Lucas 23
23
So Jesús qaÿauegueu'a so nta'a Pilato
(Mateo 27.1-2, 11-14; Marcos 15.1-5; Juan 18.28-38)
1Nachi 'enauac ñishiguem somayipi, nachi qaÿauegueu'a so Jesús so nta'a Pilato. 2Huaña, nachi qaÿauo'o na qaÿasaxalecpi qoÿiitega lasouaxashit, qoÿiita':
–Qomi' selaqalec de'eda shiÿaxaua da ÿataqta taÿa't naq'en na qadhuo' l'ecpi. Qataq 'eetega da sa ishit da seshiitenaq ñi lta'a na nta'alpi mayi netaña yi Roma, qataq 'eetega da nachida dam nta'a nca'alaxaqui.
3Nachi so Pilato inat somayi, 'eeta':
–¿Nachi'am peta'a mayi 'am lta'a na judiopi?
Nachi so Jesús 'enapeco':
–Aja', nachida dam qonapec.
4Nachi so Pilato 'enapega som lataxala'pi nam ntaxaÿaxanaxanecpi qataq som shiÿaxauapi, 'eeta':
–Aÿim sa ishit da huo'o ca sanata lasouaxashit de'eda shiÿaxaua.
5Qalaxayi somayipi ÿi'iguelaxalec da l'aqtac ÿataqta n'axannec, 'eeta':
–Namayi ÿasouaxattega't na shiÿaxauapi mayi netaña yi Judea, souaxat da lapaxaguenataxanaxac. Chigoqchiguiña yi Galilea, qaq nagui qataq nvitta'a ne'ena souaqta'a.
So Jesús qaÿauega so nta'a Herodes
6Qaq so Pilato co'ollaq hua'axaÿa de'eda, nachi nnataxanec da se'eso shiÿaxaua chigaqa'ague da Galilea. 7Qaq co'ollaq mashi qai'aqtaxanem da somayi chigaqa'ague da Galilea, nachi somayi ÿamaxa so nta'a Herodes mayi ilotague' yi 'alhua Galilea, cha'ayi somayi nataq'en hueta'a yi Jerusalén se'eso na'a'q. 8Nachi so nta'a Herodes co'ollaq ila'a so Jesús, nachi ÿataqta machiguiñi, cha'ayi mashi qaÿoqteguelo naua na'axa'te da nshitaique da ÿauatton somayi. Cha'ayi hua'aqtapeguelecnaxa da qai'axattac somayi, qataq nshitaique da ÿauaachigui da huo'o ca i'ot n'anec mayi sa qaÿauanapega. 9Nachi ÿataqta qalota na nnataxanaxacpi da inattac somayi, qalaxayi so Jesús sa ishit da ÿasateguet. 10Qaq nataq'en nachattauo nam lataxala'pi na ntaxaÿaxanaxanecpi qataq nam dapaxaguenataxaatapeguec na nqataxacpi, namayipi ÿataqta qalota na ÿasaqtapeguelec da 'eetega lasouaxashit somayi. 11Nachi so nta'a Herodes qataq so nallippi ÿataqta qaÿi'inai' so Jesús, nachi qalapaxalec so npo' ÿataqta qaica ca 'en'am da lyac, 'eeta'am qanqoÿin ca nta'a. Qaq co'ollaq ime, qaltaq qaÿi'iguelaxata so Pilato. 12Nachi se'eso na'a'q so Pilato qataq so Herodes qaltaq nmana't, cha'ayi soomayi mashi ÿataqta pa'aguenaxa'u.
