Lucas 22
22
Qaÿauotaique da qaÿaconeu'a so Jesús
(Mateo 26.1-5, 14-16; Marcos 14.1-2, 10-11; Juan 11.45-53)
1Qaq mashi nayiitauga som laloxoqui da qanallic ana pan mayi sa qaÿauo'o aca lalegue mayi ÿashiidaxachigui som huetoigui da qaiuennate so na'a'q co'ollaq qanayica'ai so Egipto. 2Nachi so lataxala'pi na ntaxaÿaxanaxanecpi da qaitaxaÿapegue' ñi Dios qataq som dapaxaguenataxaatapeguec na nqataxacpi, somayipi nmittaique ca ÿachigoxotchigui da ishit da ÿalauat so Jesús, qalaxayi somayipi ÿataqta ñi'iÿa so shiÿaxauapi.
3Nachi so Satanás inoxonoigui so Judas, da l'enaxat lÿa Iscariote. Somayi nachiso so 'oonolec soua doce lamaxa'shi. 4Nachi somayi nqo'oneu'a da detaxaÿapegue' so lataxala'pi na ntaxaÿaxanaxanecpi, nachi da'aqtaxanem somayipi da 'eetec naq'en da lataxac da ÿaneu'a somayipi so Jesús. 5Nachi somayipi ÿataqta ntootec. Huaña, nachi qaÿachaxanapecot somayi da qaishiiten. 6Nachi somayi ÿasat, nachi nmitaique ca lataxac da ÿaneuo so Jesús da ivita da ndoteec.
Da lqui'axac so qadataxala'
(Mateo 26.17-29; Marcos 14.12-25; Juan 13.21-30; 1 Corintios 11.23-26)
7Qaq mashi iviteuga so na'a'q mayi huetoigui da qanallic ana pan mayi sa qaÿauo'o anam ÿashiidaxachigui. Se'eso na'a'q nachi nalaataxaqui na qagueta llalec mayi qanallic, da yaqto' qaiuennate so na'a'q co'ollaq qanayica'ai yi Egipto. 8Nachi so Jesús ÿamaq so Pedro qataq so Juan, nachi 'enapegalo', 'eeta':
–Qoquii qome, qauqataxañiÿai' cam qonoq qom qaiuennate so na'a'q mayi qanayica'ai yi Egipto.
9Nachi soomayi denataxa'n, 'eetra':
–¿Chaq huá'ague ca 'anshitaique da sachaqa'ague camayi da saqataxanqai'?
10Nachi so Jesús 'enapeco':
–Qami' qom qaunoxoñiu'a yi la ciudad, nachi qanachiñiÿalec qome ca shiÿaxaua ÿachitac aca laco'oña 'alhua. Qaq nachica qome qauca'achiigue, chochi qaviyiitau'a ca nma' mayi tateu'a. 11Nachi qoñiÿapega qome cam lma' que'eca noÿic, qoñiita': “Ñim dapaxaguenataxaatac 'eeta': ¿Chaq huá'ague cam noÿic mayi nqui'aqa', da yaqto' sequi'iÿa'ai' na ÿapaxaguenatacpi da sachiguenaq ca nallic mayi naigui da qaiuennate co'ollaq qanayica'ai yi Egipto?” 12Nachi qami' ÿachaxanalo qome yi nqui'aqa' ÿataqta lta'adaic mayi pa'ashiguemec na l-laq ñi noÿic, sogote da qaÿaqataxaatai'. Huaña, nachi qauqataxañiÿai' qome cam qonoq.
13Nachi soomayi je'c, nachi ipacchigui da nateedalec 'enauac nam 'eetega so Jesús. Huaña, nachi ÿaqataxaadai' so nallic.
