Mattayo 14
14
Miyeeda Yohaaneeda Abattiisachchi
(Mark 6:14-29; Luk 9:7-9)
1Aba damandida ghwayiiy sugoochcheanda suguura Heroode geawunda iitta Yeesu; 2Hean gwayeeshsha soomjoogaaschi, “Siisi gajea Yohaaneeda Abattiisachchi gil, nuduunna miyeeda; ak ghoaw ghamneawa uuri sina ng'asheesuun.” 3Aba gideaba Heroode ghayi ghoang'ng'waay Yohaana ak gwajaksa ghealooniga, appadayda Herodiyaayda ghayi was gatmooda oorjeeda ghaamwat suguura Filippo; 4nea gweagu ng'asheanda ghayi rukusa Yohaana nea gwayeeshsha, “Mwadoabiiwa gideaba gaymideawana gatmooda oorjeeda giyeang'wa.” 5Gagasa gwanuus Yohaana amaduw ghoawal buuneeda aba gideaba ghwanal buuneessean gideaba Yohaana sibaneeda. 6Muchchu gagul damanda ghwelmeeda eaweetta ghayi sijiila Heroode, ghang'was hudeaba Heroodeya aba madeeda rabasta, ak geeyi bwak ea gahoosan Heroode, 7ak gwaheelleesa nea gweaksa habeawooda nea gwayeeshsha gaydagoonnyi gidawasean ing'allaan. 8Aba damandida gagwarsa ghamwat ak gwayeeshsha, “Goonean uhuuda Yohaaneeda Abattiisachchi iina jeeda harakta.” 9Gagiisan Sugoochcheanda; amaduw nea ghoapkaat habeawooda ghwanyawa akk ea gheanyanga rabasta ghwanung' eattaw; 10goojeakta siida gawa ghealooni ak ghwalach gheatta Yohaana. 11Geeyeanna uhuudannyi jeeda harakta ak geattaw hudida, ak ghwaat niny heeda ghamwat. 12Ghwahidu giinealangaaschi ak gageanda musta ak gabuy; ama ng'atta gaweay ghoadaw Yeesu iitta.
Yeesu ghoang'aatta fii sagalamnyooji muut
(Mark 6:30-44; Luk 9:10-17; Yoh 6:1-14)
13Ng'atta iing'da iiy Yeesu ng'asheesu, ghabeawa hoowa nea ghwaat maleambooda ak gawa heeda manda sih. Nyas iitta emeetuw ghabeawa geeshanga gamaseaw niny nea ghabeawa mujiinajeega nyaawa. 14Hitta Yeesu ghuutta basooda ghwadaa emeetuw ak gwasamsa amaduw ghoahaap geeyoong'ng'weakka nyaawa. 15Iiduw nea niiw shing'ada, gaweay heeda Giinealangaaschi ak gwayeeshsha, “Hiji sindiin heeda manda sihi, adawa eemeeda beatta gaweay gharang'weakka gwasheaysa geat gichchaghwaak.” 16Gwayeeshsha Yeesu “Manda gichchea ghwaat, oattawa agooga gichchaghwaak.” 17Geeyeeshsha niny, “Geendeawi aba hiji mukkattaji muut ea ghweayi iyyeenya.” 18Gwayeeshsha, “Ayeanni heedeanyu.” 19Gwayeeshsha anung' goobiitpiit emeeda aba heeda mida nyeega; ng'atta gageanu mukkattajeekka ammudiin ea ghweayeekka assiyyeenyean ak gang'ula humng'eeda, ak gang'ushsha, ng'atta ghabwanajaada mukkattajeegiga ak ghoadaw giinealangaaschi, amahit ghoadaw giinealanga emeeda. 20Gweagiischi sean ea gwalang'u. Ghoawaam gheaptanga ak ghwannyiit soscheew damaniyyeenya. 21Moonneeda fuga siing'ng'aatta ea sagalamnyooji muut headiga, nea meeyiitta gadeemga ea diibiga.
Yeesu ghabeawa badayda beega
(Mark 6:45-52; Yoh 6:15-21)
22Iiduw ghwanung' goosheeda giinealangaaschi gaweay gigheawda basooda nea ghoaghaawa maleambooda, nea gahuydean niny aba gideaba migwaheelli sea emeeda. 23Hean heelli emeeda gwading'da giijeeda heeda funyaat ghamwaash Aseetta. Iiduw ghoaw shing'ada nea gaba geaw aba hoowa, 24nea aba damani maleambooda gwachchi ea nihitta bugusta basooda, nea goodeawiit laweajajeega aba gideaba gwaroonnyi jeammeeda. 25Huuw gheatta beashatta gawa nea ghabeawa badayda beega nea gaweesa. 26Daa giinealanga nea ghabeawa badayda beega, ghabeal nea gwayi, “Nii maloonghajeanda!” Googuul aba muuwda. 27Deagheatta gwayeeshsha saawa, “Oappida ng'eanyi adoabealli siida aniini.” 28Ghwasha Betro nea gwayeeshsha, “Ng'uttamiida iyang'ing'i gil ginung' doan headaang'u nea ghabeawi badayda beega.” 29Gwayeeshsha, “Beenni.” Ng'atta ghwararang'aada Betro aba jeeda maleambooda ak gawa appadayda beega nea gagal heeda Yeesu; 30hean daa jeammeeda, ghabeal ak gwalik beega, ak googuul nea gwayeeshsha, “Ng'uttamiida lealnean.” 31Deagheatta ghoahaakta Yeesu geattindaannyi ak ghoang'ng'waay nea gwayeeshsha, “Ea siida mwanang' masawi, ghwasaan anda gibeali?” 32Ding'da duwaawi maleambooda ghahawda jeammeeda. 33Hean ghaghadoawan fukka sean mida jeeda maleamboodean nea gwayeeshsha, “Aba huumwa ang'iing'i guwosi Balleanda Aseetta.”
Yeesu ghoahaap fuga miyeani aba Genasareetti
(Mark 6:53-56)
34Ghoaghaawa basooda ak ghwahitta ng'eanyiida Genasaretti. 35Jeeng'u fugeaba hoowa, ghoadayda iitta aba daroorakkiga neekkeewean. Geeyeassa fuga sean miyeani, 36geemearmearani niny eawaas earea wileeda hang'daannyi gil akghwahit; nea fukka sean waas weeleadaannyiin geahhaap.
Currently Selected:
Mattayo 14: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
