Матфей 11

Иоанн Медеглекчиниң дугайында

(Лк. 7:18-35)

1Бодунуң он ийи өөреникчизинге суртаалдап дооскаш, Иисус Галилеяның хоорайларынга улусту өөредири-биле база суртаалдаары-биле улаштыр чорупкан.

2-3Кара-бажыңга чыткан Иоанн#Мф. 14:3; Лк. 3:19-20; Ин. 3:24 Христостуң кандыг ажыл-үүле кылып турарын дыңнааш, Олче бодунуң өөреникчилерин#11:2-3 Өске бурунгу сөзүглелдерде «Бодунуң ийи өөреникчизин» деп бижээн. : «Чедип кээр ужурлуг Кижи Силер силер бе азы өскезин манаар бис бе?»#Ин. 4:25; 6:14; 11:27 – деп айтырары-биле чорудупкан.

4Иисус оларга мынча деп харыылаан: «Көрүп база дыңнап турар чүвеңерни Иоаннга дамчыдып чедиңер: 5согурлар каракталып, аскактар кылаштап, кеш аарыглыглар арыгланып, дүлейлер дыңнап, өлгеннер катап дирлип, ядыыларга Буянныг Медээни дыңнадып турарын чугаалаар силер#Иса. 35:5; 61:1. 6Меңээ бүзүрелин чидирбес кижи амыр-чыргалдыг боор»#Ин. 6:61; 16:1.

7Иоанның өөреникчилери чоруй баарга, Иисус чонга ооң дугайында чугаалап эгелээн: «Ээн кургаг ховуже чүнү көөр дээш барып чордуңар?#Мф. 3:1 Хатка чайгаткан кулузунну бе? 8Ындыг эвес болза, чүнү көрүп чордуңар? Каас-коя хептиг кижини бе? Ынчалза-даа каас-коя хептиг улус хааннар ордуларынга чурттаар болгай. 9Чүнү көөр бис деп бодадыңар? Бурганның медээчизин бе?#Мф. 14:5; 21:26 Ийе, медээчини. Харын силерге чугаалап тур мен: ол – медээчиден-даа артык кижи-дир. 10Бижилгеде ол дугайында Бурганның: „Көр даан, Мээң төлээм Сээң мурнуңда орукту белеткеп берзин дээш, ону Сени мурнай чорудуп тур мен“#Хост. 23:20; Мал. 3:1; Мк. 1:2 – дээн кижизи ол-дур. 11Алыс шынны силерге чугаалап тур мен: чер кырынга чурттап чораан бүгү улустуң аразында Иоанн Медеглекчиден артык бедик кижи чок#Лк. 1:15. Ынчалза-даа Дээрниң Чагыргазында эң чөгенчиг кижи оон улуг боор. 12Иоанн Медеглекчиниң суртаалдап эгелээн хүннеринден эгелээш, амдыгаа чедир Дээрниң Чагыргазынга удур халдаашкын чоруп келген база хөй улус Чагырганы күш-биле эжелеп алыксап турар#Лк. 16:16.

13Бурганның хамык медээчилери болгаш ыдыктыг хоойлу Иоанның кээр мурнунда ол бүгүнүң дугайында өттүр билип медеглеп турганнар#11:13 Азы: «Бурганның хамык медээчилериниң болгаш ыдыктыг хоойлунуң өттүр билген медеглелдери Иоаннче эккел чораан». . 14А хүлээп аар деп бодаар болзуңарза, Иоанн дээрге чедип кээр ужурлуг Илия ол-дур#Мал. 4:5; Мф. 17:12-13; Лк. 1:17. 15Дыңнаар кулаа бар кижи дыңназын!#Ажыд. 2:7

16Бо салгалдың улузун Мен кымның-биле деңнээйн? Олар базаар шөлүнге олуруп алгаш, бир чамдыызы өскелеринге мынча деп алгырышкан бичии уруглар олчаан-дырлар:

17„Бис силерге лимбилеп бердивис,

а силер самнавадыңар.

