1 Corintios 12

Na lshitaxanaxatpi so Espíritu Santo mayi ÿanem ñi 'oonolec

1Qami' ÿaqaÿa't, ñishitaique da qauaÿajñiita da lataxac na lshitaxanaxatpi so Espíritu Santo mayi ÿanem ñi 'oonolec.

2Qami' qauaÿajñiita da co'ollaq saxanaxa da qau'amqajnataxañi, qaq qami' qaisomaxaata'pe da qoquiitague' na nqolacpi mayi qaicaua caua l'aqtaqa. 3Ÿoqo'oyi ñishitaique nagui da qauaÿajñiita da ca itaxaÿaxanaxan so Espíritu mayi chigoqo'ot ñi Dios, sa ishit da 'enapec da l'aqtac: “¡Yi sa qaÿalauato' so Jesús!” Qataq qaica ca ishit da 'enapec: “¡Nachiso so Jesús mayi ÿataxala'!” da huo'otaq sa ishit da nachiso so Espíritu Santo da i'aqtaxanaxan.

4Saq 'en'a't na nshitaxanaxatpi mayi qoÿanem na shiÿaxauapi, qalaxayi 'oonolec so Espíritu mayi chigoqo'ot. 5Qataq saq 'en'a't da lataxac da qai'onataxanot so qadataxala', qalaxayi 'oonolec somayi so'onataxanaqtacot. 6Qataq saq 'en'a't da lataxac da l'onataxanaxac na shiÿaxauapi, qalaxayi nachiñi ñi Dios mayi i'onataxanaxan 'enauac namayipi. 7Qaq ñi Dios ÿanem ñi 'oonolec shiÿaxaua ca lshitaxanaxat mayi ichoxot naq'en so Espíritu Santo da ÿauotaique ntaunaxat 'enauac na shiÿaxauapi. 8Qaq ñimayi huo'o na ÿanem da ÿajnaxanaxaic da detaqa, chigoqchigui naq'en so Espíritu, qataq huo'o na ÿanem da saqalota da lauattonaxanaxac da detaqa, chigoqchigui naq'en so Espíritu. 9Huo'o na ÿanem da lta'adaic da lpi'iÿaxac, chigoqchigui naq'en so Espíritu, qataq huo'o na ÿanem da ishit da nataden na dalolaxaic. 10Qataq huo'o na ÿanem da ishit da i'ot na n'añaxacpi mayi sa qaÿauanapega, qataq huo'o na ÿanem da i'axa't naua l'aqtaqa ñimayi. Qataq huo'o na ÿanem da ishit da ÿauatton nam saq cha'api da huo'otaq chochi tenataxanaxaic, huo'otaq nachiso so Espíritu Santo. Qataq huo'o na ÿanem da detaxaiguilo naua n'aqtaqa sa qaÿauangalo. Qataq huo'o na ÿanem da ÿaÿaten da i'axat ca naigui ne'enaua n'aqtaqa. 11Qalaxayi nachisota so 'oonolec Espíritu mayi chigoqo'ot 'enauac ne'enapi. Somayi maichi chigoqchigui da naloqneec na ÿotta'a't lshitaxanaxatpi da ÿanem ñi 'oonolec shiÿaxaua.

'Enauac qomi' ñiuanaqhua'a da 'oonolec n'oquiaxac

12Cha'ayi so Cristo 'eeta'am da 'oonolec n'oquiaxac mayi saqalota na logoxoshitpi. Qaq ne'ena logoxoshitpi, nai'ctaxa da saqalota, qalaxayi n'atta'a't, 'oonolec da n'oquiaxac. 13Cha'ayi 'enauaque qomi' nai'ctaxa da qomi' judío lashi', huo'otaq sa qomi' judío lashi', huo'otaq qomi' nlataqa, huo'otaq sa qomi' nlataqa, co'ollaq qomi' qanachilaxa'n, nachi so Espíritu Santo qomi' ÿauaxaÿaxana't da 'eeta'am naq'en da 'oonolec n'oquiaxac. Qaq 'enauac da shinaqta qomi' qanÿomaxanguilo so 'oonolec Espíritu.

