Lúg 7
7
Yesu za̧a̧ nán ba'ad ı̵́ nii só̧ó̧ze tóó woo
(Matío 8:5-13)
1Sey Yesu ka mood dúú vu̵ moo yȩ 'waa sú̵'ú̵ máa, daa dɔ́ la kaa Kapɛrnáhu̧mmé. 2Ɨ́ nii só̧ó̧ze nán Róma voo tóó ká dɨ kan só̧ó̧ze tȩmɛre máa, du̵u̵lı̵́. Dɨ kan nán ba'ad woo, hí̧í̧wo̧ mbaa ná'. Hȩn ho̧o̧ nán ba'ad woo pee dɨ nɔmme.
3Ɨ́ nii só̧ó̧ze pee ka ki moo Yesu woo máa, ba' ı̵́ nii Yúúda tóó vu̵ laa woolı̵́, moo ba u̵u̵ la o̧ddu̵ a ya zá̧a̧d bi nán ba'ad bii yɛ nɔ.
4Ku̵u̵ ya̧ la Yesu woolı̵́ máa, vu̵ dȩnnɔ nag, vu̵ o̧: “Maa ba mɔ́ń kɔ́d ı̵́ nii só̧ó̧ze hȩn yȩ ó̧. 5Hí̧í̧ zig baa ví ú. Wu̵ yo̧o̧d vɔ́ lig sú̵ggı̵́ vóó yɛlı̵́ á̧ḿ.”
6Ma Yesu sú̵g laa kan vu̵.
Zaa vú̵n ya̧ sú̵'ú̵ máa, ı̵́ nii só̧ó̧ze pee duu ba' daga gboo tóó vu̵, vu̵ o̧d Yesu: “Ba'á, ı̵́ nii vóó ba' vɔ́ ya, moo oo o̧d ví bin maan ba vín dɔ́n kíi biilí ní. 7Moo woo nɔ ma, bin yaan kan fó̧ó̧ bii ní yɛ nɔ. A̧máa ba i o̧ moo yə̧ŋ dágá si̧', nán bii yȩ ban za̧a̧ ó̧. 8Moo bi á̧ḿ, ba bin kid ı̵́ nii bii vu̵ tɔ́ggú̵, ba bin dɨ kan só̧ó̧ze bii ba ku̵u̵ kid bi tɔ́g máa vu̵ á̧ḿ. Ba ii o̧d dágá: ‘A̧m laa ú̵,’ tée, ban laa. Ba ii o̧d tóó: ‘A̧m yaa ú̵’ tée, ban yaa. Ba ii o̧d nán ba'ad bii: ‘A̧m kɔ́ hȩn yȩ nɔ,’ tée ban kɔ́ ú̵.”
9Sey Yesu ka ki moo yȩ máa, mbaa ɗii, tii daa o̧d dúú ku̵u̵ dugu máa vu̵: “Mí o̧d ví, kóó sa̧a̧m nán Izraɛ́l voolı̵́ si̧', mí nugun nán zó̧ó̧ 'yɛ́lı̵́ tóó gbo̧o̧ ba'a ı̵́ yɔgɔ né.”
10Sey nán pee ku̵u̵ fíí la máa, vu̵ nuŋ nán ba'ad ı̵́ ho̧o̧ pee, ho̧o̧ ka̧"o̧ sú̵'ú̵.
Yesu nim waa tóó nɔmmé kaa Náyyı̵́
11Yesu duu lúú wu̵lı̵́, daa laa kaa tóólı̵́, yéé kaa woo Náyyɨ. Waa duulí woo vu̵ kan dúú tóó vu̵ sú̵g laa kannɔ á̧ḿ.
12Sey ka ya̧ la ya̧g dɔ́m kaalı̵́ máa, vu̵ gaŋ nɔm vud ya. Ká waa dágáɨ. Na' woo ká dɔ́ sı̵́ yɛddú̵. Dúú kaalı̵́ vu̵ sú̵g ya woolı̵́. 13Ɨ́ 'yɛ́lı̵́ Yesu ka ho̧ na' woo la ná' máa, kɔ́gɔ la gíḿná, o̧ddu̵: “A̧m ká̧ŋ́ sá.”
