O le Fa‘aaliga 19

1‘Ua mavae nei mea, ‘ona ‘ou fa‘alogo lea e peiseaī o le leo tele o se fa‘apotopotoga o tagata e to‘atele o i le lagi, ‘ua fa‘apea atu, “Aleluia! ‘Ua i le Ali‘i lo tatou Atua le fa‘aolataga, ma le vi‘iga ma le fa‘ane‘ene‘ega, ma le mana. 2Auā e fa‘amaoni, e tonu fo‘i ana fa‘amasinoga; auā ‘ua fa‘asalaina e ia le fafine talitane e sili, o lē na fa‘aleagaina le lalolagi i lana faita‘aga, ‘ua ia taui atu ‘iā te ia lava le toto o ana ‘au‘auna,” 3‘Ua toe fai atu i latou, “Aleluia! ‘Ua alu a‘e lona asu e fa‘avavau fa‘avavau lava.” 4‘Ua fa‘apa‘u‘ū toeaina e to‘aluafulu ma le to‘afa, ma mea ola e fa, ma ‘ua ifo i le Atua o lē e ti‘eti‘e i le nofoāli‘i, ‘ua fa‘apea atu, “Amene. Aleluia!”

O le Tausama‘aga o le Fa‘aipoipoga a le Tama‘i Mamoe

5‘Ua o‘o mai fo‘i le leo mai le nofoāli‘i, ‘ua fa‘apea mai, “ ‘Ia vivi‘i atu i lo tatou Atua, o ‘outou ana ‘au‘auna uma, ma ‘outou o ē e matata‘u ‘iā te ia, o tagatanu‘u ‘atoa ma ali‘i.” 6‘Ua ‘ou fa‘alogo fo‘i e peiseaī o se leo o se fa‘apotopotoga o tagata, e peiseaī o se ta‘alili o vai e tele, e peiseaī fo‘i o se ta‘alili o faititili tetele, ‘ua fa‘apea atu, “Aleluia! Auā ‘ua fai ma tupu le Ali‘i le Atua e ona le malosi uma lava. 7‘Ia tatou fiafia ma ‘oli‘oli, ma tu‘u atu le vi‘iga ‘iā te ia; auā ‘ua o‘o mai le tausama‘aga a le Tama‘i Mamoe. O lona faletua fo‘i ‘ua saunia o ia e ia. 8‘Ua tu‘uina atu fo‘i ‘iā te ia ‘ina ‘ia ‘ofu o ia i le ‘ie vavae e mamā ma le pupula.” Auā o le ‘ie vavae o le amiotonu lea a le au pa‘ia.

9‘Ua fai mai fo‘i o ia, “ ‘Ia e tusi: ‘Amu‘ia e ‘ua tala‘iina i le tausama‘aga a le Tama‘i Mamoe.” ‘Ua fai mai fo‘i o ia ‘iā te a‘u, “O afioga moni ia a le Atua.”

10‘Ona ‘ou fa‘apa‘ū atu lea i luma o ona vae e ifo ‘iā te ia. A ‘ua fai mai o ia ‘iā te a‘u, “ ‘Ia oe, ‘aua lava; o a‘u o lou uso a ‘au‘auna, o so lou au uso fo‘i ‘ua i ai le mau ‘iā Iesu; ia e ifo i le Atua.”

Auā o le agaga o le valo‘aga o le mau lea ‘iā Iesu.

O lē e Ti‘eti‘e i le Solofanua Pa‘epa‘e

11Na ‘ou va‘aia fo‘i le lagi ‘ua avanoa, fa‘auta fo‘i, o le solofanua sinasina, o lē e ti‘eti‘e ai fo‘i ‘ua igoa o ia o le Fa‘amaoni ma le Moni, o le amiotonu fo‘i na te fa‘amasino ai ma tau ai le tau‘a. 12‘Ua pei o le mumū o le afi ona fofoga, ‘ua i lona ao fo‘i paleāli‘i e tele. ‘Ua ‘iā te ia le suafa ‘ua tusia e lē iloa e se isi ‘ua na o ia lava.#Tani 10.6 13‘Ua ‘ofu fo‘i o ia i le ‘ofu ‘ua fufui i le toto. ‘Ua fa‘asuafaina o ia, “O le ‘Upu a le Atua.” 14O ‘autau fo‘i o i le lagi ‘ua mulimuli atu ‘iā te ia i luga o solofanua sisina, ‘ua ‘o‘ofu i latou i le ‘ie vavae sinasina ma le mamā. 15‘Ua alu atu fo‘i le pelu ma‘ai mai lona fofoga ‘ina ‘ia taia a‘i e ia o nu‘u; e pule fo‘i o ia ‘iā te i latou i le to‘oto‘o u‘amea. E soli fo‘i e ia le soligāvine o le to‘asā mamafa o le Atua e ona le malosi uma lava. 16‘Ua ‘iā te ia fo‘i le suafa ‘ua tusia i lona ‘ofu ma lona vae, “O le Tupu o tupu, ma le Ali‘i o ali‘i.”#Teu 10.17; Tani 2.47

17Na ‘ou va‘aia fo‘i se isi agelu ‘ua tu i le la. ‘Ua ‘alaga fo‘i o ia ma le leo tele, ‘ua fa‘apea atu i manu uma e felelei i le taulotoa‘iga o le lagi, “ō mai ia, inā ‘outou fa‘apotopoto ane i le faiga‘ai a le Atua silisili. 18‘Ina ‘ia ‘outou ‘a‘ai i tino o tupu, ma tino o ta‘ita‘i o ‘au ta‘ito‘aafe, ma tino o tagata malolosi, ma tino o solofanua ma ē ‘ua ti‘eti‘e ai, ma tino o tagata uma, o ē e sa‘oloto ‘atoa ma pologa, o tagatanu‘u ‘atoa ma ali‘i.”

19‘Ona ‘ou va‘aia lea o le manu fe‘ai, ma tupu o le lalolagi, ma a latou ‘au ‘ua fa‘apotopotoina e tau ai le tau‘a ma lē ‘ua ti‘eti‘e i le solofanua ma lana itū tau‘a. 20‘Ona pu‘ea lea o le manu fe‘ai ‘atoa ma le perofeta pepelo o lē na faia fa‘ailoga i ona luga, o mea ia na fa‘asesēina ai e ia o ē ‘ua i ai le fa‘ailoga o le manu fe‘ai, ma ē ‘ua ifo i lona fa‘atagata. ‘Ua lafoolaina i lā‘ua i le lepa afi ‘ua mū i le teiō.#Fa‘aa 13.1-18 21A o ē na totoe, ‘ua fasiotia i latou i le pelu ‘ua alu atu mai le fofoga o lē ‘ua ti‘eti‘e i le solofanua; ‘ona mā‘o‘ona ai lea o manu felelei uma i o latou tino.

Currently Selected:

O le Fa‘aaliga 19: SCNT

Highlight

Copy