14Da 'oonolec n'oquiaxac sa ishit da 'oonolec ca lataxac, cha'ayi saqalota na logoxoshitpi. 15Da 'enapec na nchi: “Aÿim sa ishit da aÿim nhuaq, qaq ÿoqo'oyi sa ishit da ñi'attau'a de'eda n'oquiaxac,” qaq da l'aqtac de'eda, qalaxayi nachi 'en'am n'attauo. 16Huo'otaq ana ntela da 'enapec: “Aÿim sa ishit da aÿim n'aite, qaq ÿoqo'oyi sa ishit da ñi'attau'a de'eda n'oquiaxac,” qaq da l'aqtac de'eda, qalaxayi nachi 'en'am n'attauo. 17Cha'ayi da n'oquiaxac da 'enauac imauec 'ico' n'aite, qaq ¿huá'ago' ca hueta'ague aca ltela? Qaq da huo'otaq 'enauac da n'oquiaxac imauec da 'ico' ntela, qaq ¿huá'ago' ca hueta'ague ca lmic? 18Qalaxayi ñi Dios maichi chigoqchigui da naloqchiichiguiñi na lma'pi da i'adeuo na logoxoshitpi de'eda n'oquiaxac. 19Cha'ayi ne'ena nogoxoshitpi da 'oonolec ca lataxac, qaq ¿huá'ago' ca hueta'ague ca n'oquiaxac? 20Qalaxayi 'eesa da nai'ctaxa da saqalota na nogoxoshitpi, qalaxayi 'oonolec da qan'attau'a n'oquiaxac.

21Qaq ÿoqo'oyi ana n'aite sa ishit da 'enapega na nhuaq: “'Am sa souen,” qataq na nqaic sa ishit da 'enapegalo naua nchil: “Qami' sa soue'n.” 22Chaqdata da ca pa'aigue na nogoxoshitpi ca 'eeta'am da qaica ca l'añaxac, qaq nachica ca ÿacteec da qaiuen. 23Qataq ca pa'aigue ne'ena nogoxoshitpi ca 'eeta'am da qaica ca naigui, qaq nachica ca ÿacteec da qadtelaxa. Qataq ca pa'aigue ca 'eeta'am ñaqashinaq da qaica ca lli'oxoyic, qaq nachica ca ÿacteec da seyacnaq. 24Cha'ayi mashi sa iuen da qaiyaquen ca huo'o da lli'oxoyic. Qaq 'eda da 'eetec ñi Dios co'ollaq i'ada't de'eda n'oquiaxac, yaqto' ca pa'aigue ca 'eeta'am da qaica ca naigui ishit da ÿacteec naq'en da qaÿi'oxoden, 25yaqto' sa ishit da nÿottecachi de'eda n'oquiaxac. Chaqdata da ñi 'oonolec ishit da huetapegue' da itauan ca lÿa. 26Qaq ÿoqo'oyi da huo'o ca pa'aigue ne'ena nogoxoshitpi da huo'o ca iuet, nachi 'enauac na laÿipi daÿalli. Qaq da huo'o ca pa'aigue da ÿataqta qaÿi'oxoden, nachi 'enauac na laÿipi ntootapigui'.

27Qaq qami' mayi nachiqami' l'oquiaxac so Cristo. Ñi 'oonolec da qoñiita n'attau'a de'eda n'oquiaxac. 28Qaq 'eda da 'eetec ñi Dios co'ollaq huo'o na ÿaconeu'a na 'amqajnataxanaxaicpi da ÿanagui da l'onataxanaxac. Ÿamataxaachiguiñi da ÿideuo na lamaxashicpi naq'en so Jesús. Ime, qataq jec na i'axat da l'aqtac ñi Dios. Ime, qataq jec na dapaxaguenataxanapecpi. Ime, qataq jec na i'ot na n'añaxacpi mayi sa qaÿauanapega. Ime, qataq jec na ishit da nataden na dalolaxaic, qataq na itaunec da lhuenaxanaxa ca lÿa, qataq na ishit da nataxala'. Ime, qataq huo'o na ÿanem da ishit da detaxaiguilo naua n'aqtaqa sa qaÿauangalo. 29Qaq ¿ishit peta'a da 'enauac lamaxashicpi so Jesús? qataq ¿ishit peta'a da 'enauac l'aqtaxanaxanecpi ñi Dios? Huo'otaq ¿ishit peta'a da 'enauac dapaxaguenataxanapecpi? qataq ¿'enauac peta'a da ishit da i'ot na n'añaxacpi mayi sa qaÿauanapega? 30Qataq ¿ishit peta'a da 'enauac nataden na dalolaxaic? qataq ¿ishit peta'a da 'enauac detaxaiguilo naua n'aqtaqa sa qaÿauangalo? qataq ¿ishit peta'a da 'enauac ÿaÿaten da i'axat ca naigui ne'enaua n'aqtaqa? Aja', 'eesa da sa ishit da nachi 'eetec de'eda. 31Qaq qanpogoxoiñiÿapegue' qome da qauacoñiiguet na ÿataqta no'on lshitaxanaxatpi ñi Dios. Qalaxayi ñaqaiyita aÿim qami' sachaxanalo da ñiquiaxac mayi ÿacteec da lyac.

Currently Selected:

1 Corintios 12: TBSNT

Highlight

Copy