1 Corintios 14

Da lliquiaxac da qaitaxaiguilo naua sa qaÿauangalo n'aqtaqa

1Qanpogoxoiñiÿapegue' da huo'o da qadsoxoyiqui qataq da ña qami' ÿanema ñi Dios na lshitaxanaxatpi, qalaxayi ÿacteec qanqashiñi da qau'axachi' naua l'aqtaqa. 2Cha'ayi ca shiÿaxaua mayi detaxaiguilo naua n'aqtaqa sa qaÿauangalo, camayi n'aqtaxaatague' ñi Dios, qaq sa ishit da nachina na shiÿaxauapi, cha'ayi qaica ca ishit da hua'axaiguet. Camayi itaxaÿaxanaxan so Espíritu Santo da i'axat na 'eesa lataxacpi mayi saq cha'a. 3Qalaxayi ca i'axa't naua l'aqtaqa ñi Dios, camayi da'aqtaxanem ca lÿa da nañaxat naq'en, qataq da i'añaqchit, qataq da ÿanem da lamaiquiaxac. 4Ca ishit da detaxaiguilo naua n'aqtaqa sa qaÿauangalo, camayi maichi nañaxattac. Qalaxayi ca i'axa't naua l'aqtaqa ñi Dios, camayi nañaxat naq'en na 'amqajnataxanaxaicpi.

5Qaq aÿim ñishitaique da 'enauac da qoñiita da ishit da qautaqÿoiguilo naua n'aqtaqa sa qaÿauangalo, qalaxayi ÿacteec ñaqashin da qau'axachi' naua l'aqtaqa ñi Dios. Cha'ayi ÿacteec ca naigui da qai'axat da n'aqtac, qa saq 'en'am da qaitaxaiguilo naua n'aqtaqa sa qaÿauangalo. Lamaaxa da sa qai'axat ca naigui ne'enaua n'aqtaqa da yaqto' ishit da nañaxat na 'amqajnataxanaxaicpi. 6Qaq ÿoqo'oyi qami' ÿaqaÿa't, da huo'otaq qami' ñoqo'onalo da qami' sa'aqtaxanema, nachi qami' sedolguete naua n'aqtaqa sa qaÿauangalo, qaq da huo'otaq sa ishit da sa'axat ca qomi' ÿaÿajnaxanaxanque ñi Dios, huo'otaq ca nauattonaxanaxac, huo'otaq ca n'aqtaxanaxac mayi chigoqo'ot ñi Dios, huo'otaq ca napaxaguenataxanaxac, qaq ¿négue't ca qauachigoxochiÿaigui de'eda itaxaÿaxac? ¡Qaica!

7Saloqnaxanaxa aca nashiide qataq aca nvique mayi sa ishit da detaqa: da huo'otaq sa ishit da ÿataxague da lavilÿaxac da qaivictapigui, huo'otaq da qaÿashittapigui, qaq sa ishit da qaÿaÿaten ca l'onec. 8Huo'otaq da qanqo'ona ca alaataq, qaq da qaÿashiiyigui aca nashiide da huo'otaq saq ÿataxalec da l-lamaxa, qaq qaica ca ishit da naÿamaxattai' da taÿa ca alaataxac. 9Qaq nachi 'en'am da qoñiita: da naua n'aqtaqa mayi qanasaqaitrapeguec, da sa ishit da qai'axaigueta, qaq ¿huá'ago' da ishit da qaÿaÿaten ca qoñiitega? Qaq ¡'en'am da chochi qautaqaitapecda'! 10Qalota na ÿotta'a't shiÿaxauapi mayi huetalecna, namayipi ÿotta'a't na l'aqtacpi, qalaxayi 'enauac namayipi maichi naÿachiichiguilo naua l'aqtaqa. 11Ÿoqo'oyi aÿim da sa ishit da saÿate'n naua l'aqtaqa ca aÿim detaqtacot, qaq camayi 'eeta'am naq'en aÿim ca ÿaqa'a ca chigoxogue, nataq'en camayi 'eeta'am ñaq'en ca ÿaqa'a ca chigoxogue. 12Qaq ÿoqo'oyi qami' mayi huo'o da qadyaqai da qauacoñiiguet na nshitaxanaxatpi mayi chigoqo'ot so Espíritu Santo, ÿataqta qanpogoxoiñiÿapegue' qome da qauacoñiiguet cam ishit da nañaxat naq'en na 'amqajnataxanaxaicpi.

