2 Corintios 9

Aso ntaunaxanaqte mayi qaÿamaxa so nqaÿañicpi

1Qaq de'eda lataxac da qai'ot aca ntaunaxanaqte da yaqto' qaitauan ca qad'amqajnataxanaxaua, qalaq damayi sa ishit da iuen da shiyiñi. 2Cha'ayi aÿim mashi ime da sauattoota da qami' sa ishit da huo'o ca qai'iquiitega. Qaq ÿoqo'oyi aÿim naxa ÿataqta huo'o da ÿi'oxonnataxanaxac da qoñiita ne'ena soota'a Macedonia, da qami' mayi qoviita'a na Acaya da nal'ena so lÿa vi'i da qauauoitaique aca qadtaunaxanaqchi. Qaq ÿoqo'oyi qalota nam lma' na Macedonia na huo'o da l'añaxac souaxat da qoñiita. 3Qalaxayi nachi 'en'am aÿim ishit da qami' samaxalo se'esoua qadqaÿa't, yaqto' sa ishit da qomi' shipecaiqa da sa'axataqtac dam no'on mayi qami' qau'ochiitac. Qataq yaqto' qami' ishit da ÿoqta 'eesa qauqataxañiitai' da qadtaunaxanaxaqui mayi sogote sa'axattac. 4Ten, qom huo'otaq sa iuena'a da huo'o ca ñinaictague' nam lma' na Macedonia, qaq ishit da qami' ilalguete da saxanaxa da huo'o ca qanaÿamaxataxaqui. Nachi ishit da qomi' ÿataqta huo'o da qad'aloxo, qamaq qamí'ctaxa mayi huo'o da qad'alqoi, cha'ayi mashi qami' sa'amaqtenaqta'pe. 5Qaq nachida da huo'o mshi aÿim tachigui yi iuel da seÿaxanoto se'esoua qadqaÿa't, da yaqto' soomayi hua'auñi da qami' namaqtegalo, qataq yaqto' qami' itaua'n da ishit da nalochiguiñi acam qadtaunaxanaqchi mayi qauachaxañiÿapec co'olloxochiyi, qataq yaqto' aca'aca qadtaunaxanaqchi ishit da lhuotta da huo'o, yaqto' ishit da qaila'a da maichi qad'agaxanaqchi, qaq sa ishit da 'ico' qami' samaxasoqtalguete.

6Qaq qauennachiÿa'a qome de'eda shinapec, 'eeta': Ca saq 'amaqtaq ca ÿaañi, qaq nataq'en saq 'amaqtaq ca nqat; qaq ca qalota ca ÿaañi, qaq nataq'en qalota ca nqat. 7Qaq ÿoqo'oyi ñi 'oonolec ishit da ÿan cam lcata cam tachigui da lquiyaqteÿaxac, qaq sa ishit da chochi nachita'a, huo'otaq da chochi qaÿamaqtalec. Cha'ayi ñi Dios ÿataqta ÿaÿamaxadeeta cam dachitaqtaxan mayi ÿataqta machiguiñi. 8Ñi Dios ishit da chochaq huañi naq'en da qami' ÿanema na ÿotta'a't yi'oqchigui qan'achiquiaxaqui, yaqto' qami' ishit da huo'o 'enauac na maichi qadviñiqui, qataq yaqto' sa ishit da huo'o ca qaviñiitaique da qautaunaxañi da qau'ochi ca n'onataxanaxac ÿaÿamaqchiguiñi. 9Cha'ayi naua ñiyigui'shi l'aqtaqa ñi Dios i'axa't ca no'on shiÿaxaua, 'eeta':

Ÿachit 'enauac nam choxodaqpi,

nachi dam ÿaÿamaqchiguiñi l'onataxanaxac nachi n'onaigui namayipi.

10Ñim Dios mayi nachiñi ñi ÿan acam nanguishi qataq cam qanallic, ñimayi qami' ÿanema qome ca qaviñiitaique da yaqto' ishit da qanaxañi, qataq da ñaxat naq'en aca qodanguishii, ivitta'a da ÿataqta qalota naq'en ana ala, yaqto' da qanqat, qalaq qalota cam naigui nam ÿaÿamaqchiguiñi n'onataxanaxaguesat, 11yaqto' qami' ishit da huo'o 'enauac dam qadsallaqai, qaq yaqto' ishit da qauachitaqtaxañi. Ime, qaq qomi' qauamaqaiguelo aca qadachitaqtaxanaqchi, yaqto' ca qadqaÿañicpi ishit da ÿaatacot da n'achic ñi Dios. 12Cha'ayi da qomi' sanaxam aca qadtaunaxanaqte ca qadqaÿañicpi, qaq sa ishit da chaqdata da sanaxam cam iueetac. Cha'ayi nataq'en qomi' so'otaq da camayipi ishit da ÿataqta ÿaatacot da lta'adaic n'achiquiaxac ñi Dios. 13Qataq camayipi ishit da ÿi'oxodeetac ñi Dios, cha'ayi de'eda qadtaunaxanaxaqui ichoxot da qami' ÿataqta qaualaqaiguet da no'on qad'axaÿaxac mayi i'axat da n'aqtaguec so Cristo. Nataq'en camayipi ishit da ÿi'oxodeetac, souaxat aca qadtaunaxanaqchi mayi qau'ochi da qauamaqaÿa camayipi qataq nataq'en 'enauac nam laÿipi. 14Qataq camayipi nachi ishit da qami' nqouagaxaueetapeguelguete, cha'ayi ÿataqta qalota da lauochi da qoñiita, souaxat da lqouagaxanaqtaic ñi Dios mayi qami' ÿanema. 15Qomoxochictaxa qone', ¡sanqot da qan'achiquiaxac ñi Dios, cha'ayi ñimayi ÿataqta lta'adaic da qomi' ÿanema qan'achiquiaxac, qaq damayi sa ishit da sañoxotaq da sa'axataq ca naigui!

Currently Selected:

2 Corintios 9: TBSNT

Highlight

Copy