2 Corintios 13

Na nqataxacpi qataq da pa'ateec nquinaxanaxac

1Qaq mashi ivi' na tres nagui da shi'iguelaxalec da qami' ñoqo'onalo. Qaq 'enauac qome na nasouaxashitpi iuen da qai'axat da da'aqtaxa'n caua dos huo'otaq tres shiÿaxa'u. 2Qaq nam huo'o ca lasouaxashit co'olloxochiyi qataq 'enauac nam laÿipi, qalaq nagui da aÿim qaÿoqta qaltaq shi'iguelaxalec da saqata, 'eeta'am da shiitec can qami' soota'agueta. Qalaq qami' secoyigueete', shiita': qom ivita da qaltaq qami' ñoqo'onalo, qalaq sa ishit qome da huo'o ca sechoxodeetac. 3Qaq huaña qome, nachi qami' qanauañi' cam qanmichiitaique mayi ichoxot da so Cristo aÿim detaxaigui. Qataq so Cristo yi sa ishit da saqca ca l'añaxac da huo'o ca qami' 'ena'aque, chaqdata da somayi yi'oq da l'añaxac da qami' huetaiguilo. 4Qaq 'eesa da 'ico' qaica ca l'añaxac somayi co'ollaq qaiuaxaneuo, qalaxayi somayi nachattaigui da l'añaxac ñi Dios. Qaq ÿoqo'oyi nataq'en qomi' ñiuanaqau'a dam lchiguemaxa. Qalaxayi da ñi'adaqtau'a somayi, nachi qomi' nachattaiguilo da l'añaxac ñi Dios, yaqto' ishit da qami' souaqtapegueto.

5Qaq maichi qanmichiila't qome, yaqto' ishit da qauaÿajñiita qom ÿoqta 'eesa da huo'o ca qadpi'iÿaxaqui. Qaq ña qañi'iguiñiila't qome. Qaq ¿sa qauaÿajñiÿo' da so Jesucristo qami' hueta'agueta, lamaaxa da sa ishit da chochi qauatenataxañiitac? 6Qaq ÿoqo'oyi huo'o da ñaquitaxac da qoñiita da ña qauaÿajñiita da qomi' sa ishit da chochi qomi' tenataxanaxaiqa. 7Qataq ñoqouagaxaunaqtacot ñi Dios, da yaqto' qami' sa ishit da qau'ochi ca sa ÿaÿamaxañi. Qaq sa ishit da qomi' chochi ñachaxanaqtac da ÿoqta 'eesa cam shinaqpec, chaqdata da qomi' sauoqtaique da qami' qau'ochi ca ÿaÿamaqchiguiñi, qaq nai'ctaxa da 'eeta'am da saq 'en cam sa'axataq. 8Cha'ayi qomi' sa ishit da sañoxotaq da sataÿaqa'aguet cam 'eesa lataxac, chaqdata da setauanaq. 9Qaq ÿoqo'oyi qomi' ÿataqta samaqchiguiñi da huo'otaq qaica ca qad'añaxac, lamaaxa da ÿataqta qami' 'añaxaiqa. Qaq soqolaqtot da ñoqouagaxaunaqtac, yaqto' qami' ishit da ÿataqta qanaloichiguiñi. 10Qaq sa'auaxaañi nagui da qami' samaxalo ana ÿide, yaqto' qom ivita da qami' ñoqo'onalo, qalaq sa ishit da ÿapacteec da huo'o ca sedolec da shinec dam aÿim ÿanem so qadataxala', da yaqto' qami' ishit da qanquiquiitashiguem, qaq sa ishit da 'ico' qami' ñilaxajyiñi.

11Qaq nagui qami' ÿaqaÿa't, ÿataqta no'on qome ca qoyiquiaxaqui. Ÿataqta qanpogoxoiñiÿapegue' qome da nalochiguiñi da qanachaalataxaqui, qataq ÿataqta qauamaichiguiñi, qataq 'oonolec ca qadhuennataxaqui, qataq qaulaquiitapiguiñi. Qaq yaqto' qami' hueta'agueta ñi Dios mayi chigoqo'ot da nlagaxayic qataq da nsoxoyic. 12Qaq ñi 'oonolec qome da qoñiita napigoq ca lÿa da nquine', ÿataqta qanchoxonñiÿa't. 13Qaq 'enauac na qadqaÿañicpi mayi qadpi'iÿaxauapi qami' ÿamaxalo da lquinaxanaxac.

14Qataq qauacoñiiguet qome da lqouagaxanaqtaic so qadataxala' Jesucristo qataq da lsoxoyic ñi Dios, qataq qauacoñiiguet so Espíritu Santo da qami' hueta'agueta. Aja', nachi 'eetec.

Currently Selected:

2 Corintios 13: TBSNT

Highlight

Copy