Матфей 4

Иисустуң күткүттүргени

(Мк. 1:12-13; Лк. 4:1-13)

1 Ыдыктыг Сүлде ынчан Иисусту эрликке күткүттүрери-биле ээн кургаг ховуже аппарган. 2Дөртен хүн база дөртен дүн дургузунда шээрленгеш#Ы. х. к. 9:9; 3 Хаан. 19:8, Иисус аажок аштай берген#Мф. 21:18. 3Ынчан Аңаа күткүкчү эрлик#1 Чыл. 21:1; 1 Фес. 3:5 чедип келгеш: «Сен шынап-ла Бурганның Оглу болзуңза, бо даштарга хлеб болу бээрин дужаавыт» – дээн.

4Иисус мынча деп харыылаан: «Бижилгеде: „Кижи амытан чүгле хлеб-биле эвес, а Бурганның чугаалаан бүгү чүвезиниң ачызында амыдыраар болгай“ – деп бижээн-дир»#Ы. х. к. 8:3.

5Эрлик ынчан Ону ыдыктыг хоорай Иерусалимче аппаргаш#Неем. 11:2; Иса. 48:2; 52:1, Бурганның өргээзиниң кырының эриинге тургускаш, мынча дээн: 6«Сен Бурганның Оглу болзуңза, черже шурай бер. Чүге дээрге Бижилгеде: „Ол Бодунуң төлээлеринге Сени чагып каарга, олар Сени, будуң дашка тептикпезин дээш, холдары-биле көдүрүп аарлар“ – деп бижээн-дир»#Ыд. ыр. 90:11-12; Ин. 7:4.

7Иисус аңаа: «Бижилгеде оон ыңай: „Дээрги-Чаяакчы Бурганыңны шеневе!“#Ы. х. к. 6:16 – деп база чарлык болган болгай» – деп харыылаан.

8Эрлик ооң соонда Ону дыка бедик дагже үндүре бергеш, бо делегейниң хамык күрүнелерин бүгү өндүр-чаагайы-биле көргүскеш: 9«Доңгая кээп дүжүп, меңээ мөгеер болзуңза, бо бүгүнү Сеңээ бээр мен» – дээн.

10Иисус аңаа: «Ырап чор, эрлик!#Мф. 16:23 Бижилгеде: „Чүгле Дээрги-Чаяакчы Бурганыңга мөгейип чор, чүгле Аңаа бараан бол“ – деп бижээн-дир» – деп харыылаан#Ы. х. к. 6:13.

11Эрлик ынчан Ону каапкаш барган. Оон Иисуска дээрниң төлээлери чедип келгеш, Аңаа бараан болуп турганнар#Лк. 22:43.

Иисустуң Галилеяга бараан болуушкунунуң эгези

(Мк. 1:14-15; Лк. 4:14-15)

12Иоанны кара-бажыңче киир октапканын дыңнааш#Мф. 14:3, Иисус Галилеяже ээп келген. 13Ол Назаретти каапкаш#Мф. 2:23, Галилея хөлүнүң эриинде, Завулон биле Неффалимниң черинде#Иис. 19:32-34 турар Капернаум хоорайга чурттай берген#Мк. 1:21. 14Бурганның Исайя медээчини дамчыштыр чугаалаан сөстери ынчалдыр боттанган#Мф. 1:23:

15 «Завулоннуң база Неффалимниң чери, Иордан хемниң ындында,

далайже баар орукта өске чоннар чурттаан Галилея!

16 Караңгыга чурттап орган чон өндүр улуг чырык көрүп кагды,

өлүмнүң хөлегези бүргээн черге чурттаан улуска чырык чайыннап келди» # Иса. 9:1-2 .

17Ол үеден бээр Иисус мынча деп суртаалдап эгелээн: «Бачыдыңар миннип, Бурганче эглиңер! Чүге дээрге Дээрниң Чагыргазы чоокшулап келген-дир».

Баштайгы өөреникчилер

(Мк. 1:16-20; Лк. 5:1-11)

18Бир-ле катап Галилея хөлүнүң эрии-биле эртип бар чыткаш, Иисус ийи алышкыны: Пётр деп адаткан Симонну база ооң дуңмазы Андрейни көрүп каан#Ин. 1:40-42. Олар балыкчылар турган болгаш, четкилерин хөлче салып турганнар. 19Иисус оларга: «Мени эдериңер. Силерни кижилер тывыкчылары кылып каар мен#Мф. 13:47» – дээн. 20Алышкылар четкилерин каапкаш, ол дораан Ону эдерип чорупканнар#Мф. 19:27.

21Улаштыр бар чыткаш, Ол өске ийи алышкыны: Зеведейниң оглу Иаков биле ооң дуңмазы Иоанны көрүп каан. Олар ачазы Зеведей-биле кады хемеде четкилерин септеп органнар. Иисус оларны кый депкен. 22Алышкылар ол дораан хемезин-даа, ачазын-даа каапкаш, Ону эдерип чорупканнар.

Иисустуң чонну өөредип, экиртип турганы

(Лк. 6:17-19)

23Иисус бүгү Галилеяны эргий кезип, синагогаларга улусту өөредип, Дээрниң Чагыргазының дугайында Буянныг Медээни суртаалдап база кандыг-даа аарыг-аржыктан улусту экиртип чораан#Мк. 1:39. 24Ооң дугайында дамчыыр чугаа бүгү Сирияга#Лк. 2:2 тарай берген. Янзы-бүрү аарыг-човалаңга алыскан, күштүг аарышкыдан хинчектеткен, букшуураан, тыртар болгаш чартыктаан кижилерин улус Аңаа эккеп туруп берген. Иисус оларның шуптузун экиртип турган. 25Галилеядан, Он-хоорайдан#Мк. 5:20; 7:31, Иерусалимден, Иудеядан болгаш Иорданның ол чарыындан келген мөөң чон Ону эдерип чораан.

Currently Selected:

Матфей 4: TUV

Highlight

Copy