Матфей 12

Амыр-дыш хүнү дугайында айтырыг

(Мк. 2:23-28; Лк. 6:1-5)

1Ол үеде, амыр-дыш хүнүнде, Иисус тарып каан шөлдү таварты бар чыткан. Ооң өөреникчилери аштааш, сыпта тараа баштарын үзе соккаш, ууштап чий бергеннер#Ы. х. к. 23:25. 2Фарисейлер ону көргеш, Аңаа мынча дээннер: «Көрүңер! Силерниң өөреникчилериңер амыр-дыш хүнүнде ыдыктыг хоойлунуң хораан чүвезин кылып турлар»#Хост. 20:8-10; Сан. 15:32-36.

3Иисус ынчан олардан айтырган: «Боду-даа, кады чораан өөрү-даа аштай бээрге, Давид хаанның чүнү кылганын номчуваан силер бе?#1 Хаан. 21:1-6 4Ол Бурганның өргээзинче киргеш, ооң боду-даа, кады чораан улузу-даа чип болбас, а чүгле Бурганның бараалгакчылары чиир ужурлуг ыдыктаан хлебти#Хост. 25:30; Лев. 24:5-9 чипкен болгай. 5Амыр-дыш хүнүнде Бурганның бараалгакчылары Бурганның өргээзинге ажылдап, оозу-биле ол хүннү сагывайн турарын, ынчалза-даа буруулуг диртпезин Моисейниң хоойлузундан номчуваан силер бе?#Сан. 28:9 6А мында Бурганның өргээзинден-даа артык чугула Кижи барын чугаалап тур мен#Мф. 12:41. 7Бижилгеде: „Өргүлдү эвес, энерелдиг бооруңарны күзеп тур мен“#Ос. 6:6 – дээн сөстерниң утказын билген болзуңарза, буруу чок улусту буруу шаппас ийик силер. 8Ийе, Кижи амытан Оглу – амыр-дыш хүнүнүң-даа Дээргизи-дир!»

Када берген холдуг кижини экирткени

(Мк. 3:1-6; Лк. 6:6-11)

9Ол черден чорупкаш, Иисус демги фарисейлерниң синагогазынга кирип келген. 10Аңаа када берген холдуг кижи турган. Фарисейлер Иисустан: «Амыр-дыш хүнүнде улус экиртирин ыдыктыг хоойлу чөпшээрээр бе?» – деп айтырганнар. (Херек кырында олар Ону буруудадыр эвин бодап турганнар.)#Лк. 11:54; 20:20

11Иисус оларга мынча деп харыылаан: «Силерниң кайы-бирээңер хойлуг турган, а оозу амыр-дыш хүнүнде оңгарже кире берген дижик. Ол баргаш, хоюн ушта тыртып албас чүве бе? 12А кижи хойдан оранчок үнелиг!#Мф. 6:26; 10:31 Ындыг болганда, амыр-дыш хүнүнде буян кылырын чөпшээрээн-дир».

13Иисус оон када берген холдуг кижиге: «Холуң бээр сун» – дээн. Ол холун сунуп бээрге, оозу ол дораан, өскези дег, кадык апарган#3 Хаан. 13:6. 14А фарисейлер үнгеш, Иисусту канчап чок кылырын сүмележи бергеннер.

Бурганның шилип алган Чалчазы

15Иисус ону билип кааш, оортан чоруй барган. Эңдерик хөй чон Ону эдерип чорупкан, а Ол хамык улусту экиртип каан. 16Ынчалза-даа Иисус экирээннерге Ооң дугайында улуска чугаалаарын хоруп каан#Мф. 8:4; 9:30. 17Бурганның Исайя медээчини дамчыштыр мынча дээн сөстери ынчаар боттанган чүве-дир#Иса. 42:1-4:

18 «Мээң шилип алган Чалчам бо-дур.

Мээң ханы ынак Кижим, Мээң сеткилимге кирер Кижи – Ол-дур.

Мен Ону БодумнуңСүлдем-биле бүргээр мен.

