Lucas 4

Nayinataguec so Jesús

(Mateo 4.1-11; Marcos 1.12-13)

1Nachi so Jesús ÿataqta nlaqchigui so Espíritu Santo co'ollaq chigaqaama so tala Jordán, nachi so Espíritu ÿauec somayi da taÿa naq'en so tojlec 'alhua. 2Huaña yimayi, nachi hueta'a cuarenta na'axa'te, nachi anac so shiÿaxaua lma'na da ÿi'iguen. Qaq ÿataqta qaica ca chic somayi se'esoua na'axa'te. Qaq co'ollaq ime, nachi nomteguet na lqouaxa. 3Nachi so shiÿaxaua lma'na 'enapego' somayi, 'eeta':

–Qom ÿataqta 'eesa da 'am llalec ñi Dios, qaq qonapega ne'ena coma' da nañigui aca pan.

4Nachi so Jesús 'enapeco':

–Yi l'aqtac ñi Dios mayi nanettañi 'eeta': “Sa ishit da nachaqacata aca pan da i'añaqchit ca shiÿaxaua, mayi nataq'en 'enauac na l'aqtacpi ñi Dios.”

5Ime, nachi so shiÿaxaua lma'na qaltaq ÿaviguishiguema somayi aso qasoxonaxa, nachi saqaÿaloq da ÿachaxanalo 'enauaque naua 'ale'u. 6Nachi so shiÿaxaua lma'na 'enapeco':

–Aÿim 'am sanem qome 'enauac de'eda n'añaxac qataq da lli'oxoyic 'enauac ne'enaua 'ale'u, cha'ayi aÿim mashi aÿim qoÿanem 'enauac damayi. Qaq ÿoqo'oyi aÿim ishit da sami' ca camachaqca. 7Qaq qom 'am ishit da aÿim 'au'adoto naua 'adllicte da aÿim 'anatamnot, qaq 'adalamaxat qome 'enauac namayi.

8Qalaxayi so Jesús 'enapeco':

–'Am Satanás, aÿim qoca'ai, cha'ayi yi nanettañi l'aqtac ñi Dios 'eeta': “'Avi'oxoden ñi 'adataxala' Dios, qataq nachaqñita ñimayi 'au'onataxanot.”

9Qaq co'ollaq ime, nachi so shiÿaxaua lma'na qaltaq ÿauec somayi, ÿauega so la ciudad Jerusalén, nachi ÿaviguishiguemec na pa'ashiguem aso n'onaxanaxaqui late'edai, nachi 'enapego', 'eeta':

–Qom ÿataqta 'eesa da 'am llalec ñi Dios, qaq 'auachigoqchii ne'ena qome da 'aupadenaxaneec, 10cha'ayi yi nanettañi l'aqtac ñi Dios 'eeta':

Ñi Dios qome namaq ca lamaxashic piguem l'ecpi da yaqto' 'am ntela'a,

11da yaqto' 'am ÿachitalguete naq'en naua lhua'q namayipi,

da yaqto' 'am sa ishit da 'antoqne' ca coma'.

12Nachi so Jesús 'enapeco':

–Nataq'en yi nanettañi l'aqtac ñi Dios 'eeta': “Sa ishit da chochi 'avi'iguen ñi 'adataxala' Dios.”

13Nachi so shiÿaxaua lma'na co'ollaq sa ishit da ÿanata ca lÿa lataxac da ÿi'iguen so Jesús, nachi cada'acolec da loiguilo naua na'axa'te da ca'ai somayi.

So Jesús hueta'a yi Galilea co'ollaq chita'ague da do'onataxan

(Mateo 4.12-17; Marcos 1.14-15)

14Nachi so Jesús ÿataqta nlaqchigui da l'añaxac so Espíritu Santo co'ollaq ÿi'iguelaxague da Galilea. Nachi jec da qan'aqtaxaatapigui somayi 'enauaque naua laÿil yi'iyi 'alhua. 15Nachi dapaxaguenataxaatapoigui 'enauac anam laponaxaquipi na judiopi. Nachi 'enauac na shiÿaxauapi ÿataqta ÿi'oxodeetac somayi.