14Ma séé la, za' píg. Nán nɔm gané vu̵ dii. Yesu o̧d nɔm: “Náásaa, míi o̧m, a̧m lúú dɔggú̵.”
15Vaŋná nán nɔm pee lúú mbaa dɔg yúba, bé' moo moolȩ́, ma Yesu ɓɛ pú̵gu̵ kan na' woo. 16Dú̵ú̵ kɔ́ vu̵ ya voo 'waapád, vu̵ na' Tayɨɨ, vu̵ o̧: “Anábi gbo̧o̧ tóó yaa baa vílí sa̧a̧mé sú̵'ú̵. Tayɨɨ yaa nán woo vu̵ giiníi.”
17Yɛ́g Yesu woo kiy hág Yúúda 'waapád kan hág tóó ku̵u̵ gbɔ daa kannɔ máa vu̵ á̧ḿ.
Yoohá̧na ba' waa duulí woo vu̵ la Yesu woolı̵́
(Matío 11:2-19)
18 Waa duulí Yoohá̧na woo vu̵ o̧ddu̵ moo yȩ 'waapád.
Yoohá̧na ka ki máa, yee waa duulí woo vu̵ idú, 19ba' vu̵ la ı̵́ 'yɛ́lı̵́ Yesu woolı̵́, moo u̵u̵ la vigi: “Móo ı̵́ ka dɨ yaalı̵́ má naa? Kóó oo laa nán tóó naa?”
20Nán pee ku̵u̵ ya̧ Yesu woolı̵́ máa, vu̵ vigi: “Yoohá̧na ı̵́ mam Tayɨɨ wooné wu̵ ba' vɔ́ ya, oo vim ba mɔ́nnɔ ı̵́ ba ka dɨ yaalı̵́ má naa? Kóó oo laa nán tóó naa?”
21Sey woolı̵́ Yesu za̧a̧ nán ho̧o̧ vu̵ ɓu̵u̵lı̵́ na'a, nán fó̧ó̧ ka ndɔ́gɔ vu̵, kan nán yigid ɓı̵́d ka kɔ́ vu̵ máa. Nán yə̧m ɓu̵u̵lı̵́ na'a vu̵ ho̧ nɔ́ɔ́ á̧ḿ.
22Yesu ka ki moo yȩ máa, hí̧i̧d waa ba'ad pee vu̵: “I la o̧d Yoohá̧na hȩn kíí ho̧, kan hȩn kíí ki máa vu̵ á̧ḿ; nán yə̧m vu̵ ho̧ nɔ́ɔ́, nán kpee vu̵ 'yȩm, nán ho̧o̧ naa vu̵ yú̵d, nán kpo̧o̧g vu̵ ki tɔ́g, nɔm vu̵ níḿ, mí dɨd nán gíḿ vu̵ moo to̧o̧ 'maŋ tú"í. 23Nán a faan moo míí ní tée, zó̧ó̧ wú̵ń dȩ"o̧ ó̧.”
24Sey waa ba'ad Yoohá̧na woo ku̵u̵ vȩ́' la máa, Yesu bé'ed dúú vu̵ moo moolȩ́ yúú Yoohá̧na woolı̵́, o̧: “Ví vúd laa ȩn ho̧lȩ́ hó̧g tíŋ́ŋá? Dȩ' sápéém ka dɨ namné yȩ naa? Pɛ́lı̵́ sá̧ḿ. 25Ví vúd laa ȩn ho̧lȩ́lá? Ví la ho̧ nán ka dɔ́ sa̧a̧m du̵u̵ na'a yȩ naa? A̧máa nán ku̵u̵ dɔ́ sa̧a̧m du̵u̵, ku̵u̵ pág mbaa ya du̵u̵lı̵́ máa, vu̵ dɨ kíi gbanii woolı̵́. 26A̧máa ví vúd laa ȩn ho̧lȩ́lá? Anábiaa? Ee, a̧máa mí o̧d ví, Yoohá̧na wu̵ mba anábi. 27Ká vu̵ bíńda moo yúú Yoohá̧na woolı̵́ debterelı̵́ sú̵'ú̵. Tayɨɨ o̧:
‘Míń ba' waa ba'ad míí la tíŋ́ móólȩ́.
