wandījo 17

Ilagane mu nzīla ya kūsaalwa

1Ū Abulamu aho washisha myaka makūmi kenda na kenda (99), ū SEEBA akang'wilongela ūng'wīla gīkī, “Ū Nene nalī Mulungu wa būdūla bose, shimīzaga mu kūniigwa nene, hangī ūbize ūtī na shilingo. 2Nakūbeeja ilagane a ha gatī yane nū bebe; nīyo ū būbyīle wako nakūwīta būbize būtaale.” 3Ū Abulamu ūgwa achimīgije; ū Mulungu ūng'wīla gīkī, 4“Ī lilagane lyane ū kūlī bebe līlī gīkī, Ūkūbiza ise wa mahanga mingī. 5Nīyo ūtitanwa Abulamu hangī; ī lina lyako lyabizaga Abulahamu, nguno naakwītaga kūbiza ise wa mahanga mingī. 6Nakūkwīta ūbize na būbyīle būtaale, nabeeje mahanga mingī kūfuma mulī bebe; na batemi bakūfuma ū mulī bebe. 7Nakūlīguzuhya ī lilagane lyane, lībize ilagane lya welelo na welelo ū kūlī bebe, nū būbyīle wako shibyalīlwe na shibyalīlwe īsho shikwiza ha numa yako; ū nene nabize Mulungu wako, na Mulungu wa būbyīle wako ūbo būkwiza ha numa yako. 8Ī sī ya Kanaani īyo ūkwikalaga mo gītī nobeji, pyī ī yose nakūkwinha bebe hamò na būbyīle wako ūbo būkwiza ha numa yako. Īkūbiza yako ya wikomangīle, shikū jose ja welelo na welelo; na nakūbiza Mulungu wabo.”

9Hūna ū Mulungu ūng'wīla ū Abulahamu gīkī, “Īkwigeleelilwe ūlīlang'hane ī lilagane lyane ū bebe ng'wenīkīlī, pyī nū būbyīle wako, shibyalīlwe na shibyalīlwe īsho shiliza ha numa yako. 10Ī lilagane lyane īlo nalīlītūūla ha gatī yane nū bebe, hamò nū būbyīle wako ūbo būkwiza ha numa yako, īlo ūkūlīlang'hana līlī gīkī, Būlī ngosha ū mu bing'we akūsaalwa. 11Hūna lūūlū mukūyūsaalwa; ū būsaalwa wenūbo hū lūkūbiza lūmeng'ho lw'ilagane a ha gatī yane nū bing'we. 12Ū mu shibyalīlwe shing'we ī shose īsho shiliza, būlī ng'wana ngosha ū mu bing'we ūlū ūshisha shikū inaane asaalwe; abize wa kūbyalīlwa ha kaya, nūūlū wa kūgūlwa na hela kūfuma kū babisa, ūyo atī wa kūfuma mulī bebe. 13Būlī ng'wene ū wa kūbyalīlwa ha kaya yako shiigelile asaalwe, pyī nūūlū wa kūgūlwa bo hela jako. Ī lilagane lyane līkūbiza mu mīlī gwing'we; līl'ilagane lya welelo na welelo. 14Ngosha ose ose ūyo atasaalilwe, ūyo mīlī gokwe gūtasaalilwe, akūkomanyiwa īnjiwe ū mu banhū bakwe; nguno ū ng'wenūyo nkenaagūji w'ilagane lyane.”

Saala kwisagījiwa kūbyala ng'wana

15Hūna ū Mulungu ūng'wīla ū Abulahamu na gīkī, “Ū nke wako ū Salai, oyaga ū kūng'witana Salai; ī lina lyakwe lyabizaga Saala. 16Nīyo nakūmfuuha, hama nakūkwinha ng'wana ngosha kūbītīla mulī we. Nakūmfuuha abize nina wa mahanga, na batemi ba banhū bakūfuma mulī we.” 17Ū Abulahamu ūgwa matuja nzwi, achimīgije; hūna ūseka kūnū aliwīla gīkī, “Ū munhū wa myaka igana nang'hwe adūgije kūbyalīlwa ng'wana gete? Ū Saala na būgikūlū bokwe#17:17 Būgikūlū: Nūūlū mu myaka yakwe makūmi kenda yose yenīyo. wenūbo ūbyala ng'wana!” 18Hūna ū Abulahamu ūng'wīla ū Mulungu gīkī, “Hambū hambū ū Ishimaeli ūlū ni okūla akahangama kū būtongi wako!” 19Ū Mulungu ūhaya, “Ūlītūngīlīja; alīyo ū nke wako gete ū Saala, h'ūyo akūkūbyalīla ng'wana ngosha, nang'ho ūkūng'wilīka ī lina lyakwe Isaka. Ū ng'wenūyo h'ūyo nakūbeeja nang'hwe ī lilagane lyane, lībize ilagane lya welelo na welelo, kūlwa nguno ya būbyīle wakwe ūbo būkwiza ha numa yakwe. 20Nī ya ng'wa Ishimaeli īyo ūlīyīhaya nayigwaga nayo; nang'hwe nakūng'wīlūkīla ī mbango. Nakūng'wīta abize na būbyīle būtaale, na akūbiza na mabità mataale no no no; abize ise wa basugi ikūmi na babīlī; nīyo nakūng'wīta kūbiza ihanga itaale. 21Alīyo ī lilagane lyane nakūlībeeja na Isaka, ūyo Saala akūkūbyalīla ha ng'waka makanza gīt'aya.”

22Ū Mulungu aho wamala kūlūngalūnga nū Abulahamu, wīnga ho. 23Ū mu lūshikū lwenūlo, ū Abulahamu ūnsola ū ng'witūnja wakwe ū Ishimaeli, na a basese abo baalī baagūlwa bo hela jakwe, na a ba kūbyalīlwa a ha kaya yakwe, pye a ba gosha ba ha ng'wakwe ūbasola, ūbasaala gīt'umo Mulungu akang'wīlīla. 24Ū wei ū Abulahamu aho alīsaalwa, walī na myaka makūmi kenda na kenda (99). 25Alīyo ū ng'witūnja wakwe ū Ishimaeli, walī na myaka ikūmi n'idatū aho alīsaalwa. 26Ū Abulahamu nū Ishimaeli ū ng'witūnja wakwe, bakasaalwa lūshikū lūmò būbīlī wabo. 27Na būlī ngosha ū mu kaya ya ng'wa Abulahamu ūsaalwa hamò nang'hwe mu lūshikū lwenūlo; abize wa kūbyalīlwa ha kaya, nūūlū wa kūgūlwa bo hela kūfuma kū babisa.

Currently Selected:

wandījo 17: SUKBI15

Highlight

Copy