Матфей 17

Иисустуң хевир-шырайының өскерилгени

(Мк. 9:2-13; Лк. 9:28-36)

1Алды хүн эрткенде, Иисус Пётрну, Иаковту болгаш ооң дуңмазы Иоанны эдерткеш, чүгле ол үш кижи-биле кады бедик дагже үне берген#Мк. 5:37; 14:33. 2Аңаа, олар көрүп турда, Ооң хевир-шырайы өскерли берген: арны хүн дег чырып, а хеви чырыктан өңгүр апарган#Дан. 7:9; Ажыд. 1:16. 3Хенертен оларга Моисей биле Илия көстүп келгеш#Мал. 4:5, Иисус-биле чугаалажып эгелээн.

4Пётр Аңаа мынча дээн: «Дээрги, мында турарывыс эки-дир! Күзээр болзуңарза, үш чадырдан тип берээли: бирээзин – Силерге, өскезин – Моисейге, база бирээзин – Илияга».

5Ол ынча деп турар аразында, чырык булут көжүп келгеш, оларны шыва апкан. Булут аразындан үн дыңналган: «Бо дээрге Мээң ханы ынак Оглум-дур! Ол Мээң сеткилимге кирер-дир!#Иса. 42:1; Мф. 3:17 Ону дыңнап чоруңар!#Ы. х. к. 18:15; 2 Пет. 1:17» 6Үннү дыңнааш, олар аажок сүртеп, черже доңгая кээп дүшкеннер. 7Иисус оларже чоокшулай бергеш, холун дегзип: «Кортпаңар, тургулаңар!» – дээн. 8Олар долгандыр көргеш, Иисустан өске кымны-даа көрбээннер.

9Олар дагдан бадып олурда, Иисус оларга шыңгыы чагып каан: «Кижи амытан Оглу өлүглер аразындан катап дирилбээн шаанда, маңаа көрген чүвеңер дугайында кымга-даа чугаалаваңар!»#Мф. 8:4; 9:30; Мк. 1:44

10Өөреникчилери ынчан Оон: «Чүге ном-хоойлу тайылбырлакчылары Илия Христосту мурнай кээр ужурлуг деп турарыл?» – деп айтырыг салганнар.

11«Хамык чүвени чурумчудуп, аайлаар дээш, Илияның мурнай кээр ужурлуу чөп болгай#Мал. 4:5 – деп, Иисус харыылаан. – 12Илияның шагда-ла чедип келгенин силерге чугаалап тур мен. Ынчалза-даа улус ону танывайн баргаш, кара туразында аажылап, бак көрген. Кижи амытан Оглу база шак ынчалдыр олардан хилинчек көөр#Иса. 53:7». 13Ооң Иоанн Медеглекчиниң дугайында чугаалаанын өөреникчилери ынчан билип каан#Мф. 11:14; Лк. 1:17.

Букшуураан оолду экирткени

(Мк. 9:14-29; Лк. 9:37-43)

14Олар чонче ээп кээрге, бир кижи Иисусче чоокшулап келгеш, Ооң мурнунга дис кырынга олура дүжүп: 15«Дээрги, мээң оглумну кээргеп көрүңер! – дээн. – Ол тыртып аарааш, хинчектени берди: үргүлчү отче, сугже шураар-дыр. 16Мен ону Силерниң өөреникчилериңерже аппардым, ынчалза-даа олар ону экиртип чадашты».

17Иисус харыы кылдыр: «О, бо салгалдың бүзүрел чок, будалган улузу! Силер-биле чеже мынчап чоруур мен?! Силерни чежеге дээр шыдажып кээр мен?! Оолду Менче эккелиңер!» – дээн. 18Иисус букту хоруптарга, ол оолдан үне берген#Мк. 1:26; Аж.-ч. 8:7, а демгизи ол-ла дораан каң-кадык апарган.

19Иисус чааскаан турар өйде, өөреникчилери Аңаа чедип келгеш: «Бис чүге ол букту үндүр сывырып шыдавадывыс?» – деп айтырганнар.

20-21Ол мынча деп харыылаан: «Силерниң бүзүрелиңер биче болган-дыр. Алыс шынны чугаалап тур мен: силерде оода-ла горчица үрезини хире бүзүрел бар болза#Мф. 13:31; Лк. 17:6, бо дагга: „Туружуңдан көже бер“ – дээр болзуңарза, ол көже бээр ийик#Мк. 11:23, силерге кылып болбас хире чүү-даа турбас ийик»#17:20-21 Өске бурунгу сөзүглелдерде «Ындыг букту чүгле Бурганга тейлеп база шээрленип тургаш, үндүр сывырып болур-дур» деп сөстерни немээн. .

Иисустуң Бодунуң өлүмүнүң дугайында ийиги удаа чугаалааны

(Мк. 9:30-32; Лк. 9:43-45)

22Олар шупту Галилеяга кады турар өйде, Иисус өөреникчилеринге мынча дээн: «Кижи амытан Оглун удавас улус холунга тудуп бээр-дир. 23Ол улус Ону өлүрүп каар, ынчалза-даа үшкү хүнде Ол катап дирлип кээр»#Мф. 16:21; 20:19. Өөреникчилери аажок муңгарай берген.

Бурганның өргээзиниң үндүрүү

24Олар шупту Капернаумга чедип келгенде#Мк. 9:33, Пётрга Бурганның өргээзиниң үндүрүүн хавырар улус чедип келгеш: «Башкыңар үндүрүг төлээр бе?» – деп айтырган#Хост. 30:13; 38:26; Мф. 22:17.

25Пётр: «Төлээр!» – деп харыылааш, бажыңче кире берген.

Ол чүнү-даа чугаалап четтикпээнде, Иисус баштай айтырыг салган: «Сен чүү деп бодаар сен, Симон? Бо делегейниң хааннары кымдан албан-үндүт хавырар ийик? Бодунуң ажы-төлүнден бе азы өске улустан бе?»

26Пётр: «Өске улустан» – деп харыылаан.

Иисус: «Ынчаарга бодунуң ажы-төлүн үндүрүгден хостааны ол-дур – деп түңнеп каан. – 27Ынчалза-даа эрге-чагырга улузун хомудатпаалыңар#Рим. 13:7. Хөлче баргаш, сыырткыыжың шывадааш, бир дугаар туттунган балыкты ушта шелгеш, аксын ажыдывыт. Оон бодуң дээш-даа, Мен дээш-даа үндүрүг төлээринге четчир чоосту тып алгаш, ийилдиривистиң үндүрүүвүстү төлеп каг».

Currently Selected:

Матфей 17: TUV

Highlight

Copy