Lúg 9
9
Yesu ba' waa duulí woo vu̵ wa̧nɓó' zu̵u̵ idú
(Matío 10:5-15; Márkus 6:7-13)
1Yesu su̵g waa duulí ı̵́ wa̧nɓó' zu̵u̵ idú vu̵, pú̵ vu̵ néélȩ́ yigid ɓı̵́d vu̵ nɛné, kan ho̧o̧ za̧a̧né á̧ḿ. 2Ba' vu̵ moo u̵u̵ la pa moo gbaŋ waalı̵́ Tayɨɨ woo nɔ, u̵u̵ za̧a̧ nán ho̧o̧ vu̵ á̧ḿ. 3O̧d vu̵: “I ɓɛ hȩn 'yȩ́ȩm vu̵ sá, kóó táa, kóó kə́ə, kóó hȩn sə́né, kóó sɨɨde. Kóó nɔ́nná á̧ḿ, a pa̧ŋ sa̧a̧m idú sá. 4Kíí dɔ́ kíi tóólı̵́ tée, i mbaa wu̵lı̵́, há̧á̧ a ya̧ bá' lúúlí víí. 5Nán kaa tóó ku̵u̵ fȩȩn ví ní, kíí dɨ lúúlí wu̵lı̵́ tée, i ta'ad nag víí,#9:5 nag víí vu̵ bíńda “i ta'ad hád zu̵m doo pɛ́ɛ́g víílí” kan ya̧g gɛrɛ́ggɨ. moo a mbaad vu̵ hȩn ya̧g du̵lı̵́ɨ.”
6 Waa ba'ad pee vu̵ laa, vu̵ kə̧́ə̧́ duu kaalı̵́ kaalı̵́, vu̵ pa moo to̧o̧ 'maŋ, vu̵ za̧a̧ nán ho̧o̧ vu̵ ya 'waapád.
Heeród víń zó̧ó̧ yúú Yesu woolı̵́
(Matío 14:1-12; Márkus 6:14-29)
7Sey gbanaa Heeród ka ki hȩn ka kɔ́y 'waapád yȩ máa, la"u̵ kɛb, moo nán tóó vu̵ o̧: “Yoohá̧na ı̵́ mam Tayɨɨ wooné wu̵ níḿ nɔmmé.”
8Tóó vu̵ o̧ voo: “Anábi Elía wu̵ tú' fó̧ó̧ woo.”
Tóó vu̵ o̧: “Anábi gbo̧o̧ tóó wu̵ níḿ nɔmmé.”
9A̧máa Heeród ka ki máa, o̧: “Aga ká mí du̵ yúú Yoohá̧na woo sə̧' sú̵'ú̵. A̧máa nán káń duu ki moo ı̵́ yo̧go̧ yúú woolı̵́ yȩ, nɔ́nná?”
Heeród soo kɛb bi ho̧ Yesu ú̵.
Yesu pú̵ nán uzinɛɛre nɔ́nɔ́ vu̵ hȩn lálı̵́
(Matío 14:13-21; Márkus 6:30-44; Yoohá̧na 6:1-14)
10 Waa ba'ad ku̵u̵ fíí ya máa, vu̵ o̧d Yesu hȩn ku̵u̵ kɔ́ máa 'waapád. Ma ɓɛ vu̵ ya voolı̵́ mɛ́ń, pa̧ŋ vu̵ lúú laan dáŋ́ kaa Bɛdsáýdalı̵́.
11Nán ɓu̵u̵lı̵́ na'a ku̵u̵ gaa máa, vu̵ dugu. Yesu fȩȩ vu̵ pu̵dpu̵d, pad vu̵ moo gbaŋ waalı̵́ Tayɨɨ woo, za̧a̧ nán ho̧o̧ vu̵ á̧ḿ.
12Zá̧ga̧ ka 'yɨg máa, waa duulí ı̵́ wa̧nɓó' zu̵u̵ idú pee vu̵ ya o̧d Yesu: “A̧m gbɔ dúú yɛ u̵u̵ laa kaalı̵́ kan lumnde ka'adı̵́ yȩ vu̵lı̵́, u̵u̵ la ud, u̵u̵ nuŋ hȩn lálı̵́ wu̵lı̵́ á̧ḿ, moo ya yɛ hó̧ggɨ.”
13A̧máa Yesu hí̧i̧d vu̵ o̧: “Aga a víi pú̵ vu̵ hȩn lálı̵́.”
A̧máa vu̵ duu hí̧i̧du̵: “Vɔ́ dɨ kan beréd kígi nɔ́nɔ́ kan ze' idú aga nɔ. Mɔ́ hí̧í̧ oo la fȩȩd dúú yɛ vu̵ 'waapád hȩn láláa?”
