Luka 8

Bakīma banondeelaga Yesu

1Ha numa ya henaho, ū Yesu ūja akūlomeelaga Ng'hūlū ja būtemi bo ng'wa Mulungu hose pye ū mu mizengo ī mitaale nī mido. Na a bahemba bakwe abo ikūmi na babīlī walī hamò nabo. 2Baalīmo na bakīma balebe, bangī baalī bīngījiwa masamva na bangī būpījiwa būsaatu; ūmò wa bakīma benabo walī Malia ūyo witanagwa Magadalena, ū ng'wene gaalī gang'wīnga masamva mpungatī. 3Ūngī walī Yoana nke wa ng'wa Kūza, ūyo walī nang'hani wa sabo ja ng'wa Helode. Walīmo na Susana, na bangī bingī dūhū, abo babagunanhaga kūfuma mu sabo jabo benekīlī.

Shigemeng'hejo sha mībi

Mat 13:1-9; Mko 4:1-9

4Hūna ibita itaale libilinga, banhū bingī kūfuma mu būlī nzengo būng'wikuunūkīla ū Yesu. Wandya kūbalomeela bo kūtūmamīla shigemeng'hejo; ūhaya gīkī, 5“Mībi akaja kūbība mbīyū jakwe. Aho alībība jingī jūgwīla mu nzīla, jūpandagīlwa na kūlyiwa na noni ja kūlala. 6Jingī jūgwīla mu sī ya mawe mawe; aho jazwa jūcha nguno jikagayiwa ū būdoto. 7Jingī jūgwīla mu ming'hwa, a ming'hwa gūkūlanīja najo gūjishiteleja. 8Alīyo jimò jikagwīla mu sī yawiza, jūkūla jūtwaja mbeke igana igana.” Aho wamala ū kūhaya ī mihayo yenīyī ūbakomeleja; ūhaya gīkī, “Ūyo alī na matū gakigwaga ni igwage.”

Nguno ya kūtūmamīla shigemeng'hejo

Mat 13:10-17; Mko 4:10-12

9A bahemba bakwe būmūja a makūlū ga shigemeng'hejo shenīsho. 10Nang'hwe ūbawīla gīkī, “A bing'we ng'winhilwe būmani, mujimane ī mbisīla ja būtemi bo ng'wa Mulungu, alīyo ū kū bangī shilī shigemeng'hejo dūhū; ībize gīkī,

‘Ū kūlola balole, alīyo batizūbona;

nū kwigwa bigwe, alīyo batizitegeleja.’”

Makūlū ga shigemeng'hejo sha mībi

Mat 13:18-23; Mko 4:13-20

11“Hūna lūūlū, a makūlū ga shigemeng'hejo shenīshi galī gīkī, ī mbīyū gūlī mhayo go ng'wa Mulungu. 12Alīyo ījo jilī mu nzīla, balī abo bakagwigwaga ū mhayo; gwike ū Ng'wanishi wiza wagūpula ū mhayo wagwīnja ū mung'holò jabo, batizūzunya bakapījiwa. 13Lelo ījo jilī mu sī ya mawe mawe, a bene balī abo bakagwigwaga ū mhayo bagwanukūla mu būyegi, gwike gwabiza gūtī na miji. Balī ba kūzunya kwa kakanza dūhū, alīyo ū mu makanza ga kūgeng'wa bakashokaga kū numa. 14Hama ījo jigwīlile mu sī ya ming'hwa, a bene balī abo bakagwigwaga ū mhayo; gwike ū mu shimīzīle yabo bakashitelejiagwa na myatīla ya mu sī, hamò na būsabi wamo na kūdoosela būpanga, nose bakalemeelagwa nūūlū kūtwaja matwajo mashikanu. 15Alīyo ījo jilī mu sī yawiza, a bene h'abo bakagwigwaga ū mhayo mung'holò yawiza na ya logohano, bagūdima; bayūtwaja matwajo mu wiyūmīlīja.”

Shigemeng'hejo sha tala

Mat 5:15; Mko 4:21-25

16“Hūna lūūlū managi gīkī atīho ūyo akabachaga tala wīkundīkīja itangwa, nūūlū wībisa ng'wizungu lya būlīīlī. Ī tala īkabachiagwa yatūūlwa h'ikīndīkīlo lyayo, gīkī pye abo bakwingīlaga ū mu kaya bayūlībona ī lisana lyayo. 17Nguno gūtīho mhayo gwibisile nūūlū gūmò, ūyo gūtalafunījiwa ha ng'wape! Na hangī ītīho mbisīla īyo ītalitenda īkamanwa. 18Hū kūhaya ilang'hanagi ūmo mukūdegelekelaga; nguno būlī ng'wene ūyo alī na shikolo akwinhwa, lelo ūyo atī na shikolo, akūtaajiwa nī shisho akwiganikaga gīkī alī nasho.”

