Lucas 8

So 'alpi mayi itauaatac so Jesús

1Qaq co'ollaq mashi qaÿoqtegue de'eda, nachi so Jesús quetagui na pueblopi qataq nam naña nam saq 'amaqtaq shiÿaxauapiolec da da'aqtaxaatac, i'axattapeguem da no'on l'axaÿaxac mayi i'axat da ñi Dios ilo'ogue 'enauacna. Qaq nnaictagueto soua doce lapaxaguenataqa. 2Nataq'en huo'o so nnaictague' 'alpi mayi latanñiguishipi co'ollaq i'odauec na l'ecpi qataq nam ÿotta'a't lalolaxacpi. Qaq ÿalectauo aso María mayi qaÿamata'ac Magdala lashi, asom chigaqaigui co'olloxochiyi som siete l'ec leguemaxaicpi, 3nataq'en aso Juana asom lhua so l'enaxat Cuza, som ilotague' ca lma' so Herodes. Qataq ÿalectauo aso Susana, nataq'en qalota so laÿipi 'alpi mayi detaunaxaatacot nam huo'o lalamaxatpi.

Qaÿaloqnaxana ca danaxaatac

(Mateo 13.1-9; Marcos 4.1-9)

4Huaña, nachi qalota na anac, chigaqau'alo naua puebloyi da qanmejnaxana so Jesús. Qaq co'ollaq mashi qalota so lapoota'a't, nachi detaxaigui, qalaxayi huo'o so daloqnaxana. 'Eeta':

5–Huo'o so shiÿaxaua jec da danaxan, ÿaañi aso languishi ala. Qaq co'ollaq danaxaatac, nachi aso ÿaañi huo'o aso tajlec na laÿi so nqa'aic. Nachi asomayi qaÿapigui, qataq anac na qoÿo, nachi chic. 6Qaq aso lÿa languishi tajlec som saq 'amaqtaq na 'alhua, ÿalliigui na coma'. Nachi asa'aso nanguishi, co'ollaq ñaxat, nachi daqaxaÿañi souaxat da qaica ca laquitaxa na 'alhua. 7Qaq aso lÿa nanguishi qalaq tajlec som huo'o ana ÿaxat, nachi asomayi saq ñaxat souaxat da naquitchigueme' ana ÿaxat. 8Qaq aso lÿa nanguishi tajlec so ÿataqta no'on 'alhua. Qaq co'ollaq ñaxat, nachi ÿataqta qalota ana ala. Huo'o ana ivi' ana cien ana ala co'ollaq qanqat.

Qaq co'ollaq ime da l'aqtac, nachi ÿataqta nlamaxaden, 'eeta':

–Qami' qom qauaÿajñi da qan'axaÿaxanaxaqui, qaq no'on da qan'axaÿaxañiichiguiñi.

Dam naigui nam qaÿaloqnaxanapi

(Mateo 13.10-17; Marcos 4.10-12)

9Nachi so lapaxaguenatacpi inattac somayi da chaq 'eetec ca naigui de'eda naloqnaxanaxat. 10Nachi somayi 'enapeco':

–Ñi Dios qami' ÿaÿajnaxanaxanque nam saq cha'api lataxac da l'onataxanaxac. Qaq nam laÿipi qalaxayi sauota'a ÿaloqnaxanaxat da setaxaigui, yaqto' namayipi da demejnaxaatac qalaq 'eeta'am da sa nauaañi, qataq da hua'aqtac qalaxayi sa ÿaÿaten cam qai'axat.

So Jesús i'axat da naigui som daloqnaxaatega danaxaatac

(Mateo 13.18-23; Marcos 4.13-20)

11Qaq 'eda da naigui som saloqnaxaatega, 'eeta': Aso nanguishi ala naigui da qai'axattac da l'aqtac ñi Dios. 12Qaq asom nanguishi mayi tajlec na laÿi so nqa'aic, qalaq naigui ca shiÿaxaua mayi n'axaÿaxaatac. Qalaxayi anac som shiÿaxaua mayi lma'na, nachi deuotaxanec som n'aqtac mayi huetagui añi lquiyaqte, da yaqto' sa ishit da da'amqajnataxan naq'en, nachi sa ishit da nca'aleec. 13Qaq asom nanguishi mayi tajlec so 'alhua mayi ÿalliigui na coma', qalaq naigui ca shiÿaxaua mayi n'axaÿaxaatega da n'aqtac, qalaq huo'o da ntonaxac. Qalaxayi qaica ca ÿoqta huo'o ca lpa'a'q da n'aqtac. Cada'ac da da'amqajnataxan, qalaxayi da nvita ca ñi'iguenataguec, nachi dashiuec. 14Qaq asom nanguishi mayi tajlec som 'alhua mayi huo'o ana ÿaxat, qalaq naigui ca shiÿaxaua mayi n'axaÿaxaatega da n'aqtac. Ime, qaq jec, qaÿata'ague nachi qaÿapolec da n'aqtac souaxat da lqochoxo nam huetalec ana 'alhua, qataq dam nsallaxa, qataq dam lqopitaxanaqtaic 'enauac na chochina qauem. Qanachi sa ishit da huo'o ca alaÿaxac naq'en da n'aqtac. 15Qaq asom nanguishi mayi tajlec som no'on 'alhua, qalaq naigui ca shiÿaxaua mayi no'on da lquiyaqteÿaxac, qataq lhuotta da n'axaÿaxan, qataq ÿalaxaguet da n'aqtac, qataq quetelec. Sa ishit da qoshiuec, qataq ÿataqta huo'o da alaÿaxac.