14Qaq co'ollaq ivita so laloqo' da nqui'axac, nachi so Jesús qataq soua lamaxa'shi nachi nso'ooyiñi da qaÿatalec so nqui'axala'. 15Nachi so Jesús 'enapeco':
–¡Aÿim ÿataqta huo'o da iyaxa da qami' ñiuanaxa'u ne'ena nallic, llaxatemallaxa da saxanaxa da seleu! 16Cha'ayi aÿim shinapec da nagui sa ishit qome da qaltaq shi'iguelaxalec da sachic ne'ena nallic, chochi ivitta'a ca na'a'q qom ivita cam laloqo' da ilo'ogue 'enauacna ñi Dios. Huaña, nachi ÿoqta nalochiguiñi ne'ena nallic.
17Nachi ÿacona asom ÿomaxaqui. Ime, nachi ÿanot da n'achic ñi Dios. Qaq co'ollaq ime, nachi 'eeta':
–Qauacoñiiguet ana'ana ÿomaxaqui, nachi ñi 'oonolec da qoñiita ÿami' ca lÿa. 18Cha'ayi aÿim shinapec nagui da sa ishit da qaltaq shi'iguelaxalec da ñiÿomgui ne'ena lli'i ana uvas, to' qom ivita ca laloqo' da ilo'ogue 'enauacna ñi Dios.
19Qaq co'ollaq ime, nachi ÿacona aso pan, nachi ÿanot da n'achic ñi Dios. Ime, nachi icolaxachigui, nachi ÿanoiguilo soomayi, nachi 'enapeco':
–Ana'ana pan nachi naigui da i'oquiaxac mayi qoÿanguet da nalaataguec, souaxat da qoñiita. Qaq qau'ochi qome damayi, yaqto' sa ishit da aÿim qaucouaÿa'ai.
20Qaq nachi i'enaxatteguet nataq'en aso ÿomaxaqui co'ollaq mashi ime da nqui'axac, nachi 'eeta':
–Ana'ana ÿomaxaqui nachana ana naigui da dalaxaic aÿamaxataxac mayi ÿataqta 'itchiyiñi naq'en naua itago'q mayi qaicoldeec da qaitaunec da qoñiita.
21Qaq nagui ñi aÿim ÿaneuo qome, ñimayi nataq'en ñiso'onaqta'ai', datatalec ne'ena qadqui'axala'. 22Qalaxayi ne'ena shiÿaxaua llalec, namayi quetelec dam lliquiaxac mayi sogote da qoÿiitañi, qalaxayi ¡choxodaxaso' ñaqshin ñim shiÿaxaua mayi ÿauotaique da ÿaneuo namayi!
23Huaña, nachi maichi nnattega't somayipi da chaq negue't cam ÿaneuo somayi.
Qancotatapigui da chaq negue't ca ÿoqta ÿi'oxodaq
24Huaña, nachi ncotatega't somayipi da chaq negue't ca ÿoqta ÿacteec da qaÿamata'ac da ÿi'oxodaq. 25Qalaxayi so Jesús 'enapeco':
–Nam nta'alpi mayi ilotague' na ÿotta'a't shiÿaxauapi, namayipi ÿataqta huo'o naq 'enec da damaxasoxonapec, qataq nam nataxala'pi mayi ilotague' nam shiÿaxauapi da qaitaxaÿa namayipi qalaq qaÿamata'ac da no'on shiÿaxauapi. 26Qami', qalaxayi sa ishit da nachi qoñiitec de'eda. Cha'ayi ca 'oonolec da qoñiita da ÿi'oxodaq, qalaq camayi i'enaxat qome ca ña nsoqolec; qaq cam damaxasoxonapec, qalaq 'eeta'am qome ca chochi namaxashic. 27Qaq ÿoqo'oyi ¿chaq négue't cam ÿoqta ÿi'oxodaq, peta'a cam nso'ootañi da datatalec cam nqui'axala' da deque'etac, huo'ochaq cam qaÿamaqtac? Qaq ¿peta'a sa ishito' da nachiso som datatalec so nqui'axala' som ÿi'oxodaq? Aÿim, qalaxayi qami' sootaiguilo, shiita'am cam chochi qaÿamaqtac.