Ол өске чоннар улузунга чөптүг шииткелди медеглээр!

19 Ол алгырбас база кырышпас,

улус Ооң үнүн кудумчуларга дыңнавас.

20 Чөптүг шииткелди тиилелгеже эккелбээн шаанда,

Ол шала сынган хыыргыышты сыйбас,

имистелген чырыткыны өжүрбес.

21 Хамык чоннар Ооң адынга идегээр».

Иисус болгаш Веелзевул

(Мк. 3:20-30; Лк. 11:14-23)

22Ооң соонда Иисуска артында согур, артында үнү чок букшуураан кижи эккелгеннер. Иисус ону экиртип каарга, ол чугааланып база көрүп эгелээн. 23Улус аажок кайгап: «Бо Иисус Давидтиң Оглу#2 Хаан. 7:12-16; Мф. 9:27 бооп болур бе?» – деп айтырып турган.

24Фарисейлер ону дыңнааш: «Буктарны Ол чүгле оларның чагырыкчызы Веелзевулдуң күжү-биле үндүр сывырып турар-дыр» – дээннер#4 Хаан. 1:2; Мф. 9:34; 10:25.

25Иисус оларның бодалдарын билир болгаш, мынча дээн: «Иштинден аңгыланып эгелээн күрүне бүрүзү үр болбайн буураар, аңгыланчып, кырышкан хоорай азы өг-бүле бүрүзү бүдүн турбас. 26Эрлик боду эрликти үндүр сывырар болза, ол боду бодунга удур месилдешкени ол-дур. Ооң күрүнези бүдүн туруп шыдаар бе? 27Мен Веелзевулдуң күжү-биле буктарны үндүр сывырып турар болзумза, силерниң өөреникчилериңерге#12:27 Азы: «Ажы-төлүңер». буктарны үндүр сывырар күштү кым берип турарыл?#Мк. 9:38; Аж.-ч. 19:13 Ынчангаш өөреникчилериңер боттары силерни шииткей аан. 28Ынчалза-даа Мен буктарны Бурганның Сүлдези-биле үндүр сывырып турар болзумза, Бурганның Чагыргазы силерге ылап-ла келгени ол-дур.

29Мөге-шыырак кижини баштай хүлүп албас болза, кым ооң бажыңынче кирип, эт-хөреңгизин оорлап шыдаарыл? Чүгле хүлүп алгаш, ол ооң бажыңын үптеп шыдаар#Иса. 49:24-25.

30Мээң-биле кады эвес кижи Меңээ удур#Мк. 9:40 база ол ышкаш Мээң-биле кады чыгбас кижи төтчеглеп турар.

31Ынчангаш силерге чугаалап тур мен: улустуң кандыг-даа бачыды база бак сөгленири өршээттинер, ынчалза-даа Ыдыктыг Сүлдени бак сөглээри өршээттинмес#Мк. 3:29; Лк. 12:10. 32Кижи амытан Оглунга удур сөс сөглээн кижи бар болза, ону өршээп болур, ынчалза-даа Ыдыктыг Сүлдени бак сөглээр кижи ам-даа, кажан-бир шагда-даа өршээл албас.

33Ыяшты эки деп санаар болзуңарза, ооң чимизи база чаагай боор, а ыяшты ирик деп санаар болзуңарза, ооң чимизи база багай боор. Ыяшты чимизинден танып аар#Мф. 7:17-20; Лк. 6:43-45. 34Чылан сыскындылары!#Мф. 3:7; 23:33 Бузуттуг-бак хиреңерде#Э. д. 6:5; Мф. 7:11, канчап буянныг чүве чугаалаар силер? Кижиниң чүрээнде чүү бар болдур, ол ооң аксындан үнер болгай#Мф. 15:18; Иак. 3:6. 35Буянныг кижи буян шыгжаан черинден буянын уштуп кээр, а бузуттуг кижи бузут шыгжаан черинден бузудун уштуп эккээр#У. ч. 12:5. 36Шииткел хүнү кээрге, шупту улус эдипкен хоозун сөзү дээш харыы тударын силерге чугаалап тур мен#У. ч. 10:19; Рим. 14:12. 37Сөзүңнү барымдаалап, сени агартыр азы шиидер»#Мф. 5:22; Иак. 3:2-12.

