wandījo 11
11
Nzengo gwa Babeli
1Ali lūūlū, ī sī aho ītaalī na lūlīmi lūmò na kalūngalūngīle ka mbika īmò, 2a banhū bajaga bakūsaama saamaga kūjīlīīla mhandī ja kīya. Nose būūkashika mu mbūga ngalī ya Shinaali,#11:2 Shinaali: Nūūlū, Babeli. būtūūla ng'hambī būzenga henaho. 3Hūna biwīla gīkī, “Bing'we tūbeejagi madafaali tūgapembe mu moto gagūlūngīle.” Ī shikū jenījo batūmamīlaga madafaali a ha ng'wanya gwa mawe, na laami a ha ng'wanya gwa būlongo. 4Bakiwīla, “Twibeegejagi nzengo, tūzenge mo numba ndīhu ya kūkuumya kū malunde; twipandīkīle lina, tūtizūsalang'hana sagala sagala hose pye ū mu sī.” 5Ū SEEBA wiza kūgūlola ū nzengo gwenūyo, nī numba ī ndīhu īyo babeejaga a banhū. 6Ū SEEBA ūhaya gīkī, “A banhū benaba balī na būmò, na bakūlūngalūngaga lūlīmi lūmò. Hūna lūūlū īkī bandyaga kwīta mihayo īlī gīkī, gūtīho gwa kūbalemeela ūyo balahaye kūgwīta. 7Ī gete tūjagi tūkabayuugagūlīle ū lūlīmi lwa kalūngalūngīle kabo, boye ū kwiyigwa ūlū balīyomba.” 8Hūna ū SEEBA ūbasambaaja, bīnga ho a henaho; būja bakūzengaga hose hose ū mu masī, gūcha ū nīmo gwa kūgūzenga ū nzengo gwenūyo. 9H'ī chene ī lipandī lyenīlo līkitanwa Babeli,#11:9 Babeli: Ū mu Shiheblania ī Babeli a makūlū gaho, Wilemeelwa nūūlū Wiyuugagūji. nguno a henaho h'aho ū SEEBA akalūyuugagūlīla ū lūlīmi lwa kalūngalūngīle ka mu sī hose pye. Ū SEEBA ūbasalang'hanya ho a henaho, bīnga ūbasambaaja kūja mu masī gose pye.
Būbyīle wa ng'wa Shemu
10Īyī yene mihayo ya būbyīle wa ng'wa Shemu. Aho yabīta myaka ībīlī kūfuma a h'ihūūma, ū Shemu akamyala Apakishadi; a makanza genayo wasangwa alī na myaka igana (100). 11Ū Shemu aho wamyala ū Apakishadi, akikala ho myaka magana atanò (500); ūbyala na bitūnja bangī hamò na bashīke. 12Ū Apakishadi aho washisha myaka makūmi adatū n'ītanò (35), ūmyala Shela. 13Hūna ū Apakishadi aho wamyala ū Shela, wikala ho myaka magana anè n'idatū (403); ūbyala na bitūnja bangī hamò na bashīke. 14Ū Shela nang'hwe aho washisha myaka makūmi adatū (30), ūmyala Ebeli. 15Ū Shela aho wamyala ū Ebeli, wikala ho myaka magana anè n'idatū (403); ūbyala na bitūnja bangī hamò na bashīke. 16Nang'hwe ū Ebeli aho washisha myaka makūmi adatū n'īnè (34), ūmyala Pelegi. 17Ū Ebeli aho wamyala ū Pelegi, wikala ho myaka magana anè na makūmi adatū (430); ūbyala na bitūnja bangī hamò na bashīke. 18Ū Pelegi aho washisha myaka makūmi adatū (30), ūmyala Leu. 19Ū Pelegi aho wamyala ū Leu, wikala ho myaka magana abīlī na kenda (209); ūbyala na bitūnja bangī hamò na bashīke. 20Ū Leu aho washisha myaka makūmi adatū n'ībīlī (32), ūmyala Selugi. 21Ū Leu aho wamyala ū Selugi, akikala ho myaka magana abīlī na mpungatī (207); ūbyala na bitūnja bangī hamò na bashīke. 22Ū Selugi nang'hwe aho washisha myaka makūmi adatū (30), ūmyala Naholi. 23Ū Selugi aho wamyala ū Naholi, akikala ho myaka magana abīlī (200); ūbyala na bitūnja bangī hamò na bashīke. 24Ū Naholi aho washisha myaka makūmi abīlī na kenda (29), ūmyala Teela. 25Ū Naholi aho wamyala ū Teela, akikala ho myaka igana n'ikūmi na kenda (119); ūbyala na bitūnja bangī hamò na bashīke. 26Ū Teela aho washisha myaka makūmi mpungatī (70), ūbabyala ba Abulamu na Naholi, na Halani.
Būbyīle wa ng'wa Abulamu
27Īyī yene mihayo ya būbyīle wa ng'wa Teela, ū Teela ūyo akababyala ba Abulamu na Naholi, na Halani. Ū Halani ūmyala Lutu, 28gwike ū Halani ng'wenūyo akazumalīka, ūneka ū ise ū Teela ataalī mpanga. Akazumalīkīla mu sī ya Ūlū ya Bakalidayo, ūko walī wabyalīlwa. 29A ba Abulamu nū Naholi būtoola būbīlī wabo; ū nke wa ng'wa Abulamu witanagwa Salai, ū wa ng'wa Naholi Milika. Ū Milika walī na nsīzaye witanagwa Iska; a babīlī benaba ū saabo walī Halani. 30Alīyo ū Salai walī atī na baana, nguno walī ngūmba. 31Hūna ū Teela ūsaama ū mu sī ya Bakalidayo, ī Ulu; wīnga nū ng'witūnja wakwe ū Abulamu, būsaama kūja Kanaani. Baalī nū ng'wizūkūlū wakwe ū Lutu, ū ng'wana Halani, hamò nū Salai ū ng'wīnga wakwe, ū nke wa ng'wa Abulamu. Alīyo aho bashika Halani, būpandīka nzengo, bikala ng'wenūmo. 32Ū Teela ūshisha būlamu bo myaka magana abīlī n'ītanò (205), hūna ūzumalīkīla mu sī ya Halani.
Currently Selected:
wandījo 11: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