So Jesús qoÿanguet da nalaataguec
(Mateo 27.15-26; Marcos 15.6-15; Juan 18.39–19.16)
13Nachi so Pilato lapona't so lataxala'pi na ntaxaÿaxanaxanecpi qataq som nataxala'pi qataq na shiÿaxauapi. 14Nachi 'enapega, 'eeta':
–Qami' aÿim qanaviquiu'a de'eda shiÿaxaua, qoñiitega da nachida da ÿasouaxattega't na shiÿaxauapi, qaq aÿim sogote da sechimaxattega damayi, qalaxayi sa ishit da huo'o ca sanata lasouaxashit. Qaq qami' qauauañiichigui da aÿim qaica ca sanata lasouaxashit nam qauasaqaitapeguelecpi damayi. 15Ñi Herodes nataq'en, qaq ÿoqo'oyi ñi'iguelaxat damayi. Qaq qauloichigui damayi da qaica ca lasouaxashit da huo'otaq ishit da qaÿachigoxotchigui ca nalaataguec. 16Qaq aÿim samaxasoxoolec qome da qaiuaxan damayi, qaq qom ime, nachi saxaneec.
17Qaq so Pilato nachi 'eetai'cnaxa da n'onataxac da huo'o na isouec ncoñitaguishic da iviteuga yi naponaxaqui, yaqto' na shiÿaxauapi ÿaÿamaxadeeta somayi. 18Qalaxayi nmashiguem 'enauac somayipi da i'alaq, 'eeta':
–¡Qaÿalauat qome ne'ena shiÿaxaua! ¡Qaq ca Barrabás, qalaxayi qaisouec!
19Qaq se'eso Barrabás, somayi qaicoñi' co'olloxochiyi, nachi qoÿanaigui aso ncoñitaxanaxaqui souaxat co'ollaq qanpa'aguene' naq'en so nta'a co'ollaq huaña yi la ciudad, qataq souaxat da laataxanaxaic. 20Qalaxayi so Pilato nshitaique da isouec so Jesús, ÿoqo'oyi qaltaq ÿi'iguelaxalec da denataxan. 21Qalaxayi somayipi ÿataqta n'axannec da ÿi'iguelaqtalec da l'alaxac, 'eeta':
–¡Qaiuaxaneuo qome namayi!
22Qaltaq ÿi'iguelaxalec so Pilato da 'enapega somayipi, 'eeta':
–Qaq ¿négue'to' ca i'ot sa ÿaÿamaxañi damayi?, yi aÿim qaica ca sanata lasouaxashit da huo'otaq naigui da qaÿauo'o ca nalaataguec. Aÿim chochi samaxasoxoolec qome damayi da qaiuaxan, qaq qom ime, nachi saxaneec.
23Qalaxayi somayipi ÿataqta ÿi'iguelaqtalec da qaiÿaxaatapegueu'a so Jesús da ña qaiuaxaneuo. Qaq co'ollaq ÿagueec da l'alaxac somayipi qataq som lataxala'pi na ntaxaÿaxanaxanecpi, nachi ivitta'a da qaÿañoxot dam qoÿiitapeguec. 24Huaña, nachi so Pilato nañoxot da ÿasateguet da 'eetapeguec somayipi. 25Nachi isouec som shiÿaxaua mayi lca'ateu'a somayipi som qoÿaataigui aso ncoñitaxanaxaqui souaxat co'ollaq qanpa'aguene' naq'en so nta'a qataq souaxat da laataxanaxaic. Nachi ÿanoigui somayipi so Jesús da maichi ÿoiqueetac.
Qaiuaxaneuo so Jesús
(Mateo 27.32-44; Marcos 15.21-32; Juan 19.17-27)
26Qaq co'ollaq mashi qaÿauec so Jesús da qaÿauotaique da qaiuaxaneuo, nachi qaÿaconeu'a so shiÿaxaua, l'enaxat Simón, mayi lma' yi Cirene. Somayi chigaqauga na n'onaxa. Nachi qaÿachilec somayi so npe'enaxaqui so Jesús, nachi ca'attaueegue qanqoÿin somayi.
