Matiye 4

Gətəli kadzeghe Yɛsə

(MRK 1.12-13; LWK 4.1-13)

1Pa Sefəa Shala begheghe Yɛsə kadzete ɓerama kezha dzeghe ŋkɛ gətəli. 2Ma kwa menete hɛ wəfaɗemsə veci ba'a viɗi wəfaɗemsə Yɛsə kaɗema kezehwe wəsə, ntake ma kazhɛ nda. 3Pa gətəli hendeke nda geva. Ma ke shɛ: «Ma kenza nde Wəzege ta Shala na ne, geze nda ke pelɛ nyi kezha zhɛrenji hɛ kaɗafa.» 4Ma ke Yɛsə shɛ: Ma ke rafete geva mbe Ghena ta Shala: Deke ɗafa nde ve ŋkwa teghweme we, ama ghena nyi kesame kwa mɛa Shala.

5Pa gətəli keleghe kadzeme meleme nya keveyi geva tekeleke, pa veyi ŋkɛ kwa ghəa ghɛa Shala. 6Ma ke shɛ: «Ma kenza ŋkɛ Wəzege ta Shala na ne, neghaghe ghəa ŋa kadzawa, kwa nza ŋkɛ ma ke rafete geva mbe Ghena ta Shala: Kategeze nda Shala ke ka ghwene ta ŋkɛ kezha kele ŋa hɛ te dzeve ta nci yitea ɗema seɗa ta ŋa kampə nda geva ke pelɛ.»

7Ma ke Yɛsə zhɛnete nda: «Ma ke rafete geva mbe Ghena ta Shala perə: Dzeghema Mahwətə Shala ta ŋa na ma.»

8Pa gətəli keleghe ŋkɛ kadzeme ghweme nya biya, pa ncɛte nda pɛtɛa hɛɗi meghe nyi te hɛɗi lema ba'a mcɛləa nci, 9ma ke shɛ: «Kateve ŋa pɛtɛa wəshia shɛhɛ 'ya kegwəɗəŋə na kwa kema ta ɗa.»

10Tagha gɛ, ma ke Yɛsə shɛ: «Slə ŋa teke Satan. Kwa nza ŋkɛ ne, ma ke rafete geva: Mahwətə Shala ta ŋa yahi na kahawe ve, deke gheŋkɛ yagwəɗəŋə na kwa kema ta ŋkɛ.»

11Pa gətəli slənyɛ yitea Yɛsə. Pɛkwe ka ghwene ta Shala se shɛ, pa hɛ menete nda wəshi kezeme.

Yɛsə kagha slene ta ŋkɛ mbe Galilɛ

(MRK 1.14-15; LWK 4.14-15)

12Ma kwa fa Yɛsə nahe mbeli kekeseyi Zhaŋe kwa daŋgayɛ ne, cape ŋkɛ kadzawa Galilɛ. 13Kezhɛne ŋkɛ kanza mbe Nazarɛt we, pa dzawanyɛ kwa Kapɛrnawəm, mɛa ndərəa Galilɛ, te hɛɗia Zabəlon ba'a Nɛftali. 14Ma nda se ŋkɛ kamenete geva kala nya ne, kezha yipə ghena ta Ɛzayi, nde mɛ ŋkwa ta Shala kadzawa, ma ke ghena shɛ:

15Hɛɗia Zabəlon, hɛɗia Nɛftali,

gheyɛ nyi laka ndərə,

nyi pelɛ kema ta hələa Zhəwrdɛŋe,

Galilɛ ta kweci hwelefefi!

16Nahe mbeli nyi mbe ŋkwesle kenakɛ waŋe nya wəba.

Mbe meleme ta mbeli nyi mbe ŋkwesle ta mte ne,

nahe waŋe ta ŋkwa kencɛte geva.

17Se mɛa vecia shɛ ghate Yɛsə kazlape ghena, ma ke: «Zhɛre mə wənəa ŋayɛ, kwa nza ŋkɛ nahe Meghe nya pelɛ ghweme kehendeke geva.»

Yɛsə kaheka ka kese kelepe wəfaɗe

(MRK 1.16-20; LWK 5.1-11)

18Ma kwa nza Yɛsə kadzeghwa dzeyi mɛa ndərəa Galilɛ ne, pa nakɛ ka kesaka ma bake nyi kaka kese kelepe, Simon nya heka mbeli kaPiyɛre ba'a wəza meghekɛ Andrɛ. Kanegha bararawe hɛ te ndərə kezha kese kelepe. 19Ma ke Yɛsə sha hɛ: «Təkwə təkwə ɗa mə, kaka kese mbeli tezhɛre ŋayɛ 'ya.» 20Te ŋkwa shɛnyɛ sərəakɛ bararawea nci hɛ kezha təkwə təkwə ŋkɛ.

21Ma dzeyi ŋkɛ te kema zhɛkwa, pa nakɛ kweci ka kesaka ma bake, yɛ Zhake le Zhaŋe, ŋwalea Zɛbɛdɛ. Kwa kwambeləa nci hɛ le yiteyɛ nci Zɛbɛdɛ kahi zamba ta nci. Pa Yɛsə hekakɛ hɛ. 22Te ŋkwa shɛnyɛ sərəakɛ kwambelə hɛ le yiteyɛ nci, cape hɛ yitea Yɛsə.

Yɛsə kateke nda wəshi ke mbeli ba'a kambe ŋkwa

23Cape Yɛsə dzeyi mbe pɛtɛa hɛɗia Galilɛ, kateke nda wəshi ŋkɛ ke mbeli mbe cɛ kesəkwə ghəa nci, kazlape nda Ghena kwatenca nya ganyɛ ta Meghe nya pelɛ ghweme ŋkɛ ke mbeli. Kambe mbeli ŋkɛ va pɛtɛa zereghwe ta nci ba'a pɛtɛa gweleba ta nci. 24Nahe pɛtɛa mbeli nyi te hɛɗia ka Siri kefave zləvəa ŋkɛ, pa mbeli fəke nda pɛtɛa mbeli nyi shewə va mama ta zereghwe, nyi kesa yaka kwele kwele va yɛ zereghwe, nyi shewə va 'yi'yɛghwə, le nyi sla wəsə yitea ghə, le ka mte mtea geva. Pa Yɛsə mbelete hɛ. 25Kwele kwele mbeli nyi ketəkwə təkwə Yɛsə, mbeli nyi kese mbe Galilɛ, mbe hɛɗia Meleme Meŋe, mbe Zhɛrəzalɛm, mbe Zhəwdɛ ba'a mbeli nyi pelɛ kema ta hələa Zhəwrdɛŋe.

Currently Selected:

Matiye 4: BEK12

Highlight

Copy