Wú̵ńnɔ mbɔ́gɔm hi̧naa.’ ”
28Yesu duu o̧: “Mí o̧d ví, sa̧a̧m nán ku̵u̵ ha̧a̧ vu̵ hágá yɛlı̵́ máa, nán tóó mban Yoohá̧na na"ȩ́ né. A̧máa ı̵́ ka mbaa sɔmlɔ́gɔdná gbaŋ waalı̵́ Tayɨɨ woolı̵́ máa, wu̵ mbaga na"ȩ́.”
29Nán vu̵ 'waapád kan nán lámba su̵ggı̵́ vu̵, kú̵u̵ woo mam Tayɨɨ Yoohá̧na woolı̵́, ku̵u̵ ki moo Yesu woo yȩ máa, vu̵ o̧ Tayɨɨ ba nán yȩ́ńne. 30A̧máa nán farísa vu̵ kan nán debtere gaalı̵́ kú̵u̵ laan mam Tayɨɨ woolı̵́ Yoohá̧na woolı̵́ né máa, vu̵ duu kɔ́n hȩn hí̧í̧lí̧ Tayɨɨ woo né.
31Ma Yesu duu o̧: “Míń gú̵gú̵n nán ɓəə yɛ vu̵ kan ȩná? Vu̵ man kan nóo vu̵lá? 32Vu̵ man kan náásá̧ŋ́ waa ku̵u̵ mbaa saalı̵́ máa vu̵ yu̵. Vu̵ béén ya voolı̵́, vu̵ ó̧ń:
‘Vɔ́ úud ví lɨtɨɨd, ví naa né.
Vɔ́ beed ví yéé ká̧ń nɔm, ví ká̧ga̧ né.’ 33“Yoohá̧na ı̵́ mam Tayɨɨ wooné ká yaa, kȩȩ hȩn lálı̵́, zɔn doo né, ma ví o̧ hȩn hó̧g ba kɔ́gɔ ú̵. 34A̧máa ı̵́ míí Tayɨɨ ka ba'an ya yɛ, mí yaa, mí kȩȩn hȩn lálı̵́ né, mí zɔ hȩn, a̧máa ví duu o̧: ‘I ho̧ nán lálı̵́ gbo̧o̧ kan nán hȩn zɔlı̵́ tóó nɔ! Dag gboo nán lámba su̵ggı̵́ voo, kan nán hȩn ɓı̵́d kɔ́lı̵́ voo nɔ.’ 35A̧máa nán 'waapád ku̵u̵ duu ı̵́ yúú du̵u̵#7:35 ı̵́ yúú du̵u̵ ı̵́ yúú du̵u̵ máa, Tayɨɨ. máa, vu̵ gaa voo ba wu̵ kɔ́ hȩn yȩ́ń.”
Yesu dɨ Simɔ́ŋ nán farísa tóó woolı̵́ ligí
36Sey tóólı̵́ máa, nán farísa tóó bee Yesu hȩn lálı̵́. Ma Yesu dɔ́ la nán pee woolı̵́ ligí, mbaa ya hȩn lálı̵́lı̵́. 37Sey woo wakȩ́ȩ́ hȩn ɓı̵́d kɔ́lı̵́ tóó dɨ kaa yȩlȩ́.
Ka ki Yesu ba dɨ hȩn lálı̵́ lig nán farísa pee woolı̵́ máa, ɓɛ tɔg kúḿ albatée,#7:37 albatée nán Yúúda vu̵ baa ɓɛ 'yɛgɛ tóó, vu̵ kɛ tée, vu̵ mbɔ́g tɔg duusá̧n wu̵lı̵́. duusá̧n hi̧' wu̵lı̵́ ság. 38Dii pigim, dáŋ́ doo Yesu woolı̵́, ká̧ŋ́. Mɛmɛ́ḿ 'ya̧m doo Yesu woo 'waapád. Ma na'ad doo Yesu woo vu̵ kan yúú hú̧' woo, hu̧u̧ doo woo, ma túudu̵ duusá̧n wu̵lı̵́.
