Yohana 20
20
Kūjūūka kwa ng'wa Yesu
1A ha lūshikū lo kwandya nyuma, ū Malia Magadalena akaja ū kū shigila dilū makīngo, ūsanga ī liwe lyīnjiwagwa a ha shigila. 2Wīnga ko alīpeela ajile kūlī Simoni Petelo nū ng'hemba ū ūngī, ūyo Yesu walī antogilwe. Ūūkabawīla gīkī, “Bang'wīnjaga ū Seeba ū mu shigila, tūtamanile hīmba bantūūlaga halī!” 3Hūna ū Petelo nū ng'hemba ū ūngī ng'wenūyo, būbūūka bajile ū kū shigila. 4Bandya kūpeela nhambo pyī būbīlī wabo. Alīyo ū ng'hemba ū ūngī ūnshiga ū Petelo, ūbiza o kwandya ū kūshika a ha shigila. 5Winama kūsūūla moi, kūnū akwīlola lolaga ī myenda ya kūjīkīlwa; gwike atingīlile mo. 6Ūshika nū Simoni Petelo a ha numa yakwe, ū ng'wene ūshikīla kwingīla mo ū mu shigila; wībona ī myenda ūmo yalī ītūūlīlilwe. 7Nī shitambaala īsho shalī shikonzeelilwe ū kū ntwe gokwe ūshibona; ī shene shilinga lingilwe shūtūūlwa heeke, shitī hamò nī myenda ī yīngī. 8Hūna nū ng'hemba ū ūngī, ūyo akashika kwandya a ha shigila, wingīla moi; ūbona ūzunya. 9Kūshisha ikanza lyenīlo baalī bataalī ū kūshiitegeleja ī shandīkwa, ī gīkī yalī yigelile jūūke kūfuma mu bafu. 10Hūna būshoka kaya a bahemba benabo.
11Gwike ū Malia ūlekwa īmīīlile haho hanze ya shigila akūlīlaga. Aho alīlīla gīko, winama kūlola hangī ū mu shigila. 12Ūbabona mo bamalaika babīlī bazwalile myenda yape, bigashaga aho gwalī gūlaajiwe ū mīlī go ng'wa Yesu, ūmò walī ūko gaalī magūlū, ūngī ūko gwalī ntwe. 13Būmūja gīkī, Ūlīlīlīīla kī mayū?” Nang'hwe ūbawīla, “Bang'wīnjaga ū Seeba wane, alīyo natamanile ūko bantwalaga!” 14Aho wahaya gīko ūgalūka kūlolela kū numa, ūmona ū Yesu wīmīīlaga, alīyo atang'witegelegije gīkī walī hū ng'wene ū Yesu. 15Nang'hwe Yesu ūmūja, Ūlīlīlīīla kī mayū? Ūlīkooba kī?” Ū wei wiganika gīkī hamo ntūmami wa mu ngūnda. Ūng'wīla, “Baba ūlū wang'wīnjaga niwīlage ūko wantūūlaga, nanjīle ko!” 16Hūna ū Yesu ūng'witana, “Malia!” Ūngalūkīla ūng'witana mu Shihebulania, “Raboni!” Makūlū gaho, “Nangi!” 17Ū Yesu ūng'wīla, “Yaya ū kūnidimala, nguno nataalī ū kūlinha kūja kūlī Baba. Alīyo jaga ū kū bang'wise, ūkabawīle gīkī nalīja kūlī Baba, ūyo alī Sīng'we na a bing'we; kūlī Mulungu wane, ūyo alī Mulungu wing'we na a bing'we.” 18Ū Malia Magadalena aho washika ū kū bahemba ūbawīla gīkī, “Bing'we namona ū Seeba ūniwīla ī mihayo yenīyī!”
19Ī mhīndī ya lūshikū lwa kwandya nyuma lwenūlo, a bahemba baalī bilugalīla mu numba, kūlwa kūbogoha Bayudaya. Bahayimanīla ū Yesu wīmīīla ha gatī gatī yabo; ūbagīsha, “Mhola ībi na bing'we!” 20Aho wamala ū kūbagīsha ūboolekeja a makono gakwe, nū lūbazu. Bakayega no a bahemba ū kūmona ū Seeba. 21Na ūbawīla hangi gīkī, “Mhola ībi na bing'we; ūmo anitūmīlile ū Baba nū nene nalīmutūma gīko a bing'we.” 22Aho wamala ū kūhaya ī yenīyo; hūna ūbawīla gīkī, “Ng'wanukūlagi Moyo Ng'wela. 23Bose bose abo mukūbakulilwa shibi shabo bakūbiza bakulilagwa, ūlū ng'ūbatungila numho batungilagwa.”
24Alīyo ūmò wabo abo ikūmi na babīlī, lina lyakwe Tomaso, lina līngī witanagwa “Wībasa”, ū ng'wene osangwa atī ho aliza ū Yesu. 25Na lūūlū būng'wīla a bahemba biye, “Twamonaga ū Seeba,” ū wei ūbawīla gīkī, Ū nene natīko ū kūzunya ūlū natagabonile a malanda ga misumali ū mu makono gakwe, nūgakuumya na kūgakuumya na lwala lone; hangī nūtūūla nū nkono gwane a ha lūbazu lokwe!” 26Ha numa ya shikū inaane, a bahemba būsangwa balī mu kaya hangī, nī milyango īlugalilwe, lelo nū Tomaso alī hamò nabo; kwimanīla ū Yesu wīmīīla ha gatī gatī yabo, ūbagīsha hangī, “Mhola ībi na bing'we mhola!” 27Hūna ūng'wīla ū Tomaso gīkī, “Enhaga ū lwala lwako aha ūgalole a makono gane, wenhe nū nkono gwako ūgūtūūle a ha lūbazu lone, ūzunye ooye ū kūhana hana.” 28Ū Tomaso ūnshokeja alīng'wīla, “Seeba wane na Mulungu wane!” 29Nang'hwe ū Yesu ūng'wīla, “Hū wazunya īkī wanibona? Alīyo balī na lubango abo bakazunyaga nūūlū aho bataalī ū kūbona.”
30Ū Yesu wabeeja shimanīkījo shingī no ū kū būtongi bo bahemba bakwe. Īsho shitandīkilwe ū mu shitabo shenīshi, shilīho shingī no. 31Alīyo ī shenīshi shandīkilwe kūlwa kūmugunanha, muzunye gīkī ū Yesu alī Ng'wana wa ng'wa Mulungu, ūlū ng'ūzunya mukūpandīka būpanga ū mu lina lyakwe.
Currently Selected:
Yohana 20: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.