So Jesús hueta'a yi Nazaret

(Mateo 13.53-58; Marcos 6.1-6)

16Nachi so Jesús nqo'ona yi Nazaret yim pueblo mayi maichi lañaxataqa'. Qaq co'ollaq ivideuga so na'a'q mataxaqui, nachi inoxoneu'a aso laponaxaqui na judiopi, cha'ayi nachi n'onataxac somayi. Ime, nachi nachajñi da itaxaÿaxan yi l'aqtac ñi Dios. 17Qanachi qoÿami' asom lliyiguishi so l'aqtaxanaxanec ñi Dios l'enaxat Isaías. Nachi co'ollaq ÿauachigui, nachi ilalec som huetaña so nedec, 'eeta':

18So n'Espíritu ñi qadataxala' aÿim netanguit,

cha'ayi aÿim qoÿanagui da yaqto' sa'axatem da no'on l'axaÿaxac nam choxodaqpi,

qataq aÿim qaÿamaxalec da ñataden na huo'o da laquicoxo,

qataq da yaqto' sa'axatem da qaisouec na ncoñitaguishicpi,

qataq da sanem da nauaañi ñaq'en na qaicaua naua l'ai'te,

qataq da yaqto' sesouec nam qaica ca nyacnataguec,

19qataq da yaqto' sa'axatreec naua na'axa'te mayi huetoiguilo da ñi qadataxala' ÿan da lqouagaxanaqtaic.

20Ime, nachi so Jesús ÿapogui aso nede, nachi ÿami' som ilotague' asom laponaxaqui na judiopi. Ime, nachi nso'ooñi, nachi 'enauac nam huetaigui asom naponaxaqui ÿataqta qailochigui somayi. 21Nachi somayi detaqa, 'eeta':

–Nagui mashi ivita yi laloqo' da ipacchigui 'enauac na i'axat ana'ana ñiyiguishi mayi qan'axaÿaxañiitega.

22Nachi 'enauac qaÿi'oxodeetac so Jesús qataq ÿataqta qai'aalatapeguec souaxat naua l'aqtaqa ÿataqta 'onaxaiqa. Nachi nnattega't somayipi, 'eeta':

–De'eda, ¿peta'a sa nachido' da llalec so José?

23Nachi so Jesús 'enapeco':

–Qami' yi'oqta qome da aÿim qaudoilec da' chi n'aqtacnaxa 'eeta': “'Am natannataxanaq, maichi 'anatadeela't.” Qataq yi'oqta qome da qoñiita': “Nam sa'axasoqtapeguelec da 'au'otpi co'ollaq huaña yi Capernaum, nataq'en 'au'ot nagui da huaña na 'adalamaxat 'an'alhua.”

24Nachi qaltaq cot da l'aqtac, 'eeta':

–Qami' shinapegalo da ÿoqta 'eesa da qaica ca l'aqtaxanaxanec ñi Dios da lhuotta da qai'amaqten ca maichi lalamaxat n'alhua. 25'Eesa da ÿoqta qalota anam pa'aipi nam llalaqpi so Israel so na'a'q co'ollaq huo'o so l'aqtaxanaxanec ñi Dios l'enaxat Elías, co'ollaq qaica ca auot soua tres vi'iyi qataq soua seis ca'agoxoiqa. Nataq'en ÿataqta qalota na nqouaxa 'enauac se'eso 'alhua. 26Qalaxayi so Elías sa ishit da huo'o aca 'oonole pa'ai asom netalec so n'alhua na Israel llalaqpi da qaÿamaxa. Qaq nachasota asom netaña yi Sarepta yim sa qaÿapeque yi la ciudad l'enaxat Sidón. 27Nataq'en yim lma' na Israel llalaqpi ÿataqta qalota na sa no'on, nchiga na l'oc, se'eso na'a'q co'ollaq huo'o so l'aqtaxanaxanec ñi Dios l'enaxat Eliseo. Qalaxayi qaica da huo'otaq huo'o ca 'oonolec da qanataden somayipi, qaq chaqsota so Naamán som lma' yi 'alhua l'enaxat Siria.

28Nachi co'ollaq qai'aqchigui de'eda qai'axattac, nachi 'enauac nam huetaigui asom naponaxaqui ÿataqta qalota da lauel. 29Ime, qaq nachajñi somayipi, nachi qai'odaueegue da laÿi yi pueblo so Jesús, qaimaqtauga som loga't asom saqaÿoqotchiguemec 'alhua mayi netalec na noÿicpi, da qaÿauotaique da huaña qaq qaÿamaxauec somayi. 30Qalaxayi so Jesús ñi'iguelqot, nachi tachiguingui na laiñi somayipi. Ime, nachi jec.