39 Nán farísa ba bee Yesu hȩn lálı̵́ pee, ka ho̧ hȩn yȩ máa, taa woolı̵́ zó̧ó̧lȩ́, o̧: “Nán yɛ kan anábiɨ tée, kan gaa wakȩ́ȩ́ ka za"u̵ yȩ, mbaalı̵́ woo ba wakȩ́ȩ́ hȩn ɓı̵́d kɔ́lı̵́ɨ máa ó̧.”
40Ma Yesu o̧ddu̵: “Simɔ́ŋ, mí dɨ kan moo tóó, bi o̧mmɔ́.”
Simɔ́ŋ hí̧i̧du̵: “Akaw, i o̧ la ú̵.”
41Yesu duu o̧ddu̵: “Nán tóó ká dɨlı̵́, nán idú vu̵ ɓɛ ɓoo woolı̵́. Nán dágá ɓɛ booro tȩmɛre nɔ́nɔ́, tóó ɓɛ woo booro vo' nɔ́nɔ́. 42A̧máa ya voo idú á̧ḿ, vu̵ nugun hȩn u̵u̵ sú̵u̵nɔ wu̵lı̵́ né, ma kéé gbɔd vu̵ la, ya voo idú á̧ḿ. Yee nóo wú̵ń hí̧í̧ baa yȩ mba sa̧a̧m nán idú yȩ voolı̵́lá?”
43Simɔ́ŋ duu hí̧i̧du̵: “Mí taa, nán ı̵́ ka gbɔddu̵ ɓoo ɓu̵u̵lı̵́ na'a yȩ nɔ.”
Yesu duu o̧ddu̵: “Yagalı̵́.”
44Ma Yesu tii daa wakȩ́ȩ́ pee woolı̵́, duu o̧d Simɔ́ŋ: “Mɔ́ ho̧ wakȩ́ȩ́ yɛ áa? Mí dɔ́ ya kíi móólȩ́. Mɔ́ pú̵n mí mam doo tɛlı̵́ né. Ɨ́ woo máa, 'ya̧m doo míí kan mɛmɛ́ḿ woo, na'ad kan yúú hú̧' woo á̧ḿ. 45Mɔ́ vá'an mí kan hȩn hu̧u̧lí̧ né, a̧máa ı̵́ woo, sey mín dɔ́ ya pee nɔ, gbɔn doo míí hu̧u̧lí̧ né. 46Mɔ́ pú̵n mí kúḿ wagané nagá#7:46 kúḿ wagané nagá vu̵ bíńda “kúḿ yúú so̧"ȩ́.” né, a̧máa ı̵́ woo, túun duusá̧n dɔlı̵́. 47Moo woo nɔ, mí o̧m, hȩn ɓı̵́d woo vu̵ ɓu̵u̵lı̵́ na'a yȩ, vu̵ kéé gboy sú̵'ú̵. Moo woo nɔ, wú̵ń hí̧i̧n ɓu̵u̵lı̵́ na'a á̧ḿ. A̧máa, nán ı̵́ ku̵u̵ kéé ɓoo woo gbɔ waaná' máa, hí̧í̧lí̧ woo wú̵ń dɨ waaná' á̧ḿ.”
48Ma Yesu duu o̧d wakȩ́ȩ́ pee: “Hȩn ɓı̵́d móó vu̵ kéé gboy sú̵'ú̵.”
49Nán ı̵́ ku̵u̵ mbaa ya hȩn lálı̵́lı̵́ máa, vu̵ ó̧ń ya voolı̵́: “Nán yɛ nóo ka kéé hȩn ɓı̵́d nán voo gbɔ á̧ḿ yɛlá!”
50Yesu duu o̧d wakȩ́ȩ́ pee: “Zó̧ó̧ 'yɛ́lı̵́ móó səm sú̵'ú̵. A̧m laa nánná.”
Currently Selected:
Lúg 7: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