28Qaq qami' mayi nachi 'eetai' da aÿim qannaiquiitapegue', qaq qanqui'itaxañiigui 'enauac nam ñique'ejnaxaguesat. 29Qaq ÿoqo'oyi aÿim qami' sanema qome ca qad'onataxanaxaqui da qauloÿigue 'enauacna, 'eeta'am da 'eetec ñi ita'a da aÿim ÿanem da i'onataxanaxac, 30yaqto' qami' ñiuanaxa'u, qataq qami' ñiÿomaxa'u cam iqui'axala' qom mashi sootaigui ca i'onataxanaxac, qataq nataq'en qanso'oñiingui acam so'onaxaquipi mayi ÿi'oxodaq, da yaqto' qanmichi nam llalaqpi som doce llalaqpi so Israel.
So Jesús i'axata'a da nqolguetaxac so Pedro
(Mateo 26.31-35; Marcos 14.27-31; Juan 13.36-38)
31Nataq'en 'enapeco' so qadataxala':
–Simón, Simón, ña 'aula'a so Satanás mashi qami' iÿaxaneu'alo da 'ico' qami' ichigo'q, 'eeta'am naq'en da qaichigoq ca trigo. 32Qalaxayi aÿim 'am ñoqouagaxaueetapeguelec, da yaqto' sa ishit da saqca da 'adpi'iÿaxac. Qaq 'am qom ivita da aÿim 'añi'iguelqot, nachi 'autauan qome na 'adqaÿañicpi da yaqto' nachi 'eetai' da lpi'iÿaxac.
33Nachi so Simón 'enapeco':
–'Am ÿataxala', aÿim qaica ca shiga da 'am iÿateuo aca ncoñitaxanaxaqui, ivitta'a da 'am seleutañi'.
34Qalaxayi so Jesús 'enapeco' somayi, 'eeta':
–Pedro, nagui 'am shinapega da qomele qom yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega aÿim sa 'auauatton.
Nayiita'a so laloqo' da nque'ejnaxac so Jesús
35Nachi so Jesús denataxan, 'eeta':
–Se'eso na'a'q can qami' sama'q da sa ishit da sauo'o ca qadachoxonaxaqui qataq aca laÿi' aca qodomi qataq caua qadapela'chilli', qaq ¿peta'a huo'o co'ollaxa ca qaviñiitac?
Nachi soomayi 'ena'po':
–'A'i, qaica ca seuenaqtac.
36Nachi 'enapeco':
–Nagui qalaxayi ca huo'o ca lachoxonaxaqui, qaq no'on da ÿachi, nataq'en cam alom laÿi'. Qaq cam qaica ca lailonec, qaq no'on da imen ca lapo', ime, qaq deshijnaxanaique camayi. 37Cha'ayi aÿim shinapec da ÿataqta ipacchigui qome da ñi'aqtaguec mayi i'axat naua ñiyigui'shi l'aqtaqa ñi Dios, mayi 'eeta': “Nachi qaÿalecnoigui nam 'itaxaloxoicpi camayi.” Cha'ayi 'enauac nam ñi'aqtaguec mayi qoÿittañi, namayi ÿataqta ipacchigui.
38Nachi somayipi 'enapeco':
–'Am qadataxala', 'enaua huo'oi naua dos ÿilonqa.
Nachi somayi 'enapeco':
–A'ayi, nachi tachiguiña.
So Jesús nqouagaxaueetac, hueta'a yi Getsemaní
(Mateo 26.36-46; Marcos 14.32-42)
39Ime, nachi so Jesús huenoxoneec, tauga cam nachi 'eetai'cnaxa da lanataqa' saqaÿoqotchiguemec 'alhua mayi nanqa' ana olivos. Qataq so lapaxaguenatacpi nachi nnaictague'. Qataq so lapaxaguenatacpi nachi nnaictague'. 40Qaq co'ollaq qaiviteuga yimayi, nachi 'enapega somayipi, 'eeta':
–Qanqouagaxauñi qome, yaqto' sa ishit da qami' inoxonoiguilo ca qauem nhuennataxac.