Qaÿaloqnaxana aso ncoÿadaxanaxaqui

(Marcos 4.21-25)

16Qaica ca ishit da iqueteteu'a aca lcoÿadaxanaxaqui, ime, qaq ÿapolec, huo'otaq ÿano'ot na pa'aguiñi ca lmala'. Chaqdata da ÿanashiguem, chaxan 'eesa da huo'o ca nnoxoneuo, qalaq ishit da yi'oqtelec. 17Cha'ayi qaica da huo'o ca qoÿoxottapiguiñi da huo'otaq sa ishit da sa qaÿauana. Qataq qaica ca saq cha'a da huo'otaq sa qaÿaÿaten huo'otaq da sa qaimeten.

18Qaq ÿoqo'oyi ÿataqta qan'axaÿaxañiichiguiñi, cha'ayi cam huo'o ca hueto'ot, qalaq qanquigaxateec ca qoÿanem, qalaq cam qaica ca hueto'ot, qalaq qanhuo', ivida'a da qaiuotaxanec cam ipi'itaxaatega da hueto'ot.

Aso late'e qataq soua lqaÿa't so Jesús

(Mateo 12.46-50; Marcos 3.31-35)

19Nachi aso late'e qataq soua lqaÿa't so Jesús nvildeu'a ca hueta'a somayi, qalaxayi sa ishit da qaivideu'a somayi souaxat da ÿataqta qalota na shiÿaxauapi. 20Nachi huo'o so da'aqtaxanem so Jesús, 'eeta':

–Ada 'adate'e qataq daua 'adqaÿa't pa'atrauec, huotaique da 'am qanauane'.

21Qalaxayi somayi 'enapeco':

–Cam n'axaÿaxanalo naua l'aqtaqa ñi Dios qataq ÿataqta i'o't, qaq nachaca aca ÿate'e, qataq ca ÿaqaÿañicpi.

So Jesús vi'iiguet naq'en so l'at qataq aso lapaxa na 'etaxat

(Mateo 8.23-27; Marcos 4.35-41)

22Qaq huo'o so na'a'q nachi so Jesús huenojñigui aso barco, lÿata'pe soua lapaxaguenataqa. Nachi 'enapegalo', 'eeta':

–Qolaq, saxatague da le'ego ana lapel late'edai.

Ime, nachi je'c. 23Qaq co'ollaq mashi quetralec aso lapel, nachi so Jesús do'ochita. Ime, nachi nque'elaxatta aso lapel da huo'o so l'at lta'adaic, mashi ivida'a da ipaxangui aso barco na 'etaxat, qataq mashi huotaique da iyiiñi. 24Nachi qanqo'ona so Jesús da qanquetoxon. Nachi qoÿiitega, qoÿiita':

–'Am mayi 'auapaxaguenataxaatac, mashi huotaique da qomi' iyiiyiñi.

Nachi ñishiguem so Jesús. Ime, qaq nlaxa so l'at. Qataq ana lapaxa so 'etaxat nachi vi'iiguet 'enauac, qataq ipactegue da ntochiguiñi. 25Ime, nachi 'enapegalo soua lapaxaguenataqa, 'eeta':

–¿Chi táigo' cam qadpi'iÿaxaqui?

Qalaxayi somayipi ÿataqta ñi'i, qataq ÿataqta huo'o da l'aalaxa. Nachi ñi 'oonolec inattac ñi lÿa, 'eeta':

–¿Négue't dam da' shiÿaxaua?, yi ishit da ÿamaq na l'at qataq na 'etaxat, nachi ishit da ÿalaq.

