Filipenses 2

So Cristo qoÿanagui da l'amqchic souaxat da sa n'amaqten

1Qaq ÿoqo'oyi so Cristo da qami' i'añaqchi't, qataq da qami' machiyiñi naq'en da lauotaxanaqtaic somayi, qataq da qami' hueta'agueta so n'Espíritu, qataq da qauauattoñi da nauotaxanaqtaic qataq da nchoxonnataxanaxac, 2qaq no'on qone' da qauauo'oi qome ca ñitonaxac. Ÿataqta qaica ca ÿaqpeuga da qoñiita. 'Oonolec ca qancoñiyiitagui nsoxoyic, qataq 'oonolec ca qadhuennataqai qataq cam qoñiitapeguec. 3Qataq sa ishit qome da chochi huo'o ca qanaquichiitaique da huo'o ca qau'ochi, huo'otaq souaxat da qami' n'amqajnaxaiqa. Chaqdata da sa ishit da qami' ñi'oxonnaxaiqa, qataq sa ishit da qanamachiitaña ca qadÿai da qoñiÿapec sa ishit da qami' 'eeta'ama. 4Qataq sa ishit qome da huo'o ca i'auaxaañi da nmitaique cam chigoqchigui da huo'o ca laÿamqa'. Chaqcata cam nataq'en ishit da chigoqchigui da ÿaÿamaxajñi ca nÿa.

5Qataq qoñiita'am qome da lataxac da lhuennataxac so Cristo Jesús. 6Cha'ayi somayi nai'ctaxa co'ollaxa da 'eeta'am da lataxac ñi Dios, qalaxayi sa ishit da ÿictega da 'eeta'am da lataxac ñimayi. 7Chaqdata da co'ollaq ime da ñiguiñi da 'eeta'am ca chochi shiÿaxaua, nachi ÿacona da lataxac ca nlatac, nachi ÿacha'ague laÿi 'enauac de'eda lataxac mayi 'eeta'am ñi Dios. 8Qataq co'ollaq mashi ÿaatañi da lataxac ca chochi shiÿaxaua, nachi ÿacona da sa ishit da huo'o ca l'amaqchic. Qataq souaxat da lalaxayic, nachi ivitta'a da nalaataguec, nai'ctaxa da i'ot da n'aloxo de'eda l-leuaxa co'ollaq qaiuaxanguet so npe'enaxaqui. 9Qaq ÿoqo'oyi ñi Dios ÿanem somayi da qaica ca 'en'am l'amaqchic, qataq dam l'enaxat mayi napacalec 'enauac na laÿipi da 'enec, 10yaqto' da qai'axaÿa da l'enaxat so Jesús, nachi ishit da i'alyiñi naua l-llicte 'enauac nam hueto'ot na piguem, qataq nam huetalec ana 'alhua, qataq nam huetaueegue da laÿi na 'alhua, 11qataq yaqto' 'enauac qai'axat da ÿoqta 'eesa da so Jesucristo nachiso so qadataxala', nachi ÿataqta qaÿi'oxoden ñi qadta'a Dios.

Nam quetague' so Cristo 'eeta'am aca lcoÿadaqte na shiÿaxauapi

12Qaq ÿoqo'oyi qami' ÿaqaÿadolqa, cha'ayi qami' nachi 'eetai' naxa da aÿim qaualaqaiguet da qami' soota'agueta, qaq nagui da aÿim qaÿoqtaique, qalaq no'on da ÿacteec da aÿim qaualaqaiguet. Ÿataqta qau'onataxañiilec qome da qadca'alaqai, qataq sa ishit da 'ico' qanpichiitapeguela't, qataq ÿataqta huo'o da qadcolanqai. 13Cha'ayi ñi Dios nachiñi ñi qami' ÿanema cam ÿaÿamaqchiguiñi mayi qoñiitapeguec, qataq qami' itauanque da ña qaumachiita 'enauac. Qaq damayi maichi chigoqchigui ñimayi.