Бис силерге кажыыдал ыры ырлап бердивис,

а силер ыглашпадыңар“.

18Иоанн чедип келгеш, аъш-чем чивес, арага ишпес боорга#Мф. 3:4; Лк. 1:15, олар: „Букшуураан“ – дижир-дир. 19Кижи амытан Оглу чедип келгеш, чемненир, ижер боорга#Ин. 2:1; 12:2, олар: „Көрүңер, чазый, арагачы хей-дир, үндүрүг хавырыкчылары болгаш бачытка борашканнарның өңнүү-дүр“ – дижир-дир#Мф. 9:10-11. А мерген угаан бодунуң ажыл-херээ-биле шынзыттынар».

Галилеяның бүзүревээн хоорайларынга кеземче

(Лк. 10:13-15)

20Оларның аразынга дыка хөй кайгамчык чүүлдерни кылырга-даа, бачыттар үүлгедиринден ойталаваан хоорайларның чурттакчыларын Иисус ынчан буруудадып эгелээн:

21«Хоразин, ат болур сен! Вифсаида, ат болур сен!#Мк. 6:45; 8:21 Силерге көргүскеним дег кайгамчык чүүлдер Тир, Сидон хоорайларга#Мк. 3:7 болгулаан болза, олар шагда-ла бачыттарын миннип, качыгдалдың самдар хевин кедип, баштарын хүл-биле бызаарлар ийик. 22Ынчангаш шииткел хүнү кээрге, силерге көөрде, Тир биле Сидонга#Иса. 23:1; Иер. 47:4; Иез. 26:2; Иоил 3:4; Ам. 1:9; Зах. 9:2; Мф. 15:21 безин өршээл улуг боорун чугаалап тур мен. 23Капернаум, сен база-ла дээрге чедир көдүрлүрүн кордадың бе? Чок, тамыже дүңдерлип дүжер сен!#Иса. 14:13, 15 Чүге дээрге сеңээ көргүскеним дег кайгамчык чүүлдерни Содомга база кылган болза, ол хоорай бөгүнге чедир турар ийик. 24Ынчангаш шииткел хүнү кээрге, сеңээ көөрде, Содомга безин өршээл улуг боорун силерге чугаалап тур мен!#Иез. 16:48»

Адазы болгаш Оглу

(Лк. 10:21-22)

25Иисус ол өйде мынча дээн: «Ачай, дээр биле черниң Дээргизи! Бо чүүлдерни мерген угаанныглар болгаш эртем-билиглиглерден чажыргаш#Иов 37:24; Иса. 29:14, чаштарга көргүскениң дээш, Сени алдаржыдып тур мен! 26Ийе, Ачай, Сээң күзел-сорууң ындыг болган.

27Бүгү чүүлдү Адам Меңээ хүлээдип берген#Ин. 13:3; 17:2. Адазындан аңгы кым-даа Оглун билбес, Оглу болгаш Оглунуң ону айтып бээрин күзээн улузундан өске кым-даа Адазын база билбес»#Ин. 6:46; 7:29; 8:19; 10:15.

Могап турупканнарның тамчык-дыжы

28«Могап турупкан, аар чүък чүктээн улус дөгере Меңээ келиңер!#Ыд. ыр. 54:23; 67:20; Ин. 7:37 Мен силерге тамчык-дышты хайырлаар мен. 29Мээң чагыгларымны бодуңарга хомут дег кеткеш#Иер. 28:10-14; Ос. 10:11, Менден өөренип алыңар, Мен биче сеткилдиг болгаш чөпшүл чүректиг мен#Зах. 9:9, ынчангаш чуртталгаңарны тамчык-дыш бүргей бээр#Иер. 6:16. 30Чүге дээрге Мээң чагыгларым хомуду чиик база Мээң чүдүртүр чүъгүм аар эвес#1 Ин. 5:3».

Currently Selected:

Матфей 11: TUV

Highlight

Copy