So shiÿaxaua mayi huo'o so l'ec leguemaxaic

(Marcos 1.21-28)

31Ime, nachi so Jesús nqo'ona yi Capernaum yim pueblo mayi huaigui yi 'alhua Galilea. Qaq co'ollaq huaña yimayi, nachi ÿapaxagueetac so shiÿaxauapi som na'a'q mayi mataxaqui. 32Nachi ÿataqta huo'o da n'aalaxa da 'eetec da lapaxaguenataxanaxac somayi, cha'ayi da detaqa, qalaq ÿataqta huo'o naq 'enec naua l'aqtaqa.

33Nachi aso laponaxaqui nam judiopi ÿalectauo so shiÿaxaua mayi huo'o so l'ec leguemaxaic. Nachi somayi i'alaq, 'eeta':

34–Qomi' 'auaqta'alo. ¿Tá'ainco' yi qomi' sa 'aualemaxa't, 'am Jesús Nazaret l'ec? ¿Peta'a qomi' 'auanaÿalo da qomi' 'anlaxajyiñi? Aÿim 'am sauatton, qataq saÿaten da nachi'am lalamaxat ñi Dios.

35Nachi so Jesús nlaxa so n'ec leguemaxaic, 'eeta':

–¡'Au'enaxanai', nal'en qoca'ai ne'ena shiÿaxaua!

Nachi se'eso n'ec leguemaxaic nachi huañi naq'en so shiÿaxaua, taqtoigui naq'en somayipi. Ime, nachi ca'ai so shiÿaxaua, sa ishit da huo'o ca 'en'ac. 36Nachi 'enauac so shiÿaxauapi ÿataqta huo'o da lcolanaxa, nachi detaqtega't, 'eeta':

–¿Négue't dam da' n'aqtac? ¡Yi dam da' shiÿaxaua ÿataqta huo'o naq 'enec, qataq huo'o da l'añaxac da l'aqtac da ÿamaq so n'ec leguemaxaic, nachi somayi jec!

37Nachi qan'aqtaxaatapigui so Jesús 'enauaque naua laÿil yi'iyi 'alhua.

So Jesús nataden aso lachodo so Simón Pedro

(Mateo 8.14-15; Marcos 1.29-31)

38Huaña, nachi so Jesús ca'ai aso naponaxaqui, nachi tau'a so lma' so Simón. Qaq aso lachodo so Simón, asomayi sa no'on, ÿataqta qalota na l'edaxa. Nachi qanachoxonnot somayi da nataden asomayi. 39Nachi so Jesús nqollimlec asomayi, nachi nlaxa so n'edaxa, nachi se'eso n'edaxa jec. Qaq saqaÿaloq da ñishiguem asomayi, nachi huetac.

So Jesús nataden so qalota sa no'onpi

(Mateo 8.16-17; Marcos 1.32-34)

40Qaq co'ollaq mashi inoxooñi aso nala', nachi 'enauac na shiÿaxauapi nam huo'o na dalolaxaic huetaña na lma', nam huec na ÿotta'a't nalolaxacpi, nachi qandou'a so Jesús. Nachi so Jesús ÿashil-lec ñi 'oonolec somayipi, nachi no'oita naq'en. 41Qataq qalota na dalolaxaicpi jec na l'ec leguemaxaicpi. Nachi i'alaqtai', 'eeta':

–Nachi'am mayi 'am llalec ñi Dios.

Qalaxayi so Jesús nlaxa ne'ena n'ec leguemaxaicpi, qataq sa ÿashinem da detaqa, cha'ayi namayipi ÿaÿaten da somayi nachiso so nta'a mayi nca'alaxaqui.

So Jesús da'aqtaxaalec yi Galilea

(Marcos 1.35-39)

42Qaq co'ollaq mashi yaqta'a da yi'oxoñi, nachi so Jesús tauga ca pa'auec so la ciudad da nqo'oneuga som tojlec 'alhua. Qalaxayi na shiÿaxauapi nmittaique, nachi qaivittauga ca hueta'a somayi. Nachi qaÿauotaique da qanllañi, da yaqto' sa ishit da jec. 43Qalaxayi so Jesús 'enapeco':

–'A'i, cha'ayi iuen nataq'en da sa'axatem na laÿipi pueblopi da no'on l'axaÿaxac mayi i'axat da ñi Dios nachiñi ñi ilo'ogue 'enauacna, cha'ayi nachida da huo'o mshi aÿim qanamaq.

44Nachi so Jesús jec da da'aqtaxaatapoigui 'enauac ana naponaxaquipi yi Galilea.

Currently Selected:

Lucas 4: TBSNT

Highlight

Copy