O le Fa‘aaliga 22
22
1‘Ona fa‘aali mai lea e ia ‘iā te a‘u le vaitafe manino o le vai o le ola, e manino pei o se ma‘a tioata, ‘ua tafe ifo mai le nofoāli‘i o le Atua ma le Tama‘i Mamoe. 2O i le moa o lona ala tele ma itū ta‘itasi o le vaitafe le la‘au o le ola, o lo‘o fua mai i fuata e sefulu ma le lua, e ta‘itasi le masina ma fua mai ai lona fuata; o lau fo‘i o le la‘au e fa‘amālōlō ai nu‘u. 3E leai fo‘i se toe fa‘afano e tasi; e i ai fo‘i le nofoāli‘i o le Atua ma le Tama‘i Mamoe, o ana ‘au‘auna fo‘i latou te ‘au‘auna ‘iā te ia. 4E va‘ava‘ai atu fo‘i i ona fofoga, e i ai fo‘i i ō latou muaulu lona suafa. 5E leai lava se po i lea mea; e lē aogā fo‘i ‘iā te i latou se molī, po o le malamalama o le la; auā o le Ali‘i le Atua na te fa‘amalamalamaina i latou. E fai fo‘i i latou ma tupu e fa‘avavau fa‘avavau lava.
O le Afio Mai o Iesu
6‘Ona fai mai lea o le agelu ‘iā te a‘u, “O nei ‘upu e fa‘amaoni ia ma le moni. O le Ali‘i fo‘i le Atua o le ‘au perofeta pa‘ia, ‘ua ‘auina mai e ia lana agelu e fa‘ailoa mai i ana ‘au‘auna mea e ao ‘ona vave o‘o mai.”
7Ona fa‘apea mai ai lea o Iesu, “Fa‘auta, ‘ou te vave alu atu. ‘Amu‘ia lē e tausi i ‘upu o le valo‘aga o lenei tusi.”
8O a‘u fo‘i o Ioane, ‘ua ‘ou fa‘alogo ma ‘ou va‘ai i nei mea; ‘ua ‘ou fa‘alogo ma ‘ou va‘ai, ‘ona ‘ou fa‘apa‘ū lea e ifo atu i vae o le agelu na na fa‘aali mai ‘iā te a‘u ia mea. 9A ‘ua fai mai o ia ‘iā te a‘u, “ ‘Ia oe, ‘aua lava! Auā o a‘u o lou uso a ‘au‘auna, o se tasi o le au perofeta o ou uso, o se tasi fo‘i o ē tausi i ‘upu o lenei tusi. ‘Ia e ifo i le Atua.” 10‘Ua fai mai fo‘i o ia ‘iā te a‘u, “ ‘Aua ‘e te fa‘amaufa‘ailogaina ‘upu o le valo‘aga o lenei tusi; auā ‘ua latalata ona aso. 11O lē e amiolētonu ia amiolētonu pea o ia, o lē e pa‘ia ia pa‘ia pea o ia.”#Tani 12.10
12“Fa‘auta, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu e tusa ma lana amio ‘ua fai.#Isai 40.10; 62.11; Sala 28.4; Iere 17.10 13O a‘u le Alefa ma le Omeka, o le amataga ma le gata‘aga, o lē e muamua ma lē e mulimuli.”#Fa‘aa 1.8,17; 2.8; Isai 44.6; 48.12
14‘Amu‘ia i latou o ē e ta o latou ‘ofu, ‘ina ‘ia taga ia i latou le la‘au o le ola, ma ‘ia latou ulu atu i le ‘a‘ai i ona faitoto‘a. 15A ‘ua i tuapā o ulī, ma ē e fa‘ataulāitu, ma ē e faita‘aga, ma ē e fasioti tagata, ma ē e ifo i tupua, ‘atoa uma lava ē ‘ua loto i le tala pepelo ma latou faia.
16“O a‘u o Iesu na ‘ou ‘auina atu la‘u agelu e molimau ‘iā te ‘outou i ia mea i ekalesia. O a‘u o le a‘a ma le fānau a Tavita, o le fetūao pupula.”
17‘Ua fetalai mai le Agaga ma le fa‘ato‘anofotane, “Inā sau ia.”
Inā fai atu fo‘i ia i lē e fa‘alogo, “Inā sau ia.”
O lē e fia inu, inā sau ia, ‘atoa ma lē e mana‘o i ai, inā ‘ave fua ia lea vai o le ola.
O ‘Upu Fa‘ai‘u
18Auā ‘ou te ta‘utino atu ia i latou uma o ē e fa‘alogo i ‘upu o le valo‘aga o lenei tusi. A i ai se isi e fa‘aopoopo mai se ‘upu i nei ‘upu, e fa‘aopoopoina atu e le Atua ‘iā te ia o mala ‘ua tusia i lenei tusi.#Teu 4.2; 12.32 19A i ai fo‘i se isi e ‘ave‘ese se ‘upu i ‘upu o le tusi o lenei valo‘aga, e ‘ave‘eseina e le Atua lona tofi i le la‘au o le ola, ma le ‘a‘ai pa‘ia, o mea ia ‘ua fa‘amatalaina i lenei tusi.#Kene 2.9; 3.22
20‘Ua fai mai le molimau i nei mea, “E moni, ‘ou te vave alu atu.”
Amene. O lea lava, le Ali‘i e Iesu, ia e afio mai!
21‘Ia ‘iā te ‘outou uma le alofa tunoa o le Ali‘i o Iesu. Amene.
Currently Selected:
O le Fa‘aaliga 22: SCNT
Highlight
Share
Copy
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.
