wandījo 16
16
Salai na Haagali
1Gwike ū Salai ū nke wa ng'wa Abulamu walī atīnamyalīla baana ū ngoshi, alīyo walī na nsese nkīma muna Misili, witanagwa Haagali. 2Lūshikū lūmò ūng'wīla ū Abulamu gīkī, “Bebe ū SEEBA wanilugalīla ū nene ū būbyīle, ni walaala nang'hwe ū nsese wane; hamo nadūgije kūpandīka a baana mu nzīla yakwe.” 3Hūna lūūlū ū Abulamu aho washisha myaka ikūmi al'ū mu sī ya Kanaani, ū nke wakwe Salai ūnsola ū nsese wakwe ū Haagali, ū muna Misili; ūng'winha ū ngoshi gīkī antoole. 4Ū Abulamu ūlaala nag'hwe ū Haagali, ūngeta nda; ū nkīma ng'wenūyo aho wabona gīkī wabiza nda, ūndalaha ū nina būgonzo. 5A henaho ū Salai ūng'wīla ū Abulamu gīkī, “Yene yako lūūlū, a makoye aya galīnigwīla genaya wagenhelegije bebe. Nguno ū nene nakakwinha ū nsese wane gīkī ūntoole, hūna aho wabona gīkī wabiza nda, ūnidalaha. Ū SEEBA ni abizage namuji a ha gatī yane nū bebe!” 6Ū Abulamu ūhaya, “Ū nsese wako alī mu nkono gwako, ng'wītīlage mhayo gose gose ūyo ūlīgūbona gīkī gūng'wigeleelilwe.” Hūna ū Salai ūnuhya ū Haagali, nose ūpeela wīnga ho.
Haagali na malaika wa ng'wa SEEBA
7Malaika wa ng'wa SEEBA ūmona ū Haagali ha lwinzī, lwalī hihī n'ipanda lībītile ng'witogolo kūja sī ya Shuuli. 8Ūhaya, “Bebe Haagali nsese wa ng'wa Salai, ūlīfuma halī, na ūjile hei?” Nang'hwe ūshosha, “Nalīmpeela mayū būgonzo, Salai.” 9Ū Malaika wa ng'wa SEEBA ūng'wīla gīkī, “Shokaga ū kūlī noko būgonzo, ūkabize ng'widohya ū kūlī we.” 10Ū Malaika ongeja kūhaya gīkī, “Nīyo ū būbyīle wako nakūbūkwīja no, kūshisha būtūdūla kūbalwa.” 11Ū Malaika ng'wenūyo ūhaya na gīkī,
“Ī haha ū bebe ūlī nda,
Ūkūbyala ng'wana ngosha.
Ī lina lyakwe ūkūng'wilīka Ishimaeli,
nguno ū SEEBA wagabonile
a makoye gako.
12Akūbiza gītī nzobe ya mu matogolo;
nīyo akūbiza ng'wilwisha
na banhū bose,
hama pye a banhū bakwilwisha nang'hwe.
Ū mu kikalīle kakwe,
akwilemeelwa nabo pye a badūgūye.”
13Ū nkīma ng'wenūyo ūng'winha lina ū SEEBA ūyo akayomba nang'hwe; ūhaya, “Ū bebe ūlī Mulungu ūyo akanibonaga;” kūnū aliwīla gīkī, “Ī lelo namona Ūyo akanibonaga.” 14H'ī nguno yene ū lwinzī lwenūlo lūkitanwa lina lya, “Beeli-lahai-loi;” nī lelo īyī lūtaalī lūlīho aho lwalī, a ha gatī ya Kadeshi na Beledi. 15Aho lyashika ī likanza, ū Haagali ūmyalīla ū Abulamu ng'wana ngosha; ū Abulamu ūng'winha lina lya Ishimaeli ū ng'wana ūyo Haagali akamyala. 16Ū nkīma ng'wenūyo aho alīmyala ū Ishimaeli, ū Abulamu walī na myaka makūmi anaane n'ītandatū.
Currently Selected:
wandījo 16: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