14Qaq 'enauac cam qau'ochi, qalaq sa ishit da qautaqaitac qataq da qancotaitega't, 15yaqto' sa ishit da huo'o ca ilalec da qoñiita ca qadasouaxashichi, huo'otaq ca qadsomaxaqui. Chaqdata da qami' llalqa ñi Dios, qami' qui'itte' da qoviitangui na qauemaicpi qataq 'itaxaloxoicpi. Nachi qami' 'edoiguilo da qaucoÿayiilec namayipi, qoñiita'am aca huaqajñi da icoÿadelec na napalaxa, 16da huo'otaq qau'axachiim da n'aqtac mayi chigaqaigui da nca'alaxa. Yaqto' qom ivita da ñi'iguelaq so Cristo, nachi ÿataqta samachiguiñi souaxat da qoñiita, cha'ayi saÿateeta da sa ishit da saqca ca naigui da ñaqalgoxosoxoc qataq da i'onataxanaxac. 17Qaq nai'ctaxa da qaÿaconeu'a da maichi ÿalamaxat ñachaalataxac da huo'otaq qaÿavigaxat, da yaqto' qaÿalecnoigui aca qadachitaqtaxanaqchi mayi qai'añiÿot ñi Dios, souaxat dam qadpi'iÿaxaqui, qalaxayi aÿim samachiguiñi. Qaq de'eda ñitonaxac nachi ñiuaate' 'enauac da qoñiita. 18Qaq nataq'en qome da qoñiita qantoñiitapigui', qataq qanhuañiÿau'a da ñitonaxac.

So Timoteo qataq so Epafrodito

19Qaq so qadataxala' Jesús qom huo'otaq nachiso chigoqchigui, qaq saqaÿaloq qome da qami' samaxalo ñi Timoteo, da yaqto' qami' nauaneto, da yaqto' ishit da samachiguiñi qom qami' saÿate'n. 20Cha'ayi qaica ca lÿa da sela'a da ÿataqta 'eeta'am da iuennataxa, chaqñita ñimayi. Qataq ñimayi ÿataqta iuennatapega da qoñiita. 21Cha'ayi 'enauac nam laÿipi chochi huo'o cam naquittaique, qaq sa ishit da i'ot cam 'eetapeguec so Cristo Jesús. 22Qalaxayi qami' mashi qauaÿajñi da 'eetec da no'on lataxac so Timoteo, qataq da 'eetec da ñitauaatapegue' da sa'axataqtac da n'aqtac, qaq somayi 'eeta'am ca ñalec da itauan ca lta'a. 23Qaq qom chochi saÿaten ca 'eetec dam sootaigui, nachi saqaÿaloq da samaq ñimayi, da yaqto' qami' nauaneto, 24qaq nai'ctaxa da aÿim huo'o da ñaquitaxac so qadataxala' da aÿim ishit qome da saqaÿaloq da qami' ñoqo'onalo.

25Qalaxayi nataq'en iuen da hua'auñi da qami' samaxalo ñi qadqaÿa Epafrodito ñim ñitaunaxaua de'eda qad'onataxanaxac qataq da qanloquiaxac, ñim maichi aÿim qanamaqaÿa co'olloxochiyi da yaqto' huapegue' na iuenecpi. 26Cha'ayi ñimayi qalota da lyaxa da nauane' 'enauac da qoñiita. Qataq nataq'en huo'o da 'eeta, souaxat da qami' qad'axaÿaxaqui da sa no'on. 27Qaq ÿoqta 'eesa da ñimayi sa no'on, mashi huac da saqca. Qalaxayi ñi Dios huo'o da lchoxonnataxanaxa ñimayi. Qalaxayi saqñita ñimayi, cha'ayi nataq'en aÿim, da yaqto' sa ishit naq'en da ÿapacteec da ÿaquicoxo da 'eeta'am nagui. 28Qaq ÿoqo'oyi ÿataqta huo'o da iyaxa da qami' samaxalo ñimayi, yaqto' ÿataqta qauamaichiguiñi qom qaltaq qanauañi', qataq yaqto' aÿim sa ishit da ÿapacteec saquico. 29Qaq ÿataqta lta'adaic qome qanqashiñi da qantonaxaqui da qauacoñiiguet ñimayi, cha'ayi maichi qad'amqajnataxanaxauai so qadataxala', qataq nachi 'eetai' qome da ÿataqta qauauochiic ca 'eeta'am ñimayi. 30Cha'ayi ñimayi mashi huac co'ollaxa da saqca, souaxat da do'onataxaatacot so Cristo. Qataq ÿataqta ÿanguet da nachaalataxac da lchiquiaxac, da yaqto' ishit da aÿim itaunec cam qami' sa ishit da aÿim qautauñiic, souaxat da qami' qaÿoqtalo.

Currently Selected:

Filipenses 2: TBSNT

Highlight

Copy