So Gadara l'ec mayi huo'o so l'ec leguemaxaic

(Mateo 8.28-34; Marcos 5.1-20)

26Qaq co'ollaq mashi qaivitta yi 'alhua mayi l'enaxat Gadara yim hua'atague da le'ego aso lapel late'edai mayi nalotta yi 'alhua l'enaxat Galilea. 27Nachi co'ollaq chochi ivitta so Jesús yi'iyi 'alhua, nachi anac so shiÿaxaua mayi chigaqaigui yi pueblo. Se'eso shiÿaxaua mashi qaÿoqteguelo naua vi'iyi da huo'o so l'ec leguemaxaicpi. Qaq sa ishit da ÿaayiñi naua alogo, qataq sa ishit da naigui ca noÿic. Chaqdata da huetauga ana huachiquipi. 28Somayi co'ollaq ila'a so Jesús, nachi i'adoto naua l-llicte, nachi i'alaqtac, 'eeta':

–¿Tá'ainco' yi aÿim 'atapegueu'a, 'am Jesús mayi 'am llalec ñim Dios mayi 'amaqtaqaic? 'Am ñachoxonnot nagui sa ishit qome da 'auauo'o da ñique'ejnaxac.

29Qaq 'enapec de'eda somayi, cha'ayi so Jesús ÿamaqtapeguec se'eso n'ec leguemaxaic da ca'ai se'eso shiÿaxaua. Cha'ayi mashi qalotacnaxa da natot naq'en se'eso shiÿaxaua se'eso n'ec leguemaxaic. Nachi na shiÿaxauapi nllañicnaxa somayi da qaicoñidai'salo naua lhua'q qataq naua lchil na lquet, da yaqto' sa dedaÿapigui'. Qalaxayi ñaqaiyita ÿachiapiaxattac, nachi se'eso n'ec leguemaxaic ÿi'iguenaxaneugacnaxa ca tojlec 'alhua. 30Nachi so Jesús inat, 'eeta':

–¿Ca 'éetec ca 'ad'enaxat?

Nachi somayi 'enapeco':

–Qomyi i'enaxat Qalota.

'Enapec de'eda, cha'ayi ÿataqta qalota so n'ec leguemaxaicpi taigui somayi. 31Nachi se'eso n'ecpi nachoxodeetacot so Jesús, da yaqto' sa ishit da ÿamaxaña ca nhuaxanqa' na 'itaxaloxoicpi. 32Qaq cha'ayi qalota aso cos late'epi deque'etac, netalec aso qasoxonaxa, nachi se'eso n'ec leguemaxaicpi nachoxodeetac da ishit da qaÿashiitem da taigui asa'aso cospi. Nachi so Jesús ÿashiitem somayipi da taigui. 33Nachi se'eso n'ecpi ca'ai se'eso shiÿaxaua, nachi taigui aso cos late'epi. Nachi 'enauac asomayipi nqalgaqañi, chigoqojlec naq'en so tocot, nachi tangui aso lapel late'edai, nachi 'ogaxaipi.

34Nachi som ilotague' aso cospi co'ollaq ÿauaachigui de'eda 'eetec asomayipi, nachi nqalgoq, ÿataqta ñi'i. Ime, qaq da'aqtaxanem nam netaigui na pueblo qataq nam netalec na n'onaxa. 35Nachi 'enauac nam shiÿaxauapi demejnaxaneuga cam huaña de'eda. Qaq co'ollaq qaivita ca hueta'a so Jesús, nachi qailalec so shiÿaxaua mayi chigaqaigui se'eso n'ec leguemaxaicpi. Somayi nso'ootañi, neto'oto naua lchil so Jesús, ÿaatrañi soua alogo, qataq mashi ntoueeta. Nachi ÿataqta huo'o da ncolanaxa. 36Nachi 'enauac nam ÿauaachigui da 'eetec se'eso shiÿaxaua, nachi da'aqtaxaatac, i'axattac da 'eetec co'ollaq qanataden so shiÿaxaua mayi huo'o so l'ec leguemaxaicpi. 37Nachi 'enauac na shiÿaxauapi mayi lma' yi Gadara, nachi nachoxodeetacot so Jesús da ca'ai yimayi souaxat da ÿataqta qalota da lcolanaxa. Nachi so Jesús qaltaq huenojñigui aso barco, nachi jec. 38Qaq so shiÿaxaua mayi chigaqaigui so n'ec leguemaxaicpi nachi nachoxodeetacot so Jesús da ishit da nashiiteguet da ca'ategue. Qalaxayi so Jesús ÿamaxalec da n'onañi, nachi 'enapega, 'eeta':

39–'Avi'iguelaxa qome ca 'adma'. Ime, qaq 'au'axat 'enauac nam 'am i'otec ñi Dios.

Nachi so shiÿaxaua jec, nachi da'aqtaxanoigui 'enauac so pueblo dam i'otec so Jesús somayi.

