Матфей 16

Иисустан кайгамчык демдек негээни

(Мк. 8:11-13; Лк. 12:54-56)

1Ол черге Иисусту фарисейлер болгаш саддукейлер үглеп келгеш#Мф. 3:7, Ону шенээр сагыштыг, дээрден кайгамчык демдектен көргүссүн деп туруп бергеннер#1 Кор. 1:22. 2Иисус оларга мынча деп харыылаан: «Хүн ажар шакта: „Кызыл хаяа бар, даарта аяс боор-дур аа“, 3а даң бажында: „Дээр хүрең-кызыл, агаар чүдерээр-дир“ – дижир силер. Дээрже көргеш, агаарның кандыызын билип каар хиреңерде, бо үениң демдектерин ылгап шыдавас-тыр силер. 4Бузуттуг болгаш бачыттыг салгал бадыткал демдээ манап турар де. Ынчалза-даа оларга Иона медээчини дамчыштыр бергенинден өске демдек турбас#Иона 2:1; Мф. 12:39». Иисус ынча дээш, оларны каггаш, чоруй барган.

Фарисейлер болгаш саддукейлерниң ажыткызы

(Мк. 8:14-21)

5Иисустуң өөреникчилери ол чарыкче эжиндирип кеже бергеннер, а аъш-чем алырын уттупкан болганнар. 6Иисус оларга: «Дыңнаңар, фарисейлер биле саддукейлерниң ажыткызындан кичээниңер#Лк. 12:1; 1 Кор. 5:7-8» – дээн.

7Олар аразында ону сайгарып: «Бис хлеб албаан боорувуска, ынча дээн эвеспе» – дишкен.

8Иисус оларның чүнү чугаалашканын билир болгаш, мынча дээн: «Биче бүзүрелдиглер#Мф. 6:30, хлеб албаан бис дижип чоондуңар? 9Амдыгаа дээр билип чадааныңар ол бе? 5000 кижини беш хлеб тоттуруптарга, чем артыы-биле чеже аргаан хааржак долдуруп алчык силер?#Мф. 14:13-21 10А 4000 кижини чеди хлеб тоттуруптарга, чем артыы-биле чеже аргаан хааржак долдуруп алчык силер?#Мф. 15:36-37 11Мээң чугаам хлеб дугайында эвес деп канчап билбес улус силер? Фарисейжи болгаш саддукейжи ажыткыдан кичээниңер!»

12Ол хлеб хөөдер ажыткыдан эвес, а фарисейлер болгаш саддукейлерниң өөредиинден оларны кичээндирген-дир деп өөреникчилери ынчан билип каан.

Пётрнуң Иисусту Христос деп хүлээп көргени

(Мк. 8:27-30; Лк. 9:18-21)

13Филипптиң Кесариязының чоок-кавызынга чедип келгеш, Иисус өөреникчилеринден айтырган: «Улус Кижи амытан Оглун кым деп билип турар-дыр?»

14Олар: «Чамдык улус Силерни Иоанн Медеглекчи#Мф. 14:2, өскелери – Илия#3 Хаан. 17:1; Мал. 4:5, а бир чамдыызы – Иеремия#Иер. 1:1 азы Бурганның өске-бир медээчизи дээр-дир» – деп харыылааннар.

15Иисус олардан: «А силер Мени кым деп бодаар силер?» – деп айтырган.

16Симон Пётр: «Силер – Христос, дириг Бурганның Оглу-дур силер#Ыд. ыр. 2:7» – деп харыылаан.

17Иисус аңаа мынча дээн: «Иоанның оглу Симон, амыр-чыргалдыг-дыр сен, чүге дээрге ону сеңээ улус эвес, а Дээрде Адам илереткен-дир#1 Кор. 2:13. 18Ынчангаш Мен сеңээ мынча деп тур мен: сээң адың – Пётр, даш болур#Мк. 3:16; Ин. 1:42. Оон ол даш үндезинге#Эф. 2:20 Меңээ бүзүрээн улустуң ниитилелин тудуп үндүрер мен, тамының күштери ону базып шыдавас. 19Мен сеңээ Дээрниң Чагыргазындан дүлгүүрнү бээр мен#Иса. 22:22, черге хүлээн чүвеңни дээрге база хүлүп каан боор, а черге хостап салган чүвеңни дээрге база хостап салыпкан турар». 20Иисус оон өөреникчилеринге Ону Христос-тур деп кымга-даа чугаалавазын шыңгыы чагып каан#Мф. 9:30.

Иисустуң хилинчектенип өлүрүнүң дугайында баш удур чугаалааны

(Мк. 8:31—9:1; Лк. 9:22-27)

21Иисус ол үеден эгелээш, Бодунуң өөреникчилеринге Ол Иерусалимче баар, баштыңнарның, Бурганның дээди бараалгакчыларының болгаш ном-хоойлу тайылбырлакчыларының холундан хөй хилинчекти көрүп эртер ужурлуун#Лк. 17:25 база Ол аңаа өлүртүп каар, ынчалза-даа үшкү хүнде катап дирлип кээр#Мк. 9:31; 10:34; Ин. 2:19 дээрзин ажыы-биле чугаалап эгелээн.

22Пётр Ону кыдыынче кый депкеш, Аңаа чөрүже берген: «Дээрги! Канчап ындыг боорул! Ындыг чүве Силер-биле болбас ужурлуг!»

23А Ол Пётрже көрнүп келгеш, мынча дээн: «Менден ырап чор, эрлик!#Мф. 4:10 Сен Мени оруумдан астыктырып тур сен, чүге дээрге бодалдарың Бурганныы эвес, улустуу-дур#Флп. 3:19».

24Иисус оон Бодунуң өөреникчилеринге мынча дээн: «Мени эдерер дээн кижи бар болза, ол бодунуң күзел-бодалындан ойталазын база бодунуң белдир-ыяжын чүктеп алгаш, Мени эдерзин#Мф. 10:38-39. 25Бодунуң амы-тынын камгалап алыр дээн кижи амы-тынын ышкынып алыр, а амы-тынын Мен дээш ышкынган кижи#Мф. 19:29 амы-тынын тып алыр. 26Бүгү делегейни холунга киирип-даа алгаш, амы-тынын оскунар болза, ооң ол кижиге ажыы чүл? Амы-тынын дедир эгидер дээш, ол кижи чүнүң-биле төлээрил?#Ыд. ыр. 48:8 27Кижи амытан Оглу Бодунуң Адазының өндүр чырыынга бүргеткен, Бурганның төлээлери-биле кады чедип келгеш#Ы. х. к. 33:2; Дан. 7:13; Зах. 14:5; Мф. 24:30; 25:31; 1 Фес. 4:16, кижи бүрүзүн ооң кылган ажыл-херээниң аайы-биле шаңнаар азы шиидер#Эккл. 3:17; Ажыд. 2:23. 28Силерге алыс шынны чугаалап тур мен: мында турар улустуң аразында, өлбейн чыткаш-ла#Мф. 24:34; Ин. 21:22, Бодунуң Чагыргазын хүлээп алгаш чедип келген Кижи амытан Оглун көрүп каар улус бар-дыр».

Currently Selected:

Матфей 16: TUV

Highlight

Copy