Yesu na bang'wawe

Mat 12:46-50; Mko 3:31-35

19Hūna ū nina wiza hamò na a baana ba ng'wawe ū Yesu, baalī batogilwe kūshika aho walī, alīyo būlemeelwa kūlwa nguno y'ibita lya banhū. 20Ūwīlwa gīkī, “Ū noko alī hanze wīmīīlaga na a bazunayo; balītogwa kūkūbona.” 21Alīyo ū wei ūbashokeja ūbawīla gīkī, “Ū nene ū mayū na a bazuna bane, balī abo bakagwigwaga ū mhayo go ng'wa Mulungu bagwīta.”

Kūlembeeja nyanza

Mat 8:23-27; Mko 4:35-41

22Lūshikū lūngī ū Yesu akingīla mu lyato hamò nabo a bahemba bakwe; ūbawīla gīkī, “Tūjagi kū nkīlo gwa nyanza;” na ng'hana būbuga bajile. 23Aho balīja, ū Yesu ūlaala tūlo. Kūhayimanīla gwabūūka nyaga ntaale bataalī ū mu nyanza. Ī lyato lyūyūdaha minzī, bibona babiza mu nhabaala ya kūyagala. 24Būmisha balīhaya gīkī, “Seeba Seeba, twashila!” Aho wamisha, ūgūhama ū nyaga na a mahuuli ga minzī, shūlembeela, hūbiza sele sele. 25Hūna ūbawīla, “A bing'we ni kūlī halī ū kūzunya kwing'we?” Bakogoha no, būyūkumya dūhū ū kūnū baliwīla gīkī, “Ū munhū ng'wenūyū ī gete ni nani o kūyūhama na miyaga, būyaga na minzī pye shayūng'wigwa!”

Munhū wa Gelasi kwīngījiwa masamva

Mat 8:28-34; Mko 5:1-20

26Hūna būbuga bajile, būūkashika kū sī ya Bagelasi, yalī yilolile nī Galilaya. 27Aho wika ha sī nyūmu ūshimīza ajile, munhū nebe walī na masamva ūmanhya nang'hwe afumile kū nzengo. Ū munhū ng'wenūyo walī dūūhū, na walī wakwīja ī shikū atikalaga mu kaya, wikalaga kū mashigila. 28Aho wamona ū Yesu ūlīla n'ilaka itaale; ūgwa kū būtongi bokwe kūnū alīhaya gīkī, “Bebe Yesu Ng'wana wa ng'wa Mulungu ūyo alī higūlya no, ūlī na mhayo kī nū nene? Nalīkwikūmbīlīja ūtizūniluhya!” 29Akahaya gīko nguno ū Yesu akalīlagīla ī lisamva līmfume ū munhū ng'wenūyo. Wikalaga abohiwe minyololo na nhendele, alīyo ng'hangala ningī ī lisamva lyandimaga wagatīnagūla a mabohejo, lyampeeja kūja kū matogolo. 30Ū Yesu ūmūja ū munhū ng'wenūyo gīkī, “Ī lina lyako ūlī nani?” Nang'hwe ūshosha, “Nalī Mabita,” nguno a masamva ayo gaalī gang'wingīlīīla gaalī mingī. 31Hūna gūndayīīla gīkī atizūgalagīla gaje ng'wishimayenze. 32Līkasangwa lyalīho idale lya ngulubī ningī jadīīmaga mu lūgūlū, gūndayīīla gīkī agazunīlīje gaje gakingīle mu jene; ūgazunīlīja. 33A masamva aho gīnga ū mulī munhū ng'wenūyo, gūkingīla ū mu ngulubī jenījo; ī lidale ī lyose liyita nhambo kūjīlīīla kū lūgegu lo nyanza, jūkagwīla mu minzī, jūng'wa nhuli, jūcha! 34A badīīmi bajo aho babona yabiza gīko, būpeela nhambo, būja būūkagūkumūcha ū mhayo gwenūyo mu nzengo, nū kū magūngūli. 35Banhū būfuma kūja kūgūlola ūyo gūkilonga, aho bashika a halī Yesu būnsanga ū munhū ūyo gakamfuma masamva igashije hihī na mhambala ja ng'wa Yesu azwalile shizwalo, nīyo alī na masala madeekanu. Bakogoha no! 36Hūna a bambona būbasomboolela ūmo akapīgījiwa ūyo walī na masamva. 37Pye a banhū ba mu sī ya Gelasi būng'wikūmbīlīja ū Yesu abīngīle, nguno bakagwīlwa booba būtaale no; ng'hana wingīla mu lyato ūshoka. 38Ū munhū ūyo akīngījiwa masamva ūng'wikūmbīlīja gīkī nū ng'wene adimane nang'hwe. Alīyo ū Yesu ūnaga aje; ūng'wīla gīkī, 39“Shokaga kaya ūkabawīle īyo Mulungu wakwītīlaga.” Ng'hana ūja hose pye ū mu nzengo gwenūyo, akwīkumūchaga īyo akīītīlwa na Yesu.

