Filipenses 3

Da no'on nataxac mayi ÿataqta 'eesa

1Qaq nagui qami' ÿaqaÿadolqa, qantoñiitapeguec qome so qadataxala'. Qaq aÿim sa ishit da huo'otaq ñasamtapiguiñi da shi'iguelaqtalec de'eda sogote da shiyiñi co'ollaxa, cha'ayi damayi ÿataqta qadviñiqui. 2Qaq maxatchaxa, qadvichiÿa'aguet qome na 'eeta'am da lataxac na pioxotpi, qataq i'otta'pe naua qauema, qataq ipelectac na n'oc. 3Cha'ayi nam qaÿauo'o n'anaxashit na l'oc mayi ÿataqta 'eesa, nachiqomi' mayi chigoqchigui so Espíritu Santo da ñatamnaqtacot ñi Dios, qataq ÿataqta ñitonaqtapigui' souaxat da qomi' lalamqa'te so Cristo Jesús. Qataq sa ishit da chochi sepi'aqtega cam chochi yi'oqchigui. 4Qaq nai'ctaxa da aÿim nataq'en ishit da huo'o ca shictega ne'enapi da sepe'etega, cha'ayi qaica ca ishit da aÿim napacalec da ipi'iÿaxac 'enauac namayipi. 5Cha'ayi aÿim co'ollaq mashi sovi' naua ocho na'axa'te da aÿim ñiguiñi, nachi qaÿauo'o so ñi'anaxat, cha'ayi aÿim iuo' na Israel l'ecpi, sachigoxoigui na llalaqpi so Benjamín, naua i'aqtaqa 'eeta'ama soua ita'al hebreo lashi'. Da ÿataxac aÿim fariseo l'ec da shicteguelo naua nqataxaco mayi chigoqo'oto so Moisés. 6Qaq da lataxac da qanayicteguelo naua 'ena'pe naua nqataxaco, qalaq ÿataqta sa ishit da huo'o ca aÿim qaÿasaxalec ÿasouaxashit. 7Qalaxayi 'enauac ne'enapi mayi ÿataqta huo'o naq 'enec ñaq'en co'ollaxa, nagui 'eeta'am ñaq'en da ÿataqta qaica ca naigui, souaxat so Cristo. 8Qaq saqdata de'eda, cha'ayi 'enauac nam ishíttaxa da ÿalamaxatpi, qalaq 'enauac salatauec, cha'ayi ÿataqta sa ishit da ivi' ñaq'en da 'eetec da sauatton so Cristo Jesús mayi ÿataxala'. Qaq souaxat so Cristo, nachi imauec da daqat na temaq da ÿalamaxatpi, qataq 'eeta'am ñaq'en ca chochi lasogoñi, cha'ayi sauotaique da ñauec so Cristo, 9qataq da yaqto' aÿim qaila'a da ñi'attau'a somayi. Qaq sa ishit da chigoqchigui da no'on ÿataxac souaxat da salaxaguet na nqataxacpi, chaqdata da no'on nataxac mayi ÿanem ñi Dios cam i'amaqten so Cristo. De'eda no'on nataxac mayi chigoqchigui da npi'iÿaxac. 10Qataq aÿim ñishitaique da ÿataqta sauattoota so Cristo qataq da l'añaxac co'ollaq nca'aleeguesop qanqoÿin da nleuaxa, qataq da ñiuanau'a da nque'ejnaxac, chochi sevitta'a da shiita'am somayi da seleu. 11Cha'ayi huo'o da ñaquitaxac da salectoigui qom qaltaq qanca'alaxateec 'enauac na leuaxaicpi.

Da 'añaxataxac da yaqto' qaivida'a ca naloqnec

12Qaq aÿim sa ishit da huo'otaq shiitega da mashi sevi' 'enauac nam sa'axattac, huo'otaq da mashi nalochiguiñi da ÿataxac. Qalaxayi aÿim ashicta, huo'o da ñaquitaxac da ña sevida'a da huo'o mshi aÿim ÿaconeu'a co'ollaxa so Cristo Jesús. 13Qami' ÿaqaÿa't, sa ishit da maichi aÿim chigoqchigui da huo'otaq shinapec da mashi sevi' 'enauac de'eda. Chaqdata da aÿim secoua'ai 'enauac na nca'attauo, nachi ÿataqta ñi'añaxat da yaqto' ishit da sevida'a cam sata'a, 14yaqto' sevida'a ca naloqnec qataq cam qaÿachaxanapec cam huo'o mshi qomi' iÿaxanalo ñi Dios mayi neta'ague da piguem, souaxat da ñi'adaqtau'a so Cristo Jesús.

15Qaq ÿoqo'oyi 'enauac da shinaqta mayi mashi nalochiguiñi da qadpi'iÿaxac, no'on da nachi 'eeta'a't da qadhuennataxa. Qalaxayi da huo'otaq huo'o ca lÿa qadhuennataxaqui, qalaq ñi Dios ishit nataq'en da qami' itauanque da qauaÿajñi camayi. 16Qaq de'eda shinapec no'on da nachida qome qadhuennataxa, qataq ÿataqta nateeteguet da qadataxac dam mashi sogote da sevidaq.

17Qami' ÿaqaÿa't, no'on da ÿataqta qoquiitegue qome da no'on ÿataxac, qataq nataq'en qauaÿataxayiñiita nam quetegue da no'on nataxac mayi qami' sapaxaguenaxaque. 18Qaq mashi qalota da qami' shinapegalo, qalaxayi nagui qaltaq ñoÿiitalec da shi'iguelaxalec da qami' shinapegalo, cha'ayi ÿataqta qalota nam npa'aguene' da l-leuaxa so Cristo co'ollaq qaiuaxanguet so npe'enaxaqui. 19Qaq cam loga't qom ivita namayipi, qalaq qanlaxajñi. Cha'ayi namayipi chochi do'onataxaatacot da lamanaxanaqtaic da l'oquiaxac, qataq ñi'oxodeetapigui nam ishíttaxa da i'ot da l'aloxo, qataq ndoteec da iuennatapega nam huetalec ana 'alhua. 20Qalaxayi qomi' qadma' da piguem, qataq seuataqtaique da ñi'iguelaq so qadca'alaxaqui mayi qadataxala' Jesucristo qom chigoqtegue da piguem. 21Qaq somayi nadalaxat qome da qad'oquiaxac mayi taÿa'a da ileu, da yaqto' 'eeta'am naq'en dam l'oquiaxac mayi ÿi'oxodaic. Qaq nachida qome de'eda l'añaxac da ilo'ogue 'enauacna da do'onataxana.

Currently Selected:

Filipenses 3: TBSNT

Highlight

Copy