14Moo zaa wayée ka vu̵n dɨ fó̧ó̧ uzinɛɛre nɔ́nɔ́. Ma Yesu duu o̧d waa duulí woo vu̵: “I mbɔ́g 'yɛ́ vu̵ hágá hú' kan hú', vo' nɔ́nɔ́ nɔ́nɔ́.”
15 Waa duulí woo vu̵ kɔ́ ı̵́ yo̧go̧. Vu̵ mbɔ́g vu̵, vu̵ mbaa hágá.
16Pig woo máa, Yesu ɓee dɔg beréd nɔ́nɔ́ pee, kan ze' idú pee vu̵ á̧ḿ, 'yɛ́ dɔg nɔ́ɔ́ be"ı̵́, dȩn Tayɨɨ nag, ma yɨɨ zu̵u̵, pú̵ waa duulí woo vu̵, moo u̵u̵ yȩ'ȩ dúú pee vu̵ ú̵. 17Ya voo 'waapád vu̵ lá, vu̵ ha̧', ma vu̵ duu su̵g kéélı̵́ woo, ɓaa wa̧nɓó' zu̵u̵ idú.
Piɛ́r o̧ Yesu ba wu̵ ı̵́ nán sənné
(Matío 16:13-19; Márkus 8:27-29)
18Zá̧ga̧ tóólı̵́ máa, Yesu o̧d Tayɨɨ moo, vu̵ kan waa duulí woo vu̵ mɛ́ń. Ma vi vu̵: “Yee nán vu̵ o̧ ba mín nɔ́nná?”
19Vu̵ hí̧i̧du̵: “Tóó vu̵ o̧ ba mɔ́n Yoohá̧na ı̵́ mam Tayɨɨ wooné wu̵. Tóó vu̵ o̧ ba mɔ́n Elía wu̵. Tóó vu̵ o̧ voo ba mɔ́n anábi gbo̧o̧ tóó ba ka níḿ nɔmmé má nɔ.”
20Ma Yesu duu vi vu̵: “Ví o̧ víí nɛ́nná?”
Ma Piɛ́r hí̧i̧du̵ o̧: “Mɔ́ ı̵́ nán sənné Tayɨɨ ka ba' ya má nɔ.”
Yesu o̧ moo nɔm woo, kan nímní woo nɔmmé
(Matío 16:20-28; Márkus 8:30—9:1)
21Yesu ka ki máa, há' vu̵ u̵u̵ o̧d nán tóó moo yȩ sá. 22Duu o̧: “Ɨ́ míí Tayɨɨ ka ba'an ya yɛ, séý míń nuŋ hȩn ndɔ́gɔné gbo̧o̧ ba'a pȩ́ń. Ɨ́ nii Yúúda vu̵ kan gbanaa hȩn ha"ı̵́ vu̵ kan nán moo Tayɨɨ tú"í vú̵ń man, vú̵ń nɔɔn, a̧máa bá' idú, ta̧a̧nɔ́ woo tée, míń níḿ nɔmmé.”
23Yesu duu o̧d nán vu̵ 'waapád: “Nán tóó a hí̧í̧ bi duunɔ́ tée, a gbɔ moo taalı̵́ fó̧ó̧ woolı̵́ pȩ́ń, a ndɔg nɔm sá, a duun zá̧ga̧ 'waapád. 24Nán tóó a hí̧í̧ bi səd fó̧ó̧ bii nu tée, wú̵ń tiddu̵ ú̵. A̧máa nán a tid fó̧ó̧ woo moo míílí̧ tée, wú̵ń sə́ddú̵. 25Nán tóó a nuŋ hȩn góó 'waapád pȩ́ń, a tid vágád woo, a lı̵́ddu̵ tée, ȩn wú̵ń yagadu̵lá? 26Moo nán tóó a kɔ́ sȩ́ḿ yúú míílí̧, kan moo míí vu̵lı̵́ tée, mí á̧ḿ, sey a̧n yaa yaalı̵́ gbo̧o̧ kan na"ȩ́ Ba' míí woo kan maleeka woo vu̵ tée, sȩ́ḿ sı̵́ń kɔ́n kannɔ á̧ḿ. 27Mí o̧d ví moo yȩ́ńne, nán kíí dii yɛlı̵́ yɛ, tóó vú̵ń nɔɔ né, vú̵ń ho̧ gbaŋ waalı̵́ Tayɨɨ woo pȩ́ń.”
Fó̧ó̧ tiiní Yesu woo nɔ
(Matío 17:1-8; Márkus 9:2-8)
28Sey Yesu ka moo moo yȩ máa, duu səə alad dágá, ma ɓɛ Piɛ́r kan Yoohá̧na kan Yaakúbu, vu̵ ɗáá dɔg gu̵u̵lı̵́, moo bi o̧d Tayɨɨ mooɨ.
