Lucas 6

Soua nale't so Jesús napocta'pe na ala na trigo so na'a'q mataxaqui

(Mateo 12.1-8; Marcos 2.23-28)

1Huo'o so na'a'q mataxaqui nachi so Jesús i'axasoxoolec so nanqa' na trigo. Qaq co'ollaq ñaq queta, nachi soua nale't napocta'pe na ala. Ime, nachi qanqateu'a ana ala, nachi qanallictac. 2Nachi huo'o so dechimaqtaxan nam fariseopi, 'eeta':

–¿Tá'ainco' qami' yi qau'ochi dam sa ishit da qaishitapec da qai'ot yi na'a'q mataxaqui?

3Nachi so Jesús 'enapeco':

–¿Qami' peta'a sa ishito' naxa da qautaxaÿaxañiÿapec da 'eetec so David co'ollaq somayi qataq soua lÿa't ÿoqoua't? 4Nachi somayi inoxonoigui so lma' ñi Dios, nachi ÿaconalo soua pan mayi sa qaishita'pe, nachi chi'c, qataq nataq'en ÿanoiguilo soua lÿata'pe, qamaq ndoteec na ntaxaÿaxanaxanecpi da qaitaxaÿapegue' ñi Dios mayi nachinata ishit da chic asa'aso pan.

5Nataq'en 'enapeco':

–Ne'ena shiÿaxaua llalec, namayi nataq'en huo'o naq 'enec da huo'o ca damaxasoxoolec yi na'a'q mataxaqui.

So shiÿaxaua mayi daqaqta na lhuaq

(Mateo 12.9-14; Marcos 3.1-6)

6Qaq so lÿa na'a'q mataxaqui nachi so Jesús qaltaq inoxoneu'a asom laponaxaqui na judiopi, nachi dapaxaguenataxaatac. Qaq ÿalectauo so shiÿaxaua mayi daqaqta na lhuaq mayi aloic. 7Nachi nam dapaxaguenataxaatapeguec na nqataxacpi qataq na fariseopi chochi qanauaatac so Jesús da ishit da datannataxan se'eso na'a'q mataxaqui, da yaqto' ishit da huo'o ca qaÿachigoxotchigui da lasouaxashit qanqoÿin. 8Qalaxayi somayi sogote da ÿaÿateetac da lhuennataxa somayipi. Nachi 'enapego' som shiÿaxaua mayi daqaqta na lhuaq, 'eeta':

–Qoñishiguem qome. Ime, qaq 'angui na laiñi.

Nachi so shiÿaxaua nachajñi, nachi tangui na laiñi so shiÿaxauapi. 9Nachi so Jesús 'enapego' so laÿipi, 'eeta':

–Aÿim qami' sena't nagui: ¿Chaq negue't ca ishit da qaÿashiita da qai'ot yi na'a'q mataxaqui, peta'a ca no'on huo'otaq ca qauem?, ¿huo'otaq da qanqat ca achaalataxac, loqo' chaq da qanca'alaxateec?

10Nachi so Jesús ÿamataigui 'enauac so datatauopi. Ime, nachi 'enapega so shiÿaxaua, 'eeta':

–Ña 'ai'aneec na 'adhuaq.

Nachi so shiÿaxaua ÿaneec na lhuaq, nachi ÿataqta no'oita na lhuaq. 11Qalaxayi somayipi ÿataqta dalemata. Ime, nachi nnattega't da chaq hua'ague ca ishit da qoÿiitec so Jesús.

So Jesús ÿaconeu'alo soua doce lamaxa'shi

(Mateo 10.1-4; Marcos 3.13-19)

12Qaq huo'o so na'a'q nachi so Jesús tashiguemec aso saqaÿoqotchiguemec 'alhua da natamen, nachi imatteec se'eso pe da natameetacot ñi Dios. 13Qaq co'ollaq mashi yi'oxoñi, nachi iÿaxana so lapaxaguenatacpi. Ime, nachi lca'au'alo soua doce somayipi, nachi ÿanaguilo da ÿauo'oi lamaxa'shi. 14Qaq 'ena na l'enaxatpi somayipi: Simón som ilonec da l'enaxat Pedro, qataq so Andrés som lqaÿa so Pedro, qataq so Santiago, qataq so Juan, Felipe, qataq so Bartolomé, 15Mateo, qataq so Tomás, qataq so Santiago som llalec so Alfeo, qataq so Simón som chigaqaigui na cananistapi, 16Judas som lqaÿa so Santiago, qataq so Judas Iscariote mayi ÿaneuo co'olloxochiyi so Jesús.

