Lucas 7
7
So Jesús nataden so l-latac so huataxanaq lta'a mayi l'ec yi Roma
(Mateo 8.5-13)
1Nachi so Jesús co'ollaq imat da da'aqtaxaatapeguem so shiÿaxauapi, nachi jec, taÿa yi Capernaum. 2Qaq huaña yimayi, nachi huo'o so huataxanaq lta'a mayi l'ec yi Roma. Somayi huo'o so l-latac ÿataqta lauotaxat, qaq somayi sa no'on, qaq mashi ileetapigui'. 3Se'eso lta'a na huataxanaq co'ollaq hua'axaÿapeguelec so Jesús, nachi huo'oi soua ÿama'q nam lquedoxonecpi na judiopi, da yaqto' nachoxodeetot so Jesús da anac da nataden so l-latac. 4Nachi soomayi co'ollaq ivildeu'a so Jesús, nachi ÿataqta lta'adaic da nachoxonnaxa'c, 'eeta':
–Ñi'iñi lta'a na huataxanaq, ñimayi 'itchiguiñi da ishit da 'aulo'oguet da 'autauan, 5cha'ayi ñimayi ÿataqta ÿauotec na qadhuo' l'ecpi. Ñimayi nachiñi ñi damaxasoxoolec añi qalaponaxaqui co'ollaxa da qan'oxooshiguem.
6Nachi so Jesús nnaicapegueto soomayi. Qalaxayi co'ollaq mashi qanayiitau'a ca lma' so nta'a, nachi somayi ÿama'q soua nauochaxa'u da 'eedapega so Jesús, 'eeta':
–'Am ÿataxala', sa ishit qome da ÿapacteec da 'ansallaxaueetapec, cha'ayi sela'a da ÿataqta saq 'aiguet da 'annoxonoigui na ima'. 7Ÿoqo'oyi aÿim sa ishit da da'angui yi iuel da 'am sepaca'a da 'am shi'iguena'a. Qaq ÿoqo'oyi no'on qome da nachaqcata da 'ad'aqtac 'ai'an, yaqto' ñi ilatac ishit qome da no'oita. 8Cha'ayi aÿim nataq'en sootañot da lamaxasoxonaxac na nta'alpi, qaq aÿim nataq'en huo'o na ñallippi mayi samaqtac. Qaq da huo'otaq shinapega ñi 'oonolec namayipi da jec, nachi jec. Qataq da huo'otaq shinapega ñi 'oonolec namayipi da shiita': 'auanac, nachi anac. Nachi 'en'am da huo'otaq huo'o ca samaxalec ca ilatac, qalaq i'ot.
9Nachi co'ollaq hua'axaÿa de'eda so Jesús, nachi ÿataqta huo'o da l'aalaxa que'eca shiÿaxaua. Ime, nachi ÿamataigui so shiÿaxauapi, nachi 'enapeco':
–Ÿataqta 'eesa da na Israel llalaqpi qaica ca selalec da ÿataqta lta'adaic da lpi'iÿaxac da 'eeta'am se'eso ÿale.
10Nachi co'ollaq ÿi'iguelaxau'a ca lma' se'eso namaxashicpi, nachi qailalec se'eso nlatac da mashi no'oita.
So Jesús nca'alaxateec so llalec aso pa'ai
11Qaq co'ollaq mashi ime de'eda, nachi so Jesús taÿa so pueblo l'enaxat Naín. Qaq nnaictague' so lapaxaguenatacpi, qataq qalota so qannaictague' shiÿaxauapi. 12Qaq co'ollaq mashi qanayiitau'a so pueblo, nachi qaÿauaateguet da mashi qaidouec so nqatac. Somayi 'oonolec llalec aso 'alo pa'ai. Qaq ÿataqta qalota so shiÿaxauapi mayi chigaqaigui yi pueblo da qaica'ateueegue somayi. 13Nachi so Jesús co'ollaq ila'a asomayi, nachi ÿataqta huo'o da lchoxonnataxanaxa, nachi 'enapega, 'eeta':
–Sa ishit qome da 'anÿiitac.
