Efesios 4

So Espíritu Santo qomi' ÿauaxaÿaxana't

1Qaq ÿoqo'oyi aÿim, mayi aÿim qaicoñittai' souaxat da sasoilec so Cristo, nagui qami' ñachoxodeetoiguilo da ÿataqta qoquiitegue qome da lataxac cam iÿaxana ñi Dios, da 'eeta'am nataq'en da qoñiita. 2Qataq sa ishit qome da qami' n'amqajnaxaiqa. Chaqdata da qami' choxonnataxanaxaiqa, qataq qami' hualaxauaiqa, qataq ñi 'oonolec da qoñiita ÿataqta ichoxoden ca lÿa da huo'o ca camachaqca. 3Qataq qanpogoxoiñiÿapegue' da qaica ca ÿaqpeuga da qoñiita, yaqto' so Espíritu Santo qami' ÿauaxaÿaxana't da ÿachigoxotchigui naq'en da nlagaxayic. 4Cha'ayi 'oonolec da n'oquiaxac, qataq 'oonolec so Espíritu Santo. Cha'ayi ñi Dios qami' iÿaxanalo co'ollaxa, da yaqto' 'oonolec naq'en da qanaquitaxaqui. 5Qataq 'oonolec so qadataxala', qataq 'oonolec da qadpi'iÿaxac qataq da qanachilaxanataguec, 6qataq 'oonolec ñi Dios ñim 'enauac qadta'a. Ñimayi imattalec 'enauacna, qataq do'onataxaatapoigui 'enauac da shinaqta, qataq 'enauac qomi' hueta'agueta.

7Qalaxayi ñi 'oonolec da shinaqta qoÿanem ca nshitaxat, qaq camayi ipacchigui cam tateu'a l'onataxanaxac mayi ÿanem so Cristo. 8Cha'ayi naua ñiyigui'shi l'aqtaqa ñi Dios 'eeta':

Somayi taigue da piguem,

nachi ÿachi 'enauac so lcoñitaguishicpi.

Ime, nachi ÿanem na nshitaxatpi na shiÿaxauapi.

9Qaq ¿huá'ague ca 'eetec ca naigui de'eda n'aqtac mayi 'eeta': “taigue da piguem?” Qomyi damayi naigui da somayi i'auaxaañi co'ollaxa da naÿa ana 'alhua mayi ÿataqta qaÿoqta. 10Qaq som naÿa ana 'alhua, nachiso co'ollaxa som taigue da piguem da yaqto' imattalec 'enauacna. 11Ime, nachi ÿanem ca nshitaxat naq'en ñi 'oonolec shiÿaxaua. Nachi huo'o na lamaxashicpi naq'en somayi, qataq huo'o na l'aqtaxanaxanecpi naq'en ñi Dios, qataq huo'o naq'en na i'axattac da n'aqtaxanaxac mayi chigaqaigui da nca'alaxa, qataq huo'o na lataxala'pi naq'en na 'amqajnataxanaxaicpi, qataq na napaxaguenataxanaqpi. 12Qaq 'eda da 'eetec co'ollaq ÿaqataxanai' da llic naq'en na lalamaxatpi, yaqto' ñi 'oonolec i'ot ca l'onataxanaxac, da yaqto' nquictashiguem da l'oquiaxac so Cristo, 13chochi ivitta'a da 'enauac na 'amqajnataxanaxaicpi ÿataqta nalota'a da lpi'iÿaxac qataq da lauattonaxanaxac da ÿauattoota so llalec ñi Dios. Huaña, nachi shinaqta'am ca shiÿaxaua mayi ÿataqta saq nogotolec, cha'ayi ÿataqta semataqta'a da llaxa so Cristo. 14Nachi sa ishit qome da shinaqta'am ca nogotolec mayi qaica ca lqalaic da qaÿashaxaneec, qataq chochi ÿachitac na 'ico' l'at mayi nachina na ÿaqa'a napaxaguenataxanaxacpi. Huaña, nachi ilamaxata'aguet na shiÿaxauapi mayi sa nqalaate' da latenataxanaxac mayi nshitaique da qomi' ÿaueca'alo da nsomaxac. 15Chaqdato' da naua qad'aqtaqa qalaq ÿataqta 'eesoda, qataq qomi' soxodaiqa, qataq ÿataqta nquictashiguem da no'on qadataxac, cha'ayi ñi'adaqtau'a so Cristo mayi nachiso so lqaic de'eda n'oquiaxac. 16Qaq nachiso so Cristo som ÿataqta nacoota't qataq n'atta't naq'en 'enauac de'eda n'oquiaxac mayi n'atta'a't. Qaq ÿoqo'oyi ñi 'oonolec ne'ena n'atta'a'tpi, da ÿataqta ÿaÿamaqchiguiñi da lataxac, nachi 'enauac namayipi nañaxattac qataq nquictashiguem, souaxat da nauotaxanaqtaic.

