Gadiyeeda Giijasoodiga 12
12
Ganiisa geebiikta eaghabwaas
1Aba damandida ghang'eat sugoochcheanda suguura Herode ghuutta sawanda Ganiisa. 2Ghwang'waay Yakkobo oorjeeda geennyaawa Yohaana, ak gwanuus aba bwaanga; 3daa nea ghabwaariiy fuga Yahuudi ng'asheanji gabiikta ak ghwang'waay Betro. Nii geesin aba damandida bea mukkatteeyda meammwattawiidean. 4Iing'atta ging'ooyda geejaksa ghealooniga, ak geenung' gafur gheamughuscheew ang'wan bea shirikkara, abeetta gabaysiina gideaba iing'atta ghweelmeeda Basakka geayaat madeeda emeeda. 5Geayiin Betro ghealooniga; ak ghamwaash Aseetta fuga ganiisa.
Betro geesiksa aba ghealooniga
6Eaweedida jea gwachchi iimuchchu gooruunna Herodehiin, abeetta Betro gwalil aba dageascheeda shirikkaraji iyyeenya, ak ea sirada aba munyaloalaji iyyeenya, nea shirikkara suuk gafur gheeda sirattiisa buuneeda; 7asi ng'ulla, ghwahidu malaykajeanda Ng'uttamiida, ak ghoabwaay weeshinda jeeda ghooriida mida fuga ghealooniga; ak ghwasat hamarjeeda Betro nea gwayeeshsha, “Lamwaja ng'eada.” Ghoabitbit munyaloalajeega gwachchi mida geattingaaschi. 8Ghwalamda malaykajeanda ak gwayeeshsha, “Ashshuuba geaw hang'weakkaagu akkiillaabi geekkaagu.” Hean gwasindunu. Hit gwayeeshsha, “Radiischeena ak giyeadu geeshteanyu.” 9Ghang'eat ak ghwaat geeshta; gwaritta jarooda, nea headaannyi gwanda jeeda girgweatka. 10Gaweay ak ghang'atta ghwasuut shirikkareeda madeeda ea geaba iyyeenya, ak geehitta gidaghuutta gharinyeanda, ama sing'atta geeweay mujiini. Goottina gidaghuut nea gabwageaw, ama siritta jarooda geenyoo etteayi aba naweeda; deagheatta gwanung'usa heeda malaykajeanda. 11Biissa gwajeeng'u Betro ng'asheanji ak gwayi, “Bissa neajeeng'u aba huumwa gideaba Ng'uttamiida goojeagu malaykajeandaannyi gwalealnaneani geattinga Herode, ak goruutteaweani jeeda ng'asheega ammuukkuunaneani fuga Yahuudi.”
12Iiduw nea gwajeeng'u ng'asheesu, gawa gheeh Mariya, gheamatta Yohaana bea gheawunga suuk suguura Marko, ghwahitta nea nibwatgeat buuneeda saang'a nea geemwaash Aseetta. 13Iiduw nea gaguurda aba gidaghuut, hean gawa hudi suguura Rooda ghwajaat gidaghuut. 14Nal ghuutta gwajeeng'u gideaba siida Betro gil, hean gahoosan muuchchi ea eamutghwajaat gidaghuut, ghafach gawa gah gwarukusa buuneeda mida gah gideaba Betro ghamiinaada aba gidaghuut. 15Geeyeeshsha hudida, “Ang'iing'i gibwaageas.” Amwasiinda huda gwayeeshsha, ng'asheanji earuguuni huumwa gil. Ak geyeeshsha, “Nii jironeadaannyi gil!” 16Aba damandida Betro gudugaguuriideawa gidaghuut; iiduw geeweay ejaat gidaghuut, ama sidaah geehamng'eanyi. 17Goohiimsiina buuneeda geattinda gideaba asiinda ak gwarukusa buuneeda gidaruutteayda Ng'uttamiida aba ghealooniga. Ak gwayeeshsha, arukusiina ng'asheesu Yakkobo ea fuga siduupcheewi. Hean gwaritta jarooda gawa daroar nuut.
18Iimuchchu sakteayda, ea nung'ut muuwda shirikkarajeega nea geeyi nihissaani Betro. 19Iiduw gagasa Herode ama mudughwanyas, gwasikteawa shirikkara ak gojeakta ghwanung' eenuuseada. Ng'atta ghabeawa Yudeeya ak gawa goobiida ng'eanyiida Gaisariya.
Miyeeda Herode
20Iiduw ghwanyareas Herode muuchchi appadayda fuga ng'eanyiida Diro ea Sidoni; ak geapka headaannyi, nea abeeda ea nibalool Blasto, abeetta niny siida haw ambal gheeda sugoochcheanda gil, gaweay gamus gideaba nung' eebeaha hoyyoo, aba gideaba ng'eang'deanya ghaghus ng'eanyiideaba sugoochcheanji aba hamitta. 21Ghayi eaweechcha ghang'eat Herode ak gooshshuup geat hang'weakaaschi bea sugoochcheandumeeda, ak gawa goopteadawa hoorgeadaannyi bea sugoochcheandumeeda, hean gorgweaksa buuneeda. 22Goojuur buuneeda muuchchi nea geeyi, “Nii ghuutta aseetta gil, mii dea siida!” 23Deagheatta ghwalasta malaykajeanda Ng'uttamiida, aba gideaba moaghambiida Aseetta; ak ghwaak ghuughuutka ea ghami.
24Googuulli ng'eanyiisean ng'asheega Aseetta nea gwaheedu.
25Iiduw nea gabiigu Barnaba ea Sauli, Yerusaleemu nea niihiit gadiyeeda nyaawa, gweadu Yohaana bea gheawung' suuk suguura Marko.
Currently Selected:
Gadiyeeda Giijasoodiga 12: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