13Qaq ÿoqo'oyi ca shiÿaxaua mayi hueto'ot da ishit da detaxaiguilo naua n'aqtaqa sa qaÿauangalo, no'on da nqouagaxaunot ñi Dios da ñaq ishit da ÿanem da i'axat ca naigui ne'enaua l'aqtaqa. 14Cha'ayi da huo'otaq saconalo naua n'aqtaqa sa qaÿauangalo da ñoqouagaxauen, nachi ndoteec ñi shicapegue' iqui'i da nqouagaxauen, qaq sa ishit da huo'o ca alaÿaxac da ÿauattonaxanaxac. 15Qaq 'eda da shiitec nagui. Da ivita da ñoqouagaxauen, qalaq nachiñi ñi shicapegue' iqui'i da nqouagaxauen, qataq nataq'en da ÿauattonaxanaxac. Qaq da ivita da so'onaxan, qalaq nachiñi ñi shicapegue' iqui'i da do'onaxan, qataq nataq'en da ÿauattonaxanaxac. 16Cha'ayi 'am da huo'otaq 'avi'oxodeetac ñi Dios, qaq chaqñita ñi qocapegue' 'adqui'i yi'oxonnataxaatac, qaq da n'axaÿaxaatac que'eca shiÿaxaua mayi saxanaqca ca ÿaÿajnapec, nachi sa ishit da nhuanau'a ca 'anqouagaxaunaxac da 'ai'aatacot da 'an'achiquiaxac ñi Dios, cha'ayi camayi sa ishit da ÿaÿate'n naua 'ad'aqtaqa. 17Qaq de'eda 'anqouagaxaunaxac 'eesa da huo'otaq ÿaÿamaqchiguiñi, qalaxayi que'eca 'adÿa sa ishit da nañaxat qanqoÿin. 18Sanot da ñi'achiquiaxac ñi Dios, cha'ayi ñapactelec da qoñiita da seshit da setaxaiguilo naua n'aqtaqa sa qaÿauangalo. 19Qalaxayi da sootaigui ca laponaxac na 'amqajnataxanaxaicpi, qaq sepacapegue' da setaxaiguilo caua cincolqa n'aqtaqa, qalaxayi ishit da qaÿaÿate'n, da yaqto' sapaxaguen ca iÿa, qaq saq 'en'am ca diez mil n'aqtacpi sa qaÿauanga.

20Qami' ÿaqaÿa't, sa ishit da qoñiÿa'am da lhuennataxac ca nogotolec. Qalaxayi ca sa ÿaÿamaxañi, nachi qanacoñila't da qoñiÿa'am ca nogotolec. Qalaxayi da qadhuennataqai ÿataqta qoñiÿa'am ca shiÿaxaua ÿi. 21'Enapec naua nanettrañi lqataxaco ñi Dios: “Setaxaiguilo naua ÿaqa'alo n'aqtaqa da shinapega ne'ena shiÿaxauapi da ñamaq na ÿotta'a't shiÿaxauapi. Qalaxayi ñaqaiyita sa ishit da aÿim n'axaÿaxana namayipi. Qaq 'eda da l'aqtac ñi qadataxala' Dios.” 22Qaq qomoxochictaxa qone' ne'enaua n'aqtaqa mayi sa qaÿauangalo, naamayi l'anqa qanqoÿin na saxanaxa da da'amqajnataxan, qaq sa ishit da nachina na mashi da'amqajnataxan. Qalaxayi da qai'axat da l'aqtac ñi Dios, damayi l'anec qanqoÿin na mashi da'amqajnataxan, qaq sa ishit da nachina na saxanaxa da da'amqajnataxan. 23Qaq ÿoqo'oyi da 'enauac na 'amqajnataxanaxaicpi da huo'otaq lapoota'a't, qaq da 'enauac detaxaiguilo naua n'aqtaqa mayi sa qaÿauangalo, qaq da huo'otaq nnoxoneuo ca saqca ca ÿaÿajnapec, huo'otaq saxanaxa da da'amqajnataxan, qaq ¡yi'oqta da 'eetega da qami' huo'o da qan'onataxaqui! 24Qalaxayi da 'enauac da qau'axachiitac da l'aqtac ñi Dios, qaq da nnoxoneuo ca saxanaxa da da'amqajnataxan, huo'otaq qaica ca ÿaÿajnapec, qaq camayi ishit da maichi nlola't qataq ila'a ca lasouaxashit, cha'ayi hua'aqtega 'enauac da qau'axachiitac. 25Qaq 'enauac na saq cha'a lhuennataxacpi mayi huetaigui añi lquiyaqte ishit da yi'aqlec. Ime, qaq ishit da i'adoto naua l-llicte ñi Dios da ÿi'oxoden, qataq i'axattac da 'eesa da ñi Dios ÿataqta qami' hueta'agueta.