27Qaq ÿataqta qalota so shiÿaxauapi mayi ca'attauo qataq so 'alpi. 'Enauac asomayipi noÿiitagui, n'alaqtapiguiñi, souaxat da daquigoigue somayi. 28Nachi so Jesús nqoileeguet asomayipi, nachi 'enapega, 'eeta':
–Qami' 'alpi mayi qadmayi na Jerusalén, sa ishit qome da aÿim qanoÿiñiilec. Chaqdata qome da maichi qanoÿiñiila't, qataq qanoÿiñiilec na qai'alquiipi. 29Cha'ayi anate' caua na'axa'te qome da qoÿiita': “Ÿataqta machiguiñi qome acam sa deco'o qataq acam sa ishit da hualaxai qataq acam sa nauanapegue' da illipaxaatauo ca llalec.” 30Huaña, nachi na shiÿaxauapi 'enapega ana qasoxonaxapi, 'eeta': “Ña qomi' 'aupataxayiñi qome.” Qataq qoÿinapega ana comadelecpi, qoÿiita': “Ña qomi' 'ai'oxooyiñi qome.” 31Cha'ayi aca dadala qo'ipaq da hua'auñi da qai'otec de'eda, qaq ¿chaq huá'aguectaxa ca qoÿiitec acam ltoxoi?
32Qaq nataq'en qaÿauecta'agueta soua dos shiÿaxa'u mayi l'onataqa naua qauema da qaÿauotaique da nalaataxa'u qanqoÿin so Jesús. 33Qaq co'ollaq mashi qaiviteuga som 'alhua mayi l'enaxat nqaic lpi'inec, nachi qaiuaxaneuo so Jesús qataq nataq'en soua dos mayi l'onataqa naua qauema. So 'oonolec qoÿana'ague na aloic, qaq so lÿa qalaq qoÿana'ague na n'emaq. 34Qaq co'ollaq mashi qaiuaxaatapegueuo so Jesús, nachi 'eeta':
–'Am ita'a, 'auchoxoden qome namayipi, cha'ayi sa ÿaÿaten dam i'ottac.
Nachi som huataxanaqpi nallittapiguilo soua alogo so Jesús da chaq negue't ca talguete soomayi. 35Qaq 'enauac na shiÿaxauapi imeteetac somayi qataq ivida'a nam nta'alpi ÿi'iitac, 'eeta':
–Nca'alaxateecnaxa ca lÿa. Qaq nagui, qaq no'on da maichi nca'alaxajla't, qom ÿoqta 'eesa nachiñi ñi nta'a nca'alaxaqui mayi lca'aguishic ñi Dios.
36Qaq nataq'en som huataxanaqpi ÿataqta ÿi'iitac somayi, nachi qanquigueu'a da qaÿauotaique da qanÿomaxangui som lataxa mayi ÿataqta 'iuaxaic. 37Qataq qoÿiitega, qoÿiita':
–Qom nachi'am mayi 'am lta'a na judiopi, qaq no'on qome da maichi 'anca'alaxajla't.
38Qaq huo'o som nedec mayi qoÿittalec na pa'ashiguem, huetalguete naua l'aqtaqa na griegopi qataq na latinopi qataq na hebreopi, 'eeta': “Ñimayi nachiñi ñi lta'a na judiopi.”
39Qaq som 'oonolec som qauema nam i'otta'pe mayi nataq'en qaicoñittauo nataq'en ishiueetac somayi, 'eeta':
–Qom 'eesa da nachi'am nta'a nca'alaxaqui, qaq no'on da maichi 'anca'alaxajla't qataq nataq'en qomi' 'anca'alaxatreec.
40Qalaxayi so maichi lÿa qataq nlaxa somayi, 'eeta':
–Qalaq ¿sa ishito' da 'ayi'iÿa ñi Dios?, yi 'am nachi qoneta'am da 'anhuaxanaguec ñimayi. 41Qomi' ÿoqta 'itchiguiñi dam qanque'ejnaxac, cha'ayi maichi seshiitenaqtac dam naigui nam so'otaqpi. Qaq ñim ña' shiÿaxaua, qalaxayi sa ishit da huo'o ca i'ot qauem.