Aso llale so Jairo qataq aso 'alo mayi ipoteu'a so lapo' so Jesús

(Mateo 9.18-26; Marcos 5.21-43)

40Qaq co'ollaq mashi ñi'iguelaxatague na le'ego aso lapel late'edai so Jesús, nachi co'ollaq nvitta, nachi so shiÿaxauapi ÿataqta machiguiñi, cha'ayi 'enauac somayipi iuatta'aguet somayi. 41Huaña, nachi anac so shiÿaxaua l'enaxat Jairo. Somayi nataxala' acam laponaxaqui na judiopi. Se'eso shiÿaxaua i'adoto naua l-llicte so Jesús, nachi nachoxodeetot da ishit da nqo'ona ca lma'. 42Cha'ayi somayi huo'o aso 'oonole llale. Asomayi mashi ivi' naua doce vi'iyi, qaq asomayi mashi ileetapigui'. Nachi co'ollaq jec so Jesús, nachi ÿataqta qalota na ca'ategue, qaq ivida'a da qanpataxagui.

43Qaq se'eso shiÿaxauapi nachi ÿalectaigui aso 'alo sa no'on. Asomayi mashi ivi' naua doce vi'iyi da nque'ejnaxac da anactac na ltago'q. Qaq asomayi mashi imateuo 'enauac nam logoxoshitpi, souaxat da ishiiteetac na natannaxanaqpi, qalaq sa ishit da huo'o ca ishit da ÿañoxot da nataden da lalolaxa. 44Qaq asomayi nachi nquigueu'a so Jesús na l-laq, nachi ipoteu'a na laÿi so lapo'. Huaña, nachi vi'iteguet na ltago'q mayi anactac.

45Nachi so Jesús denataxan, 'eeta':

–¿Négue't ca aÿim ipoteu'a?

Qalaxayi qaica ca ishit da ÿasat. Nachi so Pedro qataq so laÿipi 'enapeco':

–'Am mayi 'auapaxaguenataxaatac, na shiÿaxauapi 'enauac 'am npataxagui, qataq saq ÿataq ca 'am qaipataxague. Qaq ¿tá'ainco' da 'aunataxaatac, qoneta': “Négue't ca aÿim ipoteu'a?”

46Qalaxayi so Jesús 'enapeco':

–'A'i, huo'o ca aÿim ipoteu'a, cha'ayi aÿim ñanomteguet da huo'o ca ñataden da sedolec da i'añaxac.

47Nachi aso 'alo co'ollaq ila'a da mashi yi'aqalec de'eda 'eetec, nachi nqo'oneu'a so Jesús, ÿataqta iviloxol. Nachi i'adoto naua l-llicte. Nachi da'aqtaxanem somayi da 'eetec dam huo'o mshi ipoteu'a somayi, qataq da 'eetec co'ollaq vi'iiguet na ltago'q. Qaq 'enauac se'eso shiÿaxauapi qai'aqchigui asomayi. 48Nachi so Jesús 'enapego' asomayi, 'eeta':

–'Am ÿaqaÿole, nagui mashi 'am no'oita, cha'ayi 'au'amqajnataxan. 'Aue, qojec, saqca ca da.

49Qaq co'ollaq ña detaqtac so Jesús, nachi huo'o so nvi', chigaqa'a ca lma' so Jairo som nataxala' acam laponaxaqui na judiopi. Nachi da'aqtaxanem somayi, 'eeta':

–Ayi 'ai'ale mashi ileu. Sa ishit qome da 'audaxaatapigui na dapaxaguenataxaatac.

50Nachi so Jesús co'ollaq hua'aqchigui de'eda, nachi 'enapega so Jairo, 'eeta':

–Sa ishit qome da 'ayi'i. Chaqdata da 'au'amqajnataxan, yaqto' aca 'ai'ale ishit da nca'aleec.

51Qaq co'ollaq ivideu'a so noÿic, nachi sa ishit da huo'o ca nashinguet da lÿateuo somayi, nachaqsota so Pedro, qataq so Santiago, qataq so Juan, qataq soua lta'al aso nogotole. 52Qaq 'enauac so shiÿaxauapi noÿiitac qataq n'alaqtapiguiñi souaxat asomayi. Qalaxayi so Jesús 'enapeco':

–Sa ishit qome da qanoÿiñi. Ayi nogotole sa ishit da ileu. Ayimayi chochi do'ochita.

53Qalaxayi qai'iitac somayi, cha'ayi qaÿaÿaten da mashi ileu asomayi. 54Nachi so Jesús ÿacona na lhuaq, nachi 'enapega asomayi, ÿataqta n'axannec da l'aqtac, 'eeta':

–'Am nogotole, 'am shinapega qoñishiguem.

55Nachi asomayi ñi'iguelaq da lca'alaxa, nachi saqaÿaloq da ñishiguem. Nachi so Jesús damaxasoxoolec da qoÿanem ca aloq. 56Nachi soua lta'al ÿataqta huo'o da l'aalaxa'. Qalaxayi so Jesús 'enapegalo da sa ishit da huo'o ca da'aqtaxaadem de'eda qanayiuaigui.

Currently Selected:

Lucas 8: TBSNT

Highlight

Copy