14Nachi so Jesús nquigueu'a somayi, nachi ipoteu'a aso laÿi', nachi som ÿachita'pe som leuaxaic, nachi vi'iigueta. Nachi so Jesús 'enapega so leuaxaic, 'eeta':
–'Am nsoqolec, 'am shinapega: ¡Qoñishiguem!
15Qaq som leuaxaic nachi ñishiguem, nso'ooñi, nachi detaqa. Nachi so Jesús ÿamaxa aso late'e. 16Qaq co'ollaq qaÿauaachigui de'eda, nachi 'enauac so shiÿaxauapi ÿataqta huo'o da lcolanaxa. Nachi ÿi'oxodeetac ñi Dios, 'eeta':
–Huo'o so 'amaqtaqaic l'aqtaxanaxanec ñi Dios qomi' chigoqchiguinguilo.
Nataq'en qoÿiita' da n'aqtac:
–Ñi Dios anac da itauan nam lalamaxatpi.
17Nachi ima'a't qaÿaÿaten da i'ot so Jesús 'enauaque naua laÿil yi 'alhua l'enaxat Judea.
Som lamaxashicpi so nachilaxanataxanaq mayi l'enaxat Juan
(Mateo 11.2-19)
18Nachi so Juan l'axaÿaxac 'enauac de'eda, cha'ayi soua lapaxaguenataqa da'aqtaxaadem somayi. Nachi somayi ÿaconeu'alo soua dos somayipi. 19Ime, nachi ÿamaxalo so Jesús da ina't da huo'otaq somayi ÿataqta 'eesa da nachiso so nta'a mayi nca'alaxaqui mayi qaiuattaique, loqo' chaq ña qaiuattaique ca lÿa. 20Nachi soua lamaxa'shi co'ollaq ivitra so Jesús, nachi qainat, qoÿiita':
–Ñim nachilaxanataxanaq mayi l'enaxat Juan qomi' namaxalo 'am da 'am senataq da 'am peta'a nachi'am nta'a nca'alaxaqui mayi 'am qaiuattaique, loqo' chaq ña seuataqaique ca lÿa.
21Nachi co'ollaq chochi ivildeuo soomayi, nachi so Jesús ÿataqta qalota so shiÿaxauapi nataden na ÿotta'a't lalolaxacpi, nataq'en nataden nam huo'o na l'ec leguemaxaic, nataq'en qalota na nauaañi naq'en nam qanamaicpi. 22Nachi so Jesús 'enapeco':
–Qauesomiÿa qome, qoñiÿapega ca Juan nam qami' qauauañiichigui qataq qau'aqaichigui. Qataq qau'aqtaxañiim camayi da nauaañi na qanamaicpi, nam ñi'idauo naua lchil qalaq piguiñi, qataq nam nchiga na l'oc qalaq qaiÿouec da lalolaxa, qataq nam da'añaigui na lqaic qalaq hua'aqa, qataq nam mashi saqcapi qalaq nca'aleec ltaxa, qataq nam choxodaqpi mashi qai'axatem da nca'alaxa. 23Qaq ÿataqta machiguiñi qome ca shiÿaxaua qom sa ishit da huo'otaq aÿim ÿoqolguet.