So Jesús ÿapaxagueetac so qalota shiÿaxauapi

(Mateo 4.23-25)

17Nachi so Jesús huenoteeguesop aso saqaÿoqotchiguemec 'alhua, lÿata'pe soomayi. Qaq co'ollaq qanviyiña aso lcomadaxalate, nachi somayi qataq soua lapaxaguenataqa nachi vi'iigueta. Qaq nataq'en ÿataqta qalota na shiÿaxauapi chigaqaña 'enauac yim 'alhua l'enaxat Judea, qataq yi Jerusalén, qataq na loigue yi Tiro qataq yi Sidón. Namayipi anac da huotaique da n'axaÿaxana so Jesús, qataq da qanataden da lalolaxa. 18Nachi na shiÿaxauapi mayi huo'o na l'ec leguemaxaic nataq'en no'oita. 19Nachi 'enauac na shiÿaxauapi ÿauotaique da ipoteu'a so Jesús souaxat somayi da natadeetac 'enauac na shiÿaxauapi, qalaq idolec da l'añaxac.

Nam machiguiñipi qataq nam qaica ca lamaic

(Mateo 5.1-12)

20Nachi so Jesús ÿamataigui so lapaxaguenatacpi, nachi 'enapeco':

–Ÿataqta qauamaichiguiñi qami' mayi qami' choxoda'q, cha'ayi qadalamaxachi da l'onataxanaxac ñi Dios.

21Nataq'en ÿataqta qauamaichiguiñi qami' mayi qoviitaigui nagui da qauqouachi, cha'ayi ÿataqta huo'o qome da qadcomadaqai.

Nataq'en ÿataqta qauamaichiguiñi qami' mayi qanoÿiñiitac nagui, cha'ayi ÿataqta huo'o qome da qadaÿalliguiyiqui.

22Nataq'en ÿataqta qauamaichiguiñi qom qami' nquiÿalo na shiÿaxauapi, souaxat ne'ena shiÿaxaua llalec, qataq da huo'otaq qami' qai'oldaue'c, huo'otaq da qami' qaishiue'n, huo'otaq da qai'otan da qad'enaxachi, 'eeta'am ca ÿapacteec qauem. 23Qaq ÿataqta qauamaichiguiñi qataq ÿataqta qantoñiitapigui' qome que'eca na'a'q, cha'ayi ÿataqta lta'adaic qome da qanshiitenaguiiqui da piguem. Cha'ayi nachida da 'eetec co'ollaxa so hua'au lta'alpi ne'ena shiÿaxauapi da sa ishit da iyacnapec som hua'au ltaxaÿaxanaxanecpi ñi Dios.

24Qalaxayi choxodaxasodo' qami' mayi qami' sallaxanecpi nagui, cha'ayi mashi huo'o da qadamaiqui.

25Nataq'en choxodaxasodo' qami' mayi sa ishit da qauqouachi nagui, cha'ayi huo'o qome na qadqouaqai.

Qataq choxodaxasodo' qami' mayi qauaÿalliguiyiitac nagui, cha'ayi ÿataqta qanoÿiñiitapeguem qome da qadaquicoqoi.

26Qataq choxodaxasodo' qami' qom no'on 'enauac da qan'aqtaguiiqui, cha'ayi nachida da 'eetec som hua'au lta'alpi namayipi, som tenataxanaxaicpi mayi 'enapec da l'aqtaxanaxanec ñi Dios.

