1 Corintios 13

Da nsoxoyic

1Aÿim da huo'otaq setaxaiguilo naua l'aqtaqa na shiÿaxauapi, qataq naua l'aqtaqa na chigaqshiguem lamaxashicpi ñi Dios, qalaxayi da qaica ca isoxoyic, nachi shiita'am aca qataqui mayi lamtapigui, huo'otaq aca nasaquiaxanata mayi qaÿasaquiaxaatac. 2Qataq aÿim da huo'otaq sa'axattac da l'aqtac ñi Dios, qataq saÿaten 'enauac nam lataxacpi mayi saq cha'a, qataq semata'a't 'enauac na nauattonaxanaxacpi, qataq da ipi'iÿaxac mashi ivi' da seshit da ñoqochinaxat aca qasoxonaxa, qalaxayi da qaica ca isoxoyic, nachi ñaqaiyita qaica ca shinec. 3Qataq aÿim da huo'otaq san 'enauac na aÿim hueto'ot, qataq sovitta'a da san da i'oquiaxac da qaÿavigaxat, qalaxayi da qaica ca isoxoyic, nachi ñaqaiyita qaica ca sachigoxotaigui damayi.

4Ca huo'o da lsoxoyic ÿataqta nque'ejnaxaic, qataq huotaxanaqtaqaic, qaq sa ishit da quiÿaxanaqtaqaic, qataq sa ishit da n'amqajnaxaic, huo'otaq ñi'oxonnaxaic. 5Qataq sa ishit da huota'a da l'aloxo ca lÿa, qataq sa ishit da nmitta'a ca maichi laÿamaxa. Qataq sa ishit da lemataqaic, qataq sa ishit da sa ÿapalaxata'a ca qai'otec. 6Qataq sa ishit da ntootec ca lasouaxashit ca lÿa. Chaqcata ca 'eesa lataxac mayi ntonec. 7Qataq n'añaxateguet 'enauac na chochina, cha'ayi huo'o da lpi'iÿaxac, naquitaxac, lhualaxavic.

8Da nsoxoyic qaica ca loga't. Cha'ayi huo'o qome ca na'a'q da sa iuen da qai'axa't naua l'aqtaqa ñi Dios, huo'otaq da qaitaxaiguilo naua n'aqtaqa mayi sa qaÿauangalo, huo'otaq da nauattonaxanaxac. 9Cha'ayi da qadauattonaxanaxac sa ishit da nalochiguiñi, qataq da qad'aqtaxanaxac da l'aqtac ñi Dios. 10Qalaxayi qom sovitaxa da nalochiguiñi da qadauattonaxanaxac, huaña, qanachi imeuo 'enauac na sa ishit da nalogoñi.

11Co'ollaq ñaq aÿim nogotolec, qalaq naua itaxaÿaxaco qataq naua imejnaxanaxaco qataq naua iuennataxaco i'enaxatchigui da ñaq aÿim nogotolec. Qalaxayi co'ollaq mashi aÿim ÿi, nachi saxaneec da ñinogotshic. 12Qaq nachi 'en'am nagui qomi' da seloqtaigui na lataxaguesat, 'eeta'am da seloqtalec aca tannaxai da 'omalec. Qalaxayi qom ivita ca na'a'q, nachi huaña, qaq selaqa'a 'enauac namayipi ÿataqta ÿaateec. Nagui da ÿauattonaxanaxac saxanaxa da nalochiguiñi. Qalaxayi qom ivita ca na'a'q, nachi huaña, qaq nalogoñi da ÿauattonaxanaxac, 'eeta'am da 'eetec da ñi Dios aÿim ÿauattoota. 13Qaq ÿoqo'oyi da npi'iÿaxac qataq da aquitaxac qataq da nsoxoyic ÿataqta qaica ca loga't. Qalaxayi da ÿoqta ÿacteec ne'enaua tres, nachida da nsoxoyic.

Currently Selected:

1 Corintios 13: TBSNT

Highlight

Copy