Qauaÿamaxachiichiguiñi 'enauac da lliquiaxac da qalaponaxaqui

26Ÿoqo'oyi qami' ÿaqaÿa't, da ivita da qalapoñiÿa't, qaq da huo'o ca 'oonolec da qoñiita huo'o ca l'onec, huo'otaq ca lÿa huo'o ca lapaxaguenataxanaxac, huo'otaq ca lÿa huo'o ca ÿaÿajnaxanaxanec ñi Dios, huo'otaq ca lÿa detaxaiguilo naua n'aqtaqa sa qaÿauangalo, huo'otaq ca lÿa nsoyiñi ne'enaua n'aqtaqa, hua', qaq 'enauac ne'enapi no'on da nañaxat naq'en na 'amqajnataxanaxaicpi. 27Qaq da huo'otaq huo'oi caua detaxaiguilo naua n'aqtaqa sa qaÿauangalo, qaq ishit da nachajyiñi caua dos. Qaq da huo'otaq huo'o ca lÿa, qaq no'on da sa lapagaxala't yi tres, qalaxayi qanayicteu'oguet ñi 'oonolec da qan'axaÿaxana. Qalaxayi huo'o ca ishit da nsoyiñi ne'enaua n'aqtaqa. 28Qalaxayi da sa ishit da huo'o ca ishit da nsoyiñi ne'enaua n'aqtaqa, qaq no'on da sa ishit da huo'o ca detaqa. Chaqdata da ñi 'oonolec maichi nalamaqte' ñi Dios. 29Qaq da huo'otaq huo'oi caua i'axa't naua l'aqtaqa ñi Dios, qaq no'on da nachajyiñi caua dos huo'otaq tres da da'aqtaxa'n. Qaq na laÿipi naloqten da l'aqtaxanaxa'c caamayi. 30Qalaxayi ca nso'ootañi, da huo'otaq huo'o ca ÿaÿajnaxanaxanec ñi Dios, qaq ca hua'auteec da detaqa, no'on da nañaxaañi, 31yaqto' 'enauac na i'axatta'pe naua l'aqtaqa ñi Dios da qoñiita ñi 'oonolec ishit da detaqa, yaqto' 'enauac huo'o ca qauaÿachiñi, qataq huo'o da qad'añaxaqui. 32Qaq na i'axatta'pe naua l'aqtaqa ñi Dios, namayipi no'on da iloteguelo naua ltaxaÿaxaco, 33cha'ayi ñi Dios sa ishit da chigoqo'ot da nasouaxattega't naq'en na shiÿaxauapi. Chaqdata da nlagaxayic.

Cha'ayi da n'onataxac 'enauac ana l'onaxanaxaquipi na qadqaÿañicpi 'amqajnataxanaxaicpi 'eeta': 34Na 'alpi ÿataqta ñi'imaxatta da huetaigui ca naponaxac. Qaq no'on da nachi qoñiitec de'eda, cha'ayi damayi ÿataqta sa qaishitapec. Ÿoqo'oyi na 'alpi no'on da ÿataqta ÿalaq, cha'ayi naua ñiyigui'shi lqataxaco ñi Dios nachi 'enapec de'eda. 35Qaq da huo'o ca nshitaique da ÿaÿaten, qaq no'on da inat ca lhua da hueta'a ca lma', cha'ayi qai'aguelec aca 'alo da nachi 'eetec de'eda da huo'otaq huetaigui ca naponaxac.

36Qami' qauennachiÿa'a da sa ishit da nachiqami' chigoqchiguilo da l'aqtac ñi Dios, qataq sa ishit da nachiqamita da qauacoñiiguet damayi. 37Da huo'o ca ipi'itaxaatega da l'aqtaxanaxanec ñi Dios, huo'otaq ipi'itaxaatega da netanguit so Espíritu Santo, qaq no'on da ÿaÿateeteguet de'eda shiyiñi da damayi lqataxac so qadataxala' Jesús. 38Qalaxayi da sa ishit da ÿoqocha'a de'eda, qaq camayi nataq'en sa ishit da qaÿoqocha'a.

39Qaq ÿoqo'oyi qami' ÿaqaÿa't, qanpogoxoiñiÿapegue' da qau'axachi' naua l'aqtaqa ñi Dios, qaq sa ishit da sa qauashiñi da qaitaxaiguilo naua n'aqtaqa sa qaÿauangalo. 40Qalaxayi qauaÿamaxachiichiguiñi da lliquiaxac 'enauac namayipi, yaqto' sa ishit da huo'o ca qan'enaguiiqui.

Currently Selected:

1 Corintios 14: TBSNT

Highlight

Copy