41Nachi so Jesús ca'aisalo soomayi, taÿa cam qaÿata'a. Ime, nachi i'alyiñi naua l-llicte da nqouagaxauen. 42Nachi 'eeta':
–'Am ita'a, da 'aushit, qaq no'on da sa ishit da aÿim 'apagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot ca maichi shiitapeguec, chaqcata cam qonetapeguec.
43Nachi anac som namaxashic piguem l'ec da ÿanem da l'añaxac somayi. 44Qaq co'ollaq mashi ÿagueec da nque'ejnaxac, nachi qaltaq nquigaxatteec da n'añaxataxac da nqouagaxaunaxac, nachi na nchilchaxa mayi anactac, 'eeta'am na ntago'q, ÿataqta ñijlec na 'alhua.
45Qaq co'ollaq imat da nqouagaxaunaxac, nachi ñishiguem da nqo'ona so lapaxaguenatacpi. Nachi co'ollaq ivita, nachi ilalec da do'ochita somayipi, souaxat da sa nalo'oguet da laquicoxo. 46Nachi 'eetega somayipi, 'eeta':
–¿Tá'ainco' yi qau'ochiita? Ña qoñiishiguem. Ime, qaq qanqouagaxauñi, yaqto' sa ishit da qami' taiguilo ca qauem nhuennataxa.
Qaÿaconeu'a so Jesús da qaicoñi'
(Mateo 26.47-56; Marcos 14.43-50; Juan 18.2-11)
47Qaq ña detaqtac so Jesús co'ollaq nvi' so ÿataqta qalota shiÿaxauapi. Qaq qanatataueegue so l'enaxat Judas, som 'oonolec so doce lapaxaguenatacpi. Nachi somayi nquigueu'a so Jesús da napigoq. 48Nachi so Jesús 'enapego':
–Judas, ¿'am 'anapigoqot na shiÿaxaua llalec da 'auauotaique da 'aneuo?
49Qaq som nnaictague'pi so Jesús co'ollaq ÿauaachigui de'eda qanayiuaigui, nachi qainattac somayi, qoÿiita':
–'Am qadataxala', ¿seloquiaxai' peta'a namayipi?
50Nachi so 'oonolec somayipi iquesoxouec aso aloiguishi ltela som l-latac so lataxala' nam ntaxaÿaxanaxanecpi da qaitaxaÿapegue' ñi Dios. 51Qalaxayi so Jesús 'enapeco':
–Qauaqaÿa'a, a'ayi, nachi tachiguiña.
Nachi so Jesús ipoteu'a ana ltela so nlatac, nachi nataden. 52Ime, nachi 'enapega som lataxala'pi nam ntaxaÿaxanaxanecpi qataq som ilotague'pi asom n'onaxanaxaqui late'edai, qataq som nquedoxonecpi mayi anac da ñi'iguenauga somayi da ÿauec, 'eeta':
–¿Qami' qauanaqui, qanachiita'pe naua qainaqalli' qataq naua qanpo'ñilli', 'eeta'amo' da huo'otaq aÿim cachaxaic? 53Qami' soota'agueta soua na'axa'te añi n'onaxanaxaqui late'edai, qalaq ¿tá'ainco' yi sa ishito' da aÿim qauacoñiu'a? Qalaxayi mashi ivita yi laloqo' da qau'onataxañi qataq da do'onataxan da l'añaxac na napalaxa.
So Pedro nqoleguettac, 'eetega da sa ÿauatton so Jesús
(Mateo 26.57-58, 69-75; Marcos 14.53-54, 66-72; Juan 18.12-18, 25-27)
54Nachi qaÿaconeu'a so Jesús da qaicoñi', nachi qaÿauegueu'a ca lma' som lataxala' na ntaxaÿaxanaxanecpi da qaitaxaÿapegue' ñi Dios. Nachi so Pedro ca'attau'ogue somayi. 55Qaq co'ollaq ivideuo somayipi, nachi qaÿalon so nodec, qaÿachangui na laiñi so qasoxoc. Qaq nataq'en so Pedro nso'ooñi, netangui somayipi. 56Nachi aso nlata co'ollaq ila'a somayi da datatangui so nodec, nachi iloto'ot, qaq 'enapeco':
–Nataq'en peta'a ñi'iñi shiÿaxaua nnaictague' damaxa.