24Qaq co'ollaq mashi je'c soua lamaxa'shi so Juan, nachi so Jesús i'axattac so Juan, da'aqtaxaatapeguem so shiÿaxauapi, 'eeta':
–¿Négue't som qaumejnaxañiitapeuga qami' yim tojlec 'alhua? ¿Peta'a ÿataqta coqta ÿacholaxaatac na l'at? 25Qaq ¿chaq négue'to' som qaumejnaxañiitapeuga? ¿Peta'a 'onaxaiqa naua alogo somaxa se'eso shiÿaxaua? Qami' qauaÿajñi da na ÿaatrañi naua no'oñi anogo qataq huetaigui da qaica ca iuena'a, namayipi hueta'alo naua lma'te na nta'alpi. 26Qaq ¿chaq négue'to' som qaumejnaxañiitapeuga? ¿Peta'a l'aqtaxanaxanec ñi Dios somaxa? Aja', ÿataqta 'eesa, qataq ÿataqta napacalec cam l'aqtaxanaxanec ñi Dios. 27So Juan nachiso so i'axa't naua ñiyigui'shi l'aqtaqa ñi Dios co'ollaq 'eeta':
Samaq qome ca i'aqtaxanaxanec da sa'auaxangue na 'ic,
da yaqto' ÿaqataxanai' ca 'anqa'aic.
28Qami' sa'aqtaxanema da 'enauac na shiÿaxauapi qaica da huo'o ca l'aqtaxanaxanec ñi Dios da napacalec da l'amaqchic so Juan mayi nachilaxanataxanaq. Qalaxayi nam ÿapacteec da qaica ca l'amaqchic da huetaigui da l'onataxanaxac ñi Dios, nachina na ÿataqta napactelec somayi.
29Nachi 'enauac na shiÿaxauapi, qataq nam ÿacootapeeguet ana nshiitenaqte ca nta'a mayi lachilaxanatacpi so Juan, namayipi co'ollaq hua'axaÿa de'eda, nachi ÿataqta sa ishit da qaÿoqolguet ñi Dios da ÿataqta 'eesa. 30Qalaxayi nam ÿalectaigui na fariseopi, qataq nam dapaxaguenataxaatapeguec na nqataxacpi mayi sa ishit da lachilaxanatac so Juan, namayipi n'otane' dam Dios ÿauotaique da i'otec namayipi. 31Nachi so qadataxala' 'enapeco':
–¿Negue'tom ca saloqnaxanem ne'ena shiÿaxauapi nagui? ¿Negue'tom ca 'eeta'am ñaqshin? 32Peta'a 'eeta'am na ñaqpiolec da nso'ootañi, netaña ca l'ashaqa', nachi i'alaqtalec na laÿipi, 'eeta': “Sashiidaqtapiguilo naua qadashiide, qalaq sa ishit da qauasochi, qataq so'onaqta'pe naua lalaco ca huasouaxaic, qalaq sa ishit da qanoÿiñi.” 33Cha'ayi co'ollaq anac so nachilaxanataxanaq mayi l'enaxat Juan, qalaq sa ishit da chic ca no'on nallic qataq sa nÿomgui ca lataxa, nachi qami' qoñiÿapec da somayi huo'o so l'ec leguemaxaic. 34Ime, qataq anac na shiÿaxaua llalec mayi chictac na no'on nallic qataq nÿomtac, nachi qami' qoñiÿapec da qui'axaic qataq nÿomaxaic qataq nauochaxaua na 'itaxaloxoicpi qataq nam ÿacootapeeguet ana nshiitenaqte ca nta'a. 35Qalaxayi da laÿajnec ñi Dios yi'oq naq'en nam ÿajnaxanaxaicpi.