Da dalaxaic nachaalataxac nam quetague' so Cristo

17Qaq cha'ayi aÿim ñi'attau'a so qadataxala', ÿoqo'oyi qami' shinapegalo qataq qami' saqatalo da sa ishit qome da qoñiita'am da lataxac nam sa ishit da ÿauatton ñi Dios mayi quetagueto nam lhuennataxaco mayi qaica ca naiguilo, 18qataq da lauattonaxanaxac 'ico' huetaigui na napalaxa. Namayipi sa ishit da hueto'ot da achaalataxac mayi chigoqo'ot ñi Dios, cha'ayi qaica ca ÿaÿajnapec, souaxat da ÿataqta qadamchiguilo naua lquiyaqte. 19Qataq namayipi ÿataqta imauec da daqat so lcoxo, nachi nañanguet na lamanaxanaqtaiguesat. Qataq nqopita da i'ot 'enauac na ÿotta'a't lataxaguesat mayi deshipaxanaqtaxan. 20Qalaxayi qami' sa ishit da qanapaxaguenataguiiqui de'eda da qoquiitague' so Cristo, 21lamaaxa da ÿoqta 'eesa da qau'aqaichigui da n'aqtaguec somayi, qataq da qami' qaÿapaxaguenque dam ÿoqta 'eesa lataxac mayi chigoqo'ot so Jesús. 22Qaq ÿoqo'oyi dam toguishic qadataxaqui co'ollaxa, damayi no'on da ÿataqta qaualachiiuec. Cha'ayi damayi taÿa'a da qanlaxajñi, qataq ÿataqta quichigui da natenataguec souaxat nam qauem 'eetapegueguesat. 23Qataq qami' iuen da ÿataqta qanadalaxat da qadvilÿaxaqui qataq da qadhuennataxaqui. 24Qataq qai'añiiñi da dalaxaic achaalataxac mayi maichi chigoqchigui da l'onatac ñi Dios mayi ÿataqta ichoxot da no'on nataxac qataq qui'itta.

25Qaq ÿoqo'oyi sa ishit nagui da qanasaqaiuec ca natenataxanaxac. Ñi 'oonolec da qoñiita ÿataqta 'eesa ca l'aqtac da detaxaÿapegue' ca lÿa, cha'ayi 'enauac da shinaqta ñi'adaqtau'a da 'oonolec n'oquiaxac.

26Qaq da huo'otaq qaualematai, qalaq sa ishit da qauauo'oi ca qadasouaxashichi. Qataq de'eda qadalemataique sa ishit da imauec ca 'oonolec na'a'q. 27Sa ishit qome da qauauo'oi ca lligueuo so shiÿaxaua mayi lma'na.

28Qaq cam decachitapec co'ollaxa, qalaq no'on da ÿaxaañi nagui da lcachaxac. Chaqdato' da do'onataxan, ÿacootapegue' ca l'onatac, yaqto' ishit da itauan cam huo'o da lhuenaxanaxa.

29Qataq sa ishit da qauema naua qad'aqtaqalli'. Chaqdata da qan'onaxachi' naua qad'aqtaqalli', yaqto' ishit da nquiguishiguem, qataq huo'o da n'achiquiaxac cam qami' n'axaÿaxaategalo. 30Qataq sa ishit qome da qauaquicoqchichi so Espíritu Santo mayi chigoqo'ot ñi Dios. Cha'ayi somayi nachiso so chigoqchigui da qami' qai'a'n, da yaqto' qami' lalamqa'te ñi Dios, chochi ivitta'a ca na'a'q qom ñimayi qami' ÿanema cam ÿataqta nalochiguiñi qadca'alqai.

31Qaq ÿoqo'oyi imauec qome da qai'axañiiuec da huo'o ca dalematatapega ca lÿa, huo'otaq da nquiÿatapega, huo'otaq da huo'o ca i'alaqtalec ca lÿa, huo'otaq da ishiueetac, qataq 'enauac nam sa ÿaÿamaxañisat. 32Chaqdato' da qami' soxodaiqa, qataq choxonnataxanaxaiqa, ñi 'oonolec ÿataqta ichoxoden ca lÿa da huo'o ca ÿasouaxat, yaqto' ishit da qoñiita'am ñi Dios da ÿachigoxotchigui so Cristo da qami' ichoxode'n.

Currently Selected:

Efesios 4: TBSNT

Highlight

Copy