Būdūla bo kūpīja na kūjūūcha

Mat 9:18-26; Mko 5:21-43

40Hūna ū Yesu aho washoka, ibita lya banhū lyūnsūng'wanha, nguno pye baalī banindīīla. 41Kūhayimanīla wiza ngosha ūmò, ntaale w'isinagogi; lina lyakwe Yailo. Aho washika ūngwīla mu magūlū ū Yesu, ūng'wikūmbīlīja ashike ha ng'wakwe. 42Nguno nshīke wakwe, ng'wanikī wa myaka gītī ikūmi n'ībīlī, walī nsaatu no; nīyo hihī na kūcha. Hama walī nang'hwe ūmò ng'wenūyo dūhū. Ū Yesu aho wabūūka ajile, na mabita ga banhū gūnondeela, gūja gang'wishitelegije. 43Walīho nkīma nebe wakoyiagwa būsaatu bo ngeji#8:43 Ngeji: A henaha shandīkwa shingī shongegije na mihayo īyī: Kūshisha walī wajimala pyī ī sabo jakwe kūlwa kūjitūmamīla kū bafumu., nose ūmala myaka ikūmi n'ībīlī; alīyo walī atīho nūūlū ūmò wa kūdūla kūmpīja. 44Ū nkīma ng'wenūyo ūng'wizīīla ū Yesu kū numa, ūshika ūnkuumya kwipīndo lya ng'hanjo yakwe; haho na haho a mininga gakwe goya ū kūzwa. 45Ū Yesu ūbūja, “Nani wanikuumya?” Aho bahuumūla pye a banhū, ū Petelo ūhaya, “Seeba a banhū balīkūkuumya nguno bakwishitelejaga!” 46Alīyo ū Yesu ūhaya, “Munhū nebe wanikuumya, nguno niyigwa nguzu janīnga.” 47Ū nkīma ng'wenūyo aho wabona gīkī atūdūla ū kwibisa, wiza a halī Yesu alīdetema, ūshika ūntugīja mazwi ūnsomboolela hape hape kū būtongi wa banhū bose, ī nguno īyo īkang'wenheleja kūnkuumya, nū mumo akapīlīla haho na haho. 48Nang'hwe ū Yesu ūng'wīla, “Nshīke wane, ū kūzunya kwako kwakūpījaga; jaga mu mhola.” 49Aho ataalī ūyomba nabo gīko, kūhayimanīla wiza munhū afumile ū kū ng'wa ntaale w'isinagogi; ūshikīla kūhaya gīkī, “Ū nshīke wako wazumalīka, nose ītīho nguno ya kūnkoya ū Nangi!” 50Alīyo ū Yesu aho wigwa ūng'wīla gīkī “Ūtogohage bebe ng'wene sanyaga, akūpīla dūhū.” 51Aho washika a ha kaya, atanzunīlīgije ose ose ū kwingīla, ūlū atī Petelo na Yohana na Yakobo; hamò na ise nū nina wa ng'wanikī. 52Pye a banhū balīlaga, balīnīla ū ng'wanikī! ū Yesu ūbawīla gīkī, “Mutalīlage nguno atachile, alaalile dūhū.” 53Būnseka nyachilū chilū kūlwa kūndalaha, nguno baalī bamanile gīkī ū ng'wanikī walī wamala kūcha. 54Alīyo ū wei ūndima nkono; hūna witana alīhaya, “Ng'wanikī būūkaga!” 55Ū moyo gokwe gūnshokela, ūbūūka haho na haho. Ū Seeba ūbalagīla bang'winhe shilīwa. 56A babyaji bakwe bakakumya no; alīyo ū wei ūbalemeja batizūng'wīla munhū nūūlū ūmò ūyo gūkilonga.

Currently Selected:

Luka 8: SUKBI15

Highlight

Copy