Efesios 5

Da 'eetec da lataxac nam llalaqpi ñi Dios

1Qaq cha'ayi qami' lauotaqa'te llalqa ñi Dios, ÿoqo'oyi ÿataqta qanpogoxoiñiÿapegue' qome da qoñiita'am ñimayi. 2Qataq ÿataqta qami' soxodaiqa, yaqto' qoñiita'am so Cristo da ÿataqta qomi' ÿauoteque, qataq qomi' nañaalguete da qomi' ileualguete, 'eeta'am ca qagueta llalec da qaÿalauat, qataq qaÿavigaxat da qoÿanot ñi Dios. Qaq da alaitaÿaxac ÿataqta ÿaÿamaxadeeta ñimayi.

3Qaq cha'ayi qami' lalamqa'te ñi Dios, qaq no'on da sa ishit qome da qami' chimaxanguilo da huo'o ca quishishaxac qataq 'enauac nam laÿipi mayi ishit da deshipaxanaqtaxan, huo'otaq da qaÿoqopita'a ca ÿaqa'a. 4Qataq sa ishit qome da qanasaqaideec naua n'aqtaqa mayi i'ot da n'agaxa, huo'otaq cam i'ot da naÿalguiyic, huo'otaq cam qaica ca naigui. Cha'ayi namayipi sa ishit da qaÿiguet. Chaqdato' da qami' qai'añiitacot da qantonaxaqui ñi Dios. 5Cha'ayi qami' mashi qauaÿajñi da sa ishit da inoxoneu'a ca l'onataxanaxac so Cristo qataq ñi Dios da ilo'ogue 'enauacna ca shiÿaxaua mayi ncachitapegue' aca sa ishit da lhua, huo'otaq cam i'ottac ca deshipaxanaqtaxan, huo'otaq cam quetague' da nqopitega ca ÿaqa'a (mayi 'eeta'am da qanatameetacot ca nqolac). 6Qataq sa ishit qome da huo'o ca qami' ÿatenachi't da qami' idolguete naua napaxaguenataxanaxaco mayi qaica ca naiguilo. Cha'ayi ne'enaua sa ÿaÿamaxayiñi, nachinaua na chigoqchiguilo dam qaica ca 'en'am da lchic layiloxo ñi Dios, da ÿauo'o da nhuaxanaguec nam sa ishit da ÿalaq. 7Qaq ÿoqo'oyi sa ishit qome da qaualliquiita'aguet na n'onataxac de'eda.

8Cha'ayi qami' co'ollaxa qoviitaigui na 'ico' napalaxa, qalaxayi nagui da qami' qan'ayiitau'a so qadataxala', nachi qoviitaigui na yi'oqchiguiñi. Qaq ÿoqo'oyi qami' qau'enaxachiichigui qome ca shiÿaxaua mayi huetaigui na yi'oqchiguiñi. 9Cha'ayi na yi'oqchiguiñi nachina na chigoqchigui da nauotaxanaqtaic, qataq da 'eesa lataxac, qataq dam achaalataxac mayi qui'itta. 10Qataq qanpogoxoiñiÿapegue' qome da qauaÿajñi ca lataxac ca ÿaÿamaxadeeta ñi qadataxala'. 11Qataq sa ishit qome da qanhuañiÿau'a nam qaica ca naigui lataxaguesat mayi i'ottac nam huetaigui na napalaxa. Chaqdata da qauachaxañi ca llic, da yaqto' qaÿaÿaten. 12Cha'ayi ÿataqta i'ot da n'agaxa da huo'otaq chochi qai'axat na saq cha'a mayi i'ottac namayipi. 13Qalaxayi da huo'otaq 'enauac ne'ena qauem lataxaguesat ÿataqta ÿaateec naq'en nam yi'oqchiguiñi, huaña, nachi 'enauac ÿataqta yi'oqta, cha'ayi nam yi'oqchiguiñi mayi nachina na ichoxot 'enauac. 14Qaq ÿoqo'oyi dam n'aqtac 'eeta':

'Am mayi 'au'ochita, ña 'anlouec;

qoñishiguem, qoca'ai nam leuaxaicpi,

qaq so Cristo nachi 'am icoÿadelec.