Da 'eetec da qaÿauotec ca depa'aguenataxaatac

(Mateo 5.38-48; 7.12)

27Qaq qami' mayi aÿim qan'axaÿaxañiitega, qami' shinapegalo da ÿataqta qauauochiic qome ca qami' ipa'agueeta'pe qataq ÿataqta qauaÿamaxachiita ca qami' nquiÿategalo, 28qataq ÿataqta qauchoxoyiñi ca huotaique da qami' i'oteque ca qauem, qataq qanqouagaxauñiilec ca qami' ishiueeta'pe. 29Da huo'otaq huo'o ca iuaxangui ana 'adamelque, qaq nataq'en 'ai'anem ana lÿa 'adamelque, qataq da huo'otaq huo'o ca ÿacona ca 'adpo', qalaq nataq'en 'au'aqta'a da ÿachi ca 'al-lomaxaqui. 30Qataq da huo'o ca 'am ÿashila, qalaq 'ai'anem ca iÿaxanaique, qataq da huo'o ca deuotaxanec ca 'adalamaxat, qalaq sa ishit da qoquetapeguem. 31Qaq cam no'on mayi qanshiitaique da qami' i'oteque na shiÿaxauapi, qaq nachica qau'ochiic qome namayipi.

32Cha'ayi qom ndoteec ca qami' ÿauoteque, qaq nachica qauauochiic, qaq ¿négue'to' ca ÿaÿamaqchiguiñi mayi ishit da qau'ochi? Cha'ayi ivida'a na qauemaicpi ishit da i'ot de'eda. 33Huo'otaq da qandoxochiiteec ca qami' i'oteque ca ÿaÿamaqchiguiñi, qaq nachica qau'ochiic ca no'on, qaq ¿négue'to' cam ÿaÿamaqchiguiñi mayi ishit da qau'ochi? Cha'ayi nam qauemaicpi nataq'en ishit da i'ot de'eda. 34Huo'otaq da qandoxochiiteec da qau'aalaxanaxañi cam chochi qanaquichiita'a, qaq ¿négue'to' cam ÿaÿamaqchiguiñi mayi ishit da qau'ochi? Yi nataq'en nam qauemaicpi ishit da i'aalaxanaxan ca 'eeta'am qauemaic, ime, nachi iuatta'a da nataq'en qaÿi'iguelaxateguet. 35Qalaxayi qami' ÿataqta qauauochiic ca qami' ipa'agueeta'pe, qataq qauaÿamaxachiita ca shiÿaxaua, qataq qau'aalaxanaxañi. Qalaxayi sa ishit da chochi huo'o ca qanaquichiita'a. Qaq yaqto' ÿataqta lta'adaic ca qanshiitenaguiiqui, qataq ÿataqta qami' llalqa ñim Dios mayi 'amaqtaqaic. Cha'ayi ñimayi ÿataqta choxonnataxanaxaic, ichoxoden nam 'agaqaicpi qataq nam qauemaicpi. 36Qaq ÿataqta qami' choxonnataxanaxaiqa qome, qaq yi qoñiita'am ñi qadta'a ÿataqta choxonnataxanaxaic.

Sa ishit da qanmit ca lasouaxashit ca nÿa

(Mateo 7.1-5)

37Sa ishit da qanmichi ca lasouaxashit ca qadÿai, yaqto' ñi Dios sa ishit da qami' nmi't. Qataq sa ishit da qauauo'oi ca nhuaxanaguec ca qadÿai, yaqto' ñimayi sa ishit da ÿauo'o ca qanhuaxanaguiiqui. Qalaxayi qauchoxonnataxañi qome, yaqto' ñi Dios qami' ichoxode'n. 38Qauauo'oi ca qai'añiim ca qadÿai, yaqto' ñi Dios huo'o ca qami' ÿanema. Ca qami' ÿanema ÿataqta nlaqchigui naq'en ca qadachoxonaxaquii, qantoqoochiguiñi qataq qaipataqta't, imootapeguelec naq'en. Ñimayi ipagaqchiichigui yi lcata cam 'ai'anem ca 'adÿa, qaq nachiyi 'am ÿami'.

39Nachi so Jesús ÿauo'o da daloqnaxana, 'eeta':

–¿Peta'a ishito' ca qanamaic da ÿaueca'aguet ca lÿa qanamaic? ¿Peta'a sa ishito' caamayi da tayingui aca llimiaxañi? 40Qaica ca chochi napaxaguenatac da ishit da napacalec ca napaxaguenaxala'. Qalaxayi da huo'otaq mashi inoxonaqchiteec nam qaÿapaxaguenecpi, qaqca ishit da 'eeta'am cam napaxaguenaxala'.