57Qalaxayi so Pedro nqolguet, nachi 'eeta':
–Aque', aÿim sa sauatton damayi.
58Qaq co'ollaq qaÿata'ague de'eda, qaltaq jec so lÿa da ila'a somayi, nachi 'enapega, 'eeta':
–'Am peta'a nataq'en 'adaÿipi namayipi.
Nachi so Pedro 'enapeco':
–Aque', sa ishit da nachaÿim.
59Qaq co'ollaq mashi qaÿata'ague de'eda, nachi ÿi'iguelaxalec da denataxan so lÿa, 'eeta':
–Ÿoqta 'eesa da ñi'iñi shiÿaxaua maichi lÿa de'eda shiÿaxaua, cha'ayi ñimayi nataq'en chigaqa'ague da Galilea.
60Nachi so Pedro 'enapeco':
–Aque', aÿim sa saÿaten de'eda 'au'axattac.
Nachi co'ollaq ña detaqtac so Pedro, nachi noÿin so 'olgaxa. 61Huaña, nachi so qadataxala' nqoilga da ÿamato'ot so Pedro. Huaña, nachi somayi tachigui yi lauel da l'aqtac so qadataxala' co'ollaq 'eeta': “Qomele qome yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega da aÿim sa 'auauatton.” 62Huaña, nachi pa'auec so Pedro, nachi ÿataqta lta'adaic da nneenaxac.
Qaÿi'inai' so Jesús
(Mateo 26.67-68; Marcos 14.65)
63Nachi so shiÿaxauapi mayi iuattague' so Jesús ÿataqta ÿi'inai' somayi qataq iuaxaatac. 64Qaÿapoguilo naua l'ai'te somayi, qataq qanhuaxanec na lashic, nachi qoÿiitega, qoÿiita':
–¡Ña 'au'axat chaq negue't na 'am iuaxaatac!
65Qataq lapa na laÿipi n'aqtac somayi da qaishiueetac.
So Jesús qaÿataxanoigui so nta'alpi mayi i'ot na lataxacpi
(Mateo 26.59-66; Marcos 14.55-64; Juan 18.19-24)
66Qaq co'ollaq mashi yi'oxoñi, nachi lapona't so lquedoxonecpi na judiopi qataq so lataxala'pi na ntaxaÿaxanaxanecpi qataq nam dapaxaguenataxaatapeguec na nqataxacpi. Nachi qaÿauegueu'a so nta'alpi mayi loicnatac na lataxacpi. Nachi qainattac, qoÿiita':
67–Ña qomi' 'au'aqtaxanema, ¿'am peta'a nachi'am nta'a nca'alaxaqui?
Nachi somayi 'enapeco':
–Da shinapec aja', nachaÿim, qaq ÿoqta da sa ishit da aÿim qau'amaqchiñi. 68Qaq da huo'otaq qami' sena't, qalaq ÿoqta da sa ishit da aÿim qau'aqtaxañiim, qataq sa ishit da aÿim qauesoiuec. 69Qalaxayi nagui na shiÿaxaua llalec sogote da nso'oota'ague da aloic ñi Dios mayi qaica ca ÿaqalanapec.
70Ime, nachi 'enauac qaimalec da qainattac, qoÿiita':
–¿Nachi'am, peta'a 'am llalec ñi Dios?
Nachi so Jesús 'enapeco':
–Aja', nachaÿim, cha'ayi nachi qoñiÿapec nataq'en qami'.
71Nachi somayipi 'enapeco':
–¿Negue'tom ca lÿa seuenaq da detaxaÿauo?, yi qomi' maichi sa'axasoqchigui da l'aqtac damayi mayi nasaxauec.
Currently Selected:
Lucas 22: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