So Jesús netaña yi lma' so Simón mayi ÿalectaigui ana l'enaxat fariseo
36Qaq huo'o som 'oonolec na fariseopi 'enapega so Jesús da lqui'axaua. Nachi so Jesús jec, taÿa ca lma' somayi. Qaq co'ollaq mashi ivi', nachi nso'ooñi, datatalec ca nqui'axala'. 37Nachi huo'o aso 'alo quishiguetaxai mayi netaña se'eso pueblo. Co'ollaq l'axaÿaxac so Jesús da taÿa ca lma' so fariseo da lqui'aqa', nachi asomayi anac, nachitac aso n'onata coma' l'enaxat alabastro, huetagui so codaxat. 38Nachi asomayi noÿiitac, nachi huaqtau'alo naua lchil so Jesús, nachi iÿota'pe, deÿoxonalo naua lachi'. Ime, qataq ÿaqaxaÿaxa't naua lchil somayi, huota'a na laue. Nachi napigoqta'pe, qataq icodelguete som codaxat. 39Qaq co'ollaq ÿauaachigui de'eda so fariseo mayi ÿayina'a da lqui'axaua so Jesús, nachi deuennataxaatac, 'eeta': “Ñi'iñi shiÿaxaua da ÿoqta 'eesa da l'aqtaxanaxanec ñi Dios, qaq ishíttaxa da ÿauatton añim 'alo mayi ipottau'alo naua lchil da añimayi quishiguetaxai.” 40Nachi so Jesús 'enapega so fariseo, 'eeta':
–Simón, huo'o da huotaique 'am sa'axatem.
Nachi som fariseo 'enapeco':
–Aja', 'au'axat, 'am mayi 'auapaxaguenataxaatac.
41Nachi so Jesús 'enapeco':
–Huo'oi soua dos shiÿaxa'u huo'o aso lavigaxaiste' neto'ot so navigaqtaxanaxala'. So 'oonolec soomayi ivi' quinientos denarios aso lavigaxaiste, qaq so lÿa qalaq ivi' cincuenta. 42Qaq soomayi sa ishit da ÿañoxo't da ishiite'n asa'aso lavigaxaiste', nachi se'eso navigaqtaxanaxala' ichoxode'n soomayi da ÿapalaxat asa'aso lavigaxaiste'. Qaq nagui aÿim 'au'aqtaxanem, ¿chaq négue't soomayi ca ÿoqta dauotaxanaqta?
43Nachi so Simón 'enapeco':
–Qomyi 'eeta'am da nachiso som shiÿaxaua mayi ÿacteec da qaichoxoden.
Nachi so Jesús 'enapeco':
–Aja', 'eesa da 'ad'aqtac.
44Nachi so Jesús ÿamato'ot aso 'alo. Ime, qaq 'enapega so Simón, 'eeta':
–¿'Am peta'a 'aulota'a añi'añi 'alo? Can ñinoxonoigui na 'adma', qalaq sa ishit da aÿim 'ai'anem ca 'etaxat da seÿoi' naua ichil. Qalaq añim aña' 'alo yi iÿoi' naua ichil, deÿoxonalo naua lachi', qataq ÿaqaxaÿaxa't, huota'a na laue. 45Sa ishit da aÿim 'anapigoq, qalaq añimayi can chochi ñivittauo, qalaq saq 'imgui da napigo'q naua ichil. 46Nataq'en sa ishit da 'aucoyigui na ÿaqaic ca codaxat, qalaxayi añimayi icodelguete naua ichil so codaxat ama na laita. 47Qaq ÿoqo'oyi nagui 'am sa'aqtaxanem da añimayi de'eda lta'adaic lauotaxanaqtaic naigui da ishit da qaÿapalaxat na qalota lasouaxashit, cha'ayi ca shiÿaxaua da saqalligueme da qaichoxoden, qaq nachi 'en'am saqalligueme da ÿachaxan da lsoxoyic.
48Ime, nachi 'enapega aso 'alo, 'eeta':
–Na 'adasouaxashitpi nagui 'enauac mashi qaÿapalaxat.
49Nachi na nhuanaxauapi somayi mayi nso'oota'ai', nachi deuennataxaatac, 'eeta':
–¿Chaq négue't ñim ña' shiÿaxaua?, yi ivida'a nam nasouaxashitpi ishit da ÿapalaxat.
50Qalaxayi so Jesús 'enapega aso 'alo, 'eeta':
–'Am nagui 'adca'aleec, cha'ayi 'au'amqajnataxan. 'Aue, qojec, nagui 'aulactapiguiñi.
Currently Selected:
Lucas 7: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