41Qalaq ¿tá'ainco' yi ishito' da 'auamata'a cam 'auaqpi lsochi mayi huetangui ana l'aite ca 'adqaÿa, qaq sa ishito' da 'aula'a cam qo'ipaq lta'adaic mayi huetangui ana 'ad'aite? 42Qaq da huo'otaq sa ishit da 'auanoma ca qo'ipaq lta'adaic mayi huetangui ana 'ad'aite, qaq ¿tá'ainco' yi sa 'auadenalec da qonapega ca 'adqaÿa da qoneta': “'Am ÿaqaÿa, ñaq aÿim 'auashiitem qome da ñaqat yi 'auaqpi lsochi mayi huetangui ana 'ad'aite?” ¡'Am mayi qonetega da 'am 'eesa! 'Au'auaxaañi da 'anqat yi qo'ipaq lta'adaic mayi huetangui ana 'ad'aite, yaqto' ishit da ÿataqta 'anauaachiguiñi da 'anqat acam 'auaqpi lsochi mayi huetangui ana l'aite ca 'adqaÿa.

Aca qo'ipaq maichi qaÿauatton ana ala

(Mateo 7.17-20; 12.34-35)

43Ana qo'ipaqpi qaca aca no'on qo'ipaq da huo'otaq ñaxateec aca ala nachi qauem, nataq'en qaca aca qauem qo'ipaq da huo'otaq ñaxateec nachi no'on aca ala. 44Qaq ÿoqo'oyi añi 'oonole qo'ipaq maichi qaÿauatton aca ala. Qaq sa ishit da qanqat ana ala aca higo, qaq qaÿachigoxotaigui aca qo'ipaq mayi huo'o ana le. Qataq ana uva da qanqat ana ala, qalaq sa ishit da qaÿachigoxotaigui aca ÿaxat. 45Qaq nachi 'eetec ca no'on shiÿaxaua, da detaqa qalaq no'on cam 'enapec, cha'ayi dam ÿaÿamaqchiguiñi huetagui añi lquiyaqte. Qaq nachi 'en'am ca qauem shiÿaxaua, da detaqa qalaq qauema naua 'ena'pe, cha'ayi dam qauem huetagui añi lquiyaqte. Cha'ayi nam qodap ishit da nasaxauec cam ÿataqta da'aichigui añi qadquiyaqte.

Soua dos l'oxonaxala'te ca noÿic

(Mateo 7.24-27)

46Qami' naxa da aÿim qauÿaxañiÿa, qalaq qoñiita', “'Am mayi 'am qadataxala',” qalaq ¿tá'ainco' yi sa ishit da qau'ochi cam shinapec? 47Nagui aÿim qami' sa'axatema ca 'eeta'am ca shiÿaxaua da huo'otaq aÿim nau'a da aÿim n'axaÿaxana qataq ÿataqta i'ot cam shiitega: 48Camayi 'eeta'am ca shiÿaxaua mayi i'ot ca lma', qaq i'auaxaañi da deshidaxan, ÿataqta qaÿoqchiguingui naq'en ca lshidec. Ime, qaq lapaxañi ca coma' mayi l'oxonaxala' naq'en ca noÿic. Qaq chaxan 'eesa da ivita da i'auat so tala, nachi anac na 'etaxat ÿataqta sa nsatteguet ana lapaxa da iuaxanot que'eca noÿic. Qalaxayi sa ishit da ÿañoxot da ÿayigot, cha'ayi so noÿic n'oxootalec qanqoÿin so coma'. 49Qaq ca aÿim n'axaÿaxaatega, qalaxayi sa ishit da i'ot cam shiitega, qaq camayi 'eeta'am ca shiÿaxaua da chochi i'adainya' ca lma', qaq sa ishit da ÿauo'o ca l'oxonaxala' naq'en. Qaq chaxan 'eesa da ivita da i'auat so tala, nachi anac na 'etaxat ÿataqta sa nsatteguet ana lapaxa da iuaxanot somayi, nachi ishit da hualolaguiñi, nachi ÿataqta nlachiguiñi.

Currently Selected:

Lucas 6: TBSNT

Highlight

Copy