2 Corintios 10

Da 'enec so Pablo mayi Jesús lamaxashic

1Aÿim Pablo, qami' ñachoxodeetoto, souaxat da huesottac lsoxosoxonaxac so Cristo qataq da lsoxoyic. Aÿim mayi qoÿiitegacnaxa da qaica ca i'amaqchic da qami' sootaiguilo, qalaxayi naxa da sa ishit da qami' sootaiguilo, qalaq ÿataqta saq llivigui yi iuel. 2Qaq ÿoqo'oyi nagui qami' ñachoxonnoiguilo da qom ivita da qami' ñoqo'onalo, qalaq sa ishit qome da aÿim qauamaqailec, da yaqto' ishit da sa sadeno'ot da shinapega cam qomi' ipataqtapeguelguete da so'otaqtac nam i'ottac nam chochi shiÿaxauapi. Cha'ayi aÿim qaica ca sa'aptapigui da sataÿa'aguet da ñicotaÿapegue' camayipi. 3Cha'ayi 'eesa da chochi qomi' shiÿaxa'u, qalaxayi sa ishit da shinaqta'am na shiÿaxauapi mayi huetalec ana 'alhua da huo'otaq deloqui. 4Cha'ayi dam qad'ogoxonaxat da huo'otaq seloquiaq, sa ishit da nachina na l'ogoxonaxat nam shiÿaxauapi mayi huetalec ana 'alhua. Cha'ayi damayi nachida da l'añaxac ñi Dios, da yaqto' ishit da selaxataxagui nam ñi'iguenaxaquipi, 5da yaqto' ishit da ñilaxataxañi 'enauac nam chochi qai'ot nasouaxashitpi qataq ca machaqca npa'aguenataxanaxac mayi n'amaqten da huotaique da nqanaxat da yaqto' sa ishit da qaÿauatton ñi Dios. Qataq 'enauac nam lhuennataxacpi na shiÿaxauapi ÿataqta ñillaqañi da sanqot so Cristo, da yaqto' ÿalaxaguet somayi. 6Qataq ÿataqta qaica ca shigaqtega da sauoqo'o ca nhuaxanaguec 'enauac nam sa ishit da ÿalaq, lamaaxa qom huo'otaq mashi nalochiguiñi da qadalaxayiqui.

7Qami' mayi qauloitagui ca chochi yi'oqchigui shiÿaxaua. Qom huo'otaq huo'o ca 'eetega da quetague' so Cristo, qaq camayi no'on da ÿaÿateeta da qomi' nataq'en qolaqtague' so Cristo. 8Qaq nai'ctaxa da huo'otaq aÿim ñishitaique da cada'ac da 'ico' sagaqtenaqpec dam shinaxac, qalaxayi sa ishit da ñi'aloxootac. Cha'ayi so qadataxala' qomi' ÿanema de'eda shinaxac, da yaqto' nañaxat ñaq'enaq dam saq cha'a qanachaalataxaqui. Qaq sa ishit da 'ico' qami' ñilaxataxayiñi. 9Qaq sa ishit da qaupi'itaxañiitega da sauotaique da qami' sequichoqchi't nagui da qami' samaxalo naua ÿide. 10Cha'ayi qoÿinac naxa da naua ÿide ÿataqta sa nsattegueta, qataq huo'o da l'añaxa'c, qaq dam ÿataxac da salectauo, qalaq qaica ca yi'oqchigui i'añaxac, qataq naua i'aqtaqa ÿataqta qai'ota'n. 11Qalaxayi cam 'enapec de'eda, camayi no'on da ÿaÿateeta nataq'en da qomi' saqnauate' naua qad'aqtaqa da qadtaxaÿaxac da qomi' qoÿoqtalo da huo'otaq so'otaq ana qodede, cha'ayi nachi ipacchigui da qadataxac da huo'otaq qami' salegaqtaiguilo.

12Cha'ayi qomi' sa ishit da sauoqtaique da shinaqta'am, huo'otaq da ñaloqnaxaguet da qanachaalataxac nam shiÿaxauapi mayi maichi ñi'oxodeetapeguela't. Namayipi huo'o da n'oopaxac, souaxat da maichi naloqnaxaatapeguela't, qataq da ñi 'oonolec maichi naloqnaxaatapeeguet da nachaalataxac ca lÿa. 13Cha'ayi qomi' sa ishit da huo'otaq sagaqpeguec da ñapagaqlec cam qomi' qoÿanema. Cha'ayi ñi Dios mayi nachiñi ñi i'an ca loga't cam qad'onataxanqa', qaq nachiñi ñimayi ñim qomi' ÿanema da huo'o mshi sovidaqa'alo qami' mayi qoñiitaña na Corinto. 14Qaq ÿoqo'oyi sa ishit da huo'otaq qomi' ñapagaqlec dam qomi' qoÿanema qad'onataxanaxac, qaq chaq 'eetéctaxa ca lataxac da huo'otaq saxanaxa co'ollaxa da qami' sovidaxaiguilo. Cha'ayi qomi' mayi qomi' l'auaxanqa co'ollaxa da qami' sedaxalo da qami' sa'aqtaxanaxama da no'on qad'axaÿaxac mayi i'axat da n'aqtaguec so Cristo. 15Qaq sa ishit da ñipa'axanaqpeguelec ca l'onatac ca lÿa shiÿaxaua da huo'otaq se'enaxataqteguem ca maichi qadalamaxat. Chaqdata da qomi' ñaquitaqta'a da ña nquic da qadpi'iÿaxaqui, yaqto' qomi' ishit da nquicteec da qad'onataxanaxac da qoñiita, qalaxayi nachi 'eetai' da sa ishit da ñapagaqlec yi loga't da qad'onataxanaxac. 16Qaq qom ime, nachi qataq ñoqochinaxa ca saqaÿoqta lÿa 'alhua ne'ena qoviita'a, da sa'axataq da n'aqtac mayi chigaqaigui da nca'alaxa. Qalaxayi sa ishit da chochi ñipa'axanaxalec ca l'onatac ca lÿa shiÿaxaua.

17Qaq da huo'o ca nshitaique da napagaqchin, qaq camayi no'on da ÿapagaqchin so qadataxala'. 18Cha'ayi ca shiÿaxaua mayi qaÿaÿamaxadeeta, sa ishit da nachica cam maichi ñi'oxodeetapeguela't, cha'ayi chaqcata cam ÿaÿamaxadeeta ñi qadataxala'.

Currently Selected:

2 Corintios 10: TBSNT

Highlight

Copy