42Nachi somayi 'enapego' so Jesús, 'eeta':
–Aÿim 'auennata'a qome qom 'añi'iguelaq da 'aulo'ogue 'enauacna.
43Nachi so Jesús 'enapeco':
–Ÿoqta 'eesa da shinapec da nachina nagui da sogote aÿim qoueta'aguet da qoueta'a yi lma' na qanca'alaxateecpi da piguem.
Da 'eetec da l-leuaxa so Jesús
(Mateo 27.45-56; Marcos 15.33-41; Juan 19.28-30)
44Qaq mashi yaqta'a da na'a'q laiñi. Nachi 'enauac ana 'alhua ÿataqta napanñi, chochi ivitta'a so las tres so avit. 45Aso nala' qalaq ÿataqta naue', qaq som lapoxot nam pa'auo aso n'onaxanaxaqui late'edai qalaq colaqchiguingui na laiñi. 46Nachi so Jesús i'alaq, 'eeta':
–'Am ita'a, 'am sepataxalec nagui da maichi 'aulo'ogue na iqui'i.
Qaq co'ollaq mashi nasaxauec de'eda l'aqtac, nachi ileu.
47Nachi som lataxala' so huataxanaqpi co'ollaq ÿauaachigui de'eda, nachi ÿi'oxoden ñi Dios, 'eeta':
–Ÿoqta 'eesa ñi'iñi shiÿaxaua da qaica ca ÿasouaxat.
48Qaq 'enauac so shiÿaxauapi mayi ÿauaachigui de'eda huaigui somayi nachi nlagaxatapec, qalaxayi ÿataqta iuaxaalguete naua ltogue da nqui'ic. 49Qaq 'enauac nam nauattonaxauapi so Jesús qataq som 'alpi mayi ca'attague' somayi co'ollaq chigoqchiguiña yi Galilea, nachi lshictauga ca hueta'a co'ollaq imeteetac da huaigui somayi.
So Jesús mashi qailayiñi
(Mateo 27.57-61; Marcos 15.42-47; Juan 19.38-42)
50Qaq huo'o so shiÿaxaua ÿataqta no'on da lataxac qataq sa ishit da i'ot ca sa ÿaÿamaxañi, l'enaxat da José, lma' yi pueblo Arimatea huaigui yi 'alhua Judea. Somayi nachi ÿalectaigui na nta'alpi mayi loicnatac na lataxacpi na judiopi. 51Se'eso José, somayi iuattaique da nvi' cam l'onataxanaxac ñi Dios da ilo'ogue 'enauacna. Qaq somayi sa ishit co'olloxochiyi da ÿaÿamaxaden dam i'ot som laÿipi nta'alpi. 52Nachi somayi nqo'oneu'a co'olloxochiyi so Pilato da iÿaxaneu'a da l'oquiaxac so Jesús. 53Qaq co'ollaq ime da nqajñi so Jesús, nachi lpataxangue so hualoq lapagaxaic, nachi ÿachangui asom huachiqui mayi n'onata, naigui aso coma'. Asomayi saxanaxa da huo'o ca qaÿachangui. 54Qaq se'eso na'a'q nachiso so aÿamaxataxaqui da qanaÿamaxatta'aguet so lÿa na'a'q mayi mataxaqui som yaqta'a da nnoxoneuo.
55Nachi som 'alpi mayi ca'attague' so Jesús co'ollaq chigoqchiguiña yi Galilea nataq'en jec da demejnaxaneuga aso huachiqui. Nachi ÿauaachigui da qoÿiitec da l'oquiaxac so Jesús. 56Nachi co'ollaq ÿi'iguelaxadeu'a ca lma't, nachi qaÿaqataxanai' som codaxat. Ime, nachi nmatreec se'eso na'a'q mataxaqui, qaipactelec da lamaxasoxonaxac na nqataxacpi.
Currently Selected:
Lucas 23: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.