MAK 15

Jisu Mi Pailet ko Ahgiitii

(Mt 27.1-2,11-14; Lk 23.1-5,13-16; Jn 18.28-38)

1 # Mt 27.1-2; Lk 23.1; Jn 18.28. Ho aro konchi dakele nyibu burii atañ, amiabañ atañ la pagenii atañ agiñho, ho hikha bulyañ ka agiñho taka siila miitii; ho mohlu Jisu mi rabiila ho agoho seliñ biitii ho mohmi Pailet mi nembitii. 2#Mt 27.11-26; Lk 23.2-3,18-25; Jn 18.29—19.16. Ho Pailet mohmi takatii, “No Jew atañka radde peha?” Ho mo mohlumi lukotii, “No ludonii hiila siilo.” 3Ho nyibu burii atañ mohmi abuje halii biido 4Ho Pailet hiira mohmi takatii, “Niiko hang luko sanii giimalo? Kato niimkane abuje mohlu niimi halii biido.” 5Hojalo Jisu hang luli matii, hopa Pailet niihtañ japape hiila hemurtii.

Jisu mi Mendopa Lubiido

(Mt 27.15-26; Lk 23.18-25; Jn 18.38—19.16)

6Siisi dituñ soduho mo pattiih tungko nii kone mi apalila miidu mohlupa humi mohlu kuchinii. 7Ho pattiih ude ho mohluka punkoho, halugiira ka chesu resu lyiho hoka miyu mennii kone dutii, hiika miyu ka armyañ Barabas hiila. 8Ho miyuatañ ahtii ho Pailet mi kuritii mohlupa dumiñ ka miiju chitañ pa miitope hiila. 9Ho mo lukoritii mohlumi, “Nunu ngiimi Jew atañka radde mi nunupa apa kencho hiila hendonii?” 10Niimpalukoda mo helatii nyibu burii atañ kariñla mohmi mohko tiilii bitii hiila. 11#Miin 3.14. Hojalo nyibu burii atañ miyu atañmi luhu luhatii mohlupa Barabas miya opa lintope hiila. 12Ho Pailet hiira mohlumi lutii, “Hokoda nunu ngiimi nii miitote hiila siika miyu siimi humina nunu Jew atañka radde hiila lubii donii?” 13Ho mohlu hiira gyuritii, “Mohmi ledato” 14Ho Pailet mohlumi takatii, “Niimpa, mo nii miigya tola?” Hojalo mohlu uro yapaya gyutii, “mohmi ledato.” 15Hopa Pailet, miyu atañmi hempyo miipa dupa hiila, Barabas mi mohlupa apa lintii; ho Jisu mi higor pala la, mo mohlumi nembitii leda dopa.

Sipahi Atañ Jisu mi Somiñ biido

(Mt 27.27-31)

16 # Mt 27.27-31; Lk 23.11; Jn 19.2-3. Ho sipahi atañ mohmi raddeduko uraho (hiika hii, raddeduko lengo) selii biitii; ho mohlu hikha sipahi atañmi gyokuñ liitii. 17Ho mohlu mohmi niiji pulye hokii agiitii; ho tare mi radde giiju hiilyañ hikhii lala mohlu mohmi kheliitii. 18Ho mohlu mohmi salam miitii, “Gyutii, Jew atañka radde!” 19Ho mohlu mohka dinta ho tabyu lo hitii, ho mohmi chukḛr chuputii, ho liibañ khangala mohmi herii duke hiila miitii. 20ho mohmi nyapa koya miila la, mohlu mohka niiji pulye giiniiñmi tiipatii, ho mohluka pulye mi mohmi ahgiitii. Ho mohmi ingiitii leda dupa.

Jisu mi Ledatii

(Mt 27.32-44; Lk 23.26-43; Jn 19.16-27)