29Sey ka dɨd Tayɨɨ moo o̧lȩ́ máa, ya̧g túń woo tii, sa̧a̧m woo bú mbaa kɛ́ŋ́kɛ́ŋ́. 30Vaŋná, nán tóó vu̵ idú vu̵ mba moo kannɔ. Ká anábi Múúsa vu̵ kan Elía wu̵. 31Vu̵ tú' fó̧ó̧ voo, vu̵ gáá mbaa wəŋ. Vu̵ mba moo kan Yesu yúú ba'ad a dɨ kɔ́lı̵́ Yerúsalemmé máa, kan nɔm woo wu̵lı̵́ á̧ḿ.
32Piɛ́r vu̵ kan daga vu̵, vu̵ nə la səŋgələŋ.
Ku̵u̵ níḿ, nɔ́ɔ́ voo ka tá'ád sú̵'ú̵ máa, vu̵ ho̧ gáálı̵́ Yesu woo kan nán idú vu̵n mba moo kannɔ pee vu̵ á̧ḿ.
33Sey nán yȩ ku̵u̵ bi hı̵́'ı̵́n kan Yesu ú máa, Piɛ́r o̧d Yesu: “Ba' naa, kaa sú̵g mbaa ví yɛ, du̵u̵ ú̵. Vɔ́ń kəb waa ta̧a̧nɔ́, ı̵́ móó a dágá, Múúsa woo a dágá, Elía woo a dágá.”
A̧máa Piɛ́r gaan hȩn ka o̧n yȩ né á̧ḿ.
34Sey ka dɨ moo yȩ moolȩ́ máa, mam hi̧i̧g vúd fii vu̵ ya, sú' vu̵ zu̵u̵ ɓilim.
Sey mam hi̧i̧g ka fii sú' vu̵ zu̵u̵ máa, dú̵ú̵ kɔ́ vu̵. 35Yɛ́g tóó kiy zu̵u̵ mam hi̧i̧g peelı̵́, o̧: “Ɨ́ yɛ waa míí, káń yeewu̵ má nɔ. I kiddu̵ tɔ́ggú̵.”
36Sey yɛ́g yȩ ka moo moo 'waa sú̵'ú̵ máa, Yesu kéé sı̵́ wu̵ dágá. Waa duulí woo vu̵ mbaa sı̵́ voo simná. Sey woolı̵́ máa, vu̵ o̧n nán tóó moo yúú hȩn ku̵u̵ ho̧n yȩlȩ́ né sá̧ḿ.
Yesu nɛŋ yigid ɓı̵́d vud fó̧ó̧ waa tóó woolı̵́
(Matío 17:14-18; Márkus 9:14-27)
37Ya̧g ka̧'a̧m woo ku̵u̵ dɨ zu̵u̵ sílí gu̵u̵lı̵́ máa, dúú ɓu̵u̵lı̵́ na'a vu̵ yaa, vu̵ kan kan Yesu. 38Nán tóó ká dɨ sa̧a̧m dúú yȩ voolı̵́, moo moo dɔg yúba: “Akaw, mí dȩm naggɨ, a̧m ya ho̧ waa#9:38 waa vu̵ bíńda “wayée waa” kan ya̧g gɛrɛ́ggɨ. míí yɛ ú̵, moo waa míí 'wáa dágá yɔ. 39Yigid ɓı̵́d baa ma"o̧, baa wá̧á̧ wa̧ya̧g bə́' bə́', waa 'wóy mbaa kpu̵r, fú̵g baa vúd ya̧g woolı̵́. Ka ma"o̧ sú̵'ú̵ tée, gbɔnnɔ vaŋ né, baa ko̧go̧wo̧ hágá. 40Ba mín vi waa duulí móó u̵u̵ nɛŋ yigid yȩ ó̧, a̧máa vu̵ nɛŋŋɔ mban né.”
41Ma Yesu hí̧i̧du̵ o̧: “Nán moo faalı̵́ kan hȩn kə̧ə̧g kɔ́lı̵́ yɛ ví, míń ma' zó̧ó̧ mbaa kan ví nɛ́nná? A̧m pa̧nnɔ ya ú̵.”
42Sey waa ka dɨ séélı̵́ ya máa, yigid ɓı̵́d gbɔgɔ hágá, nammɔ za̧a̧ná. A̧máa Yesu sée yigid ɓı̵́d pee, za̧a̧ waa pee á̧ḿ, daa ɓɛ pú̵gu̵ kan ba' woo. 43Hȩn gbo̧o̧ Tayɨɨ woo yɛ la' nán vu̵ kɛb fid.
