem dírmato. 34Dem megeyéla sipaying akonde gínínglok Jisuke ínmo delok níkkéla iname delo iyyie lang delokke asie biilento. 35Sim séko amie kaatodí, bí hakii bito, delokke bíkke hakiide arodung. Bí aruem podung emla kénsudung, delokke nolu arope míngke suyépe emla bí hakii bidung. 36Dooying kitab agome aronape sikepe ikai: “Bíkke alongem atel kokom dírmayé,”#Gílen 12:46; San 9:12; Miri 34:20 37delokke angu konlo Dooying kitabe podung, “Bulu buluke níkkénam amidem kaasuyé.”#Jek 12:10

Jisume Yuname

(Mt 27:57-61; Mk 15:42-47; Lk 23:50-56)

38Méélamdem Arimathialo duuna Joseph bí Pilat me simang legape ami kénmadope roguto kapeila bí Judai ami kídíem pesoto. Pilat bí tolík kolok bí aala simadem laato. 39Bím leko bosunade, kerape yumelo Jisukíng aana ami, Nikodim bí. Nikodim bí mirrh loklang aloeslok #19:39 mirrh, aloes: Esing asiglok delokke neyanglok ilennam nampodope inana are kanarung kuséréngeke. Jihudi kídíe simanglo ilíkdungai. iyélsunam kilogram íying angum kolang appikope bomato. 40Jisuke simangem laala annyide kési képalok líkla egelok yétkomto. De Judai kídílokke yunam ayone depe idungai. 41Jisume pansangko amodelo, baganko dungai, delokke sékomete yukí mangko ago aníko dungai. 42De Judai kídíke iruu saarudí longekuai delokke agode anínkolok bulu Jisume delo yuto.

Currently Selected:

JOAN 19: adiBSI

Highlight

Copy