21 # Mt 27.32; Lk 23.26; Rom 16.13. Ho mohlu chechepa impo biila ila donii kone, Sairene daka Saimon mi, mo khiibe ganda hokii ura apa ahla doniimi, Alejandar la Rufus nyika aba, Jisu ka dapo mi jobii bitote hiila kheliitii. 22#Mt 27.33-44; Lk 23.33-39; Jn 19.17-24. Ho mohlu mohmi Golgota luniiñ gandaho ahgiitii (Hiika luniiñ hii allo dinkhu ka dokuñ ko). 23Ho mohlu mohmi roalha mirr miiyo lala tantote lutii; hojalo mo tamatii. 24Ho mohlu Jisu mi ledatii, ho mohka pulye mi mohluka punkoho sarche siitii, mohluka punkoho niiyape ngiipa hiila potatuka siitii. 25Ho hiika myoduhii aroka gunta takkowatii, mohmika mohluka leda lyiho. 26Mohmika halii laka keniiñ hii hiila ketola dotii, “Jew atañka Radde.” 27Ho mohka agiñho mohlu diipyo nii anye miilañ ledatii, konemi mohka lahbi dalyiho konemi mohka lahchi dalyiho.#15.27: Goñkhu 28 Ho piniipota luniiñ hii lyipe tii, “Mohmi talemiilenii atañ agiñho khiita monkiñdo” 29#Mk 13.2; 14.58; Jn 2.19. Ho hoka impo biinii atañ mohmi ngarpa nyatii, mohluka adiñ mi dimpi biidola, ho lunyatii, “Ahe! No piniiude mi pyadu lolala ho allo lohiñ niiho miicha kendo hiibii lyila, 30atoh miya lyangur siito tiikiilo, ho dapo hokii so akañ so toto tiikiilo!” 31Hii chulipa nyibu burii atañ tiirḛ pagenii atañ agiñho nyapa koyatii, lubiidola, “Mo mihmi lyangurtii; mo atoh mi lyangur siila mayuha. 32Kristo, Isrel ka Radde mi, siisi dapo hokii akañ so toka keneto, niimpalukoda hiimi ngunu kalala ho henje talyila.” Mo agiñho dapo hoka leda lehiñ konii miilañ mohmi nyapa koyatii.

Jisu ka Shiiniiñ

(Mt 27.45-56; Lk 23.44-49; Jn 19.28-30)

33 # Mt 27.45-56; Lk 23.44-49; Jn 19.28-30. Ho alloka gunta talyañlenye ahku kiile, hikha kiiddi apiñ ho kamo ramba lyiritii alyiñdalyi ka gunta tahiñ lyihepa. 34Ho alyiñdalyi ka gunta tahiñ dakele Jisu hempḛr goropa khela gyuritii, Eloi, Eloi, lema sabachthani? Hiila luniiñsi, “Ngiika Pinii, ngiika Pinii, niimpana no ngiimi helyu biilyi kunii?” 35Ho hoka danii tange siimi tapa lala lutii, “Tageto, mo Elija mike gyodonii.” 36Ho kone hartii ho, empyaho roalha tansa nii hokii poteje niima biitii, hiimi hiibimitu ho ngalii lala ho mohmi tanke nendupa bitii, lubiidola, “kalyato, ngunu kakasa Elija ahla mohmi akañso jolo talyiha.” 37Ho Jisu hempḛr uropa uhe gyula lala, ho mohka kami japa ka sahii sakhe niimi satii. 38#Hib 10.19-20. Ho piniiude daka pulye tonkhu nanii hii tanye sarche hitii, ayoh hokiila akañ lohepa. 39#Mk 1.11; 9.7. Ho Rom sipahi, mohka hata hoka kala danii, mohka kami japaka allyi saniiñ mi kalala, mo lutii, “Jije Siika miyu si Pinii ka oho ke!”

40 # Jn 19.25. Hiika ho annii akha atañ miilañ adho hokiila kala datii; hoka danii atañ Mary Magdalen, ho Mary Jems la Joses ka anu ka annii, ho Salome miilañ datii, 41#Lk 8.1-3. siika atañsi, mohka Galili hoka daho hokii, mohmi kiiliñ ho injo montii, ho mohmi miiho luhotii; ho abuje khiibe annii akha miilañ mo agiñho Jerusalem hokii chabo montii.

Jisu mika Alie niiñ

(Mt 27.57-61; Lk 23.50-56; Jn 19.38-42)

42 # Mt 27.57-61; Lk 23.50-56; Jn 19.38-42; Miin 13.29. Ho alyiñdalyi kukele, hiika allo hii Miimyo biniiñ allo pa lyilyinii, hiikahii, arda dumoalo lubii dola, 43Arimatia daka Josep, bulyañ hoka khiikonii kone, motrḛ kalya laka Pinii ka raddeganda mika dunii, haro lodala ho Pailet ko ahtii, ho Jisu ka shiima mi bipe hiila kutii. 44Ho Pailet hentii Jisu siisi matiirḛ shiidu kuyu ah; ho sipahi sabii mi gyola la, mo tahiitii mohmi mo siisi shiila doku yuha. 45Ho sipahi sabii kokii Jisu shiido ku hiila chimpa lala, mo shiima mi Josep mi jobii heku lutii. 46Ho Josep tiipya pulye bere riila lala, ho shiima mi jolo lala, tiipya pulye ho apu biido, ho yalañ ura hoka byuh heniiñ ho joliitii. Mo byuh ka hagya ho yalañ puhe giipiñ tola atiitii. 47Mary Magdalen la Joses ka annii Mary nyi kappa biido nohna shiima mi jotola dotiinii.

Currently Selected:

MAK 15: APATBSI

Highlight

Copy