Yesu duu o̧ moo nɔm woo
(Matío 17:22-23; Márkus 9:30-32)
Hȩn 'waapád Yesu ka kɔ́ yȩ la' kóó nɔ́nná kɛb. Ma Yesu o̧d waa duulí woo vu̵: 44“Ɨ́ víí, i 'yɛ́ moo yɛ zó̧ó̧ víílí du̵u̵lı̵́ na'a; ı̵́ míí Tayɨɨ ka ba'an ya yɛ, vú̵ń dɔn nag nánán voolı̵́.”
45A̧máa vu̵ kin moo yȩ né. Hȩn woo big vu̵ la ɓid moo u̵u̵ ki sá, ma vu̵ duu ndɔggu̵ vilí á̧ḿ.
Nóo mba daga vu̵ na"ȩ́lá?
(Matío 18:1-5; Márkus 9:33-37)
46 Waa duulí Yesu woo vu̵ fan moo voolı̵́ sa̧a̧mé, vu̵ víń, nóo mba daga vu̵ na"ȩ́lá?
47Yesu ka gaa moo taalı̵́ voo máa, ɓɛ náásá̧ŋ́ waa tóó díid vu̵ tíŋ́, 48o̧d vu̵: “Nán a fȩȩ náásá̧ŋ́ waa yɛ kan yɛ́g míí tée, fȩȩ míw. Nán a fȩȩn tée, fȩȩ ı̵́ ka ba'an ya máa á̧ḿ, moo nán ı̵́ ka mbaa waaná' víílí sa̧a̧mé máa, wu̵ nán gbo̧o̧.”
Nán ka mán ví ní tée, wu̵ nán víí
(Márkus 9:38-40)
49Yoohá̧na ka moo sɔ, o̧: “Ba' naa, vɔ́ ho̧ nán tóó nɛŋ yigid ɓı̵́d vu̵ vud kan yɛ́g móó, ma vɔ́ há"u̵, moo ka duun ba ví ní má nɔ.”
50A̧máa Yesu hí̧i̧du̵: “Ka víń há"u̵ sá, moo nán ka mán ví ní tée, wu̵ nán víí.”
Kaa tóó hág Samaríilí fȩȩn Yesu né
51Zaa Yesu wú̵ń dɔg sı̵́ be"ı̵́ ú̵ máa, 'yɛ́ zó̧ó̧ bi dɔg Yerúsalemmé. 52Ba' waa ba'ad woo vu̵ laan tíŋ́. Vu̵ lúú laa kaa tóólı̵́ hág Samaríilí, moo bi mbɔ́gɔdu̵ hȩn ya dɔ́lı̵́ woolı̵́. 53A̧máa nán kaa yȩ vu̵ fȩȩnɔ né, moo ka dɨ dɔggı̵́ Yerúsalemmé má nɔ.
54Sey waa duulí woo Yaakúbu vu̵ kan Yoohá̧na ku̵u̵ ho̧ ná' máa, vu̵ o̧: “Ba'á, mɔ́ hí̧í̧ oo bee vee dɔg be"ı̵́, a zu̵u̵ a̧n vu̵ áa?”
55Yesu ka ki ná' máa, tii daa sée vu̵. 56Ma vu̵ daa laa kaa tóólı̵́.
Nán ku̵u̵ hí̧í̧ bi duu Yesu máa vu̵ yu̵
(Matío 8:19-22)
57Sey ku̵u̵ dɨ laalı̵́ hi̧naalȩ́ máa, nán tóó o̧d Yesu: “Ya 'waapád i dɨ laalı̵́ máa, míń duu ví wu̵lı̵́.”
58Yesu hí̧i̧du̵: “Ɗɨɨd vu̵ dɨ voo kan dəə ú̵. Nɔ́g waa vu̵ dɨ kan waa waa voo vu̵ á̧ḿ, a̧máa ı̵́ míí Tayɨɨ ka ba'an ya yɛ, mí kan ya úud pɛ́lı̵́.”
59Yesu o̧d nán tóó: “A̧m duunɔ́.”
Ma nán pee hí̧i̧du̵: “Ba'á, ba' míí nɔɔ ó̧, i gbɔn hi̧naa mí la dɔddu̵ pȩ́ń.”
60A̧máa Yesu duu hí̧i̧du̵: “A̧m gbɔ nán nɔm u̵u̵ dɔd nɔm voo vu̵ la ú̵. A̧m la tú' móó moo gbaŋ waalı̵́ Tayɨɨ woo nɔ.”
61Nán tóó duu o̧ddu̵: “Ba'á, míń duu ví ú. A̧máa i gbɔn hi̧naa mí la vá' nán míí vu̵ pȩ́ń.”
62A̧máa Yesu hí̧i̧du̵: “Nán ka dɨ hȩn baalı̵́ pȩ́ń, ka tii nɔ́ɔ́ 'yɛ́ la pigim tée, maanɔ mbaalı̵́ gbaŋ waalı̵́ Tayɨɨ woolı̵́ né.”
Currently Selected:
Lúg 9: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