Иона медээчиниң демдээ

(Мк. 8:11-12; Лк. 11:29-32)

38Ынчан чамдык ном-хоойлу тайылбырлакчылары болгаш фарисейлер Иисуска: «Башкы, Силерниң биске кандыг-бир кайгамчык демдектен көргүзериңерни күзеп тур бис» – дээннер#1 Кор. 1:22.

39Иисус мынча деп харыылаан: «Бузуттуг болгаш бачыттыг салгал! Бадыткал демдээн негезиңерзе-даа, Иона медээчини дамчыштыр бергенинден өске демдек көрбес силер#Мф. 16:4. 40Ионаның далай амытанының хырнынга үш дүн-хүннү эрттиргени дег#Иона 2:1, Кижи амытан Оглу база черниң ханы дүвүнге үш дүн-хүн дургузунда турар. 41Ниневияның чурттакчылары шииткел хүнүнде бо салгалдың улузу-биле кады турупкаш, оларны буруудады бээрлер#Рим. 2:27, чүге дээрге ниневийжилер Ионаның суртаалын дыңнааш, бачыдын билингеннер-дир#Иона 3:5. А ам мында Ионадан-даа артык улуг Кижи бар-дыр!#Мф. 12:6 42Мурнуу чүктүң кадыны#3 Хаан. 10:1-13 Шииткел хүнүнде бо салгалдың улузу-биле кады турупкаш, оларны буруудады бээр, чүге дээрге ол кадын Соломон хаанның мерген угаанныг өөредиин дыңнаар дээш, черниң өске кыдыындан кээп чораан-дыр. А ам мында Соломондан-даа артык улуг Кижи бар-дыр!»

Буктуң ээп кээри

(Лк. 11:24-26)

43«Бук кижиден үне бергенде, амыр-дыш дилеп, суг чок черлерге тояап-тояап, дилээн чүвезин тыппайн баар. 44Ол ынчан мынча дээр: „Каапканым эрги бажыңымче дедир чана берейн“. Оон демги кижиже ээп келгеш, чурттап турган черин аштап-ширбип, эдип-чазап каанын база ооң ээн турарын эскерип каар. 45Бук ынчан чоруткаш, бодундан-даа каржы өске чеди букту эдертип эккелгеш, ол кижиже кирип, аңаа чурттай бээрлер. Ынчан ол кижиниң сөөлгү байдалы мурнунда турганындан-даа дора апаар#2 Пет. 2:20. Бо салгалдың бузуттуг улузу-биле база ындыг болур».

Иисустуң ёзулуг өг-бүлези

(Мк. 3:31-35; Лк. 8:19-21)

46Иисус чон-биле чугаалажып турда, Ооң авазы биле дуңмалары#Мф. 13:55; Ин. 2:12; 7:3; Аж.-ч. 1:14; 1 Кор. 9:5; Гал. 1:19 бажың даштынга чедип келгеннер: олар Ооң-биле чугаалажыр бодаан чүве-дир. 47Бир кижи Аңаа: «Аваңар биле дуңмаларыңар даштын Силер-биле чугаалажыр бодап келген-дир» – дээн.

48А Иисус ол кижиге: «Мээң авам база ха-дуңмам кымнар болур чүвел?» – дээн. 49Оон Бодунуң өөреникчилеринче холу-биле айыткаш, мынча дээн: «Мээң авам база ха-дуңмам бо-дур. 50Дээрде Ачамның күзел-соруун күүседип чоруур кижи бүрүзү Мээң ха-дуңмам база авам боор болгай»#Ин. 15:14; Евр. 2:11.

Currently Selected:

Матфей 12: TUV

Highlight

Copy