15Qaq ÿoqo'oyi ÿataqta qauloitegue qome da qadataxaqui. Sa ishit da qoñiita'am cam saqca ca ÿaÿajnapec. Chaqdata da qoñiita'am ca ÿajnaxanaxaic. 16Qataq ÿataqta qauqopitaxañiÿa'pe naua na'axa'te da qau'ochi ca ÿaÿamaqchiguiñi, cha'ayi naua na'axa'te ÿataqta yiloxoiqa. 17Qaq ÿoqo'oyi sa ishit qome da qaica ca qauaÿajñiÿapec. Chaqdata da qanpogoxoiñiÿapegue' da qauaÿajñi cam 'eetapeguec so qadataxala'. 18Qataq sa ishit qome da qami' taxaiqa, cha'ayi damayi ÿaueca'a da nlaxajñi ca shiÿaxaua. Chaqdato' da ÿataqta qami' nlaqchiguilo so Espíritu Santo. 19Qataq da ñi 'oonolec detaqtague' ca lÿa, qalaq huota'a naq'en na ÿotta'a't n'onecpi mayi chigoqo'ot so Espíritu. Qataq ÿataqta imauec da qadquiyaqteÿaxaqui da qau'onaxañiitac qataq da qavi'oxoyiñiitac so qadataxala'. 20Qataq nachi 'eetai' qome da qai'añiitacot da qantonaxaqui ñi qadta'a Dios souaxat 'enauac na lataxaguesat, cha'ayi qami' qoviito'ot so qadataxala' Jesucristo.

Da lataxac caua namoxo'u qataq da lco'oxo'c

21Ñi 'oonolec qome da qoñiita ÿataqta ipacapegue' ca lÿa, souaxat da ÿataqta huo'o naq 'enec qanqashiñi ñi Dios.

22Aca 'alo mashi huadon, ÿataqta ÿalaxaguet ca lhua, i'enaxatchigui naq'en da lalaxayic so qadataxala' Jesús. 23Cha'ayi ca lhua nachica ca lqaic acamayi, nachi 'eeta'am so Cristo. Somayi nachiso so lqaic na 'amqajnataxanaxaicpi, qataq nachiso som lca'alaxaqui. Qaq namayipi nachina na 'ico' l'oquiaxac somayi. 24Qaq ÿoqo'oyi aca 'alo ÿataqta ÿalaxaguet ca lhua, 'eeta'am na 'amqajnataxanaxaicpi da ÿataqta ÿalaxaguet so Cristo.

25Qataq ca ÿale mashi huadon ÿataqta ÿauotec aca lhua, 'eeta'am nataq'en so Cristo da ÿataqta ÿauotec na 'amqajnataxanaxaicpi, qataq nañanguet da ileualec namayipi. 26Qaq 'eetec de'eda somayi, cha'ayi nshitaique da iqui'itaxatta na 'amqajnataxanaxaicpi, idolec na 'etaxat da iÿo qataq da l'aqtac. 27Yaqto' qom ivita da nachaalataxaneu'a somayi na 'amqajnataxanaxaicpi, qalaq ÿataqta huo'o da lyaquiaxac, qataq qaica ca lshipaxanaxa, huo'otaq ca 'ico' lvigaxataxa, huo'otaq ca lÿa 'eeta'am de'eda. Chaqdata da ÿataqta qui'itta qataq nalochiguiñi. 28Ca ÿale mashi huadon, ÿataqta ÿauotec aca lhua, 'eeta'am da lauotaxanaqtaic da lalamaxat l'oquiaxac. Qaq ca ÿauotec aca lhua, camayi maichi nauojla't. 29Cha'ayi qaica ca ishit da maichi ÿaÿimtapeguec da lalamaxat l'oquiaxac. Chaqdata da iqui'axan qataq ntela'a. Qaq 'eda da 'eetec nataq'en so Cristo nam 'amqajnataxanaxaicpi, 30cha'ayi maichi lalamaxat l'oquiaxac. Qaq nachiqomi' mayi qomi' l'oquiaxac, 'eeta'am da qomi' lapa'chi qataq lpi'inqa. 31“Qaq ÿoqo'oyi ca shiÿaxaua ca'ai ca lta'a qataq aca late'e da huadon, nachi lmayaxaua aca lhua. Ime, nachi que'ecaua dos 'eeta'am da 'oonolec.” 32Qaq ÿoqo'oyi de'eda sa'axattac ÿataqta lta'adaic da naigui mayi saq cha'a. Damayi i'axat da 'eetec so Cristo qataq na 'amqajnataxanaxaicpi. 33Qalaxayi damayi nataq'en i'axat da ñi 'oonolec da qoñiita ÿataqta ÿauotec aca lhua, 'eeta'am da maichi nauojla't. Qaq aca 'alo ÿataqta huo'o naq 'enec naq'en ca lhua.

Currently Selected:

Efesios 5: TBSNT

Highlight

Copy