MAK 16

Turiturku kuniiñ

(Mt 28.1-8; Lk 24.1-12; Jn 20.1-10)

1 # Mt 28.1-8; Lk 24.1-10; Jn 20.1-2. #Lk 23.56; Jn 19.39. Ho dumoalo loja kukele, Mary Magdalen, la Jems ka annii Mary, ho Salome naru nempyo giinii biiliitii, niimpalukoda mohlu ila ho mohmi nelii dupa. 2Ho allo lotu jaka hempḛr aro konchiho mohlu byuh byuhkhiiñ ho intii danyi chada lyi. 3Ho mohlu ako anyañ mi lusutii, Huyuha ngunumi byuh hagya daka yalañ mi giipa bichinii? 4Ho mohlu kacha biikele, mohlu kappatii yalañ mi giipa lintola dopa; hii hempḛr yalañ puro. 5Ho byuh ura ho ahbii kiile, mohlu yapa atu kone kappatii lahbi dalyiho dupa, puloo tarii hokii giitola; ho mohlu aluñ nyatii 6Ho mo mohlumi lutii, “Aluñ nyayo; nunu Nazaret daka Jisu minya medunii ah, humi na dapoho ledabiinenii. Mo turku rine kuke; mo so nyima ke. Kaka tocho inka sinya mohmika atii ko. 7#Mt 26.32; Mk 14.28. Hojalo inge, mohka henjeajiñ atañmi ho Pitar mi lukohe nunumi impyo yapa mo Galili ho inchi hiila; hiiko nunu mohmi kappa kendoke, mo luniiñ chulipa.” 8Ho mohlu byuh hokii ago lintii ku ho byuh-byuhkhiiñ hokii hargii nyatii ku; niimpalukoda mohlumi hempḛr biiso ho hemur nyado pa miitii; ho mohlu akomitrḛ hang luko matii, niimpalukoda mohlu biiso nyatii.

KHU AYAPUYU KA LUJA KUNIIÑ#16.8: Tangenii keniiñho siika luja kuniiñsi giima ayapuyu ho (goñkhu 9-20)

Jisu Mary Magdalen ko ahdo

(Mt 28.9-10; Jn 20.11-18)

9Ho mo kapyoja allo ho turi kula, mo Mary Magdalen ka agiñho ahtu japa ahtii, huko hokiina mo igii midiñ kanuhe mompa tiinii. 10Mo intii ho lukotii mo agiñ hoka dabonii atañmi, mohluka herula haru hela ho khela duho. 11Hojalo mohlu mo turku doku ho hiika nyimii kappatii hiila tapa lala, mohlu hiimi taje matii.

Jisu Henjeajiñ Anye ko Ahdo

(Lk 24.13-35)

12Siika hiiba ho mo yoheyapa lyila midiñ anye ko ahtii, mo anye mohluka gandaho impa ka ila doho. 13Ho mo anye inku kula ho khiibe atañ miilañmi lukotii, hojalo mohlu taje matii mo anyemi.

Jisu Alyañlenkuñ ko Ahdo

(Mt 28.16-20; Lk 24.36-49; Jn 20.19-23; Miin 1.6-8)

14Hiikahiiba ho mo alyañlenkuñ he henjeajiñ atañka punkoho ahtii mohluka diigo diiko hoka duho; ho mo mohluka henje paponiimi ho tajemala hiila gabii do, niimpalukoda mohlu taje matii mohka turi kunii mika kappa niimi. 15#Miin 1.8. Ho mo mohlumi lutii, “Hikha kiiddiapiñ ho ingela ho tonsḛrhe aya puyumi hikha puliñnii atañmi. 16Huna henje talyinii ho baptisma lachinii hii lyangur kokiñ doke; hojalo huna henje tamanii hii khiipa kokiñ doke. 17Ho siika kagiñnanii atañsi dojo monkiñdo huna henje nyadonii: ngiika armyañ pa mohlu igii atañmi mompa kendo; mohlu niti aguñ lukiñ do; 18mohlu tabu atañmi gala lakiñdo, ho mohlu wiimyo mi tanja lopa, hiika hii mohlumi hang hempa giikiñ ma; mohlu achih-ahe niiko mohluka alah tenga koda, ho mohlu hempyo kendo.”

Jisu mi Dariiganda ho Chagiitiiku

(Lk 24.50-53; Miin 1.9-11)

19Ho Attoh Jisu, mohlumi lurii tekula, dariiganda ho chatiiku, ho Pinii ka lahbi alah ho duku. 20Ho mohlu inkula ho aya puyu mi kappa kohe gandaho tonsḛrkhenyo tii, Attoh mohluka agiñho miigo miibo montii ho puyu mi jije ke hiila kakiñ la kagiñnanii dojo montii. Amen.

Currently Selected:

MAK 16